Esekielu

1 I te 30 tausaga, i te lima o aso o te fa o masina, i te taimi ne ‵nofo fakatasi ei au mo tino kolā ne ave fakapagota+ i tafa o te vaitafe ko Kepala,+ ne matala te lagi kae ne kamata o lavea ne au a fakaasiga mai i te Atua. 2 I te lima o aso o te masina​—telā ko te lima o tausaga o te avega fakapagota o te Tupu ko Ieoiakini+​— 3 ne oko mai te fekau a Ieova ki a Esekielu* te tama tagata a Pusi te faitaulaga i tafa o te vaitafe ko Kepala i te fenua o tino Kaletaia.+ I konā loa, ne oko atu ei te lima o Ieova ki luga i a ia.+

4 I te taimi ne kilokilo atu ei au, ne lavea ne au se matagi malosi+ e vau mai i te feitu ki mātū, kae e isi se kaumana lasi mo se afi ‵ka*+ e fakatamilo ne se mainaga lasi ‵ki, kae i loto i te afi se mea e foliga mai e pelā me se aulo e palu tasi mo te siliva.+ 5 I loto i ei e isi ne mea e foliga pelā me ne mea ola e fa,+ kae ko foliga o mea takitasi e pelā mo foliga o se tino. 6 A mea takitasi konā e taki fa olotou foliga kae taki fa olotou kapakau.+ 7 A olotou vae e ‵tonu, kae ko olotou alofivae e pelā mo alofivae o se tamā pulumakau, kae e malapu‵lapu e pelā mo te maina o te kopa matilotilo.+ 8 E isi ne olotou lima e pelā me ne lima o te tino mai i lalo i olotou kapakau i feitu katoa e fa, kae ko mea ola e fa konā e isi ne olotou mata mo kapakau. 9 E patele atu te kapakau e tasi ki te suā kapakau. E se ‵fuli eiloa latou ki se feitu māfai ko olo; a mea takitasi konā e olo ‵tonu eiloa ki mua.+

10 A olotou mata e foliga penei: A mea takitasi e fa konā e isi ne olotou mata e pelā mo mata o se tagata mo mata o se leona+ i te feitu fakaatamai, ko mata o se pulumakau tagata+ i te feitu fakamaui, kae ko mea e fa konā e isi ne olotou mata e pelā mo mata+ o se aeto+. 11 Konā foliga o olotou mata. A olotou kapakau e ‵fola i luga i a latou. A mea takitasi konā e lua olotou kapakau kolā e patele atu te kapakau e tasi ki te suā kapakau kae e lua kapakau kolā e ufi i ei olotou foitino.+

12 A mea takitasi konā e olo ‵tonu eiloa ki mua, e olo atu i so se koga e manako te agaga ke olo latou ki ei.+ E se ‵fuli eiloa latou ki se feitu māfai ko olo. 13 Kae ko mea ola konā e foliga mai e pelā me ne malala ‵ka o se afi, kae e isi se mea e foliga pelā me se mainaga o se afi ‵ka e gasue ki tua kae gasue ki mua i te va o mea ola konā, kae ne ‵lapa mai a uila mai i loto i te afi.+ 14 Kae kafai e olo atu a mea ola ki mua kae toe ‵foki mai, a te lotou ga‵suega e foliga e pelā me se uila e ‵lapa.

15 I te taimi ne onoono atu ei au ki mea ola konā, ne lavea ne au se teka e tasi i te lalolagi i tafa o mea ola takitasi konā mo olotou mata e fa.+ 16 A teka mo te auala ne faite ei e foliga malapulapu e pelā me se kuate lanu ‵sega, kae ko teka e fa konā e ‵pau olotou foliga. A olotou foliga mo te auala ne faite ei e foliga mai me e isi se teka e ‵mau i loto i te suā teka. 17 Kafai e ga‵sue a teka konā, e mafai o ‵tele latou ki so se feitu i feitu e fa e aunoa mo te ‵fuli māfai ko olo. 18 Ko tō ma‵luga olotou uila telā e fai ei ke ofo se tino, kae ko uila o teka katoa e fa konā e ‵fonu i mata e fakatamilo i ei.+ 19 I so se koga e ga‵sue ki ei a mea ola konā, e ga‵sue foki a teka fakatasi mo latou, kae kafai ko ma‵sagi aka a mea ola konā mai i te lalolagi, e ma‵sagi aka foki a teka.+ 20 E olo atu a mea konā ki so se koga e manako te agaga ke olo ki ei latou, ki so se koga e fano ki ei te agaga. Ka olo aka a teka fakatasi mo latou, me i te agaga telā e galue i mea ola konā e nofo foki i teka. 21 Kafai e ga‵sue latou, e ga‵sue foki a mea konei; kae kafai e ‵tu malie latou, e ‵tu malie foki a mea konei, kae kafai ko olo aka mai te lalolagi, e olo aka foki a teka fakatasi mo latou, me i te agaga telā e galue i mea ola konā ne nofo foki i teka.

22 Mai i luga i ulu o mea ola konā se mea e pelā me se fola e matilotilo e pelā me ne kati aisa fakaofoofogia, e ‵fola mai i luga i olotou ulu.+ 23 Mai lalo o te fola tenā e ‵fola ne latou olotou kapakau, e tasi te kapakau ki te suā kapakau. A mea ola takitasi e lua ana kapakau mō ufi te feitu e tasi o olotou foitino kae e lua mō ufi te suā feitu. 24 I te lagonaga ne au a te ‵tagi o olotou kapakau, e pelā eiloa mo te ‵tagi o vai e ‵tafe, e pelā mo te ‵tagi o te Atua Malosi Katoatoa.+ Kafai e ga‵sue latou e ‵tagi eiloa e pelā me se kautau. Kafai e ‵tu malie latou, e tuku ifo olotou kapakau ki lalo.

25 E isi se leo mai luga o te fola i luga i olotou ulu. (Kafai e ‵tu malie latou, e tuku ifo olotou kapakau ki lalo.) 26 I luga i te fola telā e tu mai i luga i olotou ulu se mea e foliga mai e pelā me se fatu safaila,+ kae e ‵pau eiloa me se nofogaaliki.+ E sagasaga i luga i te nofogaaliki se mea e foliga pelā me se tino.+ 27 Ne lavea ne au se mea e malapulapu e pelā me se aulo e palu tasi mo te siliva+ telā e fai pelā me se afi e vau mai i te koga telā e foliga mai e pelā me ko tena taugasulu o fano ki luga, kae mai i tena taugasulu o fanaifo ki lalo, ne lavea ne au se mea pelā me se afi.+ E isi se mainaga lasi e fakatamilo i a ia 28 e pelā me se nuanua+ i loto i se kaumana i se aso e ‵to ei vaiua. E penā a foliga o te mainaga lasi telā ne fakatamilo i ei. E foliga mai e pelā mo te ‵malu o Ieova.+ I te taimi ne lavea ei ne au, ne totuli ifo au mo oku mata e ‵fuli ki lalo kae kamata o lagona ne au te leo o se tino e faipati mai.