Te Tusi a Ioane

14 “Ke mo a ma ‵pole otou loto.+ Fakaasi atu faeloa te fakatuanaki ki te Atua;+ kae fakaasi mai foki te fakatuanaki ki a au. 2 E uke a koga ‵nofo i te fale o toku Tamana. Moi seai, penei ko fai atu ne au ki a koutou, me i a au ka fano o fakatoka se koga mō koutou.+ 3 Kafai foki e fano au o fakatoka se koga mō koutou, ka toe foki mai au o puke* koutou, ko te mea ke ‵nofo foki koutou i te koga telā e nofo au i ei.+ 4 Kae ko te koga e fano au ki ei e iloa ne koutou te auala ki ei.”

5 Ne fai atu a Toma+ ki a ia: “Te Aliki, e se iloa ne matou te koga e fano koe ki ei. E mafai pefea o iloa ne matou a te auala?”

6 Ne fai atu a Iesu ki a ia: “Au ko te auala+ mo te munatonu+ mo te ola.+ E seai se tino e fanatu ki te Tamana māfai e se auala mai i a au.+ 7 Kafai ne iloa ne koutou au, e iloa foki ne koutou toku Tamana; mai te taimi tenei o fano ki mua ko iloa ne koutou a ia kae ko lavea foki ne koutou a ia.”+

8 Ne fai atu a Filipo ki a ia: “Te Aliki, fakaasi mai ki a matou te Tamana, ko lotoma‵lie ei matou ki ei.”

9 Ne fai atu a Iesu ki a ia: “Mai tua o se taimi leva ne ‵nofo fakatasi ei au mo koutou, e Filipo, e seki iloa eiloa ne koe au? So se tino e kilo mai ki a au ko kilo foki ki te Tamana.+ Kaia la e fai mai ei koe, ‘Fakaasi mai ki a matou te Tamana’? 10 E a, e se talitonu koe i a au e ‵kau fakatasi mo te Tamana kae ko te Tamana e ‵kau fakatasi mo au?+ A mea kolā e fai atu ne au ki a koutou e se i a aku eiloa,+ kae ko te Tamana telā e ‵kau fakatasi mo au e fai eiloa ne ia ana galuega. 11 Talitonu mai ki a au me i a au e ‵kau fakatasi mo te Tamana kae e ‵kau fakatasi foki te Tamana mo au; kafai e se penā, talitonu fua koe ona ko galuega.+ 12 Au e fai ‵tonu atu ki a koutou, so se tino e fakaasi mai faeloa ne ia te fakatuanaki ki a au ka fai foki ne ia a galuega konei e fai ne au; kae ka fai ne ia a galuega kolā e sili atu i galuega konei,+ me i a au ka fano i toku auala ki te Tamana.+ 13 E se gata i ei, so se mea e fakatagi mai ei koutou i toku igoa, ka fai eiloa ne au, ko te mea ke faka‵malugina te Tamana ona ko te Tama.+ 14 Kafai e fakatagi mai koutou ki so se mea i toku igoa, ka fai eiloa ne au te mea tenā.

15 “Kafai e a‵lofa mai koutou ki a au, ka faka‵logo koutou ki aku fakatonuga.+ 16 Kae ka fakamolemole au ki te Tamana kae ka tuku atu ne ia ki a koutou se isi fesoasoani ke ‵nofo mo koutou ki te se-gata-mai,+ 17 ko te agaga* o te munatonu,+ telā e se mafai o maua ne te lalolagi, me e se lavea kae e se iloa foki ne latou te mea tenā.+ Kae e iloa ne koutou te agaga tenā me e ‵nofo mo koutou kae tenā eiloa i loto i a koutou. 18 Ka se tiaki ne au koutou ke fanoa‵noa. Au e vau ki a koutou.+ 19 Ko se leva nei ka se toe lavea ei au ne te lalolagi, kae ka lavea ne koutou au,+ me i a au e ola kae ka ola foki koutou. 20 I te aso tenā, ka iloa ei ne koutou me i a au e ‵kau fakatasi mo toku Tamana, kae ko koutou e ‵kau fakatasi mai ki a au kae ko au e ‵kau fakatasi mo koutou.+ 21 So se tino e nofo mo aku fakatonuga kae fakalogo ki ei, ko ia tenā e alofa mai ki a au. Kae ko so se tino e alofa mai ki a au e alofa foki toku Tamana ki a ia, kae ka alofa au ki ei kae ka fakaasi faka‵lei atu au ki a ia.”

22 Ne fai atu a Iuta,+ e se ko Iuta te Isikaliota, ki a ia: “Te Aliki, se a te mea ne tupu ko manako ei koe o fakaasi faka‵lei mai koe ki a matou kae e se ki te lalolagi?”

23 Ne tali atu a Iesu ki a ia: “Kafai e alofa mai se tino ki a au, ka fakalogo a ia ki aku muna,+ kae ka alofa toku Tamana ki a ia, kae ka olo atu māua ki a ia o ‵nofo fakatasi mo ia.+ 24 So se tino e se alofa mai ki a au e se fakalogo ki aku pati. A pati kolā e lagona ne koutou e se i a aku, kae i a te Tamana telā ne uga mai ne ia au.+

25 “Ko oti ne fai atu ne au a mea konei ki a koutou kae koi ‵nofo fakatasi tatou. 26 Kae ko te fesoasoani, ko te agaga tapu, telā ka uga mai ne toku Tamana i toku igoa, ko ia tenā ka akoako atu ne ia ki a koutou a mea katoa kae ka fakamasaua atu ne ia ki a koutou a mea katoa kolā ne fai atu ne au ki a koutou.+ 27 Ka tiaki ne au koutou mo te filemu; kae ka tuku atu ne au ki a koutou a toku filemu.+ E se tuku atu ne au i te auala telā e tuku atu ne te lalolagi. Ke mo a ma ‵pole otou loto io me e ma‵taku koutou. 28 Ne lagona ne koutou i a au ne fai atu ki a koutou, ‘Au ka fano kae toe foki mai au ki a koutou.’ Kafai ne a‵lofa mai koutou ki a au, ka fia‵fia eiloa koutou i a au e fano ki te Tamana, me e sili atu te Tamana i a au.+ 29 Tela la, ko oti ne fakaasi atu ne au ki a koutou kae koi tuai o ‵tupu a mea konei, ko te mea ke tali‵tonu koutou māfai ko ‵tupu.+ 30 Ka se uke aku pati e fai atu ki a koutou, me ko vau a te pule o te lalolagi,+ kae e seai sena pule i luga i a au.+ 31 Ko te mea ke iloa ne te lalolagi i a au e alofa ki te Tamana, e fai eiloa ne au a te fakatonuga ne tuku mai ne te Tamana ke fai ne au.+ ‵Tu ki luga, tatou ka olo kea‵tea mai konei.