Te Muamua Samuelu

17 Ne fakamaopoopo ne tino Filisitia+ olotou kautau mō te taua. Ne maopoopo latou i Soko,+ i Iuta, kae ne ‵nofo latou i te va o Soko mo Aseka+ i Efese-tamima.+ 2 A Saulo mo tāgata Isalaelu ne maopoopo kae ‵nofo i te Vanu o Ela,+ kae ne fakatoka latou o olo atu o taua ki tino Filisitia. 3 Ne ‵nofo a tino Filisitia i te feitu e tasi o te mauga, kae ko tino Isalaelu ne ‵nofo i te suā feitu o te mauga, kae tu te vanu i te kogaloto o latou.

4 Kae ne vau se toa mai te koga ‵nofo o tino Filisitia; a tena igoa ko Koliata+ mai Kata,+ kae ko tena maluga e ono kupita mo te aga e tasi.* 5 E isi sena pulou kopa i tena ulu, kae e pei ki se gatu tau fiti telā e isi ne mea pelā me ne unafi o ika i ei. A te ‵mafa o te gatu tau fiti+ e ‵tusa mo te 5,000 sekela* kopa. 6 E isi ne mea ufi vae kopa i ana vae mo se tao+ kopa e tautau i ana tuauma. 7 A te kau lakau o tena tao e pelā eiloa mo te mea ‵laga laugatu,+ kae ko te mata o tena tao e ‵tusa mo te 600 sekela* te ‵mafa; kae ko tena tino ave talita e sasale i ana mua. 8 Tenā ne tu aka a ia kae kalaga atu ki te kautau a Isalaelu,+ ana muna: “Kaia ne o‵mai ei koutou o taua mai? E a, au nei e sē se tino Filisitia, kae e a, e se ko koutou a tavini a Saulo? Filifili aka se tagata i a koutou ke vau ke fe‵paki māua. 9 Kafai e mafai o taua mai a ia ki a au kae ta ne ia au, ko fai ei matou mo otou tavini. Kae kafai e manumalo au i a ia kae ta ne au a ia, ko fai ei koutou mo omotou tavini o tavini mai ki a matou.” 10 Ne toe fai atu te tino Filisitia tenā: “E fakaitaita ne au a te kautau a Isalaelu+ i te aso nei. Tuku mai se tagata ke taua māua!”

11 I te lagonaga ne Saulo mo Isalaelu kātoa a pati konei a te tino Filisitia, ne pole‵pole latou kae ma‵taku valevale.

12 A Tavita ko te tama tagata a te tagata Efalata+ mai Peteleema+ i Iuta e igoa ki a Iese,+ e tokovalu ana tama tāgata+ kae ko toeaina eiloa a ia i aso o Saulo. 13 Te tokotolu tama tāgata ma‵tua a Iese ne tau‵tali i a Saulo o olo i te taua.+ A igoa o ana tama tāgata kolā ne olo ki te taua ko Eliapo+ te toekimua, ko Apinatapu+ tena tama i te tokolua, mo Sama+ tena tama i te tokotolu. 14 A Tavita ko te toekimuli,+ kae ko tama ma‵tua e tokotolu ne tau‵tali atu i a Saulo.

15 A Tavita ne fano sāle ki a Saulo kae oti ko foki o tausi a mamoe+ a tena tamana i Peteleema. 16 I te taimi tenā e vau sāle a te toa Filisitia o tu i tena tulaga i tafataeao katoa mo afiafi katoa i aso e 40.

17 Tenā ne fai atu ei a Iese ki tena tama tagata ko Tavita: “Fakamolemole, puke a te efa* tenei o saito tao mo falaoa e sefulu konei, kae fano o ave ki ou taina i te koga e ‵nofo i ei. 18 Kae puke a susu ma‵keke* e sefulu konei ki te takitaki o taki tokoafe; kae āsi atu foki ki ou taina me e a latou kae foki mai mo se tala mai i a latou.” 19 Ne ‵nofo atu latou mo Saulo mo nisi tāgata Isalaelu katoa i te Vanu* o Ela+ o taua atu ki tino Filisitia.+

20 Ne tu aka a Tavita i te tafataeao ‵malu kae tuku atu se tino ke tausi a mamoe; tenā ne fakatoka ei ana mea kae fano e ‵tusa loa mo te fakatonuga ne fai atu ne Iese ki a ia. I te taimi ne oko atu ei a ia ki te koga ‵nofo o te kautau, a te kautau ko oti ne olo atu ki te koga taua, kae kalaga atu te kalaga o te taua. 21 A te kautau Isalaelu ne olo atu eiloa ki mua o te kautau Filisitia ke fakafesagai atu te suā kautau ki te suā kautau. 22 Ne tuku fakavave ne Tavita ana kope ki te tino tausi kope kae tele atu ki te koga taua. I tena okoatuga, ne kamata a ia o fesilisili atu me e a ana taina.+

23 Kae koi faipati a ia ki a latou, ne vau te toa e igoa ki a Koliata,+ te tino Filisitia mai Kata. Ne vau a ia mai te kautau a Filisitia kae fai atu ne ia a pati ne fai foki ne ia muamua,+ kae ne lagona ne Tavita a ia. 24 I te laveaga ne tāgata Isalaelu katoa a te toa tenā, ne ‵tele kea‵tea latou mai i a ia mo te ma‵taku.+ 25 Ne fai aka a tāgata Isalaelu: “Ne lavea ne koe te tagata tenei e vau ki tua? A ia e vau o fakaitaita mai ki tino Isalaelu.+ Ka tuku atu eiloa ne te tupu a maumea e uke ki te tagata telā e mafai o tamate ne ia a te toa tenā, ka tuku atu foki ne ia tena tama fafine+ ma te tagata tenā, kae ka fakasaoloto ne ia mai mea katoa a te kāiga o tena tamana i Isalaelu.”

26 Ne kamata o fai atu a Tavita ki tāgata kolā ne ‵tu i ana tafa: “Se a te mea ka fai ki te tagata e ta ne ia te tino Filisitia tenā kae ave kea‵tea ne ia a te masiasi mai Isalaelu? Ko oi te tino Filisitia seki pilitome tenei ke vau a ia o fakaitaita a te kautau a te Atua ola?”+ 27 Tenā ne fai atu ei ne tino ki a ia a mea kolā ne fai atu muamua: “Tenei te mea ka fai ki te tagata e ta ne ia tou tagata.” 28 I te lagonaga ne tena taina matua ko Eliapo+ i a ia e faipati ki tāgata konā, ne kaitaua tou tagata ki a Tavita kae fai atu: “Kaia ne vau ei koe ki konei? Ko oi te tino ne tuku ne koe ke tausi a nai mamoe konā i te koga lavaki?+ E iloa ‵lei ne au tou fakamatamata mo manakoga ma‵sei i tou loto; a koe ne vau fua ke lavea ne koe te taua.” 29 Muna a Tavita: “Ne a nei aku mea ne fai? Au ne fesili atu fua!” 30 Ne ‵fuli kea‵tea tou tagata mai i a ia o saga atu ki te suā tino kae toe fesili atu tena fesili muamua,+ kae ne fai mai foki ne tino a te tali eiloa ne fai atu muamua ki a ia.+

31 Kae ne lagona ne nisi tino a pati ne fai ne Tavita kae fakailoa atu ki a Saulo. Tenā ne fai mai ei te fekau ke fanatu ki a ia. 32 Muna a Tavita ki a Saulo: “Ke mo a ma loto vāivāi se tino ona ko te tino tenā. Ka fanatu eiloa tau tavini o taua mo te tino Filisitia+ tenei.” 33 Kae ne fai atu a Saulo ki a Tavita: “E se mafai ne koe o taua atu ki te tino Filisitia tenei me ia koe koi tamaliki fua,+ kae ko ia ne fai pelā me se sotia* mai te taimi koi talavou ei.” 34 Muna a Tavita ki a Saulo: “A tau tavini ne fai mo tausi mamoe a te lafu mamoe a tena tamana, kae ne vau se leona,+ mo se pea foki, kae ne puke ne manu takitasi konā se mamoe mai te lafu mamoe. 35 Ne fanatu au i tua o te manu tenā kae ta ne au kae fakasao te mamoe mai i tena gutu. I te taimi ne oso mai ei ki a au, ne ‵lave atu au ki ana fulufulu* kae ta ne au ke mate. 36 Ne ta ne tau tavini a te leona mo te pea, kae ko te tino Filisitia seki pilitome tenei ka fai eiloa pelā me se manu e tasi i manu konā, me ne fakaitaita ne ia a te kautau a te Atua ola.”+ 37 Ne toe fai atu a Tavita: “A Ieova telā ne fakasao ne ia au mai lima o te leona mo te pea, ko ia foki tenā ka fakasao ne ia au mai lima o te tino Filisitia+ tenei.” Tenā ne fai atu ei a Saulo ki a Tavita: “Fano, kae ke fakatasi atu a Ieova ki a koe.”

38 Ne fakapei ne Saulo a Tavita ki ana gatu. Tuku atu ne ia te puloutau kopa ki tena ulu, oti aka fakapei ei ne ia tena gatu tau fiti ki a ia. 39 Tenā ne ‵sulu atu ei ne Tavita a tena pelu ki ana gatu kae taumafai o sasale kae e se mafai ne ia, me i a ia e se masani ki ei. Ne fai atu a Tavita ki a Saulo: “E se mafai ne au o fano mo mea konei, me e se masani au ki ei.” Tenā ne tapale ei ne Tavita a mea konā. 40 Ne puke ne ia tena tokotoko i tena lima kae fili ne ia a fatu mania‵nia e lima mai te vaitafe foliki kae tuku ki loto i tena taga tausi mamoe, kae puke tena siligi+ i tena lima. Kae ne kamata o fakapilipili atu a ia ki te tino Filisitia.

41 Ne vau eiloa te tino Filisitia ke pili mai ki a Tavita, kae ko tena tino ave talita ne sasale i ana mua. 42 I te kiloatuga a te tino Filisitia kae lavea ne ia a Tavita, ne fakatauemu atu tou tagata ki a ia me i a ia se tamaliki fua kae matagali.+ 43 Ne fai atu te tino Filisitia ki a Tavita: “Au nei se kuli,+ ke vau koe mo au tamā lakau konā o taua mai ki a au?” Tenā ne fakamalaia ei ne te tino Filisitia a Tavita e auala i ana atua. 44 Muna a te tino Filisitia ki a Tavita: “Vau ki a au, ke tuku atu ne au a tou foitino ki manu eva o te lagi mo manu fe‵kai o te vao.”

45 Ne tali atu a Tavita ki te tino Filisitia: “A koe e vau ki a au mo te pelu mo tao+ e lua, kae ko au e fanatu o taua ki a koe i te igoa o Ieova o kautau,+ ko te Atua o te kautau a Isalaelu, ko tino kolā ne fakaitaita+ ne koe. 46 I te aso eiloa tenei ka tuku mai koe ne Ieova ki oku lima,+ kae ka ta ne au koe kae ‵kati kea‵tea tou ulu ke tō; kae i te aso tenei ka tuku atu ne au a foitino ‵mate o tino Filisitia ki manu eva o te lagi mo manu fe‵kai o te lalolagi; kae ka iloa ne tino i te lalolagi kātoa me e isi se Atua i Isalaelu.+ 47 Kae ko tino katoa kolā ne maopoopo i konei ka iloa ne latou i a Ieova e se faka‵sao+ ne ia tino ki te pelu io me ko te tao, me i te taua i a Ieova,+ kae ka tuku mai ne ia a koutou katoa ki omotou lima.”+

48 Tenā ne fanatu ei te tino Filisitia ke pili atu ki a Tavita, kae ne tele fakavave atu a Tavita ki te koga taua ke taua mo te tino Filisitia. 49 Ne faulu te lima o Tavita ki loto i tena taga kae tapale mai se fatu mai i ei kae fakalele atu ne ia. Ne poko tena fatu i te lae o te tino Filisitia, kae galo te fatu ki loto i tena lae kae totuli ifo a ia mo ana mata e ‵fuli ki lalo i te laukele.+ 50 Ne fakatakavale ne Tavita a te tino Filisitia ki te siligi mo te fatu; ne ta ne ia te tino Filisitia ke mate, faitalia me seai se pelu i te lima+ o Tavita. 51 Ne tele atu a Tavita kae tu i ana tafa. Tenā puke ei ne ia te pelu+ a te tino Filisitia, ‵futi ki tua mo te koga e tuku i ei kae ‵kati ne ia tena ua ke fakamautinoa aka me ko mate. I te laveaga ne tino Filisitia me ko mate te lotou toa, ‵tele ei latou.+

52 I konā ne ‵tu aka a tāgata Isalaelu mo tāgata Iuta kae paka‵laga kae olo atu o afuli a tino Filisitia mai te vanu+ ke oko atu ki mataloa o Ekelona,+ kae ne tafola eiloa a foitino ‵mate o tino Filisitia i te auala mai Salaima+ ke oko atu ki Kata mo Ekelona. 53 I te ‵fokimaiga o tino Isalaelu mai te afuliga o tino Filisitia, ne ‵fao ne latou a mea i koga ‵nofo o tino Filisitia.

54 Tenā ne puke ei ne Tavita a te ulu o te tino Filisitia kae avatu ki Ielusalema, kae tuku ne ia a meatau a te tino Filisitia ki loto i tena faleie.+

55 I te taimi eiloa ne lavea ei ne Saulo a Tavita ko fano o taua mo te tino Filisitia, ne fai atu a ia ki a Apinelu,+ te takitaki o te kautau: “Apinelu, i a ai te tama tagata tenei?”+ Ne tali atu a Apinelu: “E pelā eiloa mo koe e ola, e te tupu, e se iloa ne au!” 56 Muna a te tupu: “‵Sala aka me i a ai te tama tagata tenā.” 57 Tela la, i te taimi ne foki mai ei a Tavita mai te tamatega o te tino Filisitia, ne puke ne Apinelu a ia kae avatu ki mua o Saulo mo te ulu o te tino Filisitia+ i tena lima. 58 Ne fesili atu a Saulo ki a ia: “A koe i a ai te tama?” kae ne tali atu a Tavita: “Au ko te tama tagata a tau tavini ko Iese+ te tino Peteleema.”+