Esekielu

36 “E pelā mo koe e te tama a te tagata, ‵valo atu e uiga ki mauga o Isalaelu kae fai atu, ‘E mauga o Isalaelu, faka‵logo mai ki te fekau a Ieova. 2 Konei a pati a te Aliki Sili ko Ieova ne fai mai: “A te fili ne faipati ‵teke atu ki a koutou, ‘A! A koga ma‵luga i aso mua ko fai mō tatou!’”’+

3 “Tela la, ‵valo kae fai atu, ‘Konei a pati a te Aliki Sili ko Ieova ne fai mai: “Ona ko latou ne fakamasei kae taua atu ki a koutou mai feitu katoa, ko te mea ke fai koutou mo kope o tino ne ‵sao* mai i atufenua kae ko tino e tumau i te fai‵pati e uiga ki a koutou kae fatufatu koutou,+ 4 tela la, e mauga o Isalaelu, faka‵logo mai ki te fekau a te Aliki Sili ko Ieova! Konei a pati a te Aliki Sili ko Ieova ne fai ki mauga mo tamā mauga, ki tamā vaitafe mo vanu, ki koga ne fakamasei kolā ko se aoga,+ mo fakai ne tiakina kolā ne ‵fao a mea i ei kae fakatauemu atu ki ei a tino o atufenua i olotou tafa kolā ne ‵sao;+ 5 ne fai atu a te Aliki Sili ko Ieova ki a latou konei: ‘I te afi o toku kaitaua+ ka faipati ‵teke atu ei au ki tino o atufenua kolā ne ‵sao kae ‵teke atu ki Etoma kātoa,+ ko latou kolā ne puke ne latou toku laukele mo te fiafia lasi mo te fakatauemu lasi ke fai mo olotou kope, ke puke ana laukele moukuā kae ke ‵fao ne latou.’”’+

6 “Tela la, ‵valo atu e uiga ki te fenua o Isalaelu, kae fai atu ki mauga mo tamā mauga, ki tamā vaitafe mo vanu, ‘Konei a pati a te Aliki Sili ko Ieova ne fai mai: “Kiloke! Ka faipati au i toku ita mo toku kaitaua malosi, me ne tauave ne koutou te masiasi mai i atufenua.”’+

7 “Tela la, konei a pati a te Aliki Sili ko Ieova ne fai mai: ‘Ko sisi aka toku lima o tauto me i atufenua ‵pili mai ka tauave ne latou te lotou masiasi.+ 8 Kae ko koutou, e mauga o Isalaelu, ka ‵somo aka otou kaula kae ‵fua otou fuataga mō oku tino Isalaelu,+ me ko pili fua o ‵foki mai latou. 9 Me i a au e fakatasi mo koutou, kae ka ‵fuli atu au ki a koutou, kae ko koutou ka fakagalue kae ‵toki ki fuaga. 10 Ka fakatokouke ne au otou tino​—ko te kāiga kātoa o Isalaelu, ko latou katoa​—kae ka isi ne tino e ‵nofo i fakai+ kae ko mea ne fakamasei ka toe faite aka.+ 11 Ao, ka fakatokouke ne au otou tino mo otou lafu manu;+ ka tokouke latou kae ‵fua malosi mai. Kae ka fai ne au ke ‵nofo a tino i a koutou e pelā mo taimi mua,+ kae ka fai ne au koutou ke sili atu te otou manuia i lō aso ko ‵teka;+ kae ka iloa ei ne koutou i a au ko Ieova.+ 12 Ka fai ne au a tino​—ko oku tino Isalaelu​—ke sa‵sale i luga i a koutou, kae ka puke ne latou a koutou.+ Ka fai koutou mo olotou tofi, kae ka se toe fai ne koutou a latou ke seai ne olotou tama.’”+

13 “Konei a pati a te Aliki Sili ko Ieova ne fai mai: ‘Ona ko latou ne fai atu ki a koutou, “A koutou se fenua ‵kai tino kae fai ke seai ne tama‵liki a otou atufenua,”’ 14 ‘tela la, a koutou ka se toe ‵kai tino io me fai ke seai ne tama‵liki i otou atufenua,’ ko te folafolaga a te Aliki Sili ko Ieova. 15 ‘Ka se toe fai ne au koutou ke ‵logo i fakamaseiga o atufenua io me fai ke tauave ne koutou a pati fakatauemu a tino,+ kae ka se toe fai ne koutou ke ‵siga otou atufenua,’ ko te folafolaga a te Aliki Sili ko Ieova.”

16 Kae ne toe oko mai te fekau a Ieova ki a au, ana muna: 17 “Te tama a te tagata, i te taimi ne ‵nofo ei te kāiga o Isalaelu i te lotou fenua, ne fakalailai ne latou ki olotou amioga mo olotou faifaiga.+ A olotou amioga e lai‵lai eiloa e pelā me se fafine e masaki fakafafine.+ 18 Tenā ne ‵ligi ei ne au toku kaitaua ki luga i a latou ona ko toto ne fakamaligi ne latou ki luga i te laukele+ kae ona ko te fakalailaiga ne latou o te laukele ki olotou tupua fakatakalia‵lia.+ 19 Tenā ne fakasalalau atu ei ne au latou ki atufenua kae fakamavaevae atu latou i luga i te fenua.+ Ne fakamasino ne au latou e ‵tusa mo olotou amioga kae e ‵tusa foki mo olotou faifaiga. 20 Kae i te lotou oloatuga ki atufenua konā, a tino ne seki āva ki toku igoa tapu+ mai te fai atu e uiga ki a latou, ‘Konei a tino o Ieova, e ‵tau o tiaki ne latou te fenua.’ 21 Tela la, ka fakaasi atu ne au a toku manavase ki toku igoa tapu, telā e se āva ki ei a te kāiga o Isalaelu i atufenua ne olo latou ki ei.”+

22 “Tela la, fai atu ki te kāiga o Isalaelu, ‘Konei a pati a te Aliki Sili ko Ieova ne fai mai: “E se ona ko koutou ne gasue ei au, e te kāiga o Isalaelu, kae ona ko toku igoa tapu, telā ne seki āva koutou ki ei i atufenua ne olo koutou ki ei.”’+ 23 ‘Ka faka‵malu eiloa ne au toku igoa sili,+ telā ne seki āva ki ei a atufenua, telā ne seki āva koutou ki ei; kae ka iloa ei ne atufenua i a au ko Ieova,’+ ko te folafolaga a te Aliki Sili ko Ieova, ‘māfai ko fakamaluga aka au i loto i a koutou i mua o latou. 24 Ka puke ne au koutou mai i atufenua kae fakamaopoopo mai koutou mai i fenua katoa kae aumai koutou ki loto i te otou fenua.+ 25 Ka fakamatulutulu ne au a vai ‵ma ki luga i a koutou, kae ka ‵ma i ei koutou;+ ka faka‵ma ne au koutou mai i otou lailaiga katoa+ kae mai i otou tupua fakatakalia‵lia katoa.+ 26 Ka tuku atu ne au ki a koutou se loto fou+ kae tuku atu se agaga fou ki loto i a koutou.+ Ka ave kea‵tea ne au mai i otou foitino a te loto telā e makeke pelā me se fatu+ kae tuku atu ki a koutou se loto malū. 27 Ka tuku atu ne au toku agaga ki loto i a koutou, kae ka fai ne au koutou ke sa‵sale i aku tulafono fo‵liki,+ kae ka tausi ne koutou kae fai a ikuga o aku fakamasinoga. 28 Tenā ka ‵nofo ei koutou i te fenua ne tuku atu ne au ki otou tupuga, kae ka fai koutou mo oku tino kae ka fai au mo otou Atua.’+

29 “‘Ka faka‵sao ne au koutou mai i otou tulaga sē ‵ma katoa kae fakatonu atu ki saito ke ‵fua malosi, kae ka se aumai ne au te oge ki luga i a koutou.+ 30 Ka fai ne au ke uke ‵ki a fuagalakau o te lakau mo fuataga o te laukele, ko te mea ke se toe masiasi koutou i atufenua ona ko te oge.+ 31 Tenā ka masaua ei ne koutou otou amioga matagā mo otou faifaiga sē ‵lei, kae ka takalia‵lia koutou ki a koutou eiloa ona ko otou mea ‵se mo otou faifaiga fakatakalia‵lia.+ 32 Kae ke iloa ne koutou te mea tenei: E se fai ne au te mea tenei ona ko koutou,’+ ko te folafolaga a te Aliki Sili ko Ieova. ‘I lō te fai penā, ke ‵ma kae masiasi ona ko otou amioga, e te kāiga o Isalaelu.’

33 “Konei a pati a te Aliki Sili ko Ieova ne fai mai: ‘I te aso e faka‵ma ei ne au koutou mai i otou mea ‵se katoa, ka fai ne au a fakai ke isi ne tino e ‵nofo i ei+ kae ke toe faite a mea kolā ne fakamasei.+ 34 Ka toe fakagalue aka te laukele telā ne fakamaseigina kae ne tuku tiaki ke onoono ki ei so se tino e ui atu i ei. 35 Kae ko tino ka fai aka: “A te laukele telā ne tuku tiaki ko fai pelā mo te fatoaga o Etena,+ kae ko fakai kolā ne fakamasei kae tuku tiaki kae ofa ki lalo ko fai nei pelā me ne fakai ma‵losi kae ‵nofo a tino i ei.”+ 36 Kae ko atufenua i otou tafa kolā ne ‵toe mai ka iloa ne latou i a au, Ieova, ne faite aka ne au a mea ne ofa ki lalo, kae ‵toki a mea ne fakamaseigina. Ko au, Ieova, ne faipati, kae ne fai eiloa ne au te mea tenā.’+

37 “Konei a pati a te Aliki Sili ko Ieova ne fai mai: ‘Ka fai foki ne au a te kāiga o Isalaelu ke fakamolemole mai ke fai ne au te mea tenei mō latou: Ka fakatokouke ne au olotou tino ke pelā me se lafu mamoe. 38 E pelā mo te lafu o tino tapu, e pelā mo te lafu o Ielusalema i taimi o ana ‵kaiga fia‵fia,+ a fakai kolā ne fakamaseigina ka ‵fonu i lafu tino;+ kae ka iloa ei ne latou i a au ko Ieova.’”