Te Tusi i te Lua ki te Kau i Tesalonia

1 Ko matou ko Paulo, Suliano* mo Timoteo+ ki te fakapotopotoga i Tesalonia telā e ‵kau fakatasi mo te Atua te ‵tou Tamana mo te Aliki ko Iesu Keliso:

2 Ke i luga i a koutou te alofa tauanoa mo te filemu mai te Atua te Tamana mo te Aliki ko Iesu Keliso.

3 E ‵tau o fakafetai atu faeloa matou ki te Atua e uiga mō koutou, e oku taina. E ‵tau o fai te mea tenei, me e gasolo aka faeloa o lasi atu te otou fakatuanaki mo te lasi o te otou a‵lofa te suā tino ki te suā tino.+ 4 Ona ko te mea tenei e fakamata‵mata ei matou i a koutou+ i fakapotopotoga katoa a te Atua ona ko te otou kufaki mo te fakatuanaki i otou fakasauaga mo mea faiga‵ta* katoa kolā e logo‵mae koutou i ei.+ 5 Tenei eiloa te fakamaoniga o fakamasinoga amio‵tonu a te Atua, telā e iku atu ki te mauaga ne koutou a te Malo o te Atua, tenā e puapuagatia ei koutou.+

6 E aofia i te mea tenei a te amiotonu o te Atua ke toe taui atu a fakasauaga ki a latou kolā e fakasaua atu ki a koutou.+ 7 Kae ko koutou kolā e logo‵mae i puapuaga ka tuku atu a te fakatapūga fakatasi mo matou i te taimi e fakaasi mai ei te Aliki ko Iesu+ mai te lagi fakatasi mo ana agelu ‵mana+ 8 i se afi ‵ka ulaula, o tuku atu te taui ma sui ki a latou kolā e se iloa ne latou te Atua mo latou kolā e se faka‵logo ki te tala ‵lei e uiga ki te ‵tou Aliki ko Iesu.+ 9 Ko latou eiloa konei ka maua ne latou te fakasalaga ko te fakaseaiga+ ki te se-gata-mai i mua o te Aliki mo te malosi o tena ‵mana, 10 i te taimi e vau ei a ia ke faka‵malu a ia fakatasi mo ana tino tapu, kae ka ofo masei a tino katoa kolā ne fakaasi atu faeloa te lotou fakatuanaki e uiga ki a ia i te aso tenā, me ne fakatuanaki koutou ki te molimau telā ne tuku atu ne matou.

11 Tenā eiloa te pogai e ‵talo faeloa matou mō koutou, ko te mea ke taulia koutou i te Atua e ‵tusa mo te otou kalagaga+ kae mai i tena ‵mana ka fakataunu katoatoa ne ia a mea ‵lei katoa e manako a ia ki ei mo galuega katoa o te fakatuanaki. 12 E fai penā ko te mea ke faka‵malugina te igoa o te ‵tou Aliki ko Iesu i a koutou, kae ke ‵kau fakatasi koutou mo ia, e ‵tusa mo te alofa tauanoa o te ‵tou Atua mo te Aliki ko Iesu Keliso.