Levitiko

7 “‘Tenei te tulafono o te taulaga mō mea ‵se:+ A te mea tenā se mea e tafasili i te tapu. 2 Ka tamate ne latou a te manu o te taulaga mō mea ‵se i te koga e tamate ei a manu mō taulaga ‵sunu, kae e ‵tau o fakamatulutulu atu ana toto+ ki feitu katoa o te fatafaitaulaga.+ 3 Ka ofo atu ne ia ana gako katoa,+ e aofia i ei a gako i te felo, gako kolā e ufi i luga i gakau, 4 mo nonu e lua mo lā gako i tafa o ana kautega. Ka tapale foki ne ia kea‵tea a gako o te ate fakatasi mo nonu.+ 5 Ka ‵sunu ne te faitaulaga a mea konā ko te mea ke au i luga i te fatafaitaulaga e pelā me se taulaga e ofo atu i luga i te afi ki a Ieova.+ A te mea tenā se taulaga mō mea ‵se. 6 A faitaulaga tāgata kātoa ka kai ne latou a mea konā,+ kae e ‵tau o kai i loto i se koga tapu. A te mea tenā se mea e tafasili i te tapu.+ 7 A te tulafono e uiga ki te taulaga mō agasala e ‵pau eiloa mo te taulaga mō mea ‵se; e tuku a te mea tenā ma te faitaulaga telā ne fai ne ia te faka‵māga.+

8 “‘Kafai e ofo atu ne te faitaulaga te taulaga ‵sunu mō se tino, a te pa‵kili+ o te taulaga ‵sunu telā ne tuku atu ki te faitaulaga ka tuku ma ia.

9 “‘So se taulaga meakai telā ne tao i te ogaumu io me ne fakatoka i se ulo io me se fiti pāpā+ e tuku ma te faitaulaga telā ne ofo atu ne ia te taulaga tenā. Ka fai eiloa ma ia a te mea tenā.+ 10 Kae ko so se taulaga meakai telā ne palutasi mo te sinu+ io me telā e malō+ ka tuku atu ki tama tāgata katoa a Alona; ka ‵vae ‵pau i a latou katoa.

11 “‘Kae tenei te tulafono mō te taulaga ‵kai fakatasi+ telā e mafai o ofo atu ne se tino ki a Ieova: 12 Kafai e ofo atu ne ia te mea tenā e pelā me se fakaasiga o te loto fakafetai,+ ka ofo fakatasi atu ne ia mo te taulaga fakafetai a falaoa puku‵puku sē faka‵fete kolā ne palu fakatasi mo sinu, falaoa manifinifi sē faka‵fete kolā ne nani ki sinu, mo falaoa puku‵puku kolā ne faite ki falaoa ‵mata kae ‵lei, kae ne palu faka‵lei mo sinu. 13 Ka ofo atu ne ia tena taulaga fakatasi mo falaoa faka‵fete puku‵puku mo te taulaga fakafetai o tena taulaga ‵kai fakatasi. 14 E ‵tau o ofo atu ne ia mai i mea konā se mea e tasi o taulaga takitasi e pelā me se tusaga tapu ki a Ieova; ka fai a te mea tenā ma te faitaulaga telā e fakamatulutulu ne ia a toto o taulaga ‵kai fakatasi.+ 15 A ‵kano o te taulaga fakafetai o ana taulaga ‵kai fakatasi e ‵tau o kai i te aso e ofo atu ei ne ia. E se ‵tau o tausi ne ia ne mea ke oko ki te tafataeao.+

16 “‘Kafai a te taulaga se taulaga o te tautoga+ io me se taulaga o te lotomalie,+ e ‵tau o kai a te taulaga tenā i te aso e ofo atu ei ne ia tena taulaga, kae ko mea e ‵toe mai i ei e mafai foki o kai i te suā aso. 17 Kae ko so se ‵kano o te taulaga e ‵toe mai i te tolu o aso, e ‵tau o ‵sunu ki te afi.+ 18 Kae kafai e kai se tino ki so se ‵kano o tena taulaga ‵kai fakatasi i te tolu o aso, ka se talia eiloa ne te Atua a te tino telā ne ofo atu ne ia te taulaga. Ka se aoga ki a ia tena taulaga; ko fai te taulaga tenā e pelā me se mea lailai, kae ko te tino telā e kai ki ne mu mea mai i ei ka fakasala eiloa mō tena mea ‵se tenā.+ 19 A ‵kano kolā e pa‵tele ki se mea sē ‵ma e se ‵tau o kai. E ‵tau o ‵sunu ki te afi. So se tino telā e ‵ma e mafai o kai ki ‵kano kolā e ‵ma.

20 “‘So se tino telā e se ‵ma kae kai ki ‵kano o te taulaga ‵kai fakatasi, telā e ofo atu ki a Ieova, a te tino tenā e ‵tau o tapale kea‵tea* mai i ana tino.+ 21 Kafai e patele se tino ki se mea sē ‵ma, faitalia me ko mea sē ‵ma o se tino+ io me se manu sē ‵ma+ io me ko so se mea sē ‵ma kae fakatakalialia,+ kae kai ki mu ‵kano o te taulaga ‵kai fakatasi, telā e ofo atu ki a Ieova, a te tino tenā e ‵tau o tapale kea‵tea* mai i ana tino.’”

22 Ne toe faipati atu a Ieova ki a Mose, ana muna: 23 “Fai atu ki tino Isalaelu, ‘E se ‵tau mo koutou o ‵kai ki so se gako+ o se pulumakau tagata io me se tamā mamoe io me se kouti. 24 A gako o se manu telā ne maua atu ko mate mo gako o se manu ne tamate ne te suā manu e mafai o fakaaoga ki so se mea, kae e se ‵tau eiloa mo koutou o ‵kai ki ei.+ 25 Me i so se tino e kai ki gako o se manu telā e ofo atu ne ia e pelā me se taulaga e ofo atu i luga i te afi ki a Ieova e ‵tau o tapale kea‵tea* mai i ana tino.

26 “‘E se ‵tau mo koutou o ‵kai ki so se toto+ i so se koga e ‵nofo koutou i ei, faitalia me ko toto o manu eva io me ko toto o manu vae fa. 27 So se tino e kai ki so se toto e ‵tau o tapale kea‵tea*+ mai i ana tino.’”

28 Ne toe faipati atu a Ieova ki a Mose, ana muna: 29 “Fai atu ki tino Isalaelu, ‘So se tino e ofo atu tena taulaga ‵kai fakatasi ki a Ieova ka aumai ne ia se vaega o tena taulaga mai tena taulaga ‵kai fakatasi ki a Ieova.+ 30 Ka aumai ne ia i ana lima a gako+ fakatasi mo te fatafata mo fai se taulaga e ofo atu i luga i te afi ki a Ieova, kae ka fakagasuesue ne ia ki mua mo tua e pelā me se taulaga fakagasuesue+ i mua o Ieova. 31 Ka ‵sunu ne te faitaulaga a gako konā ko te mea ke au i luga i te fatafaitaulaga,+ kae ka tuku ma Alona mo ana tama tāgata a te fatafata o te taulaga.+

32 “‘Ka tuku atu ne koutou a te vae fakaatamai e pelā me se tusaga tapu ki te faitaulaga mai otou taulaga ‵kai fakatasi.+ 33 A te tama tagata a Alona telā e ofo atu ne ia a toto o taulaga ‵kai fakatasi mo gako, ka fai ma ia a te vae fakaatamai e pelā me ko tena tusaga.+ 34 Me ka puke ne au a te fatafata o te taulaga fakagasuesue mo te vae o te tusaga tapu mai taulaga ‵kai fakatasi a tino Isalaelu, kae tuku atu ne au ki a Alona te faitaulaga mo ana tama tāgata e pelā me se tulafono foliki tumau mō tino Isalaelu.+

35 “‘A te mea tenei ko te tusaga mai te taulaga e ofo atu i luga i te afi ki a Ieova telā e tuku ma faitaulaga, ko Alona mo ana tama tāgata, i te aso e tuku atu ei ne ia a latou ke tavini e pelā me ne faitaulaga ki a Ieova.+ 36 Ne fakatonu atu a Ieova ke tuku atu ki a latou a te tusaga tenei mai tino Isalaelu i te aso e faū ei ne ia a latou.+ A te mea tenei se tulafono fakavae tumau i olotou kautama katoa.’”

37 Tenei te tulafono e uiga ki te taulaga ‵sunu,+ te taulaga meakai,+ te taulaga mō agasala,+ te taulaga mō mea ‵se,+ te taulaga o te fakasopoga+ mo te taulaga ‵kai fakatasi,+ 38 e ‵tusa mo te fakatonuga ne fai atu ne Ieova ki a Mose i te Mauga o Sinai+ i te aso ne fakatonu ei ne ia a tino Isalaelu ke ofo atu olotou taulaga ki a Ieova i te koga lavaki o Sinai.+