Isaia
1 Ko te fakaasiga ne lavea ne Isaia*+ te tama tagata a Amota e uiga ki Iuta mo Ielusalema i aso o Usia,+ Iotama,+ Aasa+ mo Hesekia,+ ko tupu o Iuta:+
2 Fakalogo mai, e te lagi, kae saga tonu mai e te lalolagi,+
Me i a Ieova ko oti ne faipati:
3 E iloa ‵lei ne te pulumakau tagata a te tino ne ‵togi ne ia a ia,
Kae iloa foki ne te asini a tena tali fagai manu mai tena matai;
Kae e se iloa ne Isalaelu a au,*+
E se gasue‵sue oku tino ‵tonu mo te malamalama.”
4 Kalofa eiloa i te fenua agasala,+
A tino ko ‵mafa ki lalo i mea ‵se,
Ko te fanauga a tāgata ma‵sei, tama‵liki fai mea piko‵piko!
Ko oti ne tiaki ne latou a Ieova;+
Ko oti ne sē āva latou ki te Atua Tapu o Isalaelu;
Ko oti ne fulitua atu latou ki a ia.
5 Tefea te suā koga ka ta i ei koe i te taimi e toe fakaopoopo ei ne koe tau ‵tekeatuga?+
A te ulu kātoa ko masaki,
Kae ko te loto kātoa ko fakamasakisaki.+
6 Mai te alofivae ke oko eiloa ki te ulu, e seai lele eiloa se malosi i ei.
E isi ne pa‵kiaga mo koga uliuli mo mea ‵pala
—E seki fai faka‵lei io me fusi io me ‵mili a pa‵kiaga konā ki se sinu.+
7 A te otou laukele ko fakamaseigina.
Otou fakai ko ‵sunu ki te afi.
A tino fakaa‵tea ko kai ne latou a fuataga o te otou fenua i mua eiloa o koutou.+
Ko fai e pelā me se laukele sē aoga telā ko puke ne tino fakaa‵tea.+
8 Ko oti ne tiaki a tama fāfine o Siona e pelā me se fale fakamalumalu i te togavine,
E pelā me se tamā fale i se fatoaga kukama,
E pelā me se fakai ko nikoigina.+
9 Moi ne seki faka‵toe mai ne Ieova o kautau ne nai tino o tatou ke ‵sao,
E penei ko ‵tau o fai tatou e pelā mo Sotoma,
Kae ko ‵tau foki o ‵pau tatou mo Komolo.+
10 Faka‵logo ki muna a Ieova, koutou e tino pule fakasaua* o Sotoma.+
‵Saga tonu atu ki te tulafono* a te ‵tou Atua, koutou e tino o Komolo.+
11 “Se a te aoga ki a au a taulaga e uke a koutou?”+ ko muna a Ieova.
“Au ko ‵fiu i otou taulaga ‵sunu o mamoe+ mo gako o otou manu ne fagai faka‵lei,+
Kae e se fiafia eiloa au ki toto+ o tamā pulumakau tāgata+ mo mamoe mo kouti.+
12 Kafai e o‵mai koutou ki oku mua,+
Ko oi ne manako ki te mea tenei mai i a koutou,
Ko te lakalakaga o oku koga ateatea?+
13 Sa toe aumai ne taulaga meakai kolā e se aoga.
E takalialia eiloa au ki otou mea ma‵nogi.+
A masina sae,+ sapati,+ te faiga o fono+
—Ko se mafai ne au o fa‵ki i te fakaaogaga o mea fakataulaitu+ fakatasi mo otou maopoopoga ‵malu.
14 Au ko takalialia ki otou masina sae mo otou ‵kaiga fia‵fia.
Ko fai pelā me se amoga ‵mafa ki a au;
Au ko fi‵ta i te tauavega o mea konā.
15 Kae kafai ko ‵fola mai otou lima,
E ‵funa oku mata mai i a koutou.+
Faitalia me ofo mai ne koutou a ‵talo e uke,+
E se fakalogologo au ki ei;+
Otou lima ko ‵fonu eiloa i toto.+
16 Kou‵kou ke ‵ma koutou;+
Ave kea‵tea otou faifaiga matagā mai i oku mua;
Fakagata te faiga o mea ma‵sei.+
17 Tauloto ke fai te mea ‵lei, ‵sala ki te fai mea tonu,+
Fakatonu te tino pule fakasaua,
‵Pulu a saolotoga o te tamaliki telā e seai sena tamana,
Kae fesoasoani atu ki te ‵tagi a te fafine ko mate tena avaga.”+
18 “Nei la, o‵mai ke faka‵tonu aka ne tatou a mea ke ‵tonu i te va o tatou,” ko muna a Ieova.+
“Faitalia me fai otou agasala e pelā me se laugatu kula,
Ka fai eiloa a mea konā ke ‵kena e pelā me se kiona;+
Faitalia me kula e pelā me se laugatu kula malosi,
Ka fai eiloa a mea konā e pelā me ne vulu.
19 Kafai e fakaasi mai ne koutou te loto fiafia mo te faka‵logo,
Ka ‵kai eiloa koutou ki mea ‵lei o te laukele.+
20 Kae kafai e ita koutou kae ‵teke mai,
Ka fakaseai eiloa koutou e auala i te pelu,+
Me ko oti eiloa ne faipati mai a te gutu o Ieova.”
21 Ko oti eiloa ne fai a te fakai fakamaoni+ mo fai se fafine talitāgata!+
Ne ‵fonu a ia i te fai mea tonu;+
Ne nofo sāle a te amiotonu i loto i ei,+
Kae nei la, ko ‵nofo a tino tatino i ei.+
23 Otou pelenise e loto ma‵keke kae ga‵lue fakatasi mo tino kai‵soa.+
A tino katoa i a latou e fia‵fia ki ‵togi fakakolekole kae ma‵nako faeloa ki meaalofa.+
E se fai ne latou te mea tonu ki tama‵liki kolā e seai ne olotou tamana,
Kae ko te ‵tagi a te fafine ko mate tena avaga e se oko atu eiloa ki a latou.+
24 Tela la, a te Aliki tonu, ko Ieova o kautau,
Te Atua Malosi o Isalaelu, ne folafola mai:
“Kiloke! Ka fakaseai ne au oku fili,
Kae ka taui ma sui ne au oku fili.+
25 Ka ‵fuli atu toku lima ki a koutou,
Kae ka faka‵ma kea‵tea ne au otou mea sē aoga e pelā eiloa me ‵fulu ki se sopu,
Kae ka ‵fulu kea‵tea ne au otou lailaiga katoa.+
26 Ka toe faka‵sopo aka ne au otou famasino e pelā eiloa mo te kamataga
Mo otou tino fakatonutonu e pelā mo te kamataga,+
Ka oti, ko taku ei a koutou ko te Fakai o te Amiotonu, te Fakai Fakamaoni.+
27 E auala i te fai mea tonu ka fakasao ei a Siona,+
Mo ana tino kolā ka toe ‵foki mai, ki te amiotonu.
28 A tino ‵teke mo tino agasala ka fakaseai fakatasi atu,+
Kae ko latou kolā e tiaki ne latou a Ieova ka oko atu ki te lotou fakaotiga.+
29 Me ka mavale latou ona ko lakau ma‵losi kolā ne manako malosi koe ki ei,+
Kae ka masiasi koe ona ko fatoaga* kolā ne filifili ne koe.+
30 Me ka fai koutou e pelā me se lakau lasi telā ko mage‵mage ana lau,+
Kae pelā me se fatoaga e seai ne vai i ei.
31 A te tagata malosi ka fai pelā me se filo,*
Kae ko ana galuega e pelā me se kalokaloafi
A te avā mea konā ka ula fakatasi aka,
Kae e seai se tino e mafai o tamate ne ia a mea konā māfai ko ‵ka.”