Numela

11 Ne kamata o fameo malosi a tino i mua o Ieova. I te taimi ne lagona ei ne Ieova olotou fameo ne kaitaua malosi a ia, kae ne aumai ne Ieova te afi ki luga i a latou kae ne ‵ka i ei a nisi koga i tua o te lotou fakai. 2 I te taimi ne kamata ei o ‵tagi atu a tino ki a Mose, ne fakatagi atu a ia ki a Ieova,+ kae ne mate ei a te afi. 3 Tenā ne fakaigoa ei a te koga tenā ki a Tapela* me ne aumai ne Ieova te afi ki tino i ei.+

4 Ne fakaasi atu ne tino fakaa‵tea+ kolā ne ‵nofo mo latou a te uiga kaimanako,+ kae ne kamata foki o ‵tagi a tino Isalaelu, olotou muna: “Ko oi ka aumai ne ia a meafasi ke ‵kai ei matou?+ 5 E masau‵sau faeloa matou ki ika sē ‵togi kolā e ‵kai sāle matou ki ei i Aikupito, e pelā foki mo kukama, meleni, lau aniani, aniani mo kaliki!+ 6 Kae nei la, a matou ko gasolo o vāi‵vai. E seai ne mea aka e lavea ne matou kae na ko te manai+ fua tenei.”

7 A te manai+ e pelā mo te fuaga o te koliano,+ kae e foliga mai pelā me se pulukau o te peliuma.* 8 E olo atu a tino o ‵tae a manai kae tuki ne latou ki mea tuki saito io me ki se talituki. Ko saka ei ne latou ki ulo fai meakai io me faite ne latou mai i ei a falaoa puku‵puku,+ kae e fai pelā me ne keke ma‵galo ne fai ki sinu. 9 Kafai e oko ifo a te ‵sau o te po ki luga i te fakai, kae e oko ifo foki a te manai ki luga i ei.+

10 Ne lagona ne Mose a tino e ‵tagi mautuutu, ko kāiga takitasi, mo tāgata taki tokotasi i mataloa o olotou faleie. Ne kaitaua a Ieova,+ kae ne seki fiafia foki a Mose. 11 Tenā ne fai atu ei a Mose ki a Ieova: “Kaia ko fakapuapuaga ei ne koe tau tavini? Kaia ko se fiafia ei koe ki a au, ko ala ei o tuku mai ne koe a amoga ‵mafa a tino katoa konei ki luga i a au?+ 12 E mata, ne faka‵fua ne au a tino katoa konei? E mata, ne fanau ne au latou, telā ko fai mai ei koe ki a au, ‘Amo a latou i ou fatafata, e pelā eiloa me se tausi tama* telā e tausi atu ki se pepe,’ ke oko ki te fenua ne tauto ei koe me ka tuku atu ne koe ki olotou tupuga?+ 13 Tefea te koga ka maua ne au i ei ne meafasi ke tuku atu ki tino katoa konei? Me e ‵tagi mai faeloa latou ki a au, olotou muna ‘Tuku mai ne meafasi ke ‵kai matou ki ei!’ 14 Ko sē mafai ne au o tausi atu ki tino katoa konei; ko tō faigata ki a au.+ 15 Kafai e penei eiloa au faifaiga ki a au, fakamolemole ke na tamate ne koe au i te taimi nei.+ Kafai e fiafia mai koe ki a au, sa fai la ke toe lavea ne au se fakalavelave.”

16 Ne tali atu a Ieova ki a Mose: “Fakamaopoopo mai ki a au ne tāgata e toko 70 mai toeaina o Isalaelu, ne tāgata kolā e iloa ne koe me ko toeaina mo takitaki o latou,+ kae ave latou ki te faleie o maopoopoga, kae fai ke ‵tu fakatasi latou mo koe i konā. 17 Au ka fanaifo+ ke fai‵pati mo koe i konā,+ kae ka puke ne au kea‵tea se vaega o te agaga+ mai i a koe kae tuku atu ki a latou, kae ka fesoasoani atu latou ki a koe ke amo a amoga a tino ko te mea ke se amo tokotasi ne koe.+ 18 E ‵tau o fai atu koe ki tino, ‘Ke fakatapu koutou mō te aso ma taeao,+ me ka ‵kai eiloa koutou ki meafasi, me i a koutou ne ‵tagi kae lagona+ ne Ieova a koutou e fai aka: “Ko oi ka aumai ne ia meafasi ke ‵kai ei matou? Ne ‵lei atu matou i Aikupito.”+ Ka tuku atu eiloa ne Ieova a meafasi ki a koutou, kae ka ‵kai koutou ki ei.+ 19 A koutou ka sē ‵kai ki ei i se aso fua e tasi io me 2 io me 5 io me 10 io me 20, 20 kae ka ‵kai koutou ki ei i aso katoa o te masina kātoa, ke oko ki te taimi e ‵sali mai ei a mea konā i otou puisu kae ka takalia‵lia koutou ki ei,+ me i a koutou ne ‵teke ki a Ieova, telā e fakatasi mo koutou, kae ne ‵tagi koutou i ana mua: “Kaia ne o‵mai ei matou kea‵tea mai Aikupito?”’”+

21 Tenā ne fai atu ei a Mose: “A te aofaki o tino kolā e aofia au i ei e toko 600,000 tāgata+ kolā e sa‵sale i lalo, kae ne fai mai koe, ‘Ka tuku atu ne au a meafasi ki a latou, kae ka ‵kai ma‵kona latou i ei i aso katoa o te masina kātoa’! 22 Kafai e tamate a lafu mamoe mo lafu pulumakau katoa, e mata, e lava katoa latou i ei? Io me kafai e aumai a ika katoa o te tai, e mata, e lava katoa latou i ei?

23 Tenā ne fai atu ei a Ieova ki a Mose: “E mata, ko tō toetoe te lima o Ieova?+ Nei la ka lavea ne koe me e mata, ka tupu eiloa a te mea ne fai atu ne au ki a koe io me ikai.”

24 Ne fano a Mose o fai atu ki tino a pati katoa a Ieova. Kae ne fakamaopoopo mai ne ia a tāgata e toko 70 mai toeaina o te fenua kae faka‵tu fakatamilo atu latou i tua o te faleie.+ 25 Tenā ne fanaifo ei a Ieova i se kaumana+ kae faipati atu ki a Mose+ kae puke ne ia se vaega o te agaga+ mai i a ia kae ne tuku atu ki toeaina e toko 70 konā. Kae i te taimi eiloa ne maua ei ne latou a te agaga, ne kamata latou o amio e pelā me ne pelofeta,*+ kae ne seki toe fai latou penā.

26 E isi ne tāgata e tokolua kolā ne ‵nofo i te fakai. A lā igoa ko Eletata mo Metata. Kae ne maua foki ne lāua te agaga, me ne aofia lāua i tāgata kolā ne tusi ki lalo olotou igoa, kae ne seki olo atu lāua ki te faleie. Kae ne kamata lāua o amio e pelā me ne pelofeta i te fakai. 27 Kae ne tele atu se tamataene o fakailoa te mea tenā ki a Mose, ana muna: “A Eletata mo Metata ko amio e pelā me ne pelofeta i te fakai!” 28 Tenā ne tali atu ei a Iosua+ te tama tagata a Nuno, te tavini a Mose mai te taimi koi talavou ei a ia, ana muna: “Toku aliki ko Mose, taofi aka a lāua!”+ 29 Kae ne fai atu a Mose ki a ia: “A koe na e manavase i a au ma pokotia i te mea tenei? Ikai, aku muna loa me i tino katoa o Ieova ne pelofeta, kae ke tuku atu ne Ieova tena agaga ki luga i a latou!” 30 Fakamuli ifo, ne toe ‵foki atu a Mose mo toeaina konā o Isalaelu ki te fakai.

31 Tenā ne agi mai ei te matagi mai i a Ieova kae kamata o aumai i ei a manu eva ko salu mai te tai kae fai ei ke ‵to ki lalo i te fakai,+ kāti i se ‵mao e pelā mo se malaga i se aso e tasi mai tena feitu e tasi e penā foki te ‵mao i te suā feitu, o fakatamilo te fakai kātoa, kae e nofo ki se lua kupita* te maluga mai te laukele. 32 Tela la, i te aso kātoa tenā mo te po kātoa e pelā foki mo te suā aso ne ala faeloa a tino o ‵tae mai a manu eva ko salu. E seai se tino ne nofo mai lalo i te sefulu homa* te aofaki o ana mea ne ‵tae aka, kae ne fola faeloa ne latou a mea konā i loto i te fakai kātoa mō latou. 33 Kae i te taimi koi tuku ei a meafasi konā i olotou gutu, kae koi tuai o ū ki ei, ne kaitaua malosi a Ieova ki tino, kae kamata o ‵ta ne Ieova a tino e tokouke i a latou.+

34 Ne fakaigoa ne latou te koga tenā ki a Kipelota-hatava,*+ me tenā te koga ne tanu ei ne latou a tino kaima‵nako.+ 35 Ne tiaki ne tino a Kipelota-hatava o olo atu ki Haselota, kae ne ‵nofo eiloa latou i Haselota.+