Kenese

27 I te taimi ko toeaina ei a Isaako kae ko se ‵kite ‵lei ana mata, ne kalaga atu a ia ki tena ulumatua ko Esau+ kae fai atu ki a ia: “Taku tama!” kae ne tali mai a Esau: “Tenei au!” 2 Kae ne toe fai atu a Isaako: “Au nei ko matua. E se iloa ne au te aso e mate ei au. 3 Tela la, i te taimi nei, fakamolemole, puke au mea ‵ta manu, tau kausana mo matasana kae fano ki te vao o atuli se manu i ei mō oku kai.+ 4 Tenā ko fakatoka ei ne koe te vaegā meakai telā e fiafia malosi au ki ei kae aumai ki a au. Ko kai ei ne au ko te mea ke fakamanuia koe ne au koi tuai au o mate.”

5 Kae ko Lepeka ne fakalogologo i te taimi ne faipati ei a Isaako ki tena tama ko Esau. Tenā ne fano ei a Esau ki te vao o atuli se manu ke aumai ne ia.+ 6 Kae ne fai atu a Lepeka ki tena tama ko Iakopo:+ “Ne fatoa lagona ne au a tou tamana e faipati ki tou taina ko Esau, ana muna, 7 ‘Atuli mai se manu kae fakatoka mai se meakai gali ma aku. Ko aumai ei ke kai au ki ei ko te mea ke fakamanuia ne au a koe i mua o Ieova kae koi tuai au o mate.’+ 8 Nei la, e taku tama, fakalogo faka‵lei mai kae fai a te mea telā e fakatonu atu ne au ki a koe.+ 9 Fakamolemole, fano ki te lafu kae puke mai ki a au ne tamā kouti tafasili i te ‵lei e lua, ko te mea ke fakatoka ne au mai i ei se meakai gali ma tou tamana, e pelā eiloa mo te mea e manako a ia ki ei. 10 Tenā ko ave ei ne koe ki tou tamana ke kai, ko te mea ke fakamanuia ne ia a koe koi tuai a ia o mate.”

11 Ne fai atu a Iakopo ki tena mātua ko Lepeka: “A toku taina ko Esau se tagata fulufulua,+ kae ko toku pa‵kili e molemole. 12 E a māfai e puke mai toku tamana ki a au?+ Tenā ko fai ei au e pelā me se tino loi i tena kilokiloga, kae ka aumai fua ne au ki luga i a au eiloa se fakamalaiaga i lō se fakamanuiaga.” 13 Ne fai atu tena mātua: “Ka pakū ki luga i a au te fakamalaiaga telā e ‵tau o maua ne koe, e taku tama. Fai fua te mea telā e fai atu ne au kae fano o aumai a manu konā ki a au.”+ 14 Ne fano tou tagata o puke a manu kae aumai ki tena mātua, kae ne fakatoka ne tena mātua se meakai gali, e pelā eiloa mo te mea e manako ki ei tena tamana. 15 Oti aka, puke mai ei ne Lepeka te ‵toe gatu gali eiloa o tena tama matua ko Esau mai te fale, kae fakapei atu ki tena tama foliki ko Iakopo.+ 16 Ne ufi foki ne ia a lima o tou tagata ki pa‵kili o tamā kouti mo koga o tena ua kolā e se fulufulua.+ 17 Tenā ne tuku atu ei ne ia te meakai gali mo te falaoa kolā ne fakatoka ne ia ki tena tama ko Iakopo.+

18 Ne fanatu a Iakopo ki tena tamana kae fai atu: “Toku tamana!” kae ne tali mai a Isaako: “Tenei au! Kae ko oi koe, e taku tama?” 19 Ne fai atu a Iakopo ki tena tamana: “Au ko tau toekimua ko Esau.+ Ko oti ne fai ne au te mea telā ne fakatonu mai ne koe ki a au. Fakamolemole, nofotu aka o kai a te manu ne fakatoka ne au, ko te mea ke fakamanuia mai au ne koe.”*+ 20 Kae ne fai atu a Isaako ki tena tama: “Kaia ne vave katoa ei koe penei, e taku tama?” Ne tali atu a ia: “Me ne aumai ne Ieova tou Atua a te manu tenā ki a au.” 21 Tenā ne fai atu ei a Isaako ki a Iakopo: “Fakamolemole, vau ke pili mai koe, ke puke atu au ki a koe, e taku tama, ko te mea ke iloa ne au i a koe ko taku tama eiloa ko Esau io me ikai.”+ 22 Ne fakapilipili atu a Iakopo ki tena tamana ko Isaako, kae ne puke atu a ia ki a Iakopo, kae fai atu: “A te leo ko te leo o Iakopo kae ko lima ko lima o Esau.”+ 23 Ne seki iloa tonu ne Isaako me ko oi a ia ona ko ana lima e fulufulua eiloa e pelā mo lima o tena taina ko Esau. Tenā ne fakamanuia ei ne Isaako a ia.+

24 Oti aka, ne fesili atu a Isaako: “A koe ko taku tama eiloa ko Esau?” kae ne tali atu a ia: “Ko au eiloa.” 25 Tenā ne fai atu ei a ia: “Aumai la ne mu meakai ke kai au, e taku tama, ko fakamanuia ei ne au a koe.” Ne aumai ne Iakopo a meakai ki a ia, kai ei a ia, kae ne avatu ne ia a uaina kae ne inu a ia ki ei. 26 Tenā ne fai atu ei a tena tamana ko Isaako ki a ia: “Fakamolemole, vau ki oku tafa, kae sogi mai ki a au, e taku tama.”+ 27 Ne soloki atu a Iakopo kae sogi atu ki a ia, kae ne ‵sogi ne Isaako a te manogi o tena gatu.+ Tenā ne fakamanuia ei ne ia tou tagata kae fai atu:

“Kiloke, a te manogi o taku tama e pelā eiloa mo te manogi o te vao telā ko oti ne fakamanuia ne Ieova. 28 Ke tuku atu ne te Atua tonu ki a koe a te ‵sau o te lagi+ mo laukele ola o te lalolagi mo meakai*+ e uke mo uaina+ ‵fou. 29 Ke tavini atu a tino ki a koe, kae ke ifo atu a atufenua ki a koe. Ke pule atu koe ki ou taina, kae ke ifo atu a tama tāgata a tou mātua ki a koe.+ Ke malaia a tino katoa e fakamalaia atu ki a koe, kae ke manuia a tino katoa e fakamanuia atu ki a koe.”+

30 Ne fatoa oti eiloa ne fakamanuia ne Isaako a Iakopo, kae e seki leva te fanoga a Iakopo ki tua mai tena tamana ko Isaako kae oko atu a tena taina ko Esau mai te fanoga o atuli manu.+ 31 Ne fakatoka foki ne ia se meakai gali kae avatu ki tena tamana, kae fai atu ki tena tamana: “Toku tamana, tu ki luga o kai ki te manu ne atuli ne tau tama, ko te mea ke fakamanuia ne koe au.” 32 Kae ne fai atu a tena tamana ko Isaako ki a ia: “Ko oi koe?” kae ne tali atu a ia: “Au ko tau tama, ko tau toekimua, ko Esau.”+ 33 Kae ko Isaako ne kamata o polepole valevale, kae fai atu: “Kae ko oi la telā ne atuli ne ia te manu kae aumai ki a au? Ko oti ne kai au ki ei kae koi tuai koe o oko mai, kae ne fakamanuia ne au a ia​—kae ka manuia eiloa a ia!”

34 I te lagonaga ne ia a pati a tena tamana, ne kamata o tagi pakalaga a Esau i te kaitaua kae fai atu ki tena tamana: “Fakamanuia mai au, ao, ko au foki, e toku tamana!”+ 35 Kae ne fai atu a Isaako: “Ko tou taina ne vau o fakaloiloi au ko te mea ke maua ne ia te fakamanuiaga telā ne ‵tau o maua ne koe.” 36 Kae ne fai atu a Esau: “E a, e se tenā eiloa te pogai ne fakaigoa ei a ia ki a Iakopo,* ko te mea ke puke fakalua ne ia oku tofi?+ Ko oti ne puke ne ia toku tofi toekimua,+ kae nei ko puke foki ne ia oku fakamanuiaga!”+ Kae ne toe fai atu a ia: “E a, e seai eiloa se fakamanuiaga ne faka‵toe ne koe mo oku?” 37 Kae ne tali atu a Isaako ki a Esau: “Ko oti ne fai ne au a ia mo fai tou matai,+ kae ko oti ne tuku atu ne au ki a ia ana taina katoa mo fai ana tavini, kae ko oti ne tuku atu ne au ki a ia a fuataga mo uaina ‵fou mo ana ola.+ Se a la te mea koi ‵toe e mafai o tuku atu ne au ki a koe, e taku tama?”

38 Ne fai atu a Esau ki tena tamana: “E a, e seai loa se fakamanuiaga e tasi koi nofo mo koe, e toku tamana? Fakamanuia mai au, ao, ko au foki, e toku tamana!” Tenā ne tagi pakalaga ei a Esau.+ 39 Kae ne tali atu a tena tamana ko Isaako ki a ia:

“Kiloke, a koe ka se nofo i luga i laukele ola o te lalolagi, kae ka ‵mao foki koe mai te ‵sau o te lagi i luga.+ 40 Kae ka ola koe e auala i tau pelu,+ kae ka tavini atu koe ki tou taina.+ Kae kafai ko ‵fiu koe, ko ‵fati ei ne koe a tena amo tenā i tou ua.”+

41 Kae ne ita fakamoemoe a Esau ki a Iakopo ona ko fakamanuiaga kolā ne tuku ne tena tamana ki a ia,+ kae ne fai aka faeloa a Esau i tena loto: “Ko pili o palele atu a aso o te fanoanoa o toku tamana.+ Mai tua i ei ka tamate eiloa ne au toku taina ko Iakopo.” 42 I te taimi ne fakailoa atu ei ki a Lepeka a pati a tena tama matua ko Esau, ne kalaga fakavave atu a ia ki tena tama foliki ko Iakopo kae fai atu ki a ia: “Kiloke! A tou taina ko Esau e mafaufau o taui atu tau mea ne fai mai te tamate ne ia koe.* 43 Nei la, e taku tama, fai te mea e fai atu ne au. Tu ki luga kae tele ki toku tuagane ko Lapana i Halana.+ 44 ‵Nofo fakatasi mo ia i se taimi tai leva ke oko ki te taimi e tai feoloolo ei te ita o tou taina, 45 ke oko ki te taimi e gata ei te kaitaua o tou taina ki a koe kae fakapuli ne ia tau mea ne fai ki a ia. Tenā ko uga atu ei taku fekau ke vau koe mai i konā. Kaia e talia ei ne au ke ‵galo atu koulua tokolua i te aso e tasi?”

46 Mai tua i konā, ne fai atu faeloa a Lepeka ki a Isaako: “Ko oko eiloa i toku takalialia ki toku olaga ona ko tamafine Heti.+ Kafai e puke ne Iakopo se avaga mai tamafine Heti, e pelā mo tamafine konei o te fenua, se a la te aoga o toku ola?”+