Te Tolu o Tusi a Ioane

1 Ko tusi atu au, te toeaina matua ki a Kaio, toku taina pele, telā e alofa tonu au ki ei.

2 Toku taina pele, au e ‵talo ke tumau tou manuia i mea katoa e fai ne koe kae ke malosi ‵lei koe, e pelā eiloa mo tou manuia i aso nei. 3 Me ne ‵fonu au i te fiafia i te okomaiga a taina kae molimau mai e uiga ki te munatonu tenā e puke ‵mau koe ki ei, e pelā eiloa mo tou tumau i te sasale i te munatonu.+ 4 E seai se mea e sili atu i toku fiafia ki ei i lō te mea tenei: ke lagona ne au i aku tama‵liki e tumau i te sa‵sale i te munatonu.+

5 Toku taina pele, e fakaasi mai ne koe a tou fakamaoni i so se galuega e fai ne koe mō taina, e tiga eiloa e se masani koe mo latou.+ 6 Ko oti ne molimau mai latou e uiga ki tou alofa i mua o te fakapotopotoga. Fakamolemole, uga atu a latou ke olo i se auala telā e fiafia ki ei te Atua.+ 7 Me ne olo atu latou ona ko te igoa o te Atua, e aunoa mo ne mea ne puke ne latou+ mai i tino o fenua fakaa‵tea. 8 Tela la, ko ‵tau o fakaasi atu ne tatou te uiga talimalo ki tino penā,+ ko te mea ke fai tatou mo fai ne taina e ga‵lue fakatasi i te munatonu.+

9 Ne tusi atu au e uiga ki se mea e tasi ki te fakapotopotoga, kae ko Siofilisi, telā e fia tulaga muamua i a latou,+ e se talia ne ia mo te āva so se mea telā e fai atu ne matou.+ 10 Tenā te pogai, kafai e oko atu au, ka fakaasi atu ne au a galuega kolā e fai ne ia o fakasalalau atu a tala fakamasei e uiga ki a matou.+ Ne seki lotomalie fua a ia ki te mea tenei, ne ita a ia ma talimalo a taina+ mo te āva; kae ko taina kolā e ma‵nako o talimalo a tino konā, ne taumafai a ia o taofi aka latou kae e ‵pei ki tua mo te fakapotopotoga.

11 Toku taina pele, sa fakaakoako ki mea ma‵sei kae fakaakoako ki mea kolā e ‵lei.+ A te tino telā e fai ne ia a mea ‵lei e māfua mai i te Atua.+ A te tino telā e fai ne ia a mea ma‵sei e seki lavea ne ia te Atua.+ 12 E ‵lei ‵ki a tala a tino katoa e uiga ki a Temetiu e penā foki mo te munatonu. E tonu, e molimau atu foki matou e uiga ki a ia, kae e iloa ne koe me e tonu eiloa te molimau telā e avatu ne matou.

13 E uke a mea e fia tusi atu ne au ki a koe, kae e se manako au o tusi atu i se tusi. 14 Kae e fakamoemoe au ke fetaui tāua i se taimi pili mai, ko fai‵pati fakatasi ei tāua.

Ke i luga i a koe te filemu.

Ko ‵moli atu alofaaga o taugasoa i konei. ‵Moli atu oku alofaaga ki taugasoa taki tokotasi i konā.