Esekielu

34 Ne toe oko mai te fekau a Ieova ki a au, ana muna: 2 “Te tama a te tagata, ‵valo o ‵teke atu a tausi mamoe o Isalaelu. ‵Valo, kae fai atu ki tausi mamoe, ‘Konei a pati a te Aliki Sili ko Ieova ne fai mai: “Kalofa eiloa i tausi mamoe o Isalaelu,+ kolā ne fagai sāle ne latou a latou eiloa! E a, e se ko te lafu mamoe e ‵tau o fagai ne tausi mamoe?+ 3 E kai ne koutou a gako, e ‵pei koutou ki gatu e faite ki vulu, kae e tamate ne koutou a te ‵toe manu putaputa,+ kae e se fagai ne koutou te lafu mamoe.+ 4 Ne seki fakamalosi aka ne koutou a tino vāi‵vai io me faka‵lei aka a tino ma‵saki io me fusi a pa‵kiaga o tino io me toe faka‵foki mai a latou kolā ko takasē‵se kea‵tea io me salasala atu ki tino ko ‵galo;+ i lō te fai penā ne pule atu koutou ki a latou mo te masei kae saua.+ 5 Tenā ne salalau valevale ei latou me ko seai se lotou tausi mamoe;+ ne salalau atu latou kae ne fai mo fai a meakai a manu fe‵kai katoa o te vao. 6 Aku mamoe ne takasē‵se kea‵tea i luga i mauga katoa mo tamā mauga ma‵luga katoa; aku mamoe ne salalau atu ki koga katoa o te lalolagi, e aunoa mo se tino e salasala atu ki a latou io me ‵sala ke maua latou.

7 “‘“Tela la, koutou e tausi mamoe, faka‵logo mai ki te fekau a Ieova: 8 ‘“E pelā eiloa mo au e ola,’ ko te folafolaga a te Aliki Sili ko Ieova, ‘ona ko aku mamoe ko afuli ne manu, ko fai pelā me ne meakai a manu fe‵kai katoa, me ko seai se lotou tausi mamoe, kae ko aku tausi mamoe e seki salasala atu ki aku mamoe; i lō te fai penā, ne fagai faeloa ne latou a latou eiloa kae e se fagai aku mamoe,”’ 9 tela la, faka‵logo mai koutou e tausi mamoe ki te fekau a Ieova. 10 Konei a pati a te Aliki Sili ko Ieova ne fai mai: ‘E ‵teke ne au a tausi mamoe, kae e manako au ki se tala mai i a latou e uiga ki aku mamoe,* kae ka faka‵tea ne au latou mai te fagaiga* o aku mamoe,+ ko se toe mafai ei ne tausi mamoe o fagai a latou eiloa. Ka faka‵sao ne au aku mamoe mai i olotou gutu, kae ka se toe fai a mamoe e pelā me ne meakai ma latou.’”

11 “‘Me konei a pati a te Aliki Sili ko Ieova ne fai mai: “Tenei au, kae ka salasala eiloa au ki aku mamoe, kae ka tausi ne au latou.+ 12 Ka tausi ne au aku mamoe e pelā me se tausi mamoe telā ko maua ana mamoe kolā ne salalau valevale kae fagai ne ia latou.+ Ka faka‵sao ne au latou mai i koga katoa ne salalau atu latou ki ei i te aso kaumanā mo te pouliga matolu.+ 13 Ka aumai ne au latou ki tua mai i atufenua kae fakamaopoopo fakatasi latou mai i fenua kae aumai latou ki te lotou laukele kae fagai latou i luga i mauga o Isalaelu,+ i tafa o tamā vaitafe mo tafa o koga ‵nofo katoa o te fenua. 14 Ka fagai ne au latou i se laukele moukuā ‵lei, kae ko laukele e kai‵kai ei latou ka ‵tu i luga i mauga ma‵luga o Isalaelu.+ Ka takato‵kato latou i konā i te laukele ‵lei,+ kae ka ‵kai latou i laukele moukuā ‵gali i luga i mauga o Isalaelu.”

15 “‘“Ka fagai ne au aku mamoe,+ kae ka fai ne au latou ke ta‵kato ki lalo,”+ ko te folafolaga a te Aliki Sili ko Ieova. 16 “Ka ‵sala ne au a ia telā e galo,+ ko ia telā ne takasēsē kea‵tea ka fakafoki mai ne au, ka fusi ne au a pa‵kiaga o te tino pakia, ka fakamalosi ne au a ia telā ko vāivāi; kae ko ia telā e putaputa kae malosi ka ta ne au. Ka fagai ne au a ia tenā ki te fakamasinoga.”

17 “‘E pelā mo koutou, e aku mamoe, konei a pati a te Aliki Sili ko Ieova ne fai mai: “Ko pili fua o fakamasino ne au te mamoe e tasi mo te suā mamoe, ko mamoe tāgata mo kouti tāgata.+ 18 E a, e se lava eiloa mō koutou ke kai‵kai i toe koga moukuā ‵lei? E a, e ‵tau foki mo koutou o lakalaka a te ‵toega o otou laukele moukuā ki otou vae? Kae kafai ko oti ne inu ki toe vai ‵ma eiloa, e a, e ‵tau mo koutou o fakalailai a te vai mai te lakalaka ki otou vae? 19 E mata, e ‵tau o kai‵kai aku mamoe i laukele moukuā ne lakalaka ne koutou ki otou vae kae inu ki te vai ko oti ne fakalailai e auala i te lakalaka ki otou vae?”

20 “‘Tela la, konei a pati a te Aliki Sili ko Ieova ne fai ki a latou: “Tenei au, kae ka fakamasino ne au a te mamoe putaputa mo te mamoe pakā, 21 me mai tou kaokao mo tou tuauma ne ‵tule faeloa ne koe, kae mai i ou sau ne ‵seu faeloa ne koe kea‵tea a latou katoa kolā e ma‵saki ke oko ki te taimi ko oti ei ne fakasalalau atu ne koe latou ki koga ‵mao. 22 Kae ka faka‵sao ne au aku mamoe, kae ka se toe afuli latou ne nisi manu;+ kae ka fakamasino ne au a te mamoe mo te suā mamoe. 23 Ka fakatu aka ne au se tausi mamoe e tokotasi i luga o latou,+ ko taku tavini ko Tavita,+ kae ka fagai ne ia latou. Ka fagai ne ia latou kae ka fai a ia mo olotou tausi mamoe.+ 24 Kae ko au, Ieova, ka fai mo olotou Atua,+ kae ko taku tavini ko Tavita se takitaki o latou.+ Ko au, Ieova ko oti ne faipati.

25 “‘“Kae ka fai ne au se feagaiga o te filemu mo latou,+ kae ka faka‵ma ne au te fenua mai i manu fe‵kai kae fakama‵taku,+ ko te mea ke mafai latou o ‵nofo mo te tokagamalie i te koga lavaki kae ‵moe i te vao.+ 26 Ka fai ne au a latou mo koga i tafatafa o taku tamā mauga e pelā me se fakamanuiaga,+ kae ka fai ne au te vaiua ke ‵to i te taimi tonu. A fakamanuiaga ka ‵to ifo eiloa e pelā me ne vaiua.+ 27 A lakau o te fatoaga ka ‵fua mai olotou fuataga, kae ka ‵fua mai ne te laukele ana fuaga,+ kae ka ola latou mo te tokagamalie i te fenua. Kae ka iloa ei ne latou i a au ko Ieova māfai ko ofa ne au olotou amo+ kae faka‵sao latou mai i tino e fakapologa latou. 28 Ka se toe o‵mai a nisi atufenua o ‵fao olotou mea, kae ka se toe kai latou ne manu fe‵kai o te lalolagi, kae ka ola latou mo te tokagamalie, kae seai se tino e ma‵taku latou ki ei.+

29 “‘“Ka fakatu aka ne au mō latou se fatoaga takutakua, kae ka se toe ‵mate latou ona ko te oge i te fenua,+ kae ka se toe fakamasiasi latou ne nisi atufenua.+ 30 ‘Tenā ka iloa ei ne latou i a au, ko Ieova te lotou Atua, e fakatasi mo latou kae ko latou, ko te kāiga o Isalaelu, ko toku fenua,’+ ko te folafolaga a te Aliki Sili ko Ieova.”’

31 “‘Kae pelā mo koutou, e aku mamoe,+ ko mamoe kolā e atafai au ki ei, a koutou ne tāgata fua, kae ko au ko te otou Atua,’ ko te folafolaga a te Aliki Sili ko Ieova.”