Iopu
6 Tenā ne tali atu ei a Iopu:
2 “Moi fai aka la ke fua katoa oku mafatiaga,+
Kae tuku ki luga i fua mea ‵mafa fakatasi mo oku fakalavelave!
3 Me nei la ko ‵mafa atu i one o te tai.
Tenā te pogai ko fai valevale ei aku pati.+
4 Me i matasana a te Atua Malosi Katoatoa ko ‵tu i a au,
Kae ko inu ne au a te lotou poisini;+
A mea fakama‵taku mai te Atua ko fakalaina o ‵teke mai ki a au.
5 E a, ka tagi se asini vao+ māfai e isi ne ana mouku,
Io me ka tagi se pulumakau tagata māfai e isi ne ana meakai?
6 E a, ka kai eiloa se tino ki meakai e se gali te tami e aunoa mo se masima,
Io me e a, e isi se gali o te mea ‵kena o te fuamoa?
7 Au ne ita ma patele ki mea penā.
E fai pelā me ne mea lai‵lai i aku meakai.
8 Ke talia aka la taku fakatagi
Kae ke tuku mai ne te Atua a te mea e manako au ki ei!
9 Ko te mea ke loto fiafia te Atua o tuki palapala au,
Kae ‵kapa mai tena lima o tamate au!+
10 Me i te mea tenā ka aumai ei ki a au a te fakamafanafanaga;
Au ka eva mo te fiafia ki te lagi faitalia te lasi o te ‵mae tenei,
Me ne seki fakafiti eiloa ne au a pati a te Atua Tapu.+
11 E a, e isi soku malosi ke faka‵tali faeloa?+
Kae se a toku ikuga, ko te mea ke tumau au i te ola?
12 E a, e ‵pau toku malosi mo te kaupapa?
Io me e a, ne faite toku foitino ki te kopa?
13 E a, e isi se auala e mafai o maua i ei ne au se fesoasoani
Māfai ko seai eiloa se tino e ‵lago mai ki a au?
14 So se tino e taofi ne ia te alofa fakamaoni mai tena tuakoi+
Ka tiaki ne ia te mataku ki te Atua Malosi Katoatoa.+
15 A oku taina ne amio faitogafiti+ e pelā eiloa mo se vaitafe i te tau ‵moko,
E pelā mo vai i te vaitafe telā ko ‵masa i te tau ‵moko.
16 Ko uli a mea konā ona ko poloka aisa,
Kae i loto i mea konā e ‵muni i ei a te kiona telā ko liuvai.
17 Kae i te taimi tonu ko seai i ei ne vai i a latou kae ko palele atu;
Kafai ko ‵vela, ko ‵masa pakupaku latou.
18 A te lotou auala ko ‵fuli;
Ko ‵tafe atu latou ki loto i te toafa kae ‵galo atu.
19 A te kaumalaga o Teema+ ne ‵sala ki a latou;
20 Ko ‵mā latou ona ko te lotou tali‵tonu ‵se;
Ne o‵mai latou ki konā ke maua fua i ei te fanoanoa.
21 Me tenā eiloa te mea e mafai ne koutou o fai ki a au;+
Ne lavea ne koutou te fakama‵taku o oku fakalavelave, kae e ma‵taku koutou.+
22 Kai fai atu eiloa au, ‘Aumai aka saku mea,’
Io me fakatagi atu ke fai ne koutou se meaalofa ma aku mai i otou koloa?
23 Kai fakamolemole atu eiloa au ke fakasao au mai lima o te fili
Io me fakasao mai tino pule fakasaua?
24 Akoako mai au, kae ka nofo filemu au;+
Fesoasoani mai ke malamalama au i taku mea ‵se.
25 A pati ‵tonu e se fakalogo‵mae!+
Kae ne a mea aoga e mafai o maua mai i otou pati polopoloki?+
26 E a, e taumafai koutou o fakatonutonu aku pati,
Ko pati a se tagata e seai sena fakamoemoega,+ kolā e agina ne te matagi?
27 E fai foki ne koutou se vili ki se tamaliki e seai ne ana mātua+
28 Nei la, ‵fuli kae ‵kilo mai ki a au,
Me i a au e se mafai o loi ki otou mata.
29 Fakamolemole, toe mafaufau faka‵lei—ke mo a ma manatu fatauva koutou ki a au—
Ao, toe mafaufau faka‵lei, me katoatoa eiloa toku amiotonu.
30 E a, e faipati toku alelo ki mea sē ‵tonu?
E mafau‵fau koutou me e se iloa ne toku gutu me isi se mea sē tonu?