Te Tusi a Maleko

10 Mai konā ne tu aka a Iesu kae fanatu ki tuakoi o Iuta i te suā feitu o te Iolitana, kae ne toe maopoopo atu se vaitino ki a ia. E pelā eiloa mo tena masani, ne toe kamata o akoako atu ne ia a latou.+ 2 Kae ne olo atu a Falesaio ki a ia ke tofotofo a ia, kae ne fesili atu latou me e mata, e saoloto i te tulafono ke ‵tala ne se tagata tena avaga.+ 3 Ne tali atu a ia ki a latou: “Se a te fakatonuga a Mose ki a koutou?” 4 Ne fai atu latou: “Ne talia ne Mose se pepa fakamaoni ke ‵tala ei te avaga.”+ 5 Kae ne fai atu a Iesu ki a latou: “Ona ko te otou loto ma‵keke,+ ne tusi ei ne ia te tulafono tenei ki a koutou.+ 6 Kae mai te taimi ne kamata ei o faite a mea, ‘Ne faite ne ia lāua, te tagata mo te fafine.+ 7 Tenei te pogai ka tiaki ei ne te tagata tena tamana mo tena mātua,+ 8 kae ka fai lāua mo fai se foitino e tasi,’+ tenā ko se tokolua ei lāua kae ko fai lāua mo foitino e tasi. 9 Tela la, a lāua kolā ko oti ne fakatasi ne te Atua, e se mafai eiloa o ‵tala ne se tino.”+ 10 I te lotou ‵fokiatuga ki te fale, ne fesilisili atu ana soko ki a ia e uiga ki te mea tenei. 11 Ne fai atu a ia ki a latou: “So se tagata telā e ‵tala ne ia tena avaga e mulilua+ eiloa māfai e toe avaga ki se isi fafine, 12 kae kafai e ‵tala ne se fafine tena avaga kae toe avaga ki se isi tagata, ko mulilua tou fafine.”+

13 Ne kamata o aumai ne tino ki a ia a tama‵liki fo‵liki ko te mea ke fakapatele atu a ia ki a latou, kae ne ‵liko atu ana soko ki a latou.+ 14 Ne seki fiafia a Iesu i te laveaga ne ia te mea tenā, fai atu ei ki a latou: “Tuku a tama‵liki fo‵liki ke o‵mai ki a au, kae sa taumafai o taofi latou, me i o tino penā a te Malo o te Atua.+ 15 Au e fai ‵tonu atu ki a koutou, so se tino e se talia ne ia te Malo o te Atua e pelā me se tamaliki foliki ka se mafai eiloa o ulu atu ki loto i ei.”+ 16 Ne kopi ne ia a tama‵liki, fakamanuia atu ki a latou kae fakaeke atu ana lima ki luga i a latou.+

17 Ko fai a ia o fano kae tele atu se tagata, totuli ifo i ana mua, kae fesili atu ki a ia: “Te Faiakoga ‵lei, ne a mea e ‵tau o fai ne au ke maua ei te ola se-gata-mai?”+ 18 Muna a Iesu ki a ia: “Kaia e fai mai ei koe i a au e ‵lei? E seai se tino e ‵lei, e tokotasi fua te tino ‵lei, ko te Atua.+ 19 E iloa ne koe a tulafono konei, ‘Sa tatino,+ sa mulilua,+ sa kaisoa,+ sa molimau ‵pelo,+ sa amio fakaloiloi,+ āva ki tou tamana mo tou mātua.’”+ 20 Ne fai atu te tagata tenei ki a ia: “Te Faiakoga, ko oti ne fai ne au a mea katoa konei talu mai te taimi koi talavou ei au.” 21 Ne kilo atu a Iesu ki a ia mo te alofa kae fai atu: “E tasi te mea e galo i a koe: Fano o fakatau atu au mea kae tufa atu ki tino ma‵tiva, kae ka maua ne koe a koloa e uke i te lagi ko vau ei koe o fai mo oku soko.”+ 22 Kae ne fanoanoa tou tagata i te tali tenā, fano ei kea‵tea mo te fanoanoa, me e uke ‵ki ana kope.+

23 I te otiga ne kilokilo a Iesu ki ana feitu katoa, fai atu ei ki ana soko: “Ko oko eiloa i te faigata ke ulu atu a tino kolā e uke olotou tupe ki loto i te Malo o te Atua!”+ 24 Kae ne ofo a soko i ana pati. Ne tali atu a Iesu: “Aku tama, ko oko eiloa i te faigata a te ulu atu ki loto i te Malo o te Atua! 25 E faigofie atu ke ulu se kamela ki loto i te pu o se nila i lō te ulu atu o se tagata maumea ki loto i te Malo o te Atua.”+ 26 Ne gasolo aka eiloa o ofo latou kae fai atu ki a ia: “Ko oi la e mafai o sao?”+ 27 Ne kilo ‵tonu atu a Iesu ki a latou kae fai atu: “E se mafai ne tāgata o fai te mea tenā, kae e se penā eiloa a te Atua, me e mafai ne te Atua o fai a mea katoa.”+ 28 Ne kamata a Petelu o fai atu ki a ia: “Kiloke! Ko oti ne tiaki ne matou a mea katoa kae tau‵tali atu i a koe.”+ 29 Muna a Iesu: “Au e fai ‵tonu atu ki a koutou, so se tino e tiaki ne ia tena fale, ana taina, ana tuagane io me ko tena tamana io me ko tena mātua io me ko ana tama‵liki io me ko ana manafa ona ko au mo te tala ‵lei,+ 30 ka uke faka-100 atu ana mea e maua i te vaitaimi tenei—ko fale, taina, tuagane, mātua, tama‵liki, mo manafa, fakatasi mo fakasauaga+—kae ka maua foki ne ia i taimi mai mua, a te ola se-gata-mai. 31 Kae ko tino e tokouke kolā ne ‵mua ka faka‵muli, kae ko tino kolā ne faka‵muli ka ‵mua.”+

32 Ne olo atu latou i te auala ki Ielusalema, kae ko Iesu ne mua atu i a latou, kae ne ofo latou. Kae ko tino kolā ne tau‵tali atu i a latou ne kamata o ma‵taku. Ne ‵taki atu ne Iesu te toko Sefululua ki se feitu kae kamata o fai atu ki a latou a mea kolā ko pili o ‵tupu ki a ia:+ 33 “Kiloke! A tatou e olo ki Ielusalema kae ka tuku atu a te Tama a te tagata ki faitaulaga pule mo failautusi. Ka fakasala ne latou a ia ki te mate kae tuku atu a ia ki tino o fenua fakaa‵tea, 34 kae ka fakatauemu a latou konei ki a ia kae puapuaki atu ki a ia kae ta fakamasei a ia kae tamate atu a ia, kae ka toe fakatu aka a ia mai tua o aso e tolu.”+

35 Ne olo atu ki a ia a Iakopo mo Ioane, ko tama tāgata a Sepetaio,+ kae fai atu ki a ia: “Te Faiakoga, a māua e ma‵nako ke fai ne koe so se mea e fakatagi atu ei māua ki a koe.”+ 36 Ne fai atu a ia ki a lāua: “Se a te mea e ma‵nako koulua ke fai ne au mō koulua?” 37 Ne tali atu lāua: “Talia mai ke saga‵saga māua, e tokotasi i tou feitu fakaatamai kae tokotasi i tou feitu fakamaui i tou tulaga ‵malu.”+ 38 Kae ne fai atu a Iesu ki a lāua: “E se iloa ne koulua a te mea telā ne fakamolemole mai koulua ki ei. E a, e mafai ne koulua o inu a te ipu telā e inu au ki ei, io me papatiso ki te papatisoga telā ne papatiso au ki ei?”+ 39 Ne tali atu lāua: “E mafai ne māua.” Fai atu ei a Iesu ki a lāua: “Ka inu eiloa koulua ki te ipu telā ko inu au ki ei, kae ka papatiso foki koulua ki te papatisoga telā ne papatiso au ki ei.+ 40 Kae e seai saku pule ki te tino ka sagasaga i toku feitu fakaatamai mo toku feitu fakamaui, me i koga konei e ‵nofo fua i ei a tino kolā ko oti ne fakatoka mō latou.”

41 I te ‵logoga a nisi soko e tokosefulu i te mea tenei, ne ita latou ki a Iakopo mo Ioane.+ 42 Kae ne kalaga atu a Iesu ke o‵mai latou ki a ia, kae fai atu ki a latou: “E iloa ne koutou i a latou kolā e fai pelā me ne takitaki o malo e fai pelā me ne aliki ki luga i tino, kae ko olotou tāgata takutakua e pule fakasaua atu ki a latou.+ 43 Kae ko koutou e se ‵tau o fai penā; kae ko so se tino i a koutou e manako ke sili a ia, e ‵tau o fai mo fai te otou tavini,+ 44 kae ko so se tino e manako ke mua a ia i a koutou e ‵tau o fai mo pologa ki a koutou katoa. 45 Ke oko ki te Tama a te tagata, ne seki vau ke tavini mai a tino ki a ia, kae ke tavini atu+ ki tino kae tuku atu foki tena ola e pelā me se togiola mō tino e tokouke.”+

46 Ne oko atu latou ki Ieliko. Kae i te lotou ologa mo ana soko mo te vaitino mai Ieliko, ne sagasaga atu i tafa o te auala a Patimaio (te tama tagata a Timaio), se tino ‵kivi kae gutu akai.+ 47 I te lagonaga ne ia me ko Iesu te Nasaleta, kamata ei a ia o pakalaga kae fai atu: “Iesu, te Tama a Tavita,+ ke alofa mai koe ki a au!”+ 48 Kae ne kamata o ‵liko atu te vaitino ki a ia ke se logoa, kae ne tumau a ia i te pakalaga malosi atu: “Te Tama a Tavita, ke alofa mai koe ki a au!” 49 Ne tu a Iesu kae fai atu: “Ka‵laga ki ei ke vau ki a au.” Kae ne ka‵laga atu latou ki te tagata ‵kivi, kae fai atu ki a ia: “Ke loto malosi! Tu ki luga, ko Iesu tenā e kalaga atu ki a koe.” 50 Ne ‵pei kea‵tea tena gatu, tafuke aka a ia ki luga kae fanatu ki a Iesu. 51 Kae ne fai atu a Iesu ki a ia: “Se a te mea e manako koe ke fai ne au mō koe?” Ne fai atu te tagata ‵kivi ki a ia: “Laponi,* faka‵pula aka oku mata.” 52 Ne fai atu a Iesu ki a ia: “Fano. Ko tou fakatuanaki ne ‵lei ei koe.”+ I konā eiloa ne ‵lei fakavave ei ana mata,+ kae kamata o tautali atu i a ia i te auala.