Te Muamua Tupu
12 Ne fanatu a Leopoamo ki Sekema, me i tino Isalaelu katoa ne o‵mai ki Sekema+ o fai a ia mo tupu.+ 2 I te taimi eiloa ne logo ei a Ielopoamo te tama tagata a Nepata i te mea tenā (koi nofo eiloa tou tagata i Aikupito me ne tele a ia kea‵tea ona ko te Tupu ko Solomona kae nofo i Aikupito),+ 3 ne uga atu te lotou fekau ke vau a ia. Mai tua ifo ne olo atu a Ielopoamo mo te fakapotopotoga kātoa o Isalaelu ki a Leopoamo kae fai atu: 4 “A tou tamana ne fai ne ia te motou amoga ke faigata.+ Kae kafai e fakafaigofie ne koe a galuega faiga‵ta a tou tamana, kae fakamāmā ne koe te amoga ‵mafa ne tuku mai ne ia ki a matou, ka tavini atu matou ki a koe.”
5 Ana muna ki a latou: “Olo kea‵tea mō aso e tolu ko ‵foki mai ei koutou ki a au.” Tenā ne olo kea‵tea ei a tino.+ 6 Ne faipati atu a te Tupu ko Leopoamo ki tāgata ma‵tua* kolā ne tavini atu ki tena tamana ko Solomona i te taimi koi ola ei a ia, ana muna: “Ne a otou manatu ki te tali ka fai atu ne au ki tino konei?” 7 Ne tali atu latou ki a ia: “I te aso nei kafai e fai koe mo tavini a tino konei kae talia te lotou fakatagi kae tuku atu se tali ‵lei ki a latou, ka fai faeloa latou mo fai au tavini.”
8 Kae ne ‵teke atu a ia ki manatu o tāgata ma‵tua* kolā ne fai atu, kae ne ‵sala atu a ia ki pati fakatonutonu mai tamataene kolā ne ‵tupu tasi aka mo ia kae ko fai nei mo ana tino fesoasoani.+ 9 Ne fesili atu a ia ki a latou: “Ne a otou manatu ki te tali ka fai atu ne tatou ki tino kolā ne fai mai ki a au penei, ‘Fai aka ke māmā a te amoga ne tuku mai ne tou tamana ki a matou’?” 10 Ne fai atu a tamataene kolā ne ‵tupu tasi aka mo ia: “Konei a pati e ‵tau o fai ne koe ki tino kolā ne fai atu ki a koe, ‘A tou tamana ne fai ne ia ke ‵mafa te motou amoga, kae e ‵tau o fai ne koe ke māmā mō matou’; konei a pati e ‵tau o fai ne koe ki a latou, ‘A toku matikao lima foliki ka ‵fula atu i kautega o toku tamana. 11 A toku tamana ne fai ne ia otou amoga ke ‵mafa, kae ka fakaopoopo atu ne au te amoga a koutou. A toku tamana ne fakasala ne ia koutou ki ‵kini, kae ka fakasala ne au koutou ki ‵kini makai‵kai.’”
12 Ne olo atu a Ielopoamo mo tino katoa ki a Leopoamo i te tolu o aso, e pelā eiloa mo pati a te tupu ne fai atu: “‵Foki mai ki a au i te tolu o aso.”+ 13 Kae ne tali atu te tupu mo te kaitaua ki tino, kae fakaseaoga ne ia a manatu ne fai atu ne tāgata ma‵tua* ki a ia. 14 Ne fai atu ne ia ki a latou a manatu mai tamataene, ana muna: “A toku tamana ne fai ne ia otou amoga ke ‵mafa, kae ka fakaopoopo atu ne au a mea ki te amoga a koutou. A toku tamana ne fakasala ne ia koutou ki ‵kini, kae ka fakasala ne au koutou ki ‵kini makai‵kai.” 15 Tela la, a te tupu ne seki fakalogo eiloa ki tino, me ne fai ne Ieova ke tupu a te mea tenei,+ ke fakataunu ei a pati a Ieova ne fai atu e auala i a Aita+ te tagata Sailo ki a Ielopoamo te tama tagata a Nepata.
16 I te laveaga ne tino Isalaelu katoa me i te tupu e se fia fakalogo ki a latou, ne tali atu a tino ki te tupu: “Se a te motou vaega e maua mai i a Tavita? E seai se motou tofi i te tama tagata a Iese. Isalaelu, toe ‵foki ki otou atua. Tausi atu la tou kāiga e Tavita!” I konā eiloa, ‵foki ei a tino Isalaelu ki olotou fale.*+ 17 Kae ne tumau eiloa a Leopoamo i te pule atu ki tino Isalaelu kolā e ‵nofo i fakai o Iuta.+
18 Ne uga atu ne te Tupu ko Leopoamo a Atulamo,+ telā ko te pule o tino kolā e ‵tau o ga‵lue fakagamua mō te tupu, kae ne peipei a ia ne tino Isalaelu katoa ki fatu ke mate. Ne sopo aka a te Tupu ko Leopoamo ki tena kaliota kae tele ki Ielusalema.+ 19 Kae ne tumau eiloa a tino Isalaelu i te ‵teke atu+ ki te kāiga o Tavita ke oko mai ki te aso nei.
20 I te ‵logoga a Isalaelu kātoa i a Ielopoamo ko oti ne foki mai, ne ‵kami mai ne latou a ia ki te maopoopoga kae fai ne latou ke fai mo tupu i luga i Isalaelu kātoa.+ E seai se tino ne tautali atu i te kāiga o Tavita kae ko te matakāiga fua o Iuta.+
21 I te okoatuga a Leopoamo ki Ielusalema, ne fakamaopoopo fakavave ne ia a matakāiga katoa o Iuta mo te matakāiga o Peniamina, e 180,000 toa ‵mafi kolā ne fakaakoako* faka‵lei ke taua atu ki matakāiga o Isalaelu ko te mea ke toe fakafoki a te pulega fakatupu ki a Leopoamo te tama tagata a Solomona.+ 22 Tenā ne oko atu ei a te fekau a te Atua tonu ki a Semaia+ te tagata o te Atua tonu, ana muna: 23 “Fai ki a Leopoamo te tama tagata a Solomona te tupu o Iuta mo kāiga katoa o Iuta mo Peniamina mo te ‵toega o tino katoa, 24 ‘Konei a pati a Ieova ne fai mai: “E se ‵tau mo koutou o olo o taua atu ki otou taina Isalaelu. E ‵tau mo koutou taki tokotasi o ‵foki ki otou fale, me ne fai ne au ke tupu te mea tenei.”’”+ Tenā ne faka‵logo ei latou ki te muna a Ieova kae toe ‵foki ki olotou fale, e pelā eiloa mo pati ne fai atu ne Ieova ki a latou.
25 Tenā ne toe faite faka‵lei ei ne Ielopoamo a Sekema+ i te koga maugā o Efalaima kae nofo i ei. Mai konā ne fano ei a ia o toe faite faka‵lei a Penueli.+ 26 Ne fai aka a Ielopoamo i tena loto: “I te taimi nei ka toe fakafoki eiloa a te malo ki te kāiga o Tavita.+ 27 Kafai e olo atu faeloa a tino konei ki te fale o Ieova i Ielusalema o ofo atu olotou taulaga,+ ka ‵foki eiloa a loto o tino konei ki te lotou aliki, te Tupu ko Leopoamo i Iuta. Ao, ka tamate ne latou au kae toe ‵foki ki te tupu o Iuta ko Leopoamo.” 28 I te otiga ne fai‵pati mo ana tino fakatonutonu, ne faite ne te tupu a pulumakau aulo e lua+ kae fai atu ki tino: “Se mea faigata eiloa ke olo atu koutou ki Ielusalema. Isalaelu, tenei te otou Atua, telā ne aumai ne ia koutou ki tua mo te fenua o Aikupito.”+ 29 Tenā ne fakatu aka ei ne ia e tasi i Peteli,+ kae ko te suā mea i Tanu.+ 30 Kae ne fai ne te mea tenei ke agasala a latou,+ kae ne olo atu a tino ki Tanu o tapuaki ki te pulumakau i ei.
31 Kae ne faite ne ia a fale tapuaki i koga ma‵luga kae faka‵sopo aka ne ia a faitaulaga mai tino kolā e se ne tino Levi.+ 32 Ne fai foki ne Ielopoamo se ‵kaiga fiafia i te valu o masina, i te po 15 o te masina, e pelā mo te ‵kaiga fiafia i Iuta.+ I te fatafaitaulaga telā ne faite ne ia i Peteli+ ne ofo atu ne ia i ei a taulaga ki pulumakau kolā ne faite ne ia, kae ne ‵tofi aka ne ia i Peteli a faitaulaga mō koga ma‵luga kolā ne faite ne ia. 33 Kae ne kamata o ofo atu ne ia a taulaga i luga i te fatafaitaulaga telā ne faite ne ia i Peteli i te po 15 o te valu o masina, i te masina telā ne filifili ne ia, kae ne fai ne ia se ‵kaiga fiafia mō tino Isalaelu, kae ne fanaka a ia ki te fatafaitaulaga o ofo atu a taulaga mo mea ma‵nogi i ei.