Esoto

14 Ne fai atu a Ieova ki a Mose: 2 “Fai ki tino Isalaelu ke toe ‵foki o ‵nofo i mua o Pe-hailota, i te va o Mikitolo mo te tai, i te koga telā e lavea atu i ei a Paala-sefono.+ E ‵tau o ‵nofo koutou o fakafesagai ki ei i tafa o te tai. 3 Tenā ka fai aka ei a pati a te Falao e uiga ki tino Isalaelu, ‘Ko takasē‵se kae ‵numi valevale latou i loto i te fenua. Ko se mafai latou o ‵to ki tua mo te koga lavaki.’ 4 Ka talia ne au te loto o te Falao ke makeke,+ kae ka afuli ne ia latou kae ka fai ne au ke fakaaloalogina au e auala i te Falao mo tena kautau kātoa;+ kae ka iloa ei ne tino Aikupito i a au ko Ieova.”+ Tenā eiloa te mea ne fai ne latou.

5 Fakamuli ifo, ne fakailoa atu ki te tupu o Aikupito me ko oti ne ‵tele kea‵tea a tino Isalaelu. Ne ‵fuli fakavave te kilokiloga a te Falao mo ana tavini e uiga ki tino Isalaelu,+ kae fai aka: “Kaia ne fai ei ne tatou a te mea tenei kae fakasaoloto atu a tino Isalaelu mai te tavini mai ki a tatou e pelā me ne pologa?” 6 Ne fakatoka ne ia ana kaliota tau, kae puke aka ana sotia ke olo mo ia.+ 7 Ne puke ne ia ana toe kaliota ‵lei eiloa e 600 mo nisi kaliota katoa i Aikupito, fakatasi mo sotia i luga i kaliota takitasi katoa. 8 Tela la, ne talia ne Ieova a te loto o te Falao te tupu o Aikupito ke makeke, kae ne afuli ne ia a tino Isalaelu, kolā ko olo kea‵tea mo te loto ma‵losi.*+ 9 Ne afuli ne tino Aikupito a latou,+ kae ko kaliota katoa a te Falao mo olotou solofanua mo ana sotia i luga i solofanua mo tena kautau kātoa ko pili atu eiloa ki tino Isalaelu kae koi ‵nofo latou i tafa o te tai telā e pili ki Pe-hailota kae fakafesagai atu ki Paala-sefono.

10 I te piliatuga a te Falao, ne ‵kilo aka a tino Isalaelu kae lavea ne latou a tino Aikupito e olo atu o afuli latou. Ne ma‵taku a tino Isalaelu kae kamata o ‵tagi atu ki a Ieova.+ 11 Ne fai atu latou ki a Mose: “E a, e seai ne tanuga i Aikupito ko aumai ei ne koe matou ki konei ke ‵mate i te koga lavaki?+ Se a te mea ko fai ne koe ki a matou i te ‵takimaiga o matou kea‵tea mai i Aikupito? 12 E a, e se tenei te mea ne fai atu ne matou ki a koe i Aikupito i omotou pati, ‘Tuku malie ei matou, ko te mea ke tavini atu matou ki tino Aikupito’? Me e ‵lei atu ke tavini matou ki tino Aikupito i lō te ‵mate i te koga lavaki.”+ 13 Tenā ne fai atu ei a Mose ki a latou: “Sa ma‵taku.+ Tu ‵mautakitaki kae ‵kilo ki te fakaolataga a Ieova, telā ka fai ne ia mō koutou i te aso nei.+ Me i tino Aikupito kolā e lavea ne koutou i te aso nei ka se toe lavea eiloa ne koutou.+ 14 Ko Ieova eiloa ka taua mō koutou,+ kae ko koutou ka ‵nofo fifilemu.”

15 Ne fai atu a Ieova ki a Mose: “Kaia e kalaga ‵soko mai ei koe ki a au? Fai ki tino Isalaelu me ko ‵tau latou o olo. 16 Kae e pelā mo koe, sisi aka tou tokotoko kae ‵fola atu tou lima ki luga i te tai ko vaelua ei, ko te mea ke olo atu a tino Isalaelu i loto i te tai i luga i te laukele malō. 17 Kae ka talia eiloa ne au a loto o tino Aikupito ke ma‵keke, ko te mea ke tau‵tali atu latou i olotou tua; kae ka fai ne au ke fakaaloalogina au e auala i te Falao mo tena kautau kātoa, ana kaliota tau mo ana sotia i luga i solofanua.+ 18 Kae ka iloa ne tino Aikupito i a au ko Ieova māfai ko fai ne au ke fakaaloalogina au e auala i te Falao, ana kaliota tau mo ana sotia i luga i solofanua.”+

19 Tenā ne foki ei te agelu a te Atua tonu+ telā ne fano i mua o tino Isalaelu o vau i olotou tua, kae ko te pou kaumana telā ne fano i olotou mua ne gasue o tu i olotou tua.+ 20 Tela la, ne tu atu te kaumana tenā i te va o tino Aikupito mo tino Isalaelu.+ I te feitu e tasi se kaumana pouli. Kae ko te suā feitu se mainaga e maina i te po.+ Tela la, ne seki mafai eiloa ne se potukau e tasi o fakapilipili atu ki te suā potukau i te po kātoa tenā.

21 Ne ‵fola atu ne Mose tena lima ki luga i te tai;+ kae ne ‵vae ne Ieova te tai ki se matagi malosi ‵ki mai te feitu ki saegala i te po kātoa, ‵fuli ei te takelepapa mo fai se laukele malō,+ kae ne vaelua i ei te tai.+ 22 Ne olo atu a tino Isalaelu i loto i te tai i luga i te laukele malō,+ kae ko te tai ne fai pelā me se ‵pui i te lotou feitu fakaatamai mo te lotou feitu fakamaui.+ 23 Ne afuli eiloa ne tino Aikupito a latou, kae ne olo atu a solofanua katoa a te Falao, ana kaliota tau mo ana sotia i luga i solofanua mai tua o latou ki loto i te tai.+ 24 I te ‵tuga i te tafataeao,* ne kilo atu a Ieova ki tino Aikupito mai loto i te pou afi mo te kaumana,+ kae ne fai ne ia ke ‵numi a tino Aikupito. 25 Ne tapale faeloa ne ia a teka o olotou kaliota ko te mea ke faigata o faka‵tele ne latou, kae ne fai aka a tino Aikupito: “A tatou ka ‵tele kea‵tea mai tino Isalaelu, me i a Ieova e taua mai mō latou ki tino Aikupito.”+

26 Tenā ne fai atu ei a Ieova ki a Mose: “‵Fola atu tou lima ki luga i te ‵tai ko te mea ke toe foki ifo te tai ki luga i tino Aikupito, olotou kaliota tau mo olotou sotia i luga i solofanua.” 27 I konā eiloa ne ‵fola atu te lima o Mose ki luga i te tai, kae i te okoga ki te tafataeao ne toe foki a te tai ki tena tulaga masani. I te taimi ne ‵tele ei a tino Aikupito kea‵tea mai i ei, ne ‵pei atu ne Ieova a tino Aikupito ki loto i te tai.+ 28 Ne toe foki ifo te tai kae ne ‵galo atu i ei a kaliota tau mo sotia i luga i solofanua mo kautau katoa a te Falao kolā ne tau‵tali atu i a latou ki loto i te tai.+ E seai eiloa se tino i a latou ne sao.+

29 Kae ne sa‵sale atu eiloa a tino Isalaelu i luga i te laukele malō i te takelepapa o te tai,+ kae ne fai a te tai mo fai a ‵pui i te lotou feitu fakaatamai mo te lotou feitu fakamaui.+ 30 Tela la, ne faka‵sao ne Ieova a tino Isalaelu mai i lima o tino Aikupito i te aso tenā,+ kae ne lavea ne tino Isalaelu a tino Aikupito e ‵mate i te tafatai. 31 Ne lavea foki ne tino Isalaelu a te ‵mana sē fuafuagina* o Ieova i ana mea ne fai ki tino Aikupito, kae ne kamata o ma‵taku a tino ki a Ieova kae tali‵tonu ki a Ieova mo tena tavini ko Mose.+