Esoto

13 Ne toe faipati atu a Ieova ki a Mose, ana muna: 2 “Fakatapu* kae tuku mai ki a au a toekimua tāgata* katoa a tino Isalaelu. Ko te tama tagata muamua e fanau, faitalia me se tino io me se manu, e tuku ma aku.”+

3 Tenā ne fai atu ei a Mose ki tino Isalaelu: “Ke masaua a te aso tenei ne olo ei koutou kea‵tea mai i Aikupito,+ mai i te koga ne ‵nofo pologa ei koutou, me ne aumai koutou kea‵tea ne Ieova mai konā e auala i tena lima malosi.+ Tela la, e seai se mea faka‵fete e ‵tau o ‵kai koutou ki ei. 4 A koutou ka olo kea‵tea i te aso tenei i te masina o Apipa.*+ 5 Kafai ko aumai ne Ieova koutou ki loto i te fenua o tino Kanana, tino Heti, tino Amoli, tino Hivi mo tino Iepuse,+ ko te fenua telā ne tauto atu a ia ki otou tupuga ke tuku atu ki a koutou,+ se fenua telā e ‵tafe i ei a susu mo hani,+ e ‵tau eiloa o tausi ne koutou te fakamanatuga tenei i te masina tenei. 6 E fitu aso e ‵kai ei koutou ki falaoa sē faka‵fete,+ kae i te fitu o aso e fai ei se ‵kaiga fiafia ki a Ieova. 7 Ko falaoa sē faka‵fete fua e ‵tau o ‵kai koutou ki ei i aso e fitu;+ kae e seai eiloa se mea faka‵fete e ‵tau o maua atu i a koutou,+ kae seai foki ne falaoa ne palu ki te isi e ‵tau o maua atu i otou kogā fenua* katoa. 8 Kae i te aso tenā, e ‵tau o fai atu koe ki tau tama tagata, ‘E fai ne au te mea tenei ona ko te mea telā ne fai ne Ieova ki a au i te taimi ne vau ei au ki tua mo Aikupito.’+ 9 Kae ka fai a te mea tenei e pelā me se fakailoga i luga i tou lima mo se fakamasauaga i luga i tou lae,*+ ko te mea ke faipati ne koe te tulafono a Ieova, me ne aumai ne Ieova a koe kea‵tea mai i Aikupito e auala i tena lima malosi. 10 E ‵tau o tausi ne koe te tulafono fakavae tenei i tena taimi tonu i tausaga katoa.+

11 “Kafai ko aumai koe ne Ieova ki loto i te fenua o tino Kanana, telā ne tauto atu ei a ia ki a koe mo ou tupuga ke tuku atu ki a koe,+ 12 e ‵tau o tuku atu ne koe ki a Ieova a toekimua tāgata* katoa, e pelā foki mo tama tāgata muamua a lafu manu a koe. A tama tāgata katoa e a Ieova.+ 13 A tama muamua a asini katoa e ‵tau o sui ne koe ki se mamoe, kae kafai e se sui ne koe ko ‵fati ei ne koe tena ua. Kae ko toekimua tāgata katoa a au tama tāgata e ‵tau o sui ne koe.+

14 “Kae kafai e fesili fakamuli atu tau tama tagata, ‘Se a te uiga o te mea tenei?’ ko fai atu ei koe, ‘E auala i tena lima malosi ne aumai matou ne Ieova ki tua mo Aikupito, te koga ne ‵nofo pologa ei matou.+ 15 I te taimi ne ita fitifiti ei a te Falao ma uga atu matou ke olo kea‵tea,+ tamate ei ne Ieova a toekimua katoa i te fenua o Aikupito, mai i toekimua a tino ke oko ki toekimua a manu.+ Tenā te pogai e ofo atu ei ne au ki a Ieova a toekimua tāgata* katoa e pelā me ne taulaga, kae e sui ne au a toekimua katoa a aku tama tāgata.’ 16 E ‵tau o fai a te mea tenei e pelā me se fakailoga i luga i tou lima, kae e pelā me se mea ‵sai ulu i tou lae,*+ me e auala i tena lima malosi ne aumai ne Ieova matou ki tua mo Aikupito.”

17 I te taimi ne uga atu ei ne te Falao a tino Isalaelu ke olo, ne seki ‵taki ne te Atua a latou ke olo i loto i te fenua o tino Filisitia, faitalia me e pili mai te auala tenā. Me ne fai aka te Atua: “E mafai o ‵fuli a mafaufauga o tino māfai e taua atu ne tino ki a latou, ko toe ‵foki ei ki Aikupito.” 18 Ne fai ne te Atua ke olo ana tino i loto i te koga lavaki e pili ki te Tai Kula.+ Kae ne olo kea‵tea a tino Isalaelu mai i te fenua o Aikupito e pelā me se potukau o sotia e toka o olo atu o taua. 19 Ne puke foki ne Mose a ivi o Iosefa, me ne fai ne Iosefa a tino Isalaelu ke tau‵to atu ki a ia: “Ka saga atu eiloa te Atua ki a koutou, kae e ‵tau o ave ne koutou oku ivi kea‵tea mai konei.”+ 20 Ne tiaki ne latou a Sukota kae ‵nofo atu i Etamo i te gataga o te koga lavaki.

21 Ne fano a Ieova i mua o latou i te ao i loto i se pou kaumana ke takitaki ei latou i te lotou auala,+ kae i loto i se pou afi i te po ke fakamaina ei latou, ko te mea ke mafai ne latou o faima‵laga i te ao mo te po.+ 22 E se mafai eiloa o gasue kea‵tea a te pou kaumana mai i mua o tino i te ao, io me ko te pou afi i te po.+