Ki te Kau Epelu

6 Tela la, ona ko te mea ko oti ne gasolo tatou ki mua mai i akoakoga kamata+ e uiga ki te Keliso, ke na kausaki atu tatou ke ma‵tua ‵lei,+ kae ke se toe ‵foki ki akoakoga faigofie, e pelā mo te salamō i galuega sē aoga* mo te fakatuanaki ki te Atua, 2 akoakoga e uiga ki te papatisoga mo te fakaekeatuga o lima,+ te toe‵tu mai o tino ‵mate+ mo te fakamasinoga se-gata-mai. 3 Kae ka fai eiloa ne tatou te mea tenei, māfai e talia ne te Atua.

4 E pelā mo latou kolā ne malamalama muamua+ kae ne tami ki te meaalofa faivasaga mai te lagi kae ne maua ne latou te agaga tapu 5 kae ko oti ne tami ki te ‵lei o te muna a te Atua mo mea ‵mana i te olaga telā ka oko mai, 6 kae ko oti ne ‵to kea‵tea,+ ko se mafai o fai latou ke toe sala‵mo, me ne toe ‵tuki ne latou te Tama a te Atua ki te pou fakasaua kae fakamasiasi a ia i mua o tino katoa.+ 7 Me e maua ne te laukele se fakamanuiaga mai te Atua i te taimi e inu ei ki te vaiua telā e ‵to sāle ki luga i ei tenā ko fakaola i ei ne ia a lakau kaina kolā e aoga ki tino kolā e ‵toki ne latou. 8 Kae kafai e ola aka i ei a lakau tala‵tala mo lakau makai‵kai, e tiakina a mea konā me ko pili o malaia, kae i te fakaotiga ka ‵sunu ki te afi.

9 Kae ko koutou, e oku taina pele, e tali‵tonu matou me ‵lei atu te otou tulaga i lō tino kolā ko ‵to kea‵tea, ko mea e uiga ki te fakaolataga, faitalia me e fai‵pati atu matou i te auala tenei. 10 Me i te Atua e sē se tino sē amiotonu ke puli i a ia otou galuega mo te alofa ne fakaasi ne koutou mō tena igoa+ i te taviniga mo te tumau i te taviniga ki tino tapu. 11 Kae e ma‵nako matou ke fakaasi mai ne koutou taki tokotasi te otou ga‵lue malosi penā, ko te mea ke fakamautinoa katoatoa aka ei te fakamoemoega+ ke oko eiloa ki te fakaotiga,+ 12 ko te mea ke se paie koutou,+ kae ke fakaakoako ki tino kolā ne maua ne latou a folafolaga e auala i te fakatuanaki mo te kufaki.

13 Me i te taimi ne fai ei ne te Atua tena folafolaga ki a Apelaamo, ne tauto atu a ia i tena igoa eiloa, me seai se tino e maluga atu i a ia ke tauto a ia ki ei,+ 14 ana muna: “Ka fakamanuia eiloa ne au a koe, kae ka fakatokouke eiloa ne au a tau fanau.”+ 15 Tela la, mai tua o te fakaasiatuga ne Apelaamo a te kufaki, ne maua ne ia te folafolaga tenei. 16 Me e tau‵to eiloa a tino ki se tino telā e maluga atu i a latou, kae ko te lotou tautoga e fakagata i ei a kinauga katoa, me se fakatalitonuga faka-te-tulafono tenā ki a latou.+ 17 I te auala foki tenei, i te taimi ne fakaiku ei ne te Atua ke fakaasi faka‵lei atu ki sui o te folafolaga+ me e se mafai o ‵fuli tena fuafuaga, ne fakatalitonu ne ia te mea tenā* ki se tautoga, 18 ko te mea ke fakaasi mai me e auala i mea e lua kolā e se mafai o ‵fuli kae e se mafai o loi i ei te Atua,+ a tatou kolā ne ‵tele ki te koga faka‵lafi e mafai o maua ne tatou se fakamalosiga lasi ke puke ‵mau ki te fakamoemoega telā e takato mai i ‵tou mua. 19 E fai te fakamoemoega tenei+ e pelā me se taula mō ‵tou ola, e mautinoa kae ‵mautakitaki, kae e takitaki ne ia tatou ke ulu atu ki te suā feitu o te ‵pui laugatu,+ 20 telā ne ulu muamua atu i ei a Iesu mō tatou,+ kae telā ko oti ne fai mo fai te faitaulaga sili ki te se-gata-mai, e pelā eiloa mo Mekisateko.+