Te Lua Nofoaiga Tupu

32 Mai tua o faifaiga fakamaoni+ konei a Hesekia, ne vau a te tupu o Asulia ko Sanelivi o taua mai ki Iuta. Ne nikoi ne ia a fakai e puipui faka‵lei, kae manako o ofa ne ia a ‵pui o fakai konā kae puke latou.+

2 I te laveaga ne Hesekia i a Sanelivi ne vau mo te manakoga ke taua atu ki Ielusalema, 3 ne fakaiku aka ne ia, mai tua o fai‵patiga ne fai mo ana pelenise mo ana toa ‵mafi, ke ‵pono a vai o vaipuna i tua o te fakai,+ kae ne ‵lago atu latou ki a ia. 4 Ne maopoopo fakatasi a tino e tokouke, kae ‵pono ne latou a vaipuna mo te vaitafe foliki telā e ‵tafe i loto i te fakai, kae fai atu: “Kaia fua la ka o‵mai ei a tupu o Asulia ke maua ne latou a vai e uke i konei?”

5 E se gata i ei, ne toe faite aka ne ia mo te loto malosi a te ‵pui kātoa telā ne ofa ki lalo kae faka‵tu a taoa i luga i ei, kae mai tua i ei ne faite ne ia te suā ‵pui. Ne toe faite faka‵lei foki ne ia te Koga Maluga*+ o te Fakai o Tavita, kae ne faite ne ia a meatau e uke mo talita. 6 Tenā ne ‵tofi aka ei ne ia a takitaki kautau o tino kae fakamaopoopo mai latou ki te malae o te fakai kae fakamalosi atu ki a latou,* ana muna: 7 “Ke loto ‵toa kae loto ma‵losi. Sa ma‵taku io me pole‵pole ona ko te tupu o Asulia+ mo tino e tokouke e ‵kau mo ia, me e tokouke atu tatou i lō ana tino.+ 8 E maua ne ia te malosi o te tagata,* kae ko tatou e ‵kau fakatasi mo Ieova te ‵tou Atua o fesoasoani mai ki a tatou o taua i ‵tou taua.”+ Kae ne maua ne tino a fakamalosiga mai pati a te tupu o Iuta+ ko Hesekia.

9 Mai tua o te mea nei, kae ko te tupu o Asulia ko Sanelivi e nofo atu i Lakisa+ fakatasi mo ana sotia katoa, ne uga ne ia ana tavini ki Ielusalema ki te tupu o Iuta ko Hesekia mo tino Iutaia katoa i Ielusalema,+ kae fai atu:

10 “Konei a pati a te tupu o Asulia ko Sanelivi ne fai mai, ‘Se a te mea e tali‵tonu koutou ki ei kae tumau koutou i te ‵nofo i Ielusalema i te taimi e nikoi i ei?+ 11 E a, e se takitaki‵segina koutou ne Hesekia kae tuku atu koutou ke ‵mate i te oge mo te fiainu, kae fai atu: “Ka faka‵sao tatou ne Ieova te ‵tou Atua mai i lima o te tupu o Asulia”?+ 12 E a, e se ko Hesekia foki tenā ne ave kea‵tea ne ia a koga ma‵luga+ a te otou Atua mo Ana fatafaitaulaga+ kae oti aka ko fai atu ki Iuta mo Ielusalema: “E ‵tau o ifo koutou i mua o te fatafaitaulaga e tasi kae e ‵tau o ofo atu ne koutou i ei a taulaga ke fanaka te au mai i ei”?+ 13 E se iloa ne koutou a mea ne fai ne au mo oku tupuga ki tino katoa o nisi fenua?+ E a, ne mafai ne atua o nisi atufenua o faka‵sao olotou fenua mai oku lima?+ 14 Ko oi mai atua katoa o atufenua konei ne fakaseai ne oku tupuga ne mafai o faka‵sao ne ia ana tino mai oku lima, ko te mea ke mafai ne te otou Atua o faka‵sao koutou mai oku lima?+ 15 Nei la, sa talia ne koutou a Hesekia ke fakaloiloi io me takitaki ‵se ne ia koutou penei!+ Sa fakatuanaki ki a ia, me e seai se atua o se atufenua io me se malo ne mafai o faka‵sao ne ia ana tino mai oku lima mo lima o oku tupuga. E sili atu la te sē mafai ne te otou Atua o faka‵sao koutou mai oku lima!’”+

16 E uke atu a nisi pati ne fai ne tena tavini o ‵teke atu ki a Ieova te Atua tonu kae ‵teke atu foki ki tena tavini ko Hesekia. 17 Ne tusi atu foki ne ia a tusi+ e taku fakamasei ei a Ieova te Atua o Isalaelu+ kae faipati ‵teke atu ki a ia, ana muna: “E pelā mo atua o nisi atufenua kolā e se mafai o faka‵sao olotou tino mai oku lima,+ e penā foki a te Atua o Hesekia ka se faka‵sao ne ia ana tino mai oku lima.” 18 Ne paka‵laga atu latou i te ‵gana a tino Iutaia ki tino o Ielusalema i luga i te ‵pui, ke fai ei latou ke ma‵taku kae pole‵pole, ko te mea ke mafai o puke ne latou te fakai.+ 19 Ne faipati ‵teke atu latou ki te Atua o Ielusalema e pelā eiloa mo olotou pati ‵teke ki atua o tino o te lalolagi, kolā ne faite fua ki lima o tāgata. 20 Kae ko te Tupu ko Hesekia mo te pelofeta ko Isaia+ te tama tagata a Amota, ne tumau eiloa i te ‵talo atu e uiga ki te mea tenei kae ka‵laga atu ki te lagi mō se fesoasoani.+

21 Tenā ne uga atu ei ne Ieova se agelu kae ‵ta fakapalele ne ia a toa ‵mafi katoa,+ takitaki mo aliki i te koga e ‵nofo ei te kautau a te tupu o Asulia, kae ne foki a ia ki tena fenua mo te masiasi. Ne ulu fakamuli atu a ia ki te fale* o tena atua, kae i konā eiloa ne ta ei a ia ne ana nisi tama tāgata ki te pelu.+ 22 Ne fakasao ne Ieova a Hesekia mo tino katoa i Ielusalema mai i lima o te tupu o Asulia ko Sanelivi mo lima o nisi tino katoa kae tuku atu ki a latou te filemu i feitu katoa. 23 Kae tokouke a tino ne aumai olotou meaalofa ki a Ieova i Ielusalema mo mea ‵gali ki te tupu o Iuta+ ko Hesekia, kae ne āva malosi a tino katoa o atufenua ki a ia mai tua o mea konā.

24 I aso konā a Hesekia ne masaki kae toeitiiti eiloa ko mate, kae ne ‵talo a ia ki a Ieova+ telā ne tali atu ki a ia kae tuku atu ki a ia se fakailoga.+ 25 Kae ko Hesekia ne seki saga atu mo te loto fakafetai ki mea ‵lei ne fai atu ki a ia me ko maua ne ia te loto fakamaualuga, kae ne oko atu te kaitaua o te Atua ki a ia e pelā foki mo Iuta mo Ielusalema. 26 Kae ne fakamalalo ne Hesekia a ia eiloa mai tena loto fakamatamata,+ ko ia mo tino Ielusalema, kae ne seki oko atu te kaitaua o Ieova ki a latou i aso o Hesekia.+

27 Kae ne maua ne Hesekia a koloa e uke mo te ‵malu sili;+ kae ne faite ne ia ana fale ‵teu koloa+ e ‵teu i ei a siliva, aulo, fatu tāua, sinu pasama, talita mo nisi mea tāua katoa. 28 Ne faite foki ne ia a koga mo tausi ei a saito mo te uaina fou mo sinu, e pelā foki mo koga e tausi ei a lafu manu kese‵kese katoa mo koga e tausi ei a lafu mamoe. 29 Ne maua foki ne ia a fakai ma ia mo lafu manu e uke, lafu mamoe mo lafu pulumakau, me ne tuku atu ne te Atua ki a ia a kope e uke. 30 Ko Hesekia ne ‵pono ne ia a te mata tafa ki luga o te vai+ o Kaiona+ kae fai ne ia ke ‵sali tonu atu ki te feitu ki togala o te Fakai o Tavita,+ kae ne manuia eiloa a Hesekia i ana galuega katoa ne fai. 31 Kae i te taimi ne uga atu ei a sui o pelenise o Papelonia ke fesili atu ki a ia e uiga ki te fakailoga+ telā ne tupu i te fenua,+ ne tuku a ia ne te Atua tonu ke nofo tokotasi ke tofotofo aka ei a ia,+ ko te mea ke iloa aka a mea katoa i tena loto.+

32 Kae ko te tala fakasolopito kātoa o Hesekia mo ana faifaiga alofa fakamaoni,+ e tusi katoa i te fakaasiga a te pelofeta ko Isaia,+ te tama tagata a Amota, i te Tusi o Tupu o Iuta mo Isalaelu.+ 33 Tenā ne takato ifo ei a Hesekia o malō‵lo fakatasi mo ana tupuga, kae ne tanu ne latou a ia i te ‵sifoga ki te koga e tanu ei a tama tāgata a Tavita;+ kae ko tino Iuta mo Ielusalema kātoa ne fakaaloalo ki a ia i tena mate. Kae ko tena tama tagata ko Manase ne fai mo tupu e sui ei a ia.