Te Tusi Muamua a Petelu
4 Ona ko Keliso ne logo‵mae i te foitino,+ e ‵tau foki o puipui otou mafaufau ki te vaegā manatu tenā, me ko te tino telā ko oti ne logo‵mae i te foitino ko oti foki ne fakagata ne ia te faiga o agasala,+ 2 ko te mea ke se toe ola a ia mō manakoga o tino i aso koi ‵toe o tena olaga faka-te-foitino,+ kae ke ola mō te faiga o te loto o te Atua.+ 3 Me i taimi ko ‵teka ne lava ‵lei eiloa ke fai ne koutou a loto o tino o te lalolagi+ i te taimi ne fai ei ne koutou a amioga mata‵fatu mo te sē āva, ko manakoga sē pulea, te inu malosi, fakafiafiaga fai valevale, te fakatau inu kava, mo te ifo ki tupua.+ 4 Ko ‵numi olotou mafaufau me ko se tumau koutou i te ‵tele fakatasi mo latou i te auala e tasi telā e fai i ei a toe amioga ma‵sei, ko faifai muna atu ei latou ki a koutou.+ 5 Kae ka tuku atu ne tino konei se tala ki te tino telā ko toka o fakamasino ne ia a tino ola mo tino ‵mate.+ 6 E tonu, tenei te pogai ne folafola atu foki ei te tala ‵lei ki tino ‵mate,+ me e tiga eiloa e fakamasino latou i te foitino mai i te kilokiloga a tāgata, e mafai o ola latou e ‵tusa mo te agaga mai i te kilokiloga a te Atua.
7 Kae ko te gataga o mea katoa ko pili mai. Tela la, fai ke ‵lei otou mafaufau,+ ke mataala* kae ‵talo malosi koutou.+ 8 E sili atu i mea katoa, ke fakatau a‵lofa koutou,+ me e ‵tao ne te alofa a agasala e uke.+ 9 Ke fakaasi atu te uiga talimalo te suā tino ki te suā tino e aunoa mo te mui‵mui.+ 10 Ke fakaaoga a meaalofa kolā e maua ne tino taki tokotasi ke tavini atu te suā tino ki te suā tino e pelā me ne situati ‵lei o te alofa tauanoa o te Atua telā e fakaasi mai i auala kese‵kese.+ 11 Kafai e faipati se tino, ke faipati atu e pelā eiloa me e faipati a ia ki folafolaga mai te Atua; kafai e tavini atu se tino, ke tavini atu e ‵tusa mo te malosi telā e tuku atu ne te Atua;+ ko te mea ke faka‵malugina te Atua i mea katoa+ e auala i a Iesu Keliso. I o ia te ‵malu mo te ‵mana ki te se-gata-mai, se-gata-mai eiloa. Amene.
12 Aku fagasele, sa ‵poi koutou i tofotofoga e ‵ka pelā me se afi kolā e pokotia koutou i ei,+ e pelā eiloa me se mea fou ko tupu ki a koutou. 13 I lō te fai penā, ke tumau i te fia‵fia+ me ko ‵kau fakatasi koutou mo Keliso+ i ana logo‵maega, ko te mea ke fia‵fia koutou kae ke fia‵fia malosi i te taimi e fakaasi mai ei tena ‵malu.+ 14 Kafai e taku fakamasei koutou ona ko te igoa o Keliso, ke fia‵fia koutou,+ me ko nofo i luga i a koutou te agaga o te ‵malu, ao, ko te agaga o te Atua.
15 Kae ke seai se tino i a koutou e logo‵mae ona ko ia se tino tatino io me se tino kaisoa io me se tino masei io me se tino e sona kau atu fua ki mea a nisi tino.+ 16 Kae kafai e logo‵mae se tino ona ko ia se Kelisiano, ke se mā a ia i ei,+ kae ke tumau a ia i te tavae atu ki te Atua i te tauave ne ia o te igoa tenei. 17 Me ko oko ki te taimi ne fuafuagina mō te fakamasinoga ke kamata i te fale o te Atua.+ Kafai e kamata i a tatou,+ se a la te ikuga o latou kolā e se faka‵logo ki te tala ‵lei a te Atua?+ 18 “Kae kafai ne faigata o fakasao se tino amiotonu, se a la te mea ka tupu ki te tino sē amioatua mo te tino agasala?+ 19 Tela la, ke na tuku atu ne latou kolā e logo‵mae e ‵tusa mo te loto o te Atua a latou eiloa ki te Mafuaga fakamaoni i te fai ne latou o mea ‵lei.+