Te Tusi a Iakopo
1 Au ko Iakopo,+ se pologa a te Atua mo te Aliki ko Iesu Keliso ki matakāiga e 12 kolā e salalau i koga kese‵kese:
Talofa koutou!
2 Ke fia‵fia koutou, e oku taina, māfai e fe‵paki koutou mo tofotofoga kese‵kese,+ 3 me e iloa ne koutou i tofotofoga konei o te otou fakatuanaki e tupu mai i ei te kufaki.+ 4 Kae ko te kufaki ke fakaoti faka‵lei tena galuega, ko te mea ke ‵lei katoatoa koutou i feitu katoa, e aunoa mo te manako ki se mea.+
5 Tela la, kafai se tino i a koutou e se lava te poto i a ia, ke fakamolemole atu faeloa a ia ki te Atua,+ me e tuku atu ne ia mo te kaimalie ki tino katoa e aunoa mo te mafaufau ki olotou mea ‵se ne fai,+ kae ka tuku atu eiloa te mea tenā ki a ia.+ 6 Kae ke fakamolemole atu faeloa a ia i te fakatuanaki+ e aunoa mo te fakalotolotolua,+ me i te tino telā e fakalotolotolua e fai pelā mo galu o te tai kolā e peipei kae agi valevale ne te matagi. 7 E tonu, e se ‵tau mo te tagata tenā o fakamoemoe ke maua se mea mai i a Ieova;* 8 a ia se tino fakalotolotolua,+ e se ‵mautakitaki i ana auala katoa.
9 Kae ke fiafia* te taina fatauva i tena fakamalugaga,+ 10 kae ko te tino maumea i tena fakamalaloga,+ me ka fakaseai atu a ia e pelā me se pulalakau i te vao. 11 Me pelā eiloa mo te fanakaga o te la fakatasi mo tena ‵vela kae fai ei ke magemage a te lakau, ko tō ei tena pula kae galo atu te ‵gali o ana foliga i tua, e penā foki te tino maumea ka galo atu a ia i te kausaki atu ki ana galuega masani.+
12 E fiafia te tino telā e tumau i te kufaki i tofotofoga,+ me kafai ko talia a ia ne te Atua ka maua ne ia te foualiki o te ola,+ telā ne folafola mai ne Ieova* ki tino kolā e tumau i te a‵lofa ki a Ia.+ 13 Kafai e tofotofogina se tino, ke mo a ma fai mai a ia: “Au ko tofotofo ne te Atua.” Me e se mafai o tofotofogina te Atua ki mea ma‵sei io me e tofotofo ne ia se tino. 14 Kae e tofotofogina a tino taki tokotasi mai te saga atu ki takolekolega* o ana manakoga totino.+ 15 Tela la, kafai ko faitama te manakoga, ko fanau mai i ei te agasala, kae kafai ko oti ne fakataunu te agasala, ko oko mai ei te mate.+
16 Ke mo a ma faka‵segina koutou, e oku taina fagasele. 17 A meaalofa ‵lei katoa mo mea ‵lei katoatoa e maua mai luga,+ e aumai mai te Tamana o mainaga i te lagi,+ telā e se mafulifuli e pelā mo te ata o se mea e gasuesue.+ 18 Ko tena loto eiloa ke aumai ne ia tatou e auala i te muna o te munatonu,+ ko te mea ke fai tatou mo fai a fuataga muamua o ana mea ola ne faite.+
19 Ke iloa ne koutou te mea tenei, e oku taina pele: E ‵tau mo tino katoa o vave o fakalogo‵logo, kae fakatuai o fai‵pati,+ ke se ita vave,+ 20 me e se mafai o aumai ne te ita o te tagata a te amiotonu o te Atua.+ 21 Tela la, ke tiakina a mea lai‵lai mo so se mea masei,*+ kae ke talia mo te agamalu a te ‵tokiga o te muna telā e mafai o faka‵sao ne ia koutou.
22 Kae ke fai koutou mo tino kolā e fakagalue a te muna+ kae e se ko te fakalogo‵logo fua ki ei, ko fakaloiloi ei ne koutou a koutou eiloa ki manatu sē ‵tonu. 23 Me kafai se tino e fakalogologo fua ki te muna kae e se fakagalue ne ia,+ a te tino tenei e ‵pau mo se tagata telā e onoono ki ana foliga* i te kilo. 24 E onoono a ia ki ana foliga, kae kafai ko fano, puli fakavave ei ana foliga. 25 Kae ko te tino telā e onoono faka‵lei ki te tulafono ‵lei katoatoa+ o te saolotoga kae tumau i ei, ka se puli eiloa i te tino tenei a mea kolā ne lagona ne ia, kae ka fakagalue ne ia kae ka fiafia a ia i ana mea e fai.+
26 Kafai se tino e mafaufau i a ia e tapuaki ki te Atua* kae e se pule faka‵lei atu ki tena alelo,+ e fakaloiloi ne ia a tena loto, kae e seai se aoga o tena tapuakiga. 27 A te vaegā tapuakiga* telā e ‵ma kae e se lailai i te kilokiloga a te Atua te ‵tou Tamana e fai penei: ke tausi atu ki tama‵liki ko ‵mate olotou mātua+ mo fāfine ko ‵mate olotou avaga+ i olotou puapuaga,+ kae ke tumau i te ‵ma e aunoa mo se lailaiga mai te lalolagi.+