Te Muamua Nofoaiga Tupu

28 Ne fakamaopoopo mai ne Tavita a pelenise katoa o Isalaelu ki Ielusalema: ko pelenise o matakāiga, ko takitaki o potukau+ e tavini atu ki te tupu, ko takitaki o taki tokoafe mo takitaki o taki tokoselau,+ ko takitaki o mea katoa mo lafu manu a te tupu+ mo ana tama tāgata,+ fakatasi mo ofisa a te tupu mo so se tagata malosi kae fakatuagagina.+ 2 Tenā ne tu aka ei a te Tupu ko Tavita kae fai atu:

“Faka‵logo mai ki a au, e oku taina mo oku tino. Ne manako malosi toku loto ke faite se fale mo tuku te pusa o te feagaiga a Ieova kae ke fai mo mea e tuku i ei a vae o te ‵tou Atua,+ kae ne fai ne au a fakatokaga ke faite te fale+ tenā. 3 Kae ne fai mai te Atua tonu ki a au, ‘Ka se faite ne koe a te fale mō toku igoa,+ me i a koe se tagata o taua, kae ko oti ne fakamaligi ne koe a toto.’+ 4 Kae tiga te feitu tenā, ne filifili au ne Ieova te Atua o Isalaelu mai kāiga katoa o toku tamana ke fai au mo tupu i Isalaelu ki te se-gata-mai,+ me ne filifili ne ia a Iuta ke fai mo takitaki+ kae mai te kāiga o Iuta ko te kāiga o toku tamana,+ kae mai tama tāgata a toku tamana, ko au ne talia ne ia ke fai mo tupu i Isalaelu kātoa.+ 5 Kae mai aku tama tāgata katoa—me ne tuku mai ne Ieova a tama tāgata e tokouke+ ma aku—ne filifili aka ne ia a taku tama tagata ko Solomona+ ke sagasaga i te nofogaaliki o te pulega fakatupu a Ieova i Isalaelu.+

6 “Ana muna ki a au, ‘A tau tama tagata ko Solomona ka faite ne ia toku fale mo koga ateatea i ei, me ko oti ne filifili ne au a ia mo fai taku tama kae ka fai au mo fai tena tamana.+ 7 Ka faka‵mautakitaki ne au tena pulega fakatupu ki te se-gata-mai+ māfai e fakalogo faka‵lei a ia ki aku fakatonuga mo ikuga o aku fakamasinoga,+ e pelā mo te mea e fai nei ne ia.’ 8 Tela la, e fai atu au i mua o tino Isalaelu katoa, ko te fakapotopotoga a Ieova, kae ke lagona mai ne te ‵tou Atua: Ke ‵sala kae tausi faka‵lei ki fakatonuga katoa a Ieova te otou Atua ko te mea ke puke mō koutou a te laukele ‵lei+ kae toe tuku atu e pelā me se tofi tumau ki otou tama tāgata mai otou tua.

9 “Kae ko koe e Solomona taku tama tagata, ke iloa ne koe te Atua o tou tamana kae tavini atu ki a ia mo te loto kātoa+ mo te loto fiafia, me i a Ieova e sukesuke ne ia a loto katoa,+ kae iloa ne ia a manakoga katoa o te mafaufau.+ Kafai e ‵sala koe ki a ia, ka maua eiloa ne koe a ia,+ kae kafai e tiaki ne koe a ia, ka se talia eiloa ne ia koe ki te se-gata-mai.+ 10 Kiloke, ko oti koe ne filifili ne Ieova ke faite ne koe se fale ke fai pelā me se koga tapuaki. Ke loto toa kae fano o fai te galuega.”

11 Tenā ne tuku atu ei ne Tavita ki tena tama tagata ko Solomona te ata+ o te faitega o te fakaosoga+ mo nisi potu, ana potu ‵teu koloa, ana potu i te tuafale, ana potu tafa ki loto mo te fale e faka‵ma ei agasala.+ 12 Ne tuku atu ne ia ki ei te ata o te faitega o mea katoa telā ne fakaasi atu ki a ia e auala i te agaga o te Atua, ko koga ateatea+ o te fale o Ieova, ko potu ‵kai katoa i ana tafa, ko potu ‵teu koloa o te fale o te Atua tonu mo potu ‵teu koloa o mea kolā ko oti ne fakatapu;+ 13 e pelā foki mo te vaevaega o faitaulaga+ mo tino Levi, mo tiute katoa o te taviniga i te fale o Ieova mo meāfale katoa o te taviniga i te fale o Ieova; 14 e pelā foki mo te ‵mafa o aulo, ko aulo mō taviniga kese‵kese, te ‵mafa o meāfale siliva katoa mo meāfale kese‵kese katoa o te taviniga; 15 e pelā foki mo te ‵mafa o tugamoli aulo+ mo olotou moli aulo, te ‵mafa o tugamoli kese‵kese mo olotou moli, mo tugamoli siliva, telā ko te ‵mafa o tugamoli mo ana moli, e ‵tusa mo te lotou fakaaogaga; 16 e pelā foki te ‵mafa o aulo mō taipola takitasi o falaoa,*+ e pelā foki mo te siliva mō taipola siliva, 17 mo foka, pōla, sioki ne faite mai tinā aulo, mo te ‵mafa o tamā pōla aulo, ko tamā pōla takitasi,+ mo te ‵mafa o tamā pōla siliva, ko tamā pōla siliva takitasi. 18 Ne tuku atu foki ne ia te ‵mafa o te aulo ‵ma mō te fatafaitaulaga+ o mea ma‵nogi mo te fakatusa o te kaliota,+ kolā ko kelupi+ aulo e ‵fola lā kapakau kae fakamalu i ei te pusa o te feagaiga a Ieova. 19 Muna a Tavita: “A te lima o Ieova ne i luga i a au, kae ne tuku mai ne ia ki a au a te poto ke mafai o tusi ki lalo+ a fakamatalaga likiliki katoa o te ata+ o te faitega o mea.”

20 Tenā ne fai atu ei a Tavita ki tena tama tagata ko Solomona: “Ke loto toa kae loto malosi kae fano o fai te galuega. Sa mataku io me polepole, me i a Ieova te Atua, ko toku Atua e fakatasi atu ki a koe.+ Ka se tuku tiaki ne ia koe,+ kae ka fakatasi atu eiloa a ia ki a koe ke oko ki te taimi ko palele ei a galuega katoa ki te fale o Ieova. 21 Kae tenei te vaevaega o faitaulaga+ mo tino Levi+ mō te faiga o te taviniga kātoa i te fale o te Atua tonu. E isi ne tino loto fia‵fia kae ata‵mai ke fai ne latou a vaega katoa o te taviniga,+ e pelā foki mo pelenise+ mo tino katoa kolā ka faka‵logo ki fakatonuga katoa a koe.”