Te Tusi a Iakopo
5 O‵mai koutou, e tino mau‵mea, ‵tagi mautuutu kae ‵tagi fanoa‵noa i puapuaga kolā ka oko atu ki luga i a koutou.+ 2 Ko ‵pala valevale otou koloa, kae ko katia otou gatu ne manu.+ 3 Ko ‵popo otou aulo mo siliva, kae ko te lotou ‵popo ko fai mo molimau ki a koutou kae ka kai ne latou otou ‵kano. A mea kolā ne fakaputu ne koutou ka fai mo fai se afi i aso fakaoti.+ 4 Kiloke! A tino ga‵lue kolā ne tau ne latou otou fatoaga e ‵tagi mai faeloa me ne taofi ne koutou olotou peofuga, kae ko te fakatagi mō se fesoasoani a tino ‵kati saito ko oti ne oko ki taliga o Ieova* o kautau.+ 5 Ko oti ne ola koutou i se olaga maumea kae fakafiafia i te lalolagi nei. Ko oti ne fakaputa‵puta ne koutou otou loto mō te aso e tamate ei koutou.+ 6 Ko oti koutou ne taku fakamasei; ko oti ne tamate ne koutou a te tino amiotonu. E a, ka se ‵teke atu a ia ki a koutou?
7 Tela la, ke kufaki koutou, e oku taina, ke oko ki te fakatasi mai o te Aliki!+ Kiloke! E fakatalitali faeloa te tino fai fatoaga ki fuataga tāua mai te laukele, e kufaki faeloa a ia ke oko ki te ‵toga o vaiua muamua mo vaiua kolā e ‵to fakamuli mai.+ 8 Ke kufaki foki koutou penā;+ ke ‵mautakitaki otou loto, me ko pili o fakatasi mai te Aliki.+
9 Ke se fameo* te suā tino ki te suā tino, e oku taina, ko te mea ke se fakamasinogina koutou.+ Kiloke! A te famasino ko tu mai i te mataloa. 10 Oku taina, fakaakoako ki te logo‵mae i mea matagā+ mo te kufaki+ o te kau pelofeta kolā ne fai‵pati i te igoa o Ieova.*+ 11 Kiloke! E taku ne tatou a latou kolā ne kufaki me e fia‵fia.+ Ko oti ne ‵logo koutou i te kufaki o Iopu+ kae ne lavea ne koutou a mea kolā ne tuku atu ne Ieova* ki a ia i te fakaotiga,+ me e lasi ‵ki te alofa atafai mo te alofa fakamagalo o Ieova.*+
12 Kae e sili i mea katoa, e oku taina, fakagata te tauto ki te lagi io me ki te lalolagi io me se isi tautoga. Kae ke fakauiga te otou “Ao” ki te ao, kae ko te otou “Ikai” ki te ikai,+ ko te mea ke se fakamasinogina koutou.
13 E a, e isi se tino i a koutou e logo‵mae i mea faiga‵ta? Ke ‵talo faeloa a ia.+ E a, e isi se tino e loto fiafia? Ke usu atu ne ia a pese o vikiga.+ 14 E a, e isi se tino e masaki i a koutou? Ke kalaga atu a ia ki toeaina+ o te fakapotopotoga ke olo atu ki a ia, kae ke ‵talo latou mō ia kae ‵mili atu a te sinu ki a ia+ i te igoa o Ieova.* 15 Kae ka fai ne te ‵talo o te fakatuanaki ke ‵lei a te tino masaki,* kae ka fakamalosi aka a ia ne Ieova.* Kafai foki ne fai ne ia ne agasala, ka fakamagalo eiloa a ia.
16 Tela la, ke fakatau fakaasi atu otou agasala+ kae ‵talo te suā tino mō te suā tino, ko te mea ke mafai o faka‵lei koutou. A te ‵talo a te tino amiotonu e malosi ‵ki kae magoi.+ 17 A Elia se tagata e isi ne ana lagonaga e penei mo tatou, kae ne ‵talo malosi atu a ia ke se ‵to te vaiua; kae ne seki ‵to eiloa te vaiua ki luga i te laukele i tausaga e tolu mo te ono masina.+ 18 Tenā ne toe ‵talo ei a ia, kae ne ‵to ifo te vaiua mai te lagi kae ‵fua mai a fuataga i te laukele.+
19 Oku taina, kafai e takitaki‵segina se tino i a koutou mai te munatonu kae toe ‵fuli mai a ia ne te suā tino, 20 ke iloa ne koutou i te tino telā e toe ‵fuli mai ne ia te tino agasala mai tena mea ‵se+ ka fakasao eiloa ne ia a ia* mai te mate kae ka fakamagalo* ana agasala e uke.+