Ki te kau Loma
1 Ko au ko Paulo, se pologa a Keliso Iesu, telā ne kalagagina ke fai mo apositolo, kae ke ‵vae kea‵tea mō te tala ‵lei a te Atua,+ 2 telā ne folafola mai ne ia i taimi ko ‵teka e auala i ana pelofeta i Tusitusiga tapu, 3 e uiga ki tena Tama, telā ne vau i te gafa o Tavita+ i te feitu faka-te-foitino, 4 kae telā ne folafola mai mo te ‵mana me ko te Tama a te Atua+ e ‵tusa mo te agaga o te ‵malu e auala i te toetu mai te mate+—ao, ko Iesu Keliso te ‵tou Aliki. 5 E auala i a ia e maua ne tatou a te alofa tauanoa mo te galuega fakaapositolo+ mai te faka‵logo e auala i te fakatuanaki o atufenua+ katoa ki tena igoa, 6 ko atufenua kolā ne kalagagina foki i ei koutou ke fai mo soko o Iesu Keliso— 7 ki tino pele katoa o te Atua i Loma kolā ne kalagagina ke fai mo tino tapu:
Ke i luga i a koutou a te alofa tauanoa mo te filemu o te Atua te ‵tou Tamana mo te Aliki ko Iesu Keliso.
8 Muamua la, e fakafetai atu au ki toku Atua e auala i a Iesu Keliso ona ko koutou katoa, me ko fai‵pati te lalolagi kātoa e uiga ki te otou fakatuanaki. 9 Me i te Atua telā e fai ne au ki ei te taviniga tapu mo toku agaga kātoa fakatasi mo te tala ‵lei e uiga ki tena Tama, ko taku molimau tenā me e se mafai eiloa o puli koutou i aku ‵talo,+ 10 o fakatagi atu me kafai e mafai, ke fanatu au ki a koutou māfai ko te loto eiloa tenā o te Atua. 11 Me ko oko eiloa i te fia lavea ne au a koutou, ko te mea ke tuku atu ne au ne meaalofa faka-te-agaga ki a koutou ke ‵mautakitaki ei koutou; 12 io me ke fakatau fakama‵losi+ aka ei te ‵tou fakatuanaki, ko koutou ki a au kae ko au ki a koutou.
13 E manako malosi au ke iloa ne koutou, e oku taina, me e uke a taimi ne manako au o fanatu ki a koutou—kae ne taofi aka au ke se fanatu ke oko mai ki te taimi nei—ko te mea ke maua foki ne au ne fuataga mai i a koutou e pelā eiloa mo mea ne maua mai fenua fakaa‵tea. 14 Me i a au e nofo kaitalafu ki tino Eleni mo tino fakaa‵tea, e pelā foki ki tino ‵poto mo tino va‵lea; 15 tela la, e olioli foki au ke folafola atu te tala ‵lei ki a koutou konā i Loma.+ 16 Me i a au e se mā i te tala ‵lei;+ a te mea tenā ko te ‵mana o te Atua ke maua ne tino katoa kolā e fakatuanaki+ a te fakaolataga, e muamua ki tino Iutaia+ e pelā foki mo tino Eleni.+ 17 Me e fakaasi atu i ei a te amiotonu o te Atua e auala i te fakatuanaki ke fakamalosi i ei te lotou fakatuanaki,+ e pelā eiloa mo muna konei ne tusi i te tusi: “Kae ko te tino amiotonu ka ola e auala i te fakatuanaki.”+
18 Me ka fakaasi mai eiloa te kaitaua o te Atua+ mai te lagi ki tino sē amioatua mo faifaiga sē ‵tonu katoa a tino kolā e ‵teke ki te munatonu+ i se auala masei, 19 me i mea katoa kolā e ‵tau o iloa ne latou e uiga ki te Atua e manino ‵lei ki a latou, me ne fakaasi faka‵lei atu ne te Atua ki a latou.+ 20 Me e lavea faka‵lei atu ana uiga sē lavea talu mai te faitega o te lalolagi, me e mafai o lavea atu i ana mea ne faite,+ ke oko eiloa ki tena ‵mana telā e seai sena gataga+ mo tena tulaga e pelā me ko te Atua,+ ko te mea ke seai se lotou fakamasakoga ki ei. 21 Me e tiga eiloa e iloa ne latou te Atua, ne seki faka‵malu atu latou ki a ia e pelā me ko te Atua io me fakafetai atu ki a ia, kae ko olotou manatu e seai ne aoga kae ko olotou loto va‵lea ko pouli.+ 22 E tiga eiloa e ma‵natu aka latou i a latou e ‵poto, kae ko latou e va‵lea fua 23 kae ne ‵fuli ne latou te ‵malu o te Atua telā e se mafai o fakaseai ki se fakatusa o se tagata telā e mafai o fakaseai mo manu eva mo manu vae fa mo manu ‵tolo.+
24 Tela la, e ‵tusa mo manakoga o olotou loto, ne tuku atu ei ne te Atua a latou ke fai ne latou a amioga lai‵lai, ko te mea ke fakamasiasigina olotou foitino i a latou eiloa. 25 Ne sui ne latou te munatonu a te Atua ki te loi kae faka‵malu kae fai te taviniga tapu ki mea kolā ne faite i lō te Mafuaga, telā e avatu ki ei a vikiga ki te se-gata-mai eiloa. Amene. 26 Tenā te pogai ne tuku atu ei ne te Atua a latou ke fina ki manakoga fakatauavaga,+ me ko ‵fuli ne olotou fāfine a te fakaaogaga ‵tonu o olotou foitino ki faifaiga e se masani ki ei;+ 27 e penā foki a tāgata, ne tiakina ne latou a te fakaaogaga tonu i te va o tāgata mo fāfine kae ne ‵ka olotou loto i te fia‵fai o latou i a latou eiloa, te tagata ki te tagata,+ kae ko fai ne latou a mea matagā kae ka maua ne latou te lotou fakasalaga e ‵tusa mo olotou mea ‵se e fai.+
28 E pelā eiloa mo te sē ma‵nako o latou ke iloa ‵lei ne latou te Atua, ne tuku atu latou ne te Atua ki se mafaufau sē ‵lei ke fai a mea sē ‵tau.+ 29 Kae ne ‵fonu latou i faifaiga ma‵sei+ katoa, uiga matagā, te kaimanako,+ mo te masei, e ‵fonu i te loto masei,+ te fia tatino,+ te fai taua, uiga faitogafiti,+ mo uiga fakasaua,+ ne tino mui‵mui, 30 tino fatu‵fatu,+ tino e takalia‵lia ki te Atua, e fai valevale, e fakamaualuga, e fai‵pati fakamata‵mata, e ‵sala ki mea e pa‵kia ei a tino, e se faka‵logo ki mātua,+ 31 e seai se loto malamalama,+ e se fakamaoni ki feagaiga, e seai se alofa kae seai se alofa fakamagalo. 32 E tiga e iloa ‵lei ne latou konei a tulafono amio‵tonu a te Atua—i tino kolā e fai ne latou a mea konei e iku atu eiloa ki te ‵mate+—e se gata fua i te tumau o latou i te faiga o mea konei, kae e talia foki ne latou a tino kolā e fai faeloa ne latou a mea konā.