Te Tusi a Luka

23 Ne ‵tu ki luga a tino katoa kae ‵taki atu ne latou a ia ki a Pilato.+ 2 Tenā ne kamata ei o ‵losi atu latou ki a ia,+ olotou muna: “Ne maua ne matou te tagata tenei e takitaki ‵se ne ia te motou fenua kae fakatapu ne ia te ‵togiga o lafoga ki a Kaisala+ kae fai mai foki i a ia ko te Keliso, te tupu.”+ 3 Ne fesili atu a Pilato ki a ia: “A koe ko te Tupu o tino Iutaia?” Ne tali atu a Iesu: “Tenā eiloa e fai mai ne koe.”+ 4 Tenā ne fai atu ei a Pilato ki faitaulaga pule mo te vaitino: “E se iloa ne au se mea e ‵se ei te tino tenei.”+ 5 Kae ne kinau atu faeloa latou, olotou muna: “Ko fakamakosu ne ia a tino i ana akoakoga ne fai i Iuta kātoa, ne kamata mai i Kalilaia ke oko foki eiloa ki konei.” 6 I te lagonaga ne Pilato te mea tenā, fesili atu ei a ia me ko te tagata tenā se tino Kalilaia. 7 I te otiga ne fakamautinoa aka ne ia me i te tagata tenā se tino e nofo mai lalo i te pulega a Helota,+ uga atu ei ne ia ki a Helota, telā ne nofo foki i Ielusalema i aso konā.

8 I te laveaga ne Helota a Iesu, ne fiafia malosi a ia. Me ko leva ne fia lavea ne ia a Iesu ona ko mea e uke ne logo a ia e uiga ki ei,+ kae ne fakamoemoe a ia ke lavea ne ia ne fakailoga e fai ne ia. 9 Ne kamata o ‵sili atu ne ia a fesili e uke ki a ia; kae e seai eiloa sena tali ne fai atu.+ 10 Kae ne ‵tu atu faeloa a faitaulaga pule mo failautusi o ‵losi atu mo te kaitāua ki a ia. 11 Tenā ne fai fakamasei ei a ia ne Helota mo ana sotia,+ kae fakatauemu ne ia+ mai te fakapei atu ki a ia se gatu gali kae toe uga atu ki a Pilato. 12 I te aso eiloa tenā ne toe ‵lei ei te va fakataugasoa o Helota mo Pilato, me mai mua atu i ei ne fai fili faeloa lāua.

13 Tenā ne fakamaopoopo mai ei ne Pilato a faitaulaga pule, tino pule mo tino katoa 14 kae fai atu ki a latou: “Ne aumai ne koutou te tagata tenei ki a au me ne fakamalosi ne ia a tino ke ‵teke ki a koutou. Kae kiloke! ko oti ne sukesuke ne au a ia i otou mua kae e seai eiloa sena ‵se i agasala katoa kolā ne ‵losi atu ne koutou ki a ia.+ 15 E penā foki a Helota, ne toe uga mai ne ia tou tagata ki a tatou, kae kiloke! e seai sena mea ‵se ne fai e ‵tau ei o tamate. 16 Tela la, ka fakasala ne au a ia,+ ko ‵tala atu ei.” 17* —— 18 Kae ne ka‵laga atu te vaitino: “Tamate a te tagata* tenei, kae ‵tala mai a Palapa ki a matou!”+ 19 (A te tagata tenei ne ‵pei ki te falepuipui ona ko te ‵teke atu ki te malo, kae se tino tatino foki.) 20 Ne toe kalaga atu a Pilato ki a latou me ne manako a ia o ‵tala atu a Iesu.+ 21 Tenā ne kamata ei o paka‵laga atu latou, olotou muna: “‵Tuki atu a ia ki te pou! ‵Tuki atu a ia ki te pou!”*+ 22 Ne fai atu a ia i te tolu o taimi ki a latou: “Kaia? Se a te mea masei ne fai ne te tagata tenei? E seai se mea ne maua ne au e ‵tau ei o tamate a ia; tela la, ka fakasala ne au a ia ko ‵tala atu ei.” 23 Ne paka‵laga malosi atu latou, kae kinau atu ke tamate* a ia, kae ne manumalo eiloa latou.+ 24 Tenā ne fai ei ne Pilato te ikuga e ‵tusa mo te lotou manakoga. 25 Ne ‵tala atu ne ia te tagata ne ma‵nako latou ki ei, telā ne ‵pei ki te falepuipui ona ko te ‵teke atu ki te malo mo te tatino, kae tuku atu ne ia a Iesu e ‵tusa eiloa mo te lotou manakoga.

26 I te ‵takiga ne latou a ia kea‵tea, ne taofi ne latou a Simona te Kulene, telā ne vau mai te vao, kae tuku atu ne latou te pou fakasaua* ki luga i a ia ko te mea ke amo ne ia mai tua o Iesu.+ 27 Ne tau‵tali atu i a ia a tino e tokouke, e aofia i ei a fāfine kolā ne pāpā olotou fatafata i te fanoa‵noa kae ‵tagi mautuutu ona ko ia. 28 Ne mafuli atu a Iesu ki fāfine kae fai atu: “Tama fāfine o Ielusalema, sa ‵tagi mai ki a au. I lō te fai penā, ‵tagi mō koutou eiloa mo otou tama‵liki;+ 29 kae kiloke! ka oko mai a aso ka fai aka ei a tino penei, ‘Ka fia‵fia eiloa a fāfine sē afu, mo fāfine kolā e seki fa‵nau mo ū kolā e seki faū ki ei se pepe!’+ 30 Kae ka kamata o fai atu latou ki mauga, ‘Ma‵toli mai ki luga i a matou!’ kae ki tamā mauga ‘Ufi aka matou!’+ 31 Kafai e fai ne latou a mea konei ki te lakau telā e ola ‵lei, se a la te mea ka tupu māfai ko magemage te lakau?”

32 Ne ‵taki atu foki a nisi tāgata e tokolua, ne tino solitulafono, ke tamate fakatasi mo ia.+ 33 I te lotou okoga ki te koga e igoa ki a Gatiulupoko,+ ne ‵tuki ne latou a ia i konā ki te pou i tafa o tino solitulafono, e tokotasi i tena feitu fakaatamai, kae e tokotasi i tena feitu fakamaui.+ 34 Kae ne fai aka a Iesu, penei: “Toku Tamana, fakamagalo atu latou, me e se iloa ne latou te lotou mea tenei e fai.” E se gata i ei, ne fai ne latou se vili ke tufa ne latou ana gatu.+ 35 Ne ‵tu atu a tino o onoono ki ei. Kae ne fakatauemu atu a tino pule, olotou muna: “Ne faka‵sao ne ia a nisi tino; tuku atu la ke fakasao ne ia a ia eiloa māfai a ia ko te Keliso a te Atua, telā ko te Tino Filifilia.”+ 36 Ne fakatauemu atu foki a sotia ki a ia, kae ne olo atu o tuku atu a uaina ‵vi+ ki a ia 37 kae fai atu: “Kafai koe ko te Tupu o tino Iutaia, fakasao aka la koe.” 38 E isi foki ne pati e tusi mai i luga i tena ulu: “Tenei te Tupu o tino Iutaia.”+

39 Tenā ne fai atu ei ne se tokotasi o tino solitulafono telā ne tautau atu i konā a pati sē ‵lei ki a ia,+ ana muna: “E a, e se ko koe te Keliso? Faka‵sao aka la ne koe a koe eiloa mo māua foki!” 40 Ne ‵liko atu te suā tino ki a ia kae fai atu: “E a, e se mataku koe ki te Atua, me ko fakasala foki koe e pelā mo ia? 41 Me e tonu eiloa te tā fakasalaga ona ko mea kolā ne fai ne tāua; kae ko te tagata tenei e seai eiloa sena mea ‵se ne fai.” 42 Fai atu ei a ia: “Iesu, masaua mai au māfai e oko koe ki tou Malo.”+ 43 Kae ne fai atu a Iesu ki a ia: “Au e fai ‵tonu atu ki a koe i te aso nei,* ka ‵nofo fakatasi eiloa tāua i te Palataiso.”*+

44 I te taimi tenā kāti ko te ono o itula* kae ne pouli ei te fenua kātoa ke oko eiloa ki te iva o itula,*+ 45 me ne seki maina mai te la; tenā ne masaelua ei a te ‵pui laugatu i te faletapu+ mai luga ki lalo.+ 46 Kae ne kalaga aka a Iesu i se leo maluga, ana muna: “Toku Tamana, ko tuku atu ne au toku ola ki ou lima.”+ I te otiga o ana pati konei ko te mea eiloa ko mate.*+ 47 I te laveaga ne te ofisa o te kautau a mea kolā ne ‵tupu, tavae atu ei a ia ki te Atua, ana muna: “E tonu, a te tagata tenei se tino amiotonu eiloa.”+ 48 Kae i te laveaga ne te vaitino katoa kolā ne mumu atu ki konā o maimoa ki mea kolā ne ‵tupu, ne ‵foki atu latou ki olotou fale kae pāpā olotou fatafata. 49 Kae ko latou katoa kolā ne masani mo Iesu ne ‵tu mai i se koga tai ‵mao. Ne ‵tu atu foki i konā a fāfine kolā ne olo tasi atu mo ia mai Kalilaia o onoono ki mea katoa konei.+

50 Kae kiloke! e isi se tagata e igoa ki a Iosefa, se tino o te Kaupule, se tagata ‵lei kae amiotonu.+ 51 (Ne seki palota te tagata tenei o ‵lago atu ki olotou togafiti mo galuega ma‵sei.) A ia se tino mai Alimataia, se fakai o tino Iutaia, kae ne nofo fakatalitali ki te Malo o te Atua. 52 Ne fanatu te tagata tenei ki mua o Pilato kae fakamolemole atu ke tuku atu te foitino o Iesu. 53 Ne tuku ifo ne ia te foitino ki lalo+ kae ‵kofu ne ia ki laugatu lino ‵lei, kae fakatakato ne ia i se tanuga ne tuki ne ia i te kaupapa,+ telā e seai eiloa se tagata kai tuku i ei. 54 Ko oko nei ki te Aso Fakatoka,+ kae ko pili o kamata te Sapati.+ 55 Kae ko fāfine kolā ne olo atu i a ia mai Kalilaia, ne tau‵tali atu ke onoono latou i te tanuga mo te auala ne fakatakato ei tena foitino,+ 56 kae ne toe ‵foki latou o fakatoka a mea fakama‵nogi mo sinu ma‵nogi. Kae ne malō‵lo eiloa latou i te Sapati+ e ‵tusa mo te tulafono.