Ielemia

35 Ko te fekau ne oko mai ki a Ielemia mai i a Ieova i aso o Ieoiakimo+ te tama tagata a Iosia te tupu o Iuta, ana muna: 2 “Fano ki te fale o tino Lekapa+ kae faipati atu ki a latou kae aumai latou ki te fale o Ieova, ki loto i se potu ‵kai e tasi i ei; kae tuku atu a uaina ke inu latou i ei.”

3 Tenā ne puke ei ne au a Iasania te tama tagata a Ielemia te tama tagata a Hapasinia, ana taina, mo ana tama tāgata katoa, mo te kāiga katoa o tino Lekapa 4 ki loto i te fale o Ieova. Ne aumai ne au latou ki te potu ‵kai o tama tāgata a Hananu te tama tagata a Ikitalia, te tagata o te Atua tonu, telā e tu i tafa o te potu ‵kai o pelenise telā e tu mai i luga o te potu ‵kai o Maseia te tama tagata a Saluma te tino tausi mataloa. 5 Tenā ne tuku atu ei ne au a ipu mo ipu uaina i mua o tāgata o te kāiga o tino Lekapa kae fai atu ki a latou: “Inu ki uaina.”

6 Kae ne fai atu latou: “A matou e se inu ki uaina me i a Ionatapa+ te tama tagata a Lekapa, te motou tupuga ne fai mai ne ia te fakatonuga tenei ki a matou, ‘E se ‵tau mo koutou io me ko otou tama tāgata o inu ki uaina. 7 Kae e se ‵tau mo koutou o faite se fale, ‵toki fuaga, io me ‵toki io me fai se togavine. Kae e ‵tau mo koutou o ‵nofo faeloa i faleie, ko te mea ke ola koutou i se taimi leva i te laukele telā e ‵nofo koutou i ei e pelā me ne tino fakaa‵tea.’ 8 Tenā ne faka‵logo eiloa matou ki te leo o Ionatapa te tama tagata a te motou tupuga ko Lekapa i mea katoa kolā ne fakatonu mai ne ia ki a matou, ke mo a eiloa e inu ki uaina, ko matou, omotou avaga fāfine, omotou tama tāgata mo omotou tama fāfine. 9 Kae ko matou e se faite a fale mo omotou ‵nofo, io me isi ne omotou togavine io me ne fatoaga io me ne fuaga. 10 E ‵nofo faeloa matou i faleie kae faka‵logo ki mea katoa ne fakatonu mai ne Ionatapa te motou tupuga ki a matou. 11 Kae i te taimi ne vau ei te tupu o Papelonia ko Nepukanesa* o taua mai ki te motou fenua,+ ne fai aka matou, ‘O‵mai, ‵tou olo ki Ielusalema ke ‵sao tatou mai i te kautau a tino Kaletaia mo tino Sulia,’ kae nei la ko ‵nofo matou i Ielusalema.”

12 Kae ne oko mai te fekau a Ieova ki a Ielemia, ana muna: 13 “Konei a pati a Ieova o kautau, te Atua o Isalaelu ne fai mai, ‘Fano o fai ki tāgata o Iuta mo tino e ‵nofo i Ielusalema: “E a, ne seki fakamalosi atu faeloa ki a koutou ke faka‵logo ki aku muna?”+ ko te folafolaga a Ieova. 14 “A Ionatapa te tama tagata a Lekapa ne fakatonu atu ki tino ne ‵tupu mai i a ia ke se inu ki uaina, kae ne tausi latou ki ana muna mai te sē inu ki ei ke oko mai ki te aso nei, ne faka‵logo eiloa latou ki te fakatonuga a te lotou tupuga.+ Kae ko au ne faipati atu faeloa ki a koutou, kae e seki faka‵logo eiloa koutou ki a au.+ 15 Kae ne uga atu faeloa ne au aku tavini katoa ko pelofeta ki a koutou, ne uga atu faeloa+ ne au latou ke fai atu, ‘Fakamolemole, ‵fuli mai koutou katoa mai i otou auala ma‵sei,+ kae fai te mea ‵lei! Ke mo a ma sa‵sale i tua o nisi atua kae tavini atu ki a latou. Kae ka ‵nofo faeloa koutou i te fenua ne tuku atu ne au ki a koutou mo otou tupuga.’+ Kae ko koutou ne seki tuku mai otou taliga io me faka‵logo mai ki a au. 16 A tino ne ‵tupu mai i a Ionatapa te tama tagata a Lekapa ne tausi ki te fakatonuga ne fai atu ne te lotou tupuga ki a latou,+ kae ko tino konei ne seki faka‵logo mai ki a au.”’”

17 “Tela la, konei a pati a Ieova, te Atua o kautau, te Atua o Isalaelu ne fai mai: ‘Ko aumai nei ne au ki luga i Iuta mo tino kolā e ‵nofo i Ielusalema a fakalavelave katoa kolā ne fakailoa atu ne au ki a latou,+ me ko oti au ne faipati ki a latou, kae e se faka‵logo mai, kae ne kalaga atu faeloa au ki a latou, kae e se tali mai latou.’”+

18 Kae ne fai atu a Ielemia ki te kāiga o tino Lekapa: “Konei a pati a Ieova o kautau, te Atua o Isalaelu ne fai mai, ‘Ona ko koutou ne faka‵logo ki te fakatonuga a te otou tupuga ko Ionatapa kae ne tumau koutou i te tausiga o ana fakatonuga katoa, kae fai a mea katoa ne fakatonu mai ne ia, 19 konei a pati a Ieova o kautau, te Atua o Isalaelu ne fai mai: “Ka isi faeloa se tino e tupu mai i a Ionatapa te tama tagata a Lekapa e tavini mai i oku mua.”’”