Te Tusi Muamua ki te Kau Kolinito
10 Nei la, e manako au ke iloa ne koutou, e oku taina, me i ‵tou tupuga ne ‵nofo katoa mai lalo i te kaumana+ kae ne olo atu katoa i loto i te tai,+ 2 kae ne papatiso katoa latou ke tau‵tali atu i a Mose e auala i te kaumana mo te tai, 3 kae ne ‵kai katoa latou ki te meakai faka-te-agaga e tasi+ 4 kae inu katoa ki te meainu faka-te-agaga e tasi.+ Me ne inu sāle latou mai te kaupapa faka-te-agaga telā ne tautali atu i a latou, kae ko te kaupapa tenā ne fakauiga ki a Keliso.+ 5 E tiga te feitu tenā, ne seki fiafia a te Atua ki te tokoukega o latou, me ne ‵ta latou i te koga lavaki.+
6 Ne fai a mea konei mo fakaakoakoga ki a tatou, ko te mea ke se ma‵nako tatou ki mea kolā e pa‵kia ei a tino, e pelā mo mea ne ma‵nako latou ki ei.+ 7 Ke se fai foki tatou mo tino e ifo ki tupua, e pelā mo nisi tino i a latou; me ne tusi mai penei: “Ne saga‵saga a tino ki lalo o ‵kai kae inu. Tenā ne ‵tu aka ei latou ki luga o fai olotou fakafiafiaga.”+ 8 Ke mo a ma fai faeloa ne tatou a amioga fakatauavaga sē ‵tau* e pelā mo nisi tino i a latou kolā ne aofia i amioga fakatauavaga sē ‵tau,* kae ne ‵mate ei te toko 23,000 i a latou i te aso e tasi.+ 9 Ke mo a ma tofotofo ne tatou a Ieova*+ e pelā mo te tofotofoga ne nisi tino a ia, kae ne tamate ei latou ne gata.+ 10 Ke se mui‵mui foki koutou e pelā mo nisi tino i a latou kolā ne mui‵mui,+ kae ne tamate atu ei latou ne te tino fakaoko sala.+ 11 Ne ‵tupu a mea konei ki a latou ke fai e pelā me ne fakaakoakoga, kae ne tusi ki lalo mo fai se fakailoaga ke fakaeteete tatou+ kolā ko ‵nofo i taimi o te gataga o te olaga tenei.
12 Tela la, ko te tino telā e mafaufau i a ia e tu ke fakaeteete i a ia ma siga.+ 13 E seai eiloa se tofotofoga kai oko atu ki a koutou kae na ko mea kolā e masani o oko atu ki tino.+ Kae ko te Atua e fakamaoni, kae ka se talia ne ia ke tofotofogina koutou ke silia atu i te mea telā e mafai o fa‵ki ne koutou,+ kae kafai ko oko mai a tofotofoga ka tuku mai ne ia a te auala e ‵sao ei koutou ko te mea ke mafai ne koutou o kufaki.+
14 Tela la, e aku fagasele, ‵tele kea‵tea mai te ifo ki tupua.+ 15 Au e faipati ki tino kolā e malamalama; mafau‵fau faka‵lei koutou ki aku pati. 16 A te ipu o te fakamanuiaga telā e fakamanuia ne tatou, e a, e se ko te ‵kau fakatasi i te toto o Keliso?+ Kae ko te falaoa telā e tofitofi ne tatou, e a, e se ko te ‵kau fakatasi i te foitino o Keliso?+ 17 Ona ko te mea e tasi fua te falaoa, e tasi foki te foitino,+ faitalia me e tokouke tatou, me i a tatou katoa e ‵kai ki te falaoa e tasi tenā.
18 Kilo atu ki te Isalaelu faka-te-foitino: E a, e se ‵kau fakatasi a tino kolā e ‵kai ki taulaga, mo te fatafaitaulaga?+ 19 Ne a la aku pati e fai atu? E mata, e aoga atu a mea kolā e ofo ki tupua, io me ko te tupua? 20 Ikai; kae fai atu au me i mea kolā e ofo atu ne fenua fakaa‵tea e ofo atu eiloa ne latou ki temoni, kae e se ki te Atua;+ kae e se manako au ke ‵kau fakatasi koutou mo temoni.+ 21 E se mafai koutou o inu ki te ipu a Ieova* mo te ipu a temoni; e se mafai koutou o ‵kai i “te taipola a Ieova”*+ mo te taipola a temoni. 22 Io me ‘e a, ko fai ne tatou a Ieova* ke loto masei’?+ E a, e ‵mafi atu tatou i a ia?
23 E saoloto a mea katoa; kae e se ko mea katoa e aoga. E saoloto a mea katoa; kae e se ko mea katoa e fakamalosi loto.+ 24 Ke se ‵sala atu faeloa a tino taki tokotasi ki tena ‵lei eiloa, kae ki te ‵lei o te suā tino.+
25 ‵Kai ki so se ‵kano o manu e fakatau atu i te maketi, e aunoa mo te sukesuke ki ei ona ko otou loto lagona, 26 me “i te lalolagi mo mea katoa i ei i a Ieova.”*+ 27 Kafai e ‵kami koutou ne se tino sē talitonu kae e ma‵nako koutou o olo, ‵kai ki so se mea e tuku atu ki a koutou e aunoa mo te sukesuke ki ei ona ko otou loto lagona. 28 Kae kafai e fai atu se tino ki a koutou: “A te mea tenei se taulaga ne ofo atu ki tupua,” sa ‵kai ki ei, ona ko te tino telā ne fai atu ne ia ki a koe, kae ona ko otou loto lagona.+ 29 Au e se fakauiga ki tou loto lagona kae ko te loto lagona o te suā tino. Me kaia e fakamasino ei toku saolotoga ne te loto lagona o te suā tino?+ 30 Kafai e kai au mo te loto fakafetai ki te Atua, kaia la e fakamasei ei au i te mea telā ko oti ne fakafetai atu au e uiga ki ei?+
31 Tela la, faitalia me e ‵kai koutou io me inu io me e fai so se mea aka, ke fai a mea katoa mō te vikiga o te Atua.+ 32 Ke mo a ma fai koutou mo mea e ‵siga ei a tino Iutaia e pelā foki mo tino Eleni mo te fakapotopotoga a te Atua,+ 33 e pelā eiloa mo au e taumafai o fakafiafia a tino katoa i mea katoa, e se ‵sala atu ki toku ‵lei eiloa,+ kae ki te ‵lei o tino e tokouke, ko te mea ke mafai o ‵sao latou.+