Te Tusi a Iakopo
4 Se a te māfuaga o taua mo kinauga i va o koutou? E mata, e se māfua mai i otou manakoga faka-te-foitino kolā e taua faeloa i loto i a koutou?*+ 2 E ma‵nako koutou ki mea kae tela la e se maua ne koutou. E tumau koutou i te tatino kae kaima‵nako, kae e se mafai o maua ne koutou. E tumau koutou i te taua kae fai taua.+ E seai se mea e maua ne koutou me i a koutou e se fakamolemole atu ki ei. 3 Kafai e fakamolemole atu koutou, e se maua ne koutou me fakamolemole atu koutou mō se pogai sē tonu, ko te mea ke fakaaoga ne koutou a te mea tenā ki otou manakoga faka-te-foitino.
4 Tino mulilua,* e a, e se iloa ne koutou i te fai taugasoa mo te lalolagi ko te fai fili tenā ki te Atua? Tela la, so se tino e manako ke fai a ia mo taugasoa o te lalolagi ko fai a ia eiloa mo fai te fili o te Atua.+ 5 Io me e a, e mafau‵fau koutou me e seai se pogai ne fai mai ei a tusitusiga tapu: “A te agaga o te loto masei telā e maua i loto i a tatou e manako faeloa ki mea kese‵kese e uke”?+ 6 E tiga te feitu tenā, e sili atu a te alofa tauanoa telā e tuku mai ne Ia. Tenā ne fai mai ei: “E ‵teke ne te Atua a tino fakamaua‵luga,+ kae e tuku atu ne ia te alofa tauanoa ki tino loto mau‵lalo.”+
7 Tela la, faka‵logo koutou ki te Atua;+ kae ‵teke te Tiapolo,+ kae ka tele a ia kea‵tea mai i a koutou.+ 8 Fakapilipili atu ki te Atua, kae ka fakapilipili mai a ia ki a koutou.+ ‵Fulu otou lima, koutou e tino agasala,+ kae faka‵ma otou loto,+ koutou e tino fakalotolotolua. 9 Ke talia ne koutou te loto mafatia mo te fanoanoa mo te tagi mautuutu.+ Ke ‵fuli te otou ‵kata fia‵fia ki te fanoanoa kae ko te otou fia‵fia ki te loto fanoanoa. 10 Ke loto mau‵lalo koutou i mua o Ieova,*+ kae ka fakamaluga ne ia koutou.+
11 Fakagata te fakamasei o te suā tino ki te suā tino, e oku taina.+ So se tino e fakamasei atu ki tena taina io me e fakamasino ne ia tena taina e ‵teke ki te tulafono kae e fakamasino ne ia te tulafono. Kafai e fakamasino ne koe te tulafono, ko se tautali koe i te tulafono, kae ko fai koe mo fai te famasino. 12 E tokotasi fua te Tino Fai Tulafono mo te Famasino,+ ko ia telā e mafai o fakasao io me fakaseai ne ia te tino.+ Kae ko oi la koe ke fakamasino ne koe tou tuakoi?+
13 O‵mai, koutou kolā e fai mai: “I te aso nei io me ko te aso ma taeao ka faima‵laga atu matou ki te fakai tenei o ‵nofo i se tausaga e tasi, kae ka fai omotou pisinisi i ei ke uke omotou tupe,”+ 14 kae e se iloa ne koutou te mea ka tupu ki otou ola ma taeao.+ Me i a koutou e pelā mo te ‵sau telā e sae mai i se taimi toetoe ko galo atu ei.+ 15 I lō te fai penā, e ‵tau o fai mai koutou: “Kafai e loto a Ieova* ki ei,+ ka ola eiloa matou kae ka fai ne matou te mea tenei io me ko te mea telā.” 16 Kae nei la e fakamata‵mata eiloa koutou i otou pati fia ‵sili. A uiga fakamata‵mata katoa penā ne mea matagā. 17 Tela la, kafai e iloa ne se tino a te mea tonu e ‵tau o fai kae e se fai ne ia, a te mea tenā se agasala ki a ia.+