Se Fakaasiga ki a Ioane
17 E tokotasi te agelu mai i agelu e tokofitu kolā ne maua ne latou a pōla e fitu,+ ne vau kae fai mai ki a au: “Vau, ka fakaasi atu ne au ki a koe a te fakamasinoga o te fafine talitāgata sili telā e sagasaga i luga i vai e uke,+ 2 telā ne aofia i amioga fakatauavaga sē ‵tau* fakatasi mo tupu o te lalolagi,+ kae ko tino e ‵nofo i te lalolagi ne ko‵nā i te uaina o ana amioga fakatauavaga sē ‵tau.”*+
3 Kae ne ave ne ia au i te malosi o te agaga ki te koga lavaki. Kae ne matea ne au se fafine e sagasaga i luga i se manu fekai lanu kula telā e ‵fonu i igoa ma‵sei kae e fitu ana ulu mo suki e sefulu. 4 Ne pei te fafine tenei ki gatu violeta+ kae kula kae ne teu tou fafine ki aulo mo fatu tāua mo penina,+ kae e isi se ipu aulo i tena lima telā e ‵fonu i mea fakatakalia‵lia mo mea sē ‵ma o ana amioga fakatauavaga sē ‵tau.* 5 E tusi i tena lae se igoa, se mea ‵funa: “Papelonia te Sili, te mātua o fāfine talitāgata+ mo mea fakatakalia‵lia i te lalolagi.”+ 6 Kae ne matea ne au me ne konā te fafine tenā i toto o tino tapu mo toto o molimau a Iesu.+
I taku kiloatuga ki a ia ne ofo malosi au i ei. 7 Muna a te agelu ki a au: “Kaia e ofo ei koe? Ka fai atu ne au ki a koe te tala ‵funa e uiga ki te fafine+ mo te manu fekai telā e sopo a ia i ei kae telā e fitu ana ulu mo suki e sefulu:+ 8 A te manu fekai telā ne matea ne koe, ne ola, kae ko mate, kae ka fai o fanaka mai i te lua ‵poko,+ kae ka fanatu a ia ki te fakaseaiga. Kae ko tino kolā e ‵nofo i te lalolagi—ko latou kolā ne seki tusi olotou igoa i te peluga tusi o te ola+ talu mai te taimi ne fakavae* ei te lalolagi—ka ofo malosi māfai e matea ne latou a te auala ne ola mua ei te manu fekai, telā ko mate, kae ka toe ola mai.
9 “Tenei te mea e manakogina i ei te poto: A ulu e fitu+ e fakauiga ki mauga e fitu, kolā e sagasaga i ei a te fafine. 10 Kae e tokofitu a tupu: E tokolima ko oti ne pa‵kū, e tokotasi koi nofo mai nei, kae ko te suā tupu e seki oko mai; kae kafai ko oko mai a ia, e ‵tau mo ia o nofo mai i se taimi toetoe. 11 Kae ko te manu fekai telā ne ola kae ko mate,+ ko ia foki ko te tokovalu o tupu, kae ne māfua mai a ia mai i tupu e tokofitu, kae ka fanatu a ia ki te fakaseaiga.
12 “A suki e sefulu kolā ne matea ne koe e fakauiga ki tupu e tokosefulu kolā e seki maua ne latou se malo, kae e maua ne latou te pulega e pelā me ne tupu i se itula e tasi fakatasi mo te manu fekai. 13 A latou konei e tasi eiloa te lotou manatu, ke tuku atu te lotou malosi mo te lotou pulega ki te manu fekai. 14 A latou konei ka taua mo te Tamā Mamoe,+ kae ona ko ia ko te Aliki o aliki mo te Tupu o tupu,+ ka fakatakavale ne te Tamā Mamoe a latou.+ A latou foki kolā ne fakatasi mo ia kolā ne kalagagina, ne filifilia kae fakamaoni ka manumalo.”+
15 Ana muna ki a au: “A vai kolā ne matea ne koe, e sagasaga i ei te fafine talitāgata, e fakauiga loa ki tino mo vaitino mo atufenua mo ‵gana.+ 16 Kae ko suki e sefulu+ kolā ne matea ne koe mo te manu fekai,+ a latou konei ka takalia‵lia ki te fafine talitāgata+ kae ka ta fakamasei ne latou tou fafine kae tuku ke nofo fuafua, kae ka kai ne latou ana ‵kano kae ‵sunu katoatoa a ia ki te afi.+ 17 Me ne faulu ne te Atua ki olotou loto a tena manatu ke fakataunu tena loto,+ ao, ke fakataunu te lotou manatu e tasi mai te tukuatuga o te lotou malo ki te manu fekai,+ ke oko ki te taimi ko taunu ei a muna a te Atua. 18 Kae ko te fafine+ telā ne matea ne koe e fakauiga ki te fakai takutakua telā e isi sena pule ki luga i tupu o te lalolagi.”