Ki a Tito
3 Ke fakamasaua atu faeloa ki a latou ke faka‵logo ki malo mo tino pule,+ ke toka o fai so se galuega ‵lei, 2 ke mo a ma fakamasei ne latou se tino, ke mo a ma kinau, kae ke loto malamalama,+ ke fakaasi atu te agamalu ki tino katoa.+ 3 Me i a tatou foki ne fai muamua mo fai ne tino va‵lea, sē faka‵logo, ne takitaki‵segina, ne pologa ki manakoga mo fakafiafiaga kese‵kese, ne fai mea ma‵sei kae loto ma‵sei, ne fai mea fakatakalia‵lia, kae ne takalialia te suā tino ki te suā tino.
4 Kae i te taimi ne fakaasi mai ei a te atafai o te ‵tou Fakaola, telā ko te Atua+ mo tena alofa ki tino 5 (e se ona ko so se galuega amiotonu ne fai ne tatou,+ kae ona ko tena alofa fakamagalo),+ ne faka‵sao ei ne ia tatou e auala i te ‵tou faka‵māga* ke maua ne tatou te ola+ kae faka‵fou ne ia tatou e auala i te agaga tapu.+ 6 Ne ‵ligi ne ia mo te kaimalie a te agaga tenei ki luga i a tatou e auala i a Iesu Keliso te ‵tou Fakaola,+ 7 me kafai ko oti ne taku amiotonugina tatou e auala i te alofa tauanoa o te tino tenā,+ ko mafai ei o fai tatou mo sui+ e ‵tusa mo te fakamoemoega ko te ola se-gata-mai.+
8 A pati konei e fakatuagagina, kae e manako au ke faka‵mafa atu faeloa ne koe a mea konei, ko te mea ke ‵saga faeloa a tino kolā ko tali‵tonu ki te Atua o fakatumau te faiga o galuega ‵lei. A mea konei e ‵lei kae e aoga ki tino katoa.
9 Kae ke mo a ma saga atu ki kinauga va‵lea mo fakatelega o gafa mo kinauga mo taua e uiga ki te Tulafono, me e seai ne aoga.+ 10 ‵Teke atu ki te tino+ telā e ‵lago ki akoakoga ‵se,+ māfai ko oti ne polopoloki a ia i te taimi muamua mo te lua o taimi,+ 11 mai te iloa atu me ko oti ne seke te tino tenā mo te auala kae ko agasala foki, kae ko fakasala ne ia a ia eiloa.
12 Kafai e uga atu ne au a Aletima io me ko Tukasi+ ki a koe, taumafai malosi ke oko mai koe ki a au i Nikapoli, me tenā te koga ka nofo au i ei i te tau ‵moko. 13 Fakatoka faka‵lei a mea a Senasa, telā e poto i te Tulafono, mo Apolo ko te mea ke lava mō te lā malaga.+ 14 Kae fai foki ke iloa ne ‵tou tino o fakatumau te faiga o galuega ‵lei ko te mea ke fesoasoani atu latou i taimi e manakogina ei,+ ko te mea ke aoga malosi latou.+
15 Ko ‵moli atu alofaaga o latou katoa kolā e ‵nofo mo au i konei. ‵Moli atu oku alofaaga ki tino kolā e a‵lofa ki a matou i te fakatuanaki.
Ke i luga i a koutou katoa te alofa tauanoa o te Atua.