Galuega a Apositolo
17 Ne faima‵laga atu latou i loto i Amefipoli mo Apolonia kae oko atu ki Tesalonia,+ telā e isi se sunako o tino Iutaia i ei. 2 Ne ulu atu a Paulo ki loto i a latou e pelā eiloa mo tena masani,+ kae i sapati e tolu ne fakasako‵sako a ia mo latou ki mea mai Tusitusiga Tapu,+ 3 o fakamatala kae fakatalitonu atu e auala i mea kolā ne tusi ki lalo me ne ‵tau eiloa o puapuaga+ a te Keliso kae toe fakatu aka mai te mate,+ kae fai atu: “Tenei te Keliso, ko Iesu telā e folafola atu ne au ki a koutou.” 4 Ona ko te mea tenā, ne tali‵tonu a nisi tino i a latou kae ‵kau atu ki a Paulo mo Sila,+ e pelā foki mo tino Eleni e tokouke kolā ne tapuaki ki te Atua fakatasi mo nai fāfine lauiloa.
5 Kae ona ko te loto ma‵sei o tino Iutaia,+ ne fakamaopoopo mai ne latou a tāgata amio ma‵sei kolā e oloolo sāle fua i te maketi kae ‵taki atu e pelā me se potukau kae ne fakamakosu ne latou a te fakai kātoa. Ne ulu atu latou ki te fale o Iasona o ‵sala a Paulo mo Sila ke aumai ki te vaitino. 6 Ne seki maua ne latou a lāua, toso atu ei ne latou a Iasona mo nisi taina ki takitaki o te fakai, kae paka‵laga atu: “A tāgata konei kolā ne fakamakosu ne latou a te lalolagi nofoaki kātoa e ‵nofo foki i konei,+ 7 kae ne talimalo faka‵lei ne Iasona a latou. A tāgata katoa konei e ‵teke ki tulafono a Kaisala, i olotou muna me e isi aka foki se isi tupu, telā ko Iesu.”+ 8 Ne kaitaua malosi a te vaitino mo takitaki o te fakai i te lotou ‵logoga i mea konei; 9 kae i te otiga ne puke ne latou mai i a Iasona mo nisi tino a tupe e lava ke fakasaoloto latou, tuku atu ei ne latou ke olo.
10 Ne uga fakavave atu ne taina a Paulo mo Sila ki Pelea i te po tenā. I te lā okoatuga, olo atu ei ki loto i te sunako o tino Iutaia. 11 E sili atu a te ala o mafaufau o tino i konei i lō tino i Tesalonia, me ne talia ne latou a te muna mo te loto fia‵fia, kae suke‵suke malosi ki Tusitusiga Tapu i aso katoa o fakatalitonu aka me e mata, e ‵tonu a mea konei. 12 Tela la, ne tali‵tonu a tino e tokouke mai i a latou, e pelā foki mo nai fāfine mo tāgata Eleni lauiloa e tokouke. 13 Kae i te ‵logoga a tino Iutaia i Tesalonia me ko folafola atu foki ne Paulo te muna a te Atua i Pelea, ne o‵mai latou ki konā o fakaoso a tino i ei ke kaitāua.+ 14 Tenā ne uga fakavave atu ei ne taina a Paulo ke fano ki se koga e pili ki te tai,+ kae ne ‵nofo atu a Sila mo Timoteo i konā. 15 Kae ko latou kolā ne olo fakatasi mo Paulo ne aumai ne latou a ia ke oko ki Atenai, kae ne olo latou i te otiga ne maua ne latou a fakatonuga me i a Sila mo Timoteo+ e ‵tau o ‵mai fakavave ki a Paulo.
16 Kae koi faka‵tali a Paulo ki a lāua i Atenai, ne ‵mae tena loto* i te kilo atu me ko ‵fonu a te fakai i tupua. 17 Ne kamata o fakasakosako atu a ia i loto i te sunako mo tino Iutaia mo nisi tino kolā e tapuaki ki te Atua, e pelā foki mo tino kolā e fetaui mo ia i te maketi i aso katoa. 18 Kae ne kamata o kinau atu a nisi tino mai te kau Epikulo mo te kau Setoiko ki a ia, kae ne fai mai a nisi tino i a latou: “Se a te mea e fia fai mai ne te tino gutu fai‵tala tenei?” Ne tali mai a nisi tino: “E pelā me e folafola mai ne ia a atua fakaa‵tea.” Ne fai penā olotou pati me ne folafola atu ne ia a te tala ‵lei e uiga ki a Iesu mo tena toetu.+ 19 Ne puke ne latou a ia kae ‵taki atu ki te Aleopako,* kae fai atu: “E a, e mafai o iloa ne matou a te akoakoga fou tenā e faipati mai koe ki ei? 20 Me e ‵fou ki te motou faka‵logo a mea kolā e fai mai ne koe, kae e fia iloa ne matou a te uiga o mea konei.” 21 E tonu, a tino Atenai mo tino fakaa‵tea katoa kolā e ‵nofo i konā e fakaaoga sāle olotou taimi sao‵sao ke sau‵tala ki se mea fou io me fakalogo‵logo ki se tala fou. 22 Ne tu atu a Paulo i te kogaloto o te Aleopako+ kae fai atu:
“Tāgata Atenai, e lavea ne au me e sili atu te otou ma‵taku ki atua i lō nisi tino.+ 23 E pelā mo te mea tenei, i taku vauga i loto i te otou fakai kae kilokilo faka‵lei atu ki mea e tapuaki koutou ki ei, ne lavea ne au se fatafaitaulaga mo pati konei e tusi i ei ‘Ki se Atua e se Iloa ne Matou.’ Tela la, a te mea telā e tapuaki koutou ki ei mo te sē iloa, ko ia tenei e folafola atu ne au ki a koutou. 24 A te Atua telā ne faite ne ia a te lalolagi mo mea katoa i ei, ko ia tenā ko te Aliki o te lagi mo te lalolagi,+ e se nofo i loto i faletapu ne faite ne tino ki olotou lima.+ 25 E se manako foki ki se fesoasoani mai tino e pelā me e manako a ia ki se mea,+ me ko ia fua telā e tuku atu ne ia ki tino katoa a te ola mo te mānava+ e pelā foki mo mea katoa. 26 Kae ne faite ne ia mai i te tagata e tokotasi+ a itukāiga o tino i fenua katoa ke ‵nofo i luga i te lalolagi kātoa,+ kae ko oti ne fakatapula ne ia a taimi ‵tonu mo koga ke ‵nofo ei a tino,+ 27 ko te mea ke ‵sala atu latou ki te Atua, me kafai e ‵sala malosi latou ki a ia kae ka maua eiloa ne latou a ia,+ me i a ia e se ‵mao mai i a tatou taki tokotasi. 28 E auala i a ia ko maua ei ne tatou a te ola, e gasue‵sue, kae e iai foki tatou, e pelā eiloa mo pati a nisi tino ‵fatu kupu mai i a koutou kolā ne fai mai, ‘Me i a tatou foki ko ana tama‵liki.’
29 “Tela la, ona ko tatou ko tama‵liki a te Atua,+ e se ‵tau mo tatou o mafau‵fau me i te Atua e ‵pau mo aulo io me ko siliva io me se fatu, e pelā me se mea ne faite ki poto mo mafaufauga o tāgata.+ 30 E tonu, e seki saga atu te Atua ki te taimi koi va‵lea ei a tino,+ kae nei la ko folafola atu a ia ki tino katoa i so se koga me e ‵tau mo latou o sala‵mo. 31 Me ko oti ne fakamoe ne ia te aso telā ne fuafua ne ia ke fakamasino+ ei a te lalolagi nofoaki kātoa i te amiotonu, ne se tagata telā ko oti ne fakasopo aka ne ia, kae ko oti ne fakamautinoa mai ne ia a te mea tenā ki tino katoa mai te ‵toe fakatumaiga o te tino tenā mai te mate.”+
32 I te lagonaga ne latou a mea e uiga ki te toetu mai te mate, ne kamata o fakatauemu atu a nisi tino,+ kae ko nisi tino ne fai atu: “E fia fakalogo‵logo matou ki a koe e uiga ki te mea tenei i te suā taimi.” 33 Tenā ne tiaki ei ne Paulo a latou, 34 kae ne ‵kau atu a nisi tāgata ki a ia kae ne tali‵tonu foki. E aofia i a latou konā ko Taionusio, se famasino i te fono fakamasino i te Aleopako, mo te fafine e igoa ki a Tamali, mo nisi tino aka foki.