Te Tusi a Ioane

19 Tenā ne ave ei ne Pilato a Iesu o ‵kini.+ 2 Ne ‵fili ne sotia se foualiki ki lakau tala‵tala kae fakafou atu ki tena ulu kae fakapei a ia ki se gatu violeta,+ 3 kae olo sāle atu ki a ia kae fai atu: “Talofa, te Tupu o tino Iutaia!” Ne laupāpā sāle foki ne latou ana mata.+ 4 Ne toe foki atu a Pilato ki tua kae fai atu ki a latou: “Kiloke! Ko aumai ne au a ia ki tua i a koutou ko te mea ke iloa ne koutou me seai se mea ‵se ne maua ne au i a ia.”+ 5 Ne vau a Iesu ki tua, mo tena foualiki makai‵kai mo tena gatu violeta. Kae ne fai atu a Pilato ki a latou: “Kiloke! Tenei te tagata!” 6 Kae i te laveaga ne faitaulaga pule mo ofisa a ia, ne paka‵laga atu ei latou: “‵Tuki atu a ia ki te pou! ‵Tuki atu a ia ki te pou!”*+ Ne fai atu a Pilato ki a latou: “Puke la ne koutou a ia kae ‵tuki atu ki te pou,* me e seai se mea ‵se ne maua ne au i a ia.”+ 7 Ne tali atu a tino Iutaia ki a ia: “E isi se motou tulafono, kae e ‵tusa mo te tulafono tenā e ‵tau o tamate a ia,+ me ne fai mai i a ia ko te tama a te Atua.”+

8 I te lagonaga ne Pilato olotou pati, ne mataku malosi eiloa a ia, 9 kae ne toe ulu atu a ia ki loto i te fale o te kovana kae fai atu ki a Iesu: “A koe se tino mai fea?” Kae ne seki tali atu a Iesu ki a ia.+ 10 Fai atu ei a Pilato ki a ia: “A koe e se fia faipati mai ki a au? E se iloa ne koe me e isi saku pule o fakasaoloto koe kae e isi foki saku pule o tamate koe?”* 11 Ne tali atu a Iesu ki a ia: “E seai lele eiloa sau pule i luga i a au seiloga ko oti ne talia ke tuku atu te pule tenā ki a koe mai te lagi. Tenā te pogai e lasi atu ei te agasala a te tino telā ne tuku atu ne ia au ki a koe.”

12 Ona ko te pogai tenei ne taumafai faeloa a Pilato o ‵sala se auala ke fakasaoloto a ia, kae ne paka‵laga mai a tino Iutaia: “Kafai e fakasaoloto ne koe a te tagata tenei, a koe e sē se taugasoa o Kaisala. So se tino e fai mai i a ia se tupu e ‵teke ki a Kaisala.”+ 13 I te lagonaga ne Pilato a pati konei, ne avatu ne ia a Iesu ki tua, kae ne sagasaga i te nofoga fakamasino i te koga telā e taku ko te Pae Fatu, kae i te ‵gana Epelu ko Kapata. 14 A te aso tenei ko te aso e Fakatoka+ ei mō te Paseka; kae kāti ko te ono o itula.* Kae ne fai atu a ia ki tino Iutaia: “Kiloke! Tenei te otou tupu!” 15 Kae ne paka‵laga atu latou: “Ave kea‵tea a ia! Ave kea‵tea a ia! ‵Tuki atu a ia ki te pou!”* Ne fai atu a Pilato ki a latou: “E a, ka tamate ne au te otou tupu?” Ne tali mai a faitaulaga pule: “E seai se motou tupu kae na ko Kaisala.” 16 Tenā ne toe tuku atu ei ne ia a Iesu ki a latou ke tamate i luga i te pou.+

Tenā ne ave ei ne latou a Iesu. 17 Ne amo ne ia te pou fakasaua,* kae fanatu ki te koga e igoa ki a Gatiulupoko,+ telā ko Kolokota i te ‵gana Epelu.+ 18 Ne ‵tuki ne latou a ia i konā ki luga i te pou,+ fakatasi mo nisi tāgata e tokolua, e taki tokotasi i ana feitu kae ko Iesu i te kogaloto.+ 19 Ne tusi foki ne Pilato se faka‵pulaga kae faka‵piki atu ki luga i te pou,* e fai penei: “Iesu te Nasaleta, te Tupu o tino Iutaia.”+ 20 Ne fai‵tau a tino Iutaia e tokouke ki te faka‵pulaga tenei, me i te koga telā ne ‵tuki i ei a Iesu ki te pou e pili fua ki te fakai, kae ne tusi a pati konā i te ‵gana Epelu, te ‵gana Latina mo te ‵gana Eleni. 21 Kae ne fai atu a faitaulaga pule o tino Iutaia ki a Pilato: “Sa tusigina penei ‘Te Tupu o Tino Iutaia,’ kae tusi penei me ne fai mai a ia, ‘Au ko te tupu o Tino Iutaia.” 22 Ne tali atu a Pilato: “A te mea ko oti ne tusi ne au, tuku eiloa penā.”

23 I te otiga ne ‵tuki ne sotia a Iesu ki te pou, ne puke ne latou tena gatu kae vaevae ki vaega e fa, ke tofu te sotia mo tena vaega, kae ne puke foki ne latou tena gatu ‵tao loto. Kae ko tena gatu ‵tao loto e seai ne sokoga i ei me ne ‵laga eiloa mai luga ke oko ki lalo. 24 Tenā ne fai aka ei latou i a latou eiloa: “Ke se saesae ne tatou, kae ke fai ne tatou se vili me ko oi ka maua ne ia.”+ Ne fai penei ke fakataunu ei a pati i Tusitusiga Tapu: “Ne vaevae ne latou oku gatu i a latou, kae ne fai ne latou se vili ki toku gatu ‵tao loto.”+ Ne fai eiloa ne sotia a mea konei.

25 Kae i tafa o te pou* fakasaua o Iesu ne ‵tu atu i ei a tena mātua+ mo te taina o tena mātua; Malia te avaga a Kalopa, mo Malia te Makatala.+ 26 Tela la, i te laveaga ne Iesu a tena mātua mo te soko telā ne alofa a ia ki ei+ e ‵tu ‵pili mai, fai atu ei a ia ki tena mātua: “Te fafine, kiloke! Tenā tau tama!” 27 Ne fai atu foki a ia ki te soko tenā: “Kiloke! Tenā tou mātua!” Kae mai te itula eiloa tenā ne puke ei ne te soko a tou fafine ke nofo i tena fale.

28 Fakamuli ifo, ne iloa ne Iesu me ko oti ne fakataunu a mea katoa e ‵tusa mo Tusitusiga Tapu, fai atu ei a ia: “Au ko fiainu.”+ 29 Ne tu atu i konā se tiā telā e ‵fonu i uaina ‵kona. Tenā ne puke ei ne latou se omomi telā e ‵fonu i te uaina ‵kona kae faka‵piki atu ki luga i se kaula o te isopo* kae tuku atu ki tena gutu.+ 30 I te otiga ne tami ki te uaina ‵kona, ne fai aka ei a Iesu: “Ko oti ne fakataunu!”+ ne fakagaugau ifo tena ulu, gata ei tena mānava.*+

31 Kae ona te aso tenā ko te aso Fakatoka,+ ne fakamolemole atu a tino Iutaia ki a Pilato ke ‵fati a vae o latou konā kae ave kea‵tea olotou foitino ko te mea ke seai se foitino e tautau i luga i se pou+ i te Sapati, (me ko te Sapati sili tenā).+ 32 Ne olo atu a sotia kae ‵fati ne latou a vae o te tagata muamua mo vae o te suā tagata kolā ne ‵tuki ki pou i tafa o Iesu. 33 Kae i te lotou okoatuga ki a Iesu, ne lavea ne latou i a ia ko leva ne mate, tenā ne seki ‵fati ei ne latou ana vae. 34 E ui i ei, ne velo ne se sotia e tokotasi tena kaokao ki se tao,+ kae ne ‵sali fakavave mai ei ki tua a toto mo vai. 35 Kae ko te tino telā ne lavea ne ia ne molimau mai ki te mea tenei, kae e tonu eiloa tena molimau, e iloa ne ia me e ‵tonu eiloa ana pati, ko te mea ke tali‵tonu foki koutou.+ 36 E tonu, ne ‵tupu a mea konei ke fakataunu ei a muna i Tusitusiga Tapu: “Ka se fati eiloa sena ivi e tasi.”+ 37 Kae e fai mai penei te suā tusi faitau: “Ka ‵kilo atu latou ki te tino telā ne velo ne latou.”+

38 I te otiga o mea konei, fakamolemole atu ei a Iosefa te Alimataia ki a Pilato ke ave ne ia te foitino o Iesu. A Iosefa se soko foki o Iesu, kae ona ko tena mataku i tino Iutaia+ ne seki fakaasi atu ne ia te mea tenei ki tino. Ne tuku atu ne Pilato te saolotoga ki a ia. Tenā ne vau ei tou tagata o ave tena foitino kea‵tea.+ 39 Ne vau foki a Nikotemo,+ te tagata telā ne fanatu ki a Iesu i te po i te taimi muamua, mo mulo mo aloe kolā ne palu fakatasi, kāti e selau pauna* te ‵mafa.+ 40 Tenā ne puke ei ne lāua te foitino o Iesu kae fusi ki laugatu lino mo mea ma‵nogi,+ e pelā eiloa mo te tuu masani a tino Iutaia i te fakatokaga o te foitino mō te tanuga. 41 E isi se fatoaga i te koga ne tamate* a ia i ei, kae i loto i te fatoaga tenā e isi se tanuga fou+ telā e seai eiloa se tino kai tuku ki loto i ei. 42 Ona ko te aso Fakatoka+ o tino Iutaia ne tuku ei ne latou a Iesu i te koga tenā me e pili mai fua te tanuga tenā.