Levitiko

27 Ne toe faipati atu a Ieova ki a Mose, ana muna: 2 “Faipati ki tino Isalaelu kae fai atu ki a latou, ‘Kafai e fai ne se tagata se tautoga+ fakapito ke ofo atu ne ia te ‵togi fakatautau o se tino ki a Ieova, 3 a te ‵togi fakatautau o se tagata mai te 20 ki te 60 tausaga e 50 sekela* siliva e ‵tusa mo te sekela masani i te koga tapu.* 4 Kae kafai se fafine, a tena ‵togi fakatautau e 30 sekela. 5 Kafai a te matua o te tino ko 5 tausaga ke oko ki te 20 tausaga, a te ‵togi fakatautau o te tagata e 20 sekela, kae 10 sekela māfai se fafine. 6 Kafai a te matua o te tino ko tasi te masina ke oko ki te lima tausaga, a te ‵togi fakatautau o te tagata e lima sekela siliva kae tolu sekela siliva māfai se fafine.

7 “‘Kafai a te matua o te tino ko 60 tausaga io me silia atu, a te ‵togi fakatautau o te tagata e 15 sekela kae 10 sekela māfai se fafine. 8 Kae kafai ko tō mativa a ia ke ‵togi tena ‵togi fakatautau,+ e ‵tau o tu a te tino tenā i mua o te faitaulaga, kae ka fai ne te faitaulaga se ‵togi mō ia. Ka fai ne te faitaulaga a tena ‵togi e ‵tusa mo te mea e mafai o ‵togi ne te tino telā ne fai tena tautoga.+

9 “‘Kafai e aofia i te tautoga se manu telā e fetaui ‵lei ke ofo atu ki a Ieova, so se mea e tuku atu ki a Ieova ka fai eiloa e pelā me se mea tapu. 10 E se mafai o sui io me fesuiaki ne ia se mea ‵lei ki se mea masei io me se mea masei ki se mea ‵lei. Kae kafai e fesuiaki ne ia se manu ki se isi manu, a te manu tenā fakatasi mo te manu telā e sui ki ei ka fai katoa e pelā me ne mea tapu. 11 Kafai a te manu tenā se manu sē ‵ma+ telā e se mafai o ofo atu ki a Ieova, e ‵tau o fakatu ne ia te manu tenā i mua o te faitaulaga. 12 Ko fai ei ne te faitaulaga tena ‵togi e ‵tusa mo te ‵lei io me ko te masei o te manu tenā. A te ‵togi e fakatautau ne te faitaulaga ko tena ‵togi eiloa tenā. 13 Kae kafai e manako a ia ke toe ‵togi mai ne ia, e ‵tau o fakaopoopo atu ne ia te tasi-vae-lima ki te ‵togi fakatautau+ o te mea tenā.

14 “‘Kafai e fakatapu ne se tagata tena fale e pelā me se mea tapu ki a Ieova, e ‵tau o fai ne te faitaulaga tena ‵togi, e ‵tusa mo te ‵lei io me ko te masei o te mea tenā. A te ‵togi telā e fai mai ne te faitaulaga, tenā eiloa tena ‵togi.+ 15 Kae kafai e manako te tino ne fakatapu tena fale o toe ‵togi mai tena fale, e ‵tau o fakaopoopo atu ne ia te tasi-vae-lima ki te ‵togi fakatautau, ko toe maua ei tena fale.

16 “‘Kafai e fakatapu ne se tagata ana nisi manafa ki a Ieova, a te ‵togi fakatautau e fakavae ki te uke o fuaga e manakogina ke ‵toki i ei: a te homa* e tasi o fuaga kalite e 50 sekela siliva. 17 Kafai ne fakatapu tena manafa talu mai te tausaga o te Iupeli,+ e tumau eiloa tena ‵togi fakatautau. 18 Kafai e fakatapu tena manafa mai tua o te Iupeli, ka galue ne te faitaulaga te ‵togi e ‵tusa mo te aofaki o tausaga koi ‵toe ke oko ki te suā tausaga o te Iupeli, kae e ‵tau o toese se aofaki mai i tena ‵togi fakatautau.+ 19 Kae kafai e toe ‵togi mai ne te tino ne fakatapu ne ia te manafa, e ‵tau o fakaopoopo atu ne ia te tasi-vae-lima ki te ‵togi fakatautau, kae ka fai eiloa mō ia te manafa. 20 Kae kafai e se ‵togi ne ia te manafa, kae ko fakatau atu te manafa tenā ki se isi tagata, e se mafai o toe ‵togi mai ne ia te manafa tenā. 21 Kafai ko fakasaoloto a te manafa tenā i te Iupeli, ka fai eiloa e pelā me se mea tapu ki a Ieova, se manafa telā ko oti ne tuku katoatoa atu ki a ia. Ka fai eiloa mo fai te kope totino o faitaulaga.+

22 “‘Kafai e fakatapu ne se tagata ki a Ieova se manafa telā ne ‵togi ne ia kae e sē se vaega o tena tofi,+ 23 ka galue ne te faitaulaga a tena ‵togi ke oko ki te tausaga o te Iupeli, ko fakailoa atu ei ne ia te ‵togi fakatautau i te aso tenā.+ A te mea tenā se mea tapu ki a Ieova. 24 I te tausaga o te Iupeli ka toe fakafoki atu a te manafa ki te tino telā ne ‵togi ne ia mai i ei, ki te tino i o ia te manafa.+

25 “‘A ‵togi katoa e ‵tau o fakagalue aka e ‵tusa mo te sekela masani i te koga tapu. A te sekela e tasi e ‵tau o ‵pau mo te 20 kile.*

26 “‘Kae e seai se tino e ‵tau o fakatapu ne ia te toekimua a se manu, me e fanau mai e pelā me ko te toekimua e tuku ki a Ieova.+ Faitalia me se pulumakau tagata io me se mamoe, a te manu tenā i a Ieova.+ 27 Kafai e aofia te manu tenā i manu sē ‵ma kae e sui ne ia e ‵tusa mo tena ‵togi fakatautau, e ‵tau o fakaopoopo atu ne ia te tasi-vae-lima ki tena ‵togi fakatautau.+ Kae kafai e se toe ‵togi mai ne ia, ka fakatau atu eiloa ki tua e ‵tusa mo tena ‵togi fakatautau.

28 “‘Kae e seai se mea telā ko oti ne tuku katoatoa* atu ne se tagata ki a Ieova mai ana kope, e mafai o fakatau atu ki tua io me toe ‵togi mai ne ia, faitalia me se tino io me se manu io me se laukele o ia. So se mea telā e tuku katoatoa atu se mea tafasili i te tapu ki a Ieova.+ 29 E se gata i ei, e seai se tino ko oti ne taku fakamaseigina kae ne ‵vae kea‵tea ke fakaseai atu, e mafai o fakasao.+ E ‵tau eiloa o tamate a te tino tenā.+

30 “‘A te tasi-vae-sefulu+ o te laukele, faitalia me ko fuataga o te laukele io me ko fuagalakau mai lakau, i a Ieova a mea konā. A te mea tenā se mea tapu ki a Ieova. 31 Kafai e manako se tagata ke toe ‵togi mai se vaega o tena tasi-vae-sefulu, e ‵tau o fakaopoopo atu ne ia te tasi-vae-lima ki tena ‵togi. 32 Kae e pelā mo te tasi-vae-sefulu o te lafu pulumakau mo te lafu mamoe, so se mea telā e fano mai lalo i te tokotoko o te tausi mamoe, ko te sefulu o manu* e ‵tau o fai pelā me se mea tapu ki a Ieova. 33 E se ‵tau o iloilo ne ia me e ‵lei io me masei a te manu tenā, e se ‵tau foki o sui ne ia. Kae kafai e taumafai a ia o sui te manu tenā, ka fai eiloa a te manu tenā fakatasi mo te manu telā e sui ki ei e pelā me ne mea tapu.+ E se mafai o toe ‵togi mai.’”

34 Konei a fakatonuga ne tuku atu ne Ieova ki a Mose mō tino Isalaelu i te Mauga o Sinai.+