Neemia

9 I te po 24 o te masina tenei ne maopoopo fakatasi ei a tino Isalaelu; ne fakaliki‵liki latou kae ‵pei ki gatu lautaga mo ‵pefu i luga i olotou ulu.+ 2 Tenā ne ‵vae kea‵tea ei a tino kolā ne ‵tupu mai i tino Isalaelu mai tino o fenua fakaa‵tea katoa,+ kae ne ‵tu aka latou o fakaasi atu olotou agasala mo mea ‵se a olotou tamana.+ 3 Tenā ne ‵tu aka ei latou i olotou koga kae faitau i se leo maluga a te tusi o te Tulafono+ a Ieova te lotou Atua i loto i itula e tolu o te aso;* kae i te suā tolu itula ne fakaasi atu olotou agasala kae ifo ki a Ieova te lotou Atua.

4 A Iesua, Pani, Katamiela, Seipania, Pinu, Selepaia,+ Pani mo Kenanu ne ‵tu i luga i te tulaga+ o tino Levi kae ka‵laga atu i se leo maluga ki a Ieova te lotou Atua. 5 Kae ne fai atu a tino Levi ko Iesua, Katamiela, Pani, Hasapeneia, Selepaia, Hotia, Seipania mo Pateia: “‵Tu ki luga o ‵viki ki a Ieova te otou Atua ki te se-gata-mai.*+ Kae fai ke ‵viki atu latou ki tou igoa ‵malu, telā e maluga atu i fakamanuiaga mo vikiga katoa.

6 “Ko koe tokotasi ko Ieova;+ ne faite ne koe te lagi, ao, te lagi o lagi mo olotou kautau katoa, te lalolagi mo mea katoa i luga i ei, te tai mo mea katoa i loto i ei. Kae ne tausi ne koe a mea katoa konā ke ola, kae ko te kautau o te lagi e ifo ki lalo i a koe. 7 A koe ko Ieova te Atua tonu, telā ne filifili ne koe a Apelamo+ kae aumai ki tua mo Ulo+ i Kaletaia kae tuku atu ki a ia a te igoa ko Apelaamo.+ 8 Ne iloa ne koe tena loto e fakamaoni faeloa ki a koe,+ tenā ne fai ei ne koe se feagaiga mo ia ke tuku atu ki a ia a te fenua o tino Kanana, tino Heti, tino Amoli, tino Pelise, tino Iepuse mo tino Kilikase, ke tuku atu ne ia ki ana tama;*+ kae ne tausi eiloa koe ki au tautoga, me i a koe e amiotonu.

9 “Ne lavea ne koe te puapuaga o omotou tupuga i Aikupito,+ kae lagona ne koe te lotou ‵tagi i te Tai Kula. 10 Tenā ne fai ei ne koe a fakailoga mo vavega ke ‵teke atu ki te Falao mo ana tavini katoa mo tino katoa o tena fenua,+ me iloa ne koe me ne fakapuapuaga+ ne latou ou tino. Ne fai ne koe ke takutakua tou igoa ke oko mai eiloa ki te aso nei.+ 11 Kae ne ‵vae aka ne koe te tai i olotou mua, ko te mea ke olo latou i loto i te tai i luga i te laukele malō,+ kae ne ‵pei ne koe a tino kolā ne olo atu o afuli latou ki te koga ‵poko e pelā eiloa me se fatu e ‵pei ki loto i te tai sou.+ 12 E takitaki ne koe latou ki te pou kaumana i te ao, kae i te po ki se pou afi, ke fakamaina atu ki a latou te auala e ‵tau o olo i ei.+ 13 Kae ne fanaifo koe ki te Mauga o Sinai+ o faipati ki a latou mai te lagi+ kae tuku atu ki a latou a fakamasinoga amio‵tonu, tulafono o te munatonu,* tulafono ‵lei mo fakatonuga.+ 14 Ne fakailoa ne koe ki a latou a tou Sapati ‵malu,+ kae tuku atu ne koe ki a latou a fakatonuga, tulafono fo‵liki, mo se tulafono e auala i tau tavini ko Mose. 15 Ne tuku ne koe ki a latou a meakai mai te lagi i te taimi ne fia‵kai ei,+ kae ne aumai ne koe a vai mai se kaupapa i te taimi ne fiainu ei,+ kae ne fai atu koe ki a latou ke ulu atu o puke mō latou te fenua telā ne tauto* koe ke tuku atu ki a latou.

16 “Kae ko latou, ko omotou tupuga, ne fakamata‵mata+ kae loto ma‵keke,+ kae e se faka‵logo latou ki au fakatonuga. 17 Ne ita latou ma faka‵logo,+ kae ne seki masaua ne latou a faifaiga fakaofoofogia kolā ne fai ne koe ki a latou, kae ne loto ma‵keke latou kae fakasopo aka se lotou takitaki ke faka‵foki latou ki te lotou olaga pologa i Aikupito.+ Kae ko koe se Atua telā e toka o fakamagalo,* e alofa atafai* kae alofa fakamagalo, e tuai o ita kae ‵fonu i te alofa fakamaoni,*+ kae ne seki tiaki eiloa ne koe latou.+ 18 I te taimi ne faite ei ne latou se tupua fiti o te pulumakau kae fai aka, ‘Tenei te otou Atua telā ne takitaki ne ia koutou ki tua mo Aikupito,’+ kae fai ne latou a faifaiga sē āva, 19 i te taimi tenā, ona ko te lasi o tou alofa fakamagalo, ne seki tiaki ne koe latou i te koga lavaki.+ Ne seki tiaki latou ne te pou kaumana i luga i a latou i te ao telā e takitaki ei latou i te auala, io me ko te pou afi i te po ke fakamaina ki ei te auala e ‵tau o olo latou i ei.+ 20 Ne tuku atu ne koe ki a latou a tou agaga* ke maua ne latou te poto,+ kae ne seki taofi ne koe tau manai mai olotou gutu,+ kae ne tuku atu ne koe a vai ki a latou māfai ko fiainu.+ 21 Ne tuku atu faeloa ne koe ki a latou a meakai i te koga lavaki i tausaga e 40.+ E seai se mea ne ma‵tiva latou i ei. A olotou gatu ne seki ‵pala,+ kae ne seki fula‵fula olotou vae.

22 “Ne tuku atu ne koe ki a latou a malo mo tino, kae vaevae atu olotou laukele,+ tenā ne puke ei mō latou a te fenua o Sekono,+ telā ko te fenua o te tupu o Hesepono,+ e pelā foki mo te fenua o Oko+ te tupu o Pasana. 23 Kae ne fai ne koe olotou tama tāgata ke tokouke e pelā mo fetū o te lagi.+ Tenā ne aumai ei ne koe latou ki loto i te fenua ne tauto koe ki olotou tupuga me e ‵tau o ulu latou ki ei o puke mō latou.+ 24 Ne ulu atu olotou tama tāgata ki loto kae puke ne latou te fenua,+ kae fakatakavale ne koe i mua o latou a tino Kanana,+ kolā e ‵nofo i te fenua tenā, kae ne tuku atu ne koe a latou ki olotou lima, fakatasi mo olotou tupu mo tino o te fenua, ke fai ki a latou so se mea e ma‵nako latou ki ei. 25 Kae ne puke ne latou a fakai e puipui faka‵lei+ mo laukele ola ‵lei,+ kae ne puke mō latou a fale e ‵fonu i vaegā mea ‵lei katoa, vaikeli kolā ko oti ne keli, togavine, togaolive,+ mo lakau e uke a fuagalakau i ei. Ne ‵kai latou kae ma‵kona kae puta‵puta, kae ne fakaaoga ne latou a mea ‵gali e uke ona ko tou aga‵lei.

26 “Kae ne kamata o se faka‵logo kae ‵teke atu latou ki a koe+ kae fulitua atu ki tau Tulafono.* Ne tamate ne latou au pelofeta kolā ne fakamalosi atu ki a latou ke toe ‵foki mai ki a koe, kae fai ne latou a faifaiga sē āva e uke.+ 27 Ona ko te mea tenei, ne tuku atu ne koe latou ki lima o olotou fili+ kolā ne fakapuapuaga atu ki a latou.+ Kae ne ka‵laga mai latou ki a koe i taimi o olotou puapuaga kae lagona mai ne koe mai te lagi; kae ona ko te lasi o tou alofa fakamagalo, ne tuku atu ne koe ne tāgata ke faka‵sao latou mai lima o olotou fili.+

28 “Kae i te taimi eiloa ne maua ei ne latou se tulaga filemu, ko toe fai foki ne latou a mea ma‵sei i ou mua,+ kae tuku atu ne koe latou ki lima o olotou fili ke pule atu ki a latou.+ Tenā ko ‵foki mai ei latou o ka‵laga atu ki a koe mō se fesoasoani,+ kae lagona mai ne koe mai te lagi kae faka‵sao ne koe latou i taimi katoa ona ko te lasi o tou alofa fakamagalo.+ 29 E tiga eiloa ne avatu ne koe a fakamasauaga ki a latou ke ‵foki mai ki tau Tulafono, ne fai ne latou a faifaiga fakamata‵mata kae ita ma faka‵logo ki au fakatonuga;+ kae ne agasala latou ki au tulafono fo‵liki, kolā e ola i ei te tino māfai e fakalogo ki ei.+ Kae ne fulitua atu latou ki a koe mo te loto ma‵keke kae ita ma faka‵logo. 30 Ne kufaki eiloa koe i a latou+ i tausaga e uke kae fakamasaua atu faeloa tou agaga ki a latou e auala i au pelofeta, kae ita latou ma faka‵logo. Fakamuli loa, tuku atu ei ne koe latou ki lima o tino mai nisi fenua.+ 31 Kae ona ko te lasi o tou alofa fakamagalo ne seki ‵ta fakapalele atu ne koe latou+ io me tiaki ne koe, me i a koe se Atua alofa atafai kae alofa fakamagalo.+

32 “Kae nei la, e te motou Atua, te Atua sili kae malosi kae fakaofoofogia, telā ne tausi ki tena feagaiga kae fakaasi atu te alofa fakamaoni,+ ke mo a ma manatu māmā koe ki mea faiga‵ta ko oko ki a matou, omotou tupu, omotou pelenise,+ omotou faitaulaga,+ omotou pelofeta,+ omotou tupuga mo ou tino katoa mai aso o tupu o Asulia+ ke oko mai eiloa ki te aso nei. 33 A koe e amiotonu faeloa i mea katoa kolā ne oko mai ki a matou, me i a koe e gasuesue mo te fakamaoni; kae ko matou ne fai ne matou a mea ma‵sei.+ 34 Kae e pelā mo omotou tupu, omotou pelenise, omotou faitaulaga mo omotou tupuga, ne seki tausi latou ki tau Tulafono io me ‵saga tonu atu ki au fakatonuga io me ko au fakamasauaga kolā ne fakailoa ne koe ki a latou. 35 I te taimi foki eiloa ne ‵nofo ei latou i te lotou malo kae maua ne latou a mea ‵lei e uke kolā ne tuku ne koe ki a latou kae ‵nofo i se laukele lauefa kae ola ‵lei telā ne avatu ne koe ki a latou, ne seki tavini eiloa latou ki a koe+ kae seki ‵fuli foki kea‵tea mai olotou faifaiga ma‵sei. 36 Kae konei matou ko pologa i te aso nei+—ao, ko pologa i te fenua ne avatu ne koe ki omotou tupuga ke ‵kai ki fuataga mo mea ‵lei i ei. 37 A fuataga e uke e ‵fua mai i ei e tuku atu ki tupu kolā ne fai ne koe ke pule i a matou ona ko omotou agasala.+ E pule mai latou ki omotou foitino mo omotou lafu manu, e ‵tusa mo te mea e ma‵nako ki ei, kae ko puapuagatia malosi eiloa matou i ei.

38 “Ona ko mea katoa konei, ko fai ne matou se feagaiga+ kae tusi ki lalo, kae fakatalitonugina e auala i te fakamailoga a omotou pelenise, omotou tino Levi mo omotou faitaulaga.”+