FAMASINO

1 Mai tua o te mate o Iosua,+ ne fesili atu a tino Isalaelu* ki a Ieova:+ “Ko oi i a matou ka fanaka muamua o taua atu ki tino Kanana?” 2 Ne tali atu a Ieova: “Ko Iuta ka fanaka.+ Kiloke! Ka tuku atu* ne au a te laukele ki ana lima.” 3 Tenā ne fai atu ei a Iuta ki tena taina ko Simeona: “Vau ke olo tāua ki te kogā fenua+ telā ko oti ne ‵tofi mō oku ke taua atu tāua ki tino Kanana. Ko olo tasi ei tāua ki te kogā fenua ne ‵tofi aka mō koe.” Tenā ne fanatu ei a Simeona i a ia.

4 I te taimi ne fanaka ei a Iuta, ne tuku atu ne Ieova a tino Kanana mo tino Pelise ki olotou lima,+ kae ne fakatakavale ne latou a tāgata e toko 10,000 i Peeseka. 5 Ne maua ne latou a Atonipiseka i Peeseka kae ne taua atu latou ki a ia i konā, fakatakavale ei ne latou a tino Kanana+ mo tino Pelise.+ 6 Ne tele kea‵tea a Atonipiseka kae afuli ne latou, maua atu ei ne latou, ne ‵kati ne latou ana matikao lima ma‵tua mo ana matikao vae ma‵tua. 7 Tenā ne fai atu ei a Atonipiseka: “E toko 70 a tupu ne ‵kati kea‵tea olotou matikao lima ma‵tua mo olotou matikao vae ma‵tua kae e taetae meakai mai lalo i taku taipola. A mea kolā ne fai ne au ki a latou, ko toe taui mai nei ne te Atua ki a au.” I konā loa ne aumai ei ne latou a ia ki Ielusalema+ kae ne mate atu a ia i konā.

8 E se gata i ei, ne taua atu a tāgata Iuta ki Ielusalema+ kae puke ne latou; ne ‵ta ne latou a tino o te fakai tenā ki te pelu kae ‵sunu ki te afi. 9 Fakamuli ifo, ne olo ifo a tāgata Iuta o taua atu ki tino Kanana kolā e ‵nofo i te koga maugā mo te Nekepi mo te Sefila.+ 10 Tenā ne olo atu ei a tāgata Iuta o taua ki tino Kanana kolā e ‵nofo i Hepelona (a te igoa muamua o Hepelona ko Kiliata-alapa), kae ne ‵ta ne latou a Sesai, Aimanu mo Talamai.+

11 Ne olo atu latou mai konā o taua atu ki tino e ‵nofo i Tipeli.+ (A te igoa muamua o Tipeli ko Kiliata-sefelo.)+ 12 Kae ne fai atu a Kalepo:+ “A te tagata e fakatakavale ne ia a Kiliata-sefelo kae puke ne ia, ka tuku atu ne au ki ei a taku tama fafine ko Akesa mo fai tena avaga.”+ 13 Kae ko Otinielu+ te tama tagata a Kenasa,+ te taina foliki o Kalepo, ne fakatakavale ne ia te fakai tenā. Tenā ne tuku atu ei ne Kalepo ki a ia tena tama fafine ko Akesa mo fai tena avaga. 14 Kae i te auala o tou fafine ki te fale, ne fakamalosi atu a ia ki tena avaga ke fakamolemole atu ki tena tamana ke tuku mai se laukele mō lāua. Tenā ne tu ifo ei a ia ki lalo mo tena asini.* Ne fesili atu a Kalepo ki tou fafine: “Se a te mea e manako koe ki ei?” 15 Muna a tou fafine ki a ia: “Fakamolemole fakamanuia mai au, ko oti ne tuku mai ne koe se laukele mō oku i te feitu ki saute; tuku mai aka foki ki a au a Kulota-maima.”* Tenā ne tuku atu ei ne Kalepo ki tou fafine a Kulota i Luga mo Kulota i Lalo.

16 Kae ko tino ne ‵tupu mai i tino Keni,+ te tamana o te avaga a Mose,+ ne o‵mai mai te fakai o lakau ko pama+ fakatasi mo tino Iuta ki te koga lavaki o Iuta i te feitu ki saute o Alata.+ Ne olo atu latou ki konā kae ‵nofo fakatasi mo tino i ei.+ 17 Kae ne olo fakatasi atu a Iuta mo tena taina ko Simeona, kae taua atu ki tino Kanana kolā e ‵nofo i Sefata kae fakamasei ne latou te fakai.+ Tenā ne fakaigoa ei ne latou te fakai tenā ki a Holema.*+ 18 Tenā ne puke ei ne Iuta a Kasa+ mo tena kogā fenua, Asekelona+ mo tena kogā fenua, mo Ekelona+ mo tena kogā fenua. 19 Ne fakatasi atu eiloa a Ieova ki a Iuta, kae ne puke ne latou a te koga maugā kae ne seki mafai o afuli kea‵tea ne latou a tino kolā ne ‵nofo i te koga* tenā me e isi ne olotou kaliota tau mo fiti makai‵kai.*+ 20 Ne tuku atu ne latou a Hepelona ki a Kalepo, e pelā eiloa mo te tautoga a Mose,+ kae ne afuli kea‵tea ne ia mai i konā a tama tāgata e tokotolu a Anaki.+

21 Kae ne seki afuli kea‵tea ne tino Peniamina a tino Iepuse kolā e ‵nofo i Ielusalema, tenā ne tumau eiloa a tino Iepuse i te ‵nofo fakatasi mo tino Peniamina i Ielusalema ke oko mai ki te aso nei.+

22 I te taimi tenā, ne olo atu a te kāiga o Iosefa+ o taua ki Peteli, kae ne fakatasi atu a Ieova ki a latou.+ 23 A te kāiga o Iosefa ne olo o iloilo a Peteli (a te igoa muamua o te fakai tenā ko Lusā),+ 24 kae ne lavea ne sipai konā se tagata ko vau ki tua mo te fakai. Tenā ne fai atu ei latou ki a ia: “Fakamolemole fakaasi mai aka a te auala ki loto i te fakai, kae ka fai faka‵lei* ne matou a koe.” 25 Tenā ne fakaasi mai ei ne te tagata tenā a te auala ki loto i te fakai, kae ne ‵ta ne latou a te fakai ki te pelu, kae ne fakasaoloto ne latou a te tagata tenā mo tena kāiga kātoa.+ 26 Ne fanatu te tagata tenā ki te laukele o tino Heti kae faite ne ia se fakai i ei kae fakaigoa ne ia ki a Lusā, tenā eiloa tena igoa ke oko mai ki te aso nei.

27 Ne seki puke ne Manase a Peta-seana mo ana fakai fo‵liki, Tanaka+ mo ana fakai fo‵liki, tino e ‵nofo i To mo ana fakai fo‵liki, tino e ‵nofo i Ipeleamo mo ana fakai fo‵liki, mo tino e ‵nofo i Mekito mo ana fakai fo‵liki.+ Ne tumau eiloa a tino Kanana i te ‵nofo atu i te laukele tenei. 28 I te taimi ne gasolo aka ei o malosi a Isalaelu, ne fai ne latou a tino Kanana ke galue ‵mafa,+ kae ne seki afuli katoatoa ne latou kea‵tea.+

29 Ne seki afuli foki kea‵tea ne Efalaima a tino Kanana kolā ne ‵nofo i Kesela. Ne tumau eiloa a tino Kanana i te ‵nofo fakatasi mo latou i Kesela.+

30 Ne seki afuli kea‵tea ne Sepulona a tino kolā ne ‵nofo i Kitilona mo tino kolā ne ‵nofo i Nalalo.+ Ne tumau eiloa a tino Kanana i te ‵nofo fakatasi mo latou kae fai a galuega ‵mafa.+

31 Ne seki afuli kea‵tea ne Asela a tino kolā ne ‵nofo i Ako mo tino kolā ne ‵nofo i Saitonu,+ Alaapa, Akasipa,+ Helipa, Afeko+ mo Lehopa.+ 32 Tenā ne ‵nofo fakatasi eiloa a tino Asela mo tino Kanana kolā ne ‵nofo i te laukele tenā, me ne seki afuli ne latou kea‵tea.

33 Ne seki afuli ne Nafatali a tino kolā ne ‵nofo i Peta-semese mo tino ne ‵nofo i Petanata+ kae ne tumau eiloa latou i te ‵nofo fakatasi mo tino Kanana kolā e ‵nofo i te laukele tenā.+ Ne fakagalue ‵mafa ne latou a tino Peta-semese mo tino Petanata.

34 Ne fai ne tino Amoli a tino Tanu ke ‵nofo i koga maugā, me ne seki talia ne latou ke olo ifo latou ki lalo i te koga* tenā.+ 35 Ne tumau eiloa a tino Amoli i te ‵nofo atu i Mauga o Helese, Aitialona+ mo Salapima.+ Kae i te taimi ne gasolo aka ei o malosi* te kāiga o Iosefa, ne faimālō ei latou ke fai a galuega ‵mafa. 36 A te kogā fenua o tino Amoli e vau mai te fanakaga ki Akalapima,+ mai Selaa o fanaka ki luga.

2 Ne fanaka a te agelu+ a Ieova mai Kilikala+ ki Pokima kae fai atu: “Ne aumai ne au koutou kea‵tea mai Aikupito ki te laukele ne tauto ei au ki otou tupuga.+ E se gata i ei, e fai atu au, ‘Ka se ofa eiloa ne au taku feagaiga mo koutou.+ 2 Kae e se ‵tau mo koutou o fai feagaiga mo tino e ‵nofo i te laukele+ tenei kae e ‵tau o ofa ne koutou ki lalo a olotou fatafaitaulaga.’+ Kae ne seki faka‵logo koutou ki toku leo.+ Kaia ne fai ei ne koutou a te mea tenei? 3 Tenā te pogai ne fai atu ei au, ‘Ka se afuli eiloa ne au latou kea‵tea mai otou mua,+ kae ka malei ne latou koutou+ kae takitaki koutou kea‵tea ne olotou atua.’”+

4 I te taimi ne faipati atu ei ne te agelu a Ieova a pati konei ki tino Isalaelu katoa, ne kamata o ‵tagi mautuutu a tino i se leo maluga. 5 Ne fakaigoa ne latou a te koga tenā ki a Pokima,* kae ofo atu ne latou a taulaga ki a Ieova i konā.

6 I te taimi ne uga atu ei ne Iosua a tino ke olo, ne olo atu a tino Isalaelu taki tokotasi ki olotou tofi o ‵nofo i ei.+ 7 Ne tumau eiloa a tino i te tavini atu ki a Ieova i aso katoa ne ola ei a Iosua mo aso katoa o toeaina kolā ne ola i te taimi ko oti ne mate atu ei a Iosua kae ne lavea ne latou a faifaiga fakaofoofogia katoa a Ieova ne fai mō Isalaelu.+ 8 Kae ko Iosua te tama tagata a Nuno, te tavini a Ieova, ne mate kae ko 110 ana tausaga.+ 9 Tenā ne tanu ei ne latou a ia i te kogā fenua o tena tofi i Timenata-sele+ i te koga maugā o Efalaima, i te feitu ki mātū o te Mauga o Kaasa.+ 10 Ne fakamaopoopo atu a te kautama kātoa tenā ki olotou tupuga,* kae ne toe sae aka te suā kautama mai tua o latou kolā e se iloa ne latou a Ieova io me ko mea ne fai ne ia mō Isalaelu.

11 Tenā ne fai ei ne tino Isalaelu a mea ma‵sei i te kilokiloga a Ieova kae tavini* atu latou ki a Paala.+ 12 Tenā ne tiaki ei ne latou a Ieova te Atua o olotou tupuga, ko te Atua telā ne aumai ne ia latou ki tua mo Aikupito.+ Kae ne tau‵tali atu latou i nisi atua, ko atua o tino kolā e ‵nofo i olotou tafa,+ kae ne ifo atu ki a latou kae fai ei ke kaitaua a Ieova.+ 13 Ne tiaki ne latou a Ieova kae tavini atu ki a Paala mo fakatusa o Asitate.*+ 14 Ona ko te mea tenei ne kaitaua malosi ei a Ieova ki Isalaelu, tenā ne tuku atu ei ne ia latou ki lima o tino ‵fao mea kolā ne kai‵soa ne latou olotou mea.+ Ne fakatau atu ne ia latou ki lima o olotou fili kolā ne ‵nofo atu i olotou tafa,+ kae ko se mafai eiloa o ‵teke atu latou ki olotou fili.+ 15 I so se koga ne olo latou ki ei, ne ‵teke atu faeloa te lima o Ieova ki a latou kae ne aumai ne ia a fakalavelave ki a latou,+ e pelā eiloa mo pati a Ieova ne fai kae pelā foki mo tena tautoga ne fai ki a latou;+ kae ne puapuaga malosi eiloa latou i ei.+ 16 Ne faka‵tu aka ne Ieova a famasino kolā ka faka‵sao ne latou a tino konā mai lima o tino ‵fao mea.+

17 Kae ne seki faka‵logo latou ki famasino, kae ‵togi atu latou e pelā me ne fāfine talitāgata ki nisi atua kae ifo atu ki a latou. Ne ‵fuli fakavave kea‵tea latou mai te auala ne sa‵sale ei olotou tupuga, ko latou kolā ne faka‵logo ki fakatonuga a Ieova.+ Ne fakata‵mala latou o fai a te mea tenā. 18 I so se taimi ne faka‵tu aka ei ne Ieova a famasino mō latou,+ ne fakatasi atu eiloa a Ieova ki te famasino tenā kae faka‵sao latou mai lima o olotou fili i aso katoa o te famasino tenā; me ne alofa+ eiloa a Ieova ki a latou ona ko te lotou ‵tagi fi‵ta telā e fakamāfua aka ne tino kolā e fakasaua+ atu ki a latou mo tino kolā e fai fakamasei atu ki a latou.

19 Kae kafai ko mate atu te famasino tenā, ko toe fai ei ne latou a faifaiga sē ‵tonu kolā e sili atu i te ma‵sei i lō mea ne fai ne olotou tupuga kae ne tau‵tali atu latou ki nisi atua, tavini atu ki mea konā, kae ifo ki ei.+ Ne seki tiaki eiloa ne latou olotou faifaiga konā mo te lotou loto ma‵keke. 20 Fakamuli ifo, ne kaitaua malosi a Ieova ki tino Isalaelu+ kae ne fai atu a ia: “Ona ko te mea ko oti ne ofa ne te fenua tenei taku feagaiga+ telā ne fakatonu atu ne au ki olotou tupuga kae ne seki faka‵logo mai latou ki a au,+ 21 kae ko au, ka se afuli kea‵tea eiloa ne au mai i olotou mua se fenua e tasi mai i atufenua kolā ne faka‵toe ne Iosua i te taimi ne mate i ei a ia.+ 22 A te mea tenei e tofotofo aka ei me e mata, ka puke ‵mau a Isalaelu ki auala o Ieova+ mai te sa‵sale atu i ei e pelā mo olotou tupuga io me ikai.” 23 Ne talia ne Ieova ke ‵nofo mai a atufenua konei. Ne seki afuli fakavave ne ia latou kea‵tea, kae ne seki tuku atu foki ne ia latou ki lima o Iosua.

3 Konei a atufenua ne talia ne Ieova ke ‵nofo mai ko te mea ke mafai o tofotofo aka a tino katoa i Isalaelu kolā e seki ‵kau eiloa ki taua i Kanana+ 2 (ne fai penei ko te mea ke mafai o ‵kau atu a te kautama fou o tino Isalaelu ki taua, ko latou kolā e seki ‵kau atu eiloa ki se vaegā mea penei muamua): 3 ko aliki e tokolima o te kau Filisitia,+ mo tino Kanana katoa, tino Saitonu,+ mo tino Hivi+ kolā e ‵nofo i te Mauga o Lepanona+ mai te Mauga ko Paala-helemoni ke oko atu ki Lepo-hamata.*+ 4 Ne fai a latou konei e pelā me ne mea ke tofotofo aka ei a tino Isalaelu ke iloa aka me e mata, ka faka‵logo latou ki fakatonuga a Ieova kolā ne tuku atu ne ia ki olotou tupuga e auala i a Mose io me ikai.+ 5 Tenā ne ‵nofo fakatasi ei a tino Isalaelu mo tino Kanana,+ tino Heti, tino Amoli, tino Pelise, tino Hivi mo tino Iepuse. 6 Ne puke ne latou a tama fāfine a tino konā mo fai olotou avaga, kae tuku atu olotou tama fāfine ki tama tāgata a tino konā, kae ne kamata latou o tavini atu ki olotou atua.+

7 Tenā ne fai ei ne tino Isalaelu a mea ma‵sei i te kilokiloga a Ieova, kae ne puli i a latou a Ieova te lotou Atua kae ne tavini atu latou ki a Paala+ mo pou lakau tapu.*+ 8 Ona ko te mea tenei, ne kaitaua malosi eiloa a Ieova ki Isalaelu, kae ne fakatau atu ne ia latou ki lima o Kusana-lisataima te tupu o Mesopotamia.* Ne tavini atu a tino Isalaelu ki a Kusana-lisataima i tausaga e valu. 9 I te taimi ne ka‵laga atu ei a tino Isalaelu ki a Ieova mō se fesoasoani,+ ne fakatu aka ne Ieova se fakaola ke faka‵sao a tino Isalaelu,+ ko Otinielu+ te tama tagata a Kenasa, te taina foliki o Kalepo. 10 Ne oko atu ki luga i a ia a te agaga o Ieova,+ kae ne fai a ia mo fai te famasino o Isalaelu. I te taimi ne fano ei a ia ki te taua, ne tuku atu ne Ieova a Kusana-lisataima te tupu o Mesopotamia* ki ana lima ko te mea ke manumalo a ia i a Kusana-lisataima. 11 Mai tua ifo, ne seki toe ai eiloa ne taua i te fenua i tausaga e 40. Tenā ne mate atu ei a Otinielu te tama tagata a Kenasa.

12 Kae ne toe kamata foki o fai ne tino Isalaelu a mea ma‵sei i te kilokiloga a Ieova.+ Ne fai ne Ieova a Ekeloni te tupu o Moapi+ ke manumalo i Isalaelu, me ne fai ne latou a mea ma‵sei i te kilokiloga a Ieova. 13 E se gata i ei, ne fai foki ne ia ke taua atu ki a latou a tino Amoni+ mo tino Amaleka.+ Ne taua atu latou ki Isalaelu kae puke ne latou a te fakai o lakau ko pama.+ 14 Ne tavini atu a tino Isalaelu ki a Ekeloni te tupu o Moapi i tausaga e 18.+ 15 Kae ne ka‵laga atu a tino Isalaelu ki a Ieova mō se fesoasoani,+ tenā ne fakatu aka ei ne Ieova se fakaola+ mō latou, ko Euta+ te tama tagata a Kela, se tagata Peniamina,+ telā e tau ki tena maui.+ Fakamuli ifo, ne ave ne tino Isalaelu e auala i a ia a meaalofa ki a Ekeloni te tupu o Moapi. 16 I te taimi tenā, ne faite ne Euta se pelu e ‵kai matalua ma ia, telā e tasi te kupita* te loa, kae ne faka‵mau ne ia ki tena fusi mai loto i tena gatu i tena kauaga fakaatamai. 17 Tenā ne tuku atu ei ne ia a meaalofa ki a Ekeloni te tupu o Moapi. Kae ko Ekeloni se tagata ‵fula ‵ki.

18 I te otiga ne tuku atu ne Euta a meaalofa, uga atu ei ne ia ke olo a tino kolā ne sau mai ne latou a meaalofa. 19 Kae mai tua o tena okoatuga ki te koga e ‵tu i ei a tupua faite i Kilikala,+ ne toe foki a ia kae fai atu: “Tou ‵malu te tupu, e isi se fekau ‵funa e fia fakaasi atu ne au ki a koe.” Tenā ne fai atu ei te tupu: “Sa logoa!” Kae ne olo ei ana tavini katoa ki tua. 20 Ne fanatu a Euta ki a ia kae ko ia e sagasaga tokotasi i tena potu ‵moko i te tuafale. Kae ne fai atu a Euta: “E isi se fekau ne vau mo au mai te Atua ki a koe.” Tenā ne tu aka ei a ia ki luga mai tena nofogaaliki.* 21 Tenā ne tapale aka ei ne Euta te pelu mai tena kauaga fakaatamai ki tena lima fakamaui kae ‵suki atu ki tena tinae. 22 Ne galo te kau o te pelu mo te pelu kātoa ki loto kae ne ufi te pelu ne gako, me ne seki ‵futi mai ne ia ki tua a te pelu mai tena tinae, kae ne ‵to mai ki tua ana fekau. 23 Ne ulu a Euta ki tua i te fakaosoga,* kae ‵pono a mataloa o te potu i te tuafale i ana tua kae ‵loka ne ia. 24 I tena fanoga, ne o‵mai a tavini kae lavea ne latou a mataloa o te potu i te tuafale e ‵loka. Tenā ne fai atu ei latou: “Kāti ne fano a ia ki ana tinae i loto i te potu ‵moko tafa ki loto.” 25 Ne faka‵tali eiloa latou ke oko ki te taimi ko ma‵vale ei latou, kae i te taimi ne lavea ei ne latou me e seki ‵tala mai eiloa ne ia a mataloa o te potu i te tuafale, ne puke ne latou te kī kae ‵tala ne latou kae lavea ne latou te lotou aliki e takato i te fola,* ko mate.

26 Ne sao atu a Euta i te taimi koi fakatali‵tali ei latou, ne tele atu a ia i tafa o te koga telā e ‵tu ei a tupua faite+ kae oko atu mo te saogalemu ki Seilaa. 27 I tena okoatuga, ne fakatagi ne ia te pu+ i te koga maugā o Efalaima,+ olo ifo ei a tino Isalaelu ki lalo mai te koga maugā kae ne takitaki ne tou tagata a latou. 28 Kae ne fai atu a ia ki a latou: “Tau‵tali mai i a au, me ko oti ne tuku mai ne Ieova otou fili, ko tino Moapi, ki otou lima.” Ne tau‵tali ei latou i a ia kae puke ne latou te asaga o te Iolitana ke taua atu ki tino Moapi, kae ne seki talia ne latou se tino ke fanatu ki te suā feitu. 29 I te taimi tenā, ne ‵ta ne latou kāti se toko 10,000 tino Moapi,+ ne tāgata ma‵losi kae ‵mafi; e seai eiloa se tino ne sao.+ 30 Ne fakatakavale a Moapi ne Isalaelu i te aso tenā; kae ne seki toe ai eiloa ne taua i te fenua i tausaga e 80.+

31 Mai tua o Euta, ko Samekala,+ te tama tagata a Anata, telā ne ‵ta ne ia a tāgata Filisitia+ e toko 600 ki se fiti telā e takitaki ki ei a pulumakau;+ kae ne faka‵sao foki ne ia a tino Isalaelu.

4 Mai tua o te mateatuga a Euta ne toe fai ne tino Isalaelu a mea ma‵sei i te kilokiloga a Ieova.+ 2 Tenā ne fakatau atu ei ne Ieova latou ki lima o Iapino te tupu o Kanana,+ telā ne pule i Hasola. A te takitaki o tena kautau ko Sesela, telā ne nofo i Haloseta+ mai fenua fakaa‵tea. 3 Ne ‵tagi a tino Isalaelu ki a Ieova,+ me i a Iapino e isi ne ana kaliota tau mo fiti makai‵kai+ e 900, kae ne pule fakasaua atu a ia ki tino Isalaelu+ i tausaga e 20.

4 A Tepola, te avaga a Lapitota, se pelofeta fafine,+ ko te famasino o Isalaelu i te taimi tenā. 5 Ne masani o sagasaga tou fafine i lalo o te lakau pama o Tepola i te va o Lama+ mo Peteli+ i te koga maugā o Efalaima; kae ko tino Isalaelu e olo sāle ki luga i tou fafine ke iloa ne latou a fakamasinoga mai i te Atua. 6 Ne ‵kami mai ne ia a Palaka+ te tama tagata a Apinoama mai Ketesa-nafatali+ kae fai atu: “E a, e seai se fakatonuga ne fai mai ne Ieova te Atua o Isalaelu? ‘Fano o māti* ki te Mauga o Tapola kae puke mai a tāgata e toko 10,000 mai Nafatali mo Sepulona ke olo koutou. 7 Ka aumai ne au ki a koe a Sesela, te takitaki kautau a Iapino, fakatasi mo ana kaliota tau mo tena kautau ki te vai o Kisona,+ kae ka tuku atu ne au a ia ki ou lima.’”+

8 Kae ne fai atu a Palaka ki tou fafine: “Kafai e vau koe ke olo tāua ko fano au kae kafai e se vau koe ke olo tāua, ko au ka se fano.” 9 Ne fai atu tou fafine: “Ka olo eiloa tāua. Kae ko te malaga tenei e fano koe i ei ka se maua ne koe ne vikiga mai i ei, me ka tuku atu ne Ieova a Sesela ki lima o se fafine.”+ Tenā ne tu aka ei a Tepola kae olo mo Palaka ki Ketesa.+ 10 Ne fakamaopoopo ne Palaka a Sepulona mo Nafatali+ ki Ketesa, kae toko 10,000 tāgata ne tau‵tali i ana kalafaga. A Tepola ne olo fakatasi eiloa mo ia.

11 I te taimi tenā, a Hepela te tino Keni ko oti ne ‵vae kea‵tea mo tino Keni,+ ko tino kolā ne ‵tupu mai i a Hopapu, te tamana o te avaga a Mose,+ kae ne fakatu tena faleie i tafa o te lakau lasi i Sananima, telā e tu i Ketesa.

12 Ne fakailoa atu ne latou ki a Sesela me i a Palaka te tama tagata a Apinoama ko oti ne fanaka ki luga i te Mauga o Tapola.+ 13 I te taimi eiloa tenā, ne fakamaopoopo ei ne Sesela ana kaliota tau katoa—e 900 kaliota mo fiti makai‵kai—mo te kautau kātoa kolā ne ‵kau fakatasi mo ia i Haloseta mai fenua fakaa‵tea ke olo atu ki te vai o Kisona.+ 14 Ne fai atu a Tepola ki a Palaka: “Tu ki luga me tenei te aso ka tuku atu ei ne Ieova a Sesela ki ou lima. E a, e se ko Ieova tenā e fanatu i ou mua?” Kae ne fanaifo a Palaka mai te Mauga o Tapola fakatasi mo tāgata e toko 10,000 e tau‵tali mai i ana tua. 15 Tenā ne fai ei ne Ieova a Sesela mo ana kaliota tau katoa mo tena kautau kātoa ke ‵numi+ i mua o Palaka mo tena pelu. Oti aka, ne fanaifo a Sesela ki lalo mo tena kaliota kae tele i ona vae. 16 Ne afuli ne Palaka a kaliota tau mo te kautau tenā ke oko atu eiloa ki Haloseta mai fenua fakaa‵tea. Tenā ne takavale ei te kautau kātoa a Sesela i te pelu. E seai eiloa se tino ne ‵toe mai.+

17 Kae ko Sesela ne tele i ona vae ki te faleie o Iaeli+ te avaga a Hepela+ te tino Keni, me ne maua ne Iapino+ te tupu o Hasola se va filemu mo te kāiga o Hepela te tino Keni. 18 Tenā ne vau ei a Iaeli ki tua o fakafetaui ki a Sesela kae fai atu ki ei: “Vau ki loto e toku aliki, vau ki loto i konei. Sa mataku.” Tenā ne ulu atu ei tou tagata ki loto i tena faleie, kae ne pulou ne tou fafine a ia ki te pulagiketi. 19 Kae ne fai atu a ia ki tou fafine: “Fakamolemole, aumai aka ne mu vai ke inu aka au, i a au ka mate i te fiainu.” Ne ‵tala ne tou fafine se fagu susu ne faite mai pa‵kili o manu kae tuku atu ki a ia ke inu,+ oti aka toe pulou ei ne tou fafine a ia. 20 Muna a tou tagata ki a ia: “Tu i te mataloa o te faleie, kae kafai e vau se tino kae fesili atu, ‘E isi se tagata i konei?’ fai atu ki ei, ‘E seai!’”

21 Kae ko Iaeli te avaga a Hepela ne puke ne ia se pine o te faleie mo se samala i tena lima. Kae i te taimi ne ‵nau ei tena moe ona ko te fi‵ta, ne tolotolo malie atu tou fafine kae ‵tuki ne ia te pine i te feitu e tasi o tena ulu kae ne tu ki lalo i te laukele, mate i ei tou tagata.+

22 Ne fanatu a Palaka ki konā o ‵sala a Sesela kae ne vau a Iaeli o fakafetaui ki tou tagata kae fai atu: “Vau kae ka fakaasi atu ne au te tagata telā e ‵sala koe ki ei.” Ne ulu atu a ia ki loto fakatasi mo tou fafine kae lavea ne ia a Sesela e moe mai ko mate, mo te pine o te faleie e ‵mau i feitu e lua o tena ulu.

23 Tela la, i te aso tenā ne fai ne te Atua ke takavale a Iapino te tupu o Kanana i mua o tino Isalaelu.+ 24 Kae ne gasolo eiloa o ma‵losi a lima o tino Isalaelu ki luga i a Iapino te tupu o Kanana,+ ke oko ki te taimi ne tamate ei ne latou a Iapino te tupu o Kanana.+

5 I te aso tenā ne usu ne Tepola+ fakatasi mo Palaka+ te tama tagata a Apinoama+ te pese tenei:

 3 Faka‵logo mai e tupu! Tuku mai otou taliga, koutou e takitaki!

Ka usu atu au ki a Ieova.

Ka usu ne au a pese o vikiga ki a Ieova,+ te Atua o Isalaelu.+

‵Viki atu ki a Ieova!

Tenā ne olo ifo ei a tino o Ieova ki mataloa o te fakai.

12 Ala mai, ala mai, e Tepola!+

Ala mai, ala mai, usu aka se pese!+

Tu ki luga, e Palaka!+ ‵Taki au pagota kea‵tea, e te tama tagata a Apinoama!

Ne uga atu a ia ke sasale i ana vae ki te vanu laugatasi.+

Mai te mavae‵vae o te matakāiga o Leupena ne lasi eiloa te sukesukega ne fai ki olotou loto.

Me i te mavae‵vae o te matakāiga o Leupena, ne lasi eiloa te sukesukega ne fai ki olotou loto.

E seai ne siliva ne puke ne latou.+

Ne lakalaka ne au ki lalo a tino ma‵losi.

Kaia ko tuai ei te ‵tagi mai o vae o ana kaliota?’+

Kae ne seki toe ai eiloa ne taua i te fenua i tausaga e 40.+

6 Kae ne toe fai ne tino Isalaelu a mea ma‵sei i te kilokiloga a Ieova,+ tenā ne tuku atu ei ne Ieova latou ki lima o tino Mitiana mō tausaga e fitu.+ 2 Ne pule malō eiloa a tino Mitiana ki tino Isalaelu.+ Ona ko tino Mitiana, ne faite ei ne tino Isalaelu a koga ‵muni* mō latou i luga i mauga, i loto i ana, mo koga kolā e faigata o oko ki ei.+ 3 Kafai e ‵toki ne tino Isalaelu a fuaga, ka taua atu a Mitiana mo Amaleka+ mo tino e ‵nofo i te feitu ki saegala+ ki a latou. 4 Ne taua sāle atu latou ki tino Isalaelu kae ne fakamasei a lakau o te laukele ke oko atu eiloa ki Kasa, kae e seai eiloa se mea ne faka‵toe ne latou ke ‵kai ki ei a tino Isalaelu, e seai foki se mamoe io me se pulumakau io me se asini.+ 5 Ne o‵mai latou mo olotou lafu manu mo faleie e pelā eiloa mo seakelise i te uke,+ kae ko se mafai eiloa o lau+ aka a latou mo olotou kamela, kae ka olo atu latou o fakamasei te fenua. 6 Tenā ne ma‵tiva malosi ei a tino Isalaelu ona ko tino Mitiana; kae ne ka‵laga atu a tino Isalaelu ki a Ieova mō se fesoasoani.+

7 I te taimi ne ka‵laga atu ei a tino Isalaelu ki a Ieova mō se fesoasoani ona ko tino Mitiana,+ 8 ne uga atu ne Ieova ki tino Isalaelu se pelofeta telā ne fai atu ki a latou: “Konei a pati a Ieova te Atua o Isalaelu ne fai mai, ‘Ne aumai ne au koutou mai Aikupito kae ne aumai foki ne au koutou ki tua mai te koga ne ‵nofo pologa ei koutou.+ 9 Tenā ne faka‵sao ei ne au koutou mai lima o tino Aikupito mo tino katoa kolā e fakasaua atu ki a koutou kae afuli latou kea‵tea mai otou mua kae tuku atu olotou laukele ki a koutou.+ 10 Kae ne fai atu au ki a koutou: “Au ko Ieova te otou Atua.+ E se ‵tau mo koutou o ma‵taku ki atua o tino Amoli, i te lotou laukele tenā e ‵nofo koutou i ei.”+ Kae ne seki faka‵logo mai eiloa koutou ki a au.’”*+

11 Fakamuli ifo, ne vau te agelu+ a Ieova o sagasaga mai lalo i te lakau lasi a Ieoasa te tagata Apiese+ i Ofala. A tena tama tagata ko Kitiona+ e tuki saito i loto i te mea ‵tau uaina ko te mea ke se lavea ne tino Mitiana. 12 Ne fakasae atu te agelu a Ieova ki a ia kae fai atu: “A Ieova e fakatasi atu ki a koe,+ e te toa mafi.” 13 Ona ko te mea tenei ne fai atu Kitiona ki a ia: “Fakamolemole, e toku aliki, kafai e fakatasi mai a Ieova ki a matou, kae kaia la ko fe‵paki ei matou mo mea katoa konei?+ Kofea la ana faifaiga ‵gali katoa kolā ne fakamatala mai ne omotou tupuga ki a matou,+ olotou muna ‘E a, e se ko Ieova ne aumai ne ia matou ki tua mo Aikupito?’+ Ko oti eiloa ne tiakina matou ne Ieova,+ kae tuku atu ki lima o tino Mitiana.” 14 Ne saga atu Ieova ki a ia kae fai atu: “Fano mo te malosi tenā i a koe, kae ka faka‵sao ne koe a tino Isalaelu mai lima o tino Mitiana.+ E a, e se ko au tenei e uga atu ne au koe?” 15 Ne tali atu a Kitiona: “Fakamolemole, e Ieova. E mafai pefea o faka‵sao ne au a Isalaelu? Kiloke! A toku kaukāiga* ko latou loa e mu‵tana i te matakāiga o Manase, kae ko au ko te ‵toe tino sē taulia eiloa i te kāiga o toku tamana.” 16 Kae ne fai atu a Ieova ki a ia: “Ona ko au e fakatasi atu ki a koe,+ ka ‵ta eiloa ne koe a tino Mitiana e pelā eiloa me ne ta ne koe se tagata fua e tokotasi.”

17 Tenā ne fai atu ei a Kitiona ki a ia: “Kafai ko talia ne koe au i tau kilokiloga, fakaasi mai ki a au se fakailoga me ko koe eiloa tenei e fai‵pati mo au. 18 Fakamolemole sa fano muamua seiloga ke foki mai au mo taku meaalofa o tuku atu i ou mua.”+ Kae ne fai atu a ia: “Ka faka‵tali eiloa au i konei ke foki mai koe.” 19 Ne fano a Kitiona ki loto kae fakatoka se tamā kouti kae palu a falaoa sē faka‵fete mai se efa* o te falaoa.+ Ne tuku ne ia a ‵kano manu ki se ato mo te supu i te ulo, kae aumai ne ia ki tua i te agelu kae laulau atu ana meakai mai lalo o te lakau lasi.

20 Ne fai atu a te agelu a te Atua tonu ki a ia: “Puke a ‵kano o manu mo te falaoa sē faka‵fete kae ave o tuku i luga i te fatu lasi telā i ko, kae ‵ligi a te supu ki ei.” Kae ne fai eiloa ne ia te mea tenā. 21 Tenā ne fakapatele ei ne te agelu a Ieova a te mata o te tokotoko i tena lima ki te ‵kano o te manu mo te falaoa sē faka‵fete, kae ne ula aka te afi mai te fatu kae ‵ka i ei a ‵kano o manu mo te falaoa sē faka‵fete.+ Tenā ko te agelu eiloa a Ieova ko galo atu mai i ana mua. 22 Ne iloa aka ne Kitiona me ko te agelu+ a Ieova tenā.

I konā eiloa ne fai aka a Kitiona: “Oi aue, te Aliki Sili ko Ieova, ko oti ne lavea ne au te agelu a Ieova mata ki mata!”+ 23 Kae ne fai atu a Ieova ki a ia: “Ke i luga i a koe te filemu. Sa mataku,+ a koe ka se mate.” 24 Ne faite ne Kitiona se fatafaitaulaga i konā ki a Ieova, kae ne fakaigoa ki a Ieova-saloma*+ ke oko mai eiloa ki te aso nei. Koi tu eiloa a te fatafaitaulaga tenā i Ofala i te fenua o tino Apiese.

25 I te po tenā, ne fai atu a Ieova ki a ia: “Puke te tamā pulumakau a tou tamana, ko te lua o tamā pulumakau telā ko fitu tausaga te matua, kae ofa ki lalo a te fatafaitaulaga a tou tamana ki a Paala, kae ‵kati ki lalo te pou lakau tapu* i ana tafa.+ 26 Kafai ko oti ne faite ne koe te fatafaitaulaga ki a Ieova tou Atua i luga i te koga maluga tenei e isi se fakasologa o fatu i ei, puke te lua o tamā pulumakau kae ofo atu e pelā me se taulaga ‵sunu i luga i fafie mai te pou lakau tapu* telā ne ‵kati ne koe ki lalo.” 27 Tenā ne puke ei ne Kitiona a tāgata e tokosefulu mai i ana tavini kae fai a mea katoa kolā ne fai atu ne Ieova ki a ia. Kae ne mataku malosi a ia i kāiga o tena tamana mo tāgata o te fakai ma fai a mea konā i te ao, tenā ne fai ei ne ia i te po.

28 I te taimi ne ala aka ei a tāgata o te fakai i te suā taeao, ne lavea ne latou me ko oti ne ofa ki lalo a te fatafaitaulaga a Paala kae ko te pou lakau tapu* i ana tafa ko oti ne ‵kati ki lalo kae ko oti foki ne ofo atu a te lua o tamā pulumakau i luga i te fatafaitaulaga telā ko oti ne faite. 29 Ne fakatau fesilisili latou: “Ko oi ne fai ne ia te mea tenei?” I te otiga ne fai olotou sukesukega, ne fai atu latou: “Ko Kitiona te tama tagata a Ieoasa ne fai ne ia te mea tenei.” 30 Ne fai atu a tāgata o te fakai ki a Ieoasa: “Aumai tau tama tagata ki tua nei ke tamate, me ne ofa ne ia ki lalo a te fatafaitaulaga a Paala kae ‵kati ki lalo a te pou lakau tapu* i ana tafa.” 31 Tenā ne fai atu ei a Ieoasa+ ki tino katoa kolā ne olo atu ki a ia: “E a, e ‵kau koutou i a Paala? E ma‵nako koutou o fakasao a ia? So se tino e kau ki a ia e ‵tau o tamate i te taeao nei.+ Kafai a ia se atua, tuku ke fakasao ne ia a ia eiloa,+ me ko oti ne ofa ki lalo ne se tino tena fatafaitaulaga.” 32 Ne fakaigoa ne ia a Kitiona ki a Ielupaala* i te aso tenā, ana muna: “Tuku ke fakasao ne Paala a ia eiloa, me ko oti ne ofa ki lalo ne se tino tena fatafaitaulaga.”

33 Ne ‵kau fakatasi katoa a tino Mitiana,+ tino Amaleka+ mo tino kolā e ‵nofo i te feitu ki saegala+ kae olo atu latou ki te suā feitu o te Vanu o Ieseleelu o ‵nofo i ei. 34 Tenā ne oko atu ei te agaga o Ieova ki luga i a Kitiona+ kae ne ili ne ia te pu,+ kae tau‵tali atu a tino Apiese+ o ‵lago atu ki a ia. 35 Ne uga atu ne ia a avefekau ki tino Manase katoa, kae ne tau‵tali atu foki latou o ‵lago ki a ia. Ne uga foki ne ia a avefekau ki Asela, Sepulona mo Nafatali, kae ne o‵mai latou o fakafetaui ki a ia.

36 Tenā ne fai atu ei a Kitiona ki te Atua tonu: “Kafai e fakasao ne koe a Isalaelu e auala i a au, e pelā eiloa mo tau tautoga,+ 37 nei la ko tuku ne au ne mu vulu i te koga tuki saito. Kafai e lavea atu te ‵sau i luga fua i te vulu, kae ko te laukele kātoa i ana tafa e malō, tenā ko iloa ei ne au me ka fakasao ne koe a Isalaelu e auala i a au, e pelā eiloa mo tau tautoga.” 38 Kae tenā eiloa te mea ne tupu. I tena alaakaga i te tafataeao ‵malu o te suā aso ne ‵kumi ne ia a vulu, kae ‵sali mai a vai mai te vulu kae ne ‵fonu i ei se pōla lasi i vai. 39 Kae ne fai atu a Kitiona ki te Atua tonu: “Sa kaitaua mai ki a au, kae talia mai fua ke toe fai atu taku suā fakamolemole. Fakamolemole, talia mai ke toe fai atu ne au se tofotofoga ki te vulu tenei. Fakamolemole fai aka ke malō a te vulu, kae ko te laukele kātoa i ana tafa ke ‵fonu i te ‵sau.” 40 Kae tenā loa te mea ne fai ne te Atua i te po tenā; ko te vulu fua ne malō, kae ne ‵fonu te laukele kātoa i te ‵sau.

7 Kae ko Ielupaala, telā ko Kitiona,+ mo tino katoa kolā ne ‵nofo mo ia, ne ‵tu aka i te tafataeao ‵malu kae olo o ‵nofo i te Vaipuna o Halota, kae ko tino Mitiana e ‵nofo i te feitu ki mātū o tou tagata, i te tamā mauga o Mole, i te vanu laugatasi. 2 Ne fai atu a Ieova ki a Kitiona: “Ko tō tokouke katoa a tino konā ne o‵mai mo koe ke tuku atu ne au a Mitiana ki olotou lima.+ Kafai e fai penei, ko tena uiga ka fakamatamata a Isalaelu kae fai ana pati ki a au, ‘Ko toku lima eiloa ne sao ei au.’+ 3 Nei la, fakamolemole faka‵pula atu ki tino katoa: ‘So se tino e mataku kae polepole, ke foki la ki tena fale.’”+ Tenā ne tofotofo ei latou ne Kitiona. Kae e toko 22,000 a tino ne ‵foki ki olotou fale, kae e toko 10,000 ne ‵toe mai.

4 Kae ne toe fai atu a Ieova ki a Kitiona: “Koi tokouke ‵ki eiloa a tino. Fai ki a latou ke olo ifo ki te vai ke tofotofo aka ne au latou mō koe i konā. Kafai e fai atu au ki a koe, ‘A te tino tenei ka fanatu i a koe,’ ka fanatu eiloa a ia i a koe, kae kafai e fai atu au ki a koe, ‘A te tino tenei ka se fanatu i a koe,’ ka se fanatu eiloa.” 5 Ne ave ne ia a tino konā ki te vai.

Tenā ne fai atu ei a Ieova ki a Kitiona: “‵Vae fakaa‵tea a tino katoa kolā e inu e pelā me ne kuli mai i a latou kolā e punou ifo ki lalo i olotou tuli o inu.” 6 A te aofaki o latou kolā e inu seposepo ki vai mai i olotou lima e toko 300 tāgata. A te ‵toega o tāgata konā ne punou ifo ki lalo i olotou tuli o inu.

7 Ne fai atu a Ieova ki a Kitiona: “Ka fakasao ne au koe fakatasi mo tāgata e toko 300 kolā ne inu seposepo ki vai mai i olotou lima kae ka tuku atu ne au a Mitiana ki ou lima.+ Kae fai ki nisi tino katoa ke ‵foki ki olotou fale.” 8 I te otiga ne puke mai ne latou a meakai mo pu fakatagi‵tagi mai i tino konā, uga atu ei ne ia a nisi tāgata Isalaelu ke ‵foki ki olotou fale, kae ne taofi aka fua ne ia a tāgata e toko 300. A te kau Mitiana e ‵nofo fua mai lalo o latou i te vanu laugatasi.+

9 I te po tenā, ne fai atu a Ieova ki a ia: “Tu ki luga, fano o taua me ko oti ne tuku atu ne au latou ki ou lima.+ 10 Kae kafai koe e mataku ma taua atu, olo mo tau tavini ko Pula ki te koga e ‵nofo ei latou. 11 Fakalogo ki olotou pati e fai, ka oti ko maua ei ne koe te loto toa* o taua atu ki a latou.” I te taimi tenā, ne olo ifo ei lāua mo tena tavini ko Pula ki tafa o te koga e ‵nofo ei te kautau.

12 Nei la, ko ‵fonu eiloa a te vanu laugatasi i tino Mitiana mo tino Amaleka mo latou katoa kolā e ‵nofo i te feitu ki saegala,+ ko pelā eiloa mo se mumuga seakelise;+ kae ko olotou kamela ko se mafai o lau, e pelā eiloa mo one i te tafatai i te uke. 13 Ne oko atu a Kitiona ki konā, kae e isi se tagata e fakamatala tena moemiti ki tena taugasoa, ana muna: “E isi saku moemiti. E isi se puta falaoa o kalite ne teka mai ki loto i te koga ‵nofo o tino Mitiana. Ne teka mai kae poko malosi ki se faleie e tasi ko te mea loa ko siga.+ Ao, ne ‵fuli fakakotua ne ia te faleie, ko te mea loa ko mafola i te laukele.” 14 I konā loa ne fai atu ei tena taugasoa: “A te mea tenā ko te pelu eiloa a Kitiona+ te tama tagata a Ieoasa, te tagata Isalaelu. Ko oti ne tuku ne te Atua a Mitiana mo tena kautau katoa ki ana lima.”+

15 I te otiga eiloa ne lagona ne Kitiona a te tagata tenā e fakamatala tena moemiti mo tena uiga,+ ne ifo tou tagata ki lalo o tapuaki. Oti aka, foki atu ei a ia ki te koga e ‵nofo ei a tino Isalaelu kae fai atu: “‵Tu ki luga me ko oti ne tuku atu ne Ieova a te kau Mitiana ki otou lima.” 16 Tenā ne vaevae aka ei ne ia a tāgata e toko 300 ki potukau e tolu kae tuku atu ki a latou katoa a pu+ mo tiā ‵masa kolā e isi ne moli i loto i ei. 17 Kae ne fai atu a ia ki a latou: “‵Kilo mai ki a au kae fai eiloa ne koutou a te mea ka fai ne au. Kafai ko pili atu au ki tafa o te koga ‵nofo o latou, e ‵tau o fai ne koutou a te mea ka fai ne au. 18 Kafai ko ili ne au te pu, ko au fakatasi mo te motou potukau, e ‵tau foki mo koutou o ili otou pu kae fakatamilo te lotou koga ‵nofo, kae paka‵laga penei, ‘Mō Ieova mo Kitiona!’”

19 Ne olo atu a Kitiona mo tāgata e toko 100 ki tafa o te koga e ‵nofo i ei olotou fili i te kamataga o te ‵tuga i te valuapo,* mai tua malie eiloa o te suiga o olotou sotia ‵tu. Ne ili ne latou a pu+ kae ‵foa a tiā ‵lasi i olotou lima.+ 20 Tenā ne ili ei ne potukau e tolu olotou pu kae ‵foa olotou tiā ‵lasi. Ne puke ne latou a moli i olotou lima fakamaui kae faka‵tagi a pu i olotou lima fakaatamai kae ne ka‵laga atu latou: “Ko te pelu a Ieova mo te pelu a Kitiona!” 21 Kae i te taimi tenā, ne ‵tu eiloa a tāgata katoa konā i olotou tulaga kae fakatamilo ne latou te koga e ‵nofo ei a sotia konā, kae ne fakatau ‵tele te kautau kātoa kea‵tea, kae paka‵laga valevale.+ 22 Ne ili faeloa ne tāgata e toko 300 olotou pu, kae ne fai ne Ieova a te kautau a te fili ke fakatau taua valevale i loto i te lotou koga ‵nofo;+ kae ne fakatau ‵tele valevale latou ke oko atu eiloa ki Peta-sita, ke oko atu ki Sielela, e pelā foki loa mo fakai fo‵liki o Apelu-meola+ i tafa o Tapata.

23 Kae ne oko atu te kalaga ki tāgata Isalaelu mai i Nafatali, Asela, mo Manase+ kātoa kae ne ‵tele atu latou o afuli a tino Mitiana. 24 Ne uga atu ne Kitiona a avefekau ki te koga maugā kātoa o Efalaima, ana muna: “Olo o taua ki tino Mitiana, kae ‵pono te auala ki te vai ke oko atu ki Petapala mo te Iolitana.” Tenā ne maopoopo fakatasi ei a tāgata Efalaima katoa kae olo atu o ‵pono te vai ke oko atu ki Petapala mo te Iolitana. 25 Ne puke foki ne latou a pelenise e tokolua o Mitiana, ko Olepaa mo Seipa; ne tamate ne latou a Olepaa+ i te kaupapa o Olepaa, kae ne tamate ne latou a Seipa i te mea ‵tau uaina o Seipa. Ne ‵sala atu faeloa latou ki tino Mitiana;+ kae ne aumai ne latou a ulu o Olepaa mo Seipa ki a Kitiona i te kogā koga i tafa o te Iolitana.

8 Tenā ne fai atu ei a tāgata Efalaima ki a ia: “Se a te mea tenei ko oti ne fai ne koe ki a matou? Kaia ne seki kalaga mai ei koe ki a matou i te otou oloatuga o taua ki tino Mitiana?”+ Kae ne kinau malosi atu eiloa latou ki a ia.+ 2 Kae ne fai atu a ia ki a latou: “Ne a mea ne fai ne au e ‵pau mo mea ko oti ne fai ne koutou? E a, e se ‵lei atu a toegā vine o Efalaima+ i lō ‵katigā vine o Apiese?+ 3 Ne tuku atu ne te Atua ki otou lima a pelenise o Mitiana ko Olepaa mo Seipa,+ kae ne a mea ne fai ne au e ‵pau mo mea ko oti ne fai ne koutou?” I tena faipatiatuga penei, ne filemu ei latou.

4 Ne oko atu Kitiona ki te Iolitana kae fanatu ki te suā feitu. Ne fi‵ta a ia fakatasi mo ana tāgata e toko 300, kae ne olo atu eiloa o afuli olotou fili. 5 Ne fai atu a ia ki tāgata o Sukota: “Fakamolemole tuku aka ne falaoa faka‵fete ki tāgata kolā e o‵mai i oku tua, me ko fi‵ta latou kae ko au ko fano o afuli a Sepa mo Salemuna, ko tupu o Mitiana.” 6 Kae ko pelenise o Sukota ne fai atu: “E a, ko i ou lima a Sepa mo Salemuna* ko te mea ke mafai o tuku atu ne matou a falaoa ki tau kautau?” 7 I konā loa ne fai atu ei a Kitiona: “Ona ko te mea tenā, kafai ko tuku mai ne Ieova a Sepa mo Salemuna ki oku lima, ka ‵kini ne au koutou ki lakau tala‵tala mo lakau makai‵kai o te koga lavaki.”+ 8 Ne fanatu a ia mai i konā ki Penueli kae toe fai atu ne ia te fakamolemole eiloa tenā, kae ko tāgata Penueli ne fai atu ne latou te tali eiloa telā ne fai foki ne tāgata Sukota. 9 Tenā ne fai atu foki ei a ia ki tāgata Penueli: “Kafai e foki mai au i te filemu, ka ofa ne au ki lalo a te taoa tenei.”+

10 Ne ‵nofo atu a Sepa mo Salemuna i Kalakolo mo lā kautau, kāti e toko 15,000 tāgata. Konei a tino kolā ne ‵toe mai te kautau kātoa o tino kolā e ‵nofo i te feitu ki saegala,+ me i te toko 120,000 tāgata kolā e isi ne olotou pelu ko oti ne taka‵vale. 11 Ne fanaka eiloa a Kitiona ki luga i te koga e ‵nofo ei a tino i olotou faleie i te feitu ki saegala o Nopaa mo Iokopea,+ kae ne taua atu a ia ki a latou, kae e se toka latou. 12 I te taimi ne ‵tele ei a Sepa mo Salemuna, ne afuli ne ia lāua kae puke a tupu e tokolua o tino Mitiana, ko Sepa mo Salemuna, kae fai ei ke manava‵se valevale te kautau kātoa.

13 Tenā ne foki mai ei a Kitiona, te tama tagata a Ieoasa, mai te taua kae fanatu i te auala telā e fanaka ki luga i Heleesi. 14 I tena auala tenā ne puke ne ia se tamataene mai Sukota kae fakafesilisili ne ia. Tenā ne tusi ei ne te tamataene tenā a igoa o pelenise mo toeaina o Sukota, e toko 77 tāgata katoa. 15 Mai i konā, ne fanatu a ia ki tāgata Sukota kae fai atu: “Konei a Sepa mo Salemuna kolā ne fakaitaita mai koutou ki a au penei, ‘E a, ko i ou lima a Sepa mo Salemuna ke mafai o tuku atu ne matou ne falaoa faka‵fete ki ou tāgata kolā ko fi‵ta?’”+ 16 Tenā ne puke ei ne ia a toeaina o te fakai kae fakaaoga ne ia a lakau tala‵tala mo lakau makai‵kai o te koga lavaki, ke fai ne ia ke tauloto ne tāgata Sukota se akoakoga mai te lotou mea ‵se ne fai.+ 17 Kae ne ofa ne ia ki lalo a te taoa o Penueli+ kae tamate a tāgata o te fakai.

18 Ne fesili atu a ia ki a Sepa mo Salemuna: “Ne tāgata pefea ne tamate ne koulua i Tapola?” Ne fai atu lāua: “Ne tāgata e pelā mo koe, a tāgata taki tokotasi katoa e foliga pelā me se tama a te tupu.” 19 Kae ne fai atu a ia: “A latou ko oku taina, ko tama tāgata a toku mātua. E pelā eiloa mo Ieova e ola, moi ne faka‵sao ne koulua olotou ola, penei e se tamate ne au a koulua.” 20 Tenā ne fai atu ei a ia ki a Ietela tena toekimua: “Tu ki luga, tamate a lāua konā.” Kae ne seki tata eiloa ne te tamataene tenei a tena pelu; ne mataku a ia me i a ia koi tamataene fua. 21 Ne fai atu a Sepa mo Salemuna: “Tu koe ki luga o tamate māua, me i te tagata e fakamasino eiloa e ‵tusa mo tena malosi.” Tenā ne tu aka ei a Kitiona kae tamate ne ia a Sepa mo Salemuna+ kae puke a mea fakagali‵gali kolā e foliga pelā me se āfa o te masina i ua o lā kamela.

22 Fakamuli ifo, ne fai atu a tāgata Isalaelu ki a Kitiona: “Ke pule ne koe matou, ko koe mo tau tama tagata mo tou mokopuna tagata, me ne faka‵sao ne koe matou mai i lima o tino Mitiana.”+ 23 Kae ne fai atu a Kitiona ki a latou: “Ka se pule atu au ki a koutou, io me ko taku tama tagata ke pule atu ki a koutou. Ko Ieova eiloa e pule ne ia koutou.”+ 24 Ne toe fai atu a Kitiona: “E toe tasi eiloa taku fakamolemole ki a koutou: ke tuku mai ne koutou taki tokotasi se ligi isu mai mea kolā ne puke ne koutou mai te taua.” (Me e isi ne olotou ligi isu aulo, me i a latou ne tino Isamaeli.)+ 25 Ne tali atu latou: “Ka tuku atu eiloa ne matou.” I konā, ne ‵fola ei ne latou se gatu kae ne ‵pei atu ne tāgata taki tokotasi se ligi isu mai olotou mea ne puke mai i te taua. 26 A te ‵mafa o ligi isu aulo kolā ne fakamolemole atu a ia ki ei e ‵tusa mo te 1,700 sekela* aulo, i tafa o mea fakagali‵gali kolā e foliga pelā mo te feitu masina, mea fakatau‵tau o malele, gatu vulu lanu violeta kolā e ‵pei ki ei a tupu o Mitiana mo malele mai kamela.+

27 Ne faite ne Kitiona ki ei se efota+ kae tuku atu ne ia i tena fakai ko Ofala;+ kae ne fai ne tino Isalaelu katoa a faifaiga talitāgata i te feitu faka-te-agaga mo te mea tenā i konā,+ kae ne fai eiloa e pelā me se malei ki a Kitiona mo tino o tena kāiga.+

28 Ne taka‵vale eiloa a tino Mitiana+ i mua o tino Isalaelu, kae ne seki toe taua atu eiloa ki a latou; kae ne seki toe ai eiloa ne taua i te fenua i tausaga e 40 i aso o Kitiona.+

29 Ne toe foki atu a Ielupaala+ te tama tagata a Ieoasa ki tena fale kae nofo i ei.

30 E toko 70 a tama tāgata* a Kitiona, me e tokouke ana avaga. 31 E isi foki sena tama tagata i tena avaga fakasalasala i Sekema, kae ne fakaigoa ne ia ki a Apimeleko.+ 32 Kae ko Kitiona te tama tagata a Ieoasa ne mate i te taimi ko toeaina ei a ia kae ne tanu i te tanuga o Ieoasa tena tamana i Ofala, te fenua o tino Apiese.+

33 I te taimi eiloa ne mate ei Kitiona, ne toe fai ne tino Isalaelu a faifaiga talitāgata i te feitu faka-te-agaga mo Paala,+ kae ne ‵tofi aka ne latou a Paala-pelita mo fai te lotou atua.+ 34 Ne seki masaua ne tino Isalaelu a Ieova te lotou Atua,+ telā ne faka‵sao ne ia latou mai i lima o olotou fili i olotou tafa;+ 35 io me fakaasi atu ne latou te alofa fakamaoni ki tino o te kāiga o Ielupaala, telā ko Kitiona, e ‵tusa mo mea ‵lei katoa ne fai ne ia mō Isalaelu.+

9 Fakamuli loa, ne fano a Apimeleko+ te tama tagata a Ielupaala ki tuagane o tena mātua i Sekema, kae ne fai atu ki a latou mo kāiga katoa o tena tupuna tagata:* 2 “Fakamolemole, fesili aka ki takitaki* katoa o Sekema, ‘Tefea e ‵lei atu ki a koutou, ko tama tāgata katoa e toko 70 a Ielupaala+ ke pule i luga i a koutou io me se tagata fua e tokotasi ke pule ki luga i a koutou? Kae masaua me i a au ko te otou ivi mo te otou ‵kano.’”*

3 Tenā ne fai atu ei ne tuagane o tena mātua a pati konei ki takitaki katoa o Sekema, kae ne ma‵nako eiloa latou o tau‵tali i a Apimeleko, me ne fai aka latou: “A ia ko te motou taina eiloa.” 4 Tenā ne avatu ei ne latou ki a ia e 70 tupe siliva mai te fale* o Paala-pelita,+ kae ne fakaaoga ne Apimeleko ke ‵togi ki ei a tāgata ma‵sei kae e se aoga ke olo fakatasi mo ia. 5 Oti aka, fanatu ei a ia ki te fale o tena tamana i Ofala+ kae tamate ana taina,+ ko tama tāgata a Ielupaala, e toko 70 tāgata i luga i se fatu e tasi. A te tino fua ne sao mai i ei ko Iotama, te toekimuli tagata a Ielupaala, me ne ‵muni a ia.

6 Tenā ne maopoopo fakatasi ei a takitaki katoa o Sekema mo Petamilo kātoa kae fai ne latou a Apimeleko mo fai te lotou tupu,+ e pili ki te lakau lasi, i tafa o te pou i Sekema.

7 I te taimi ne fakailoa atu ei ne latou te mea tenei ki a Iotama, ne fanatu fakavave a ia o tu i te taulu o te Mauga o Kelisima+ kae kalaga atu i se leo maluga ki a latou: “Faka‵logo mai ki a au, koutou takitaki o Sekema, kae ka fakalogo foki a te Atua ki a koutou.

8 “I te aso e tasi, ne olo atu a lakau o fakasopo se tupu ke pule i a latou. Tenā ne fai atu ei latou ki te lakau ko te olive, ‘Vau o pule i a matou.’+ 9 Kae ne fai atu te lakau ko te olive ki a latou, ‘E a, ka tiaki ne au oku sinu* kolā e fakaaoga ne latou ke fakaaloalo atu ki te Atua mo tino, ke fanatu au o gasuesue i luga i nisi lakau?’ 10 Tenā ne fai atu ei a lakau ki te mati, ‘Vau o pule i a matou.’ 11 Kae ne fai atu a te lakau ko te mati ki a latou, ‘E a, ka tiaki ne au a oku fuaga ma‵galo mo oku fuagalakau ‵lei ke fanatu au o gasuesue i luga i nisi lakau?’ 12 Oti aka, fai atu ei a lakau ki te vine, ‘Vau o pule i a matou.’ 13 Ne tali atu te vine ki a latou, ‘E a, ka tiaki ne au oku uaina ‵fou kolā e fai ne latou te Atua mo tino ke fia‵fia kae ke fanatu au o gasuesue i luga i nisi lakau?’ 14 Fakamuli loa, ne fai atu a lakau ki te lakau talatala, ‘Vau o pule i a matou.’+ 15 Ne fai atu a te lakau talatala ki lakau konā, ‘Kafai e ma‵nako eiloa koutou o fakasopo au ke fai mo tupu o koutou, o‵mai la o faka‵lafi mai lalo i oku malūga. Kafai e se o‵mai koutou, ko te afi eiloa ka oso atu mai te lakau talatala o ‵sunu a alasi o Lepanona.’

16 “Nei la, e mata, ne gasue‵sue eiloa koutou mo te fakamaoni mo te āva o fai a Apimeleko mo fai te tupu,+ e mata, ne fakaasi atu ne koutou a te aga‵lei ki a Ielupaala mo tino o tena kāiga, kae e mata, ne fai ne koutou ki a ia a mea kolā e ‵tau o fai ki a ia? 17 I te taimi ne taua atu ei toku tamana mō koutou,+ ne talia ne ia ke tu tena ola i se tulaga fakamataku ke faka‵sao koutou mai lima o tino Mitiana.+ 18 Kae i te aso nei, ko ‵tu aka koutou o ‵teke ki te kāiga o toku tamana kae tamate ana tama tāgata, e toko 70 tāgata i luga i se fatu e tasi.+ Tenā ne fai ei ne koutou a Apimeleko, te tama tagata a tena pologa fafine,+ ke fai mo tupu i luga i takitaki o Sekema ona fua ko ia ko te otou taina. 19 Ao, kafai koutou e gasue‵sue mo te fakamaoni mo te āva ki a Ielupaala mo tena kāiga i te aso nei, ke fia‵fia koutou ki a Apimeleko kae ke fiafia foki a ia ki a koutou. 20 Kafai e se penā, ke oso atu eiloa te afi mai i a Apimeleko o ‵sunu a takitaki o Sekema mo Petamilo,+ kae ke oso atu foki te afi mai takitaki o Sekema mo Petamilo o ‵sunu a Apimeleko.”+

21 Tenā ko Iotama+ eiloa ko tele ki Pia, kae nofo tou tagata i konā me i a ia e mataku i tena taina ko Apimeleko.

22 Ne pule a Apimeleko i Isalaelu i tausaga e tolu. 23 Tenā ne fai ei ne te Atua ke sae aka se kinauga* i te va o Apimeleko mo takitaki o Sekema, kae ne fakatogafiti ne latou a Apimeleko. 24 Ne tupu te mea tenei ko te mea ke taui atu a faifaiga fakasaua kolā ne fai ki tama tāgata e toko 70 a Ielupaala, ko te mea ke ‵losi atu a toto o latou ki te lotou taina ko Apimeleko mō te tamatega o latou+ mo takitaki foki o Sekema me ne fesoasoani atu latou ki a ia i te tamatega o ana taina. 25 Tenā ne fai ei ne takitaki o Sekema ke olo atu ne tāgata o ‵muni kae ke alamati ne latou a ia i luga i mauga, kae ke kaisoa ne latou a mea katoa a tino kolā e olo atu i te auala tenā. Fakamuli loa, ne fakailoa atu a te mea tenei ki a Apimeleko.

26 Tenā ne olo atu ei Kaala, te tama tagata a Epeto fakatasi mo ana taina ki te suā feitu ki Sekema,+ kae ne tali‵tonu eiloa a takitaki o Sekema ki a ia. 27 Ne olo latou ki te fatoaga kae ‵kati mai a vine mai olotou togavine, ne lakalaka ne latou, kae fai se ‵kaiga fiafia, oti aka olo ei ki loto i te fale o te lotou atua+ o ‵kai kae inu kae fai a pati sē ‵lei ki a Apimeleko. 28 Tenā ne fai aka ei a Kaala te tama tagata a Epeto: “Ko oi a Apimeleko, kae ko oi a Sekema ke tavini atu tatou ki a ia? E a, e se ko ia te tama tagata a Ielupaala,+ kae e a, e se ko Sepula tena komisina? Tavini atu ki tāgata o Hamola te tamana o Sekema! Kaia e ‵tau ei o tavini tatou ki a Apimeleko? 29 Moi fai ne ‵nofo a tino konei mai lalo i taku pule, ko leva ne fakatea ne au a Apimeleko.” Tenā ne fai atu ei a ia ki a Apimeleko: “Fakatokouke tau kautau kae vau ki tua.”

30 I te taimi ne logo ei a Sepula te pelenise o te fakai i pati a Kaala te tama tagata a Epeto, ne kaitaua malosi a ia. 31 Ne uga ‵funa* atu ne ia a avefekau ki a Apimeleko kae fai atu ki ei: “Kiloke! A Kaala te tama tagata a Epeto mo ana taina kolā ko ‵nofo nei i Sekema, kae konei e fakama‵losi ne latou a tino o te fakai ke taua atu ki a koe. 32 Nei la, olo atu koutou i te po, ko koe mo au tāgata, o ‵muni kae faka‵tali i te vao. 33 I te taimi eiloa e sae aka ei te la i te tafataeao, e ‵tau o ‵tu aka koutou o taua atu ki te fakai; kae kafai ko o‵mai a ia mo ana tāgata ki tua o taua atu ki a koutou, fai so se mea e mafai ne koutou o fai ke fakatakavale tou tagata.”

34 Tenā ne ‵tu aka ei a Apimeleko mo ana tino katoa i te po, kae olo atu i potukau e fa o ‵muni kae faka‵tali o taua atu ki Sekema. 35 I te taimi ne fanatu ei a Kaala te tama tagata a Epeto o tu i te mataloa o te fakai, ne ‵tu aka a Apimeleko mo ana tāgata mai olotou koga ‵muni. 36 I te taimi ne lavea ei ne Kaala a tino konā, ne fai atu a ia ki a Sepula: “Kiloke! E isi ne tino kolā e o‵mai mai luga i mauga.” Kae ne fai atu a Sepula ki a ia: “Koe na e kilo fua ki ata o mauga e pelā me ne tino.”

37 Fakamuli ifo, ne fai atu a Kaala: “Kiloke! E isi ne tino kolā e olo ifo mai te kogaloto o te fenua, kae ko te suā potukau e o‵mai i te auala mai te lakau lasi o Meonenima.” 38 Ne tali atu a Sepula ki a ia: “Kofea au pati fakamata‵mata ne fai, ‘Ko oi a Apimeleko ke tavini atu tatou ki a ia?’+ E a, e se ko tino konei ne ‵teke atu koe ki ei? Fano ki tua o taua atu ki a latou.”

39 Tenā ne ‵taki atu ei ne Kaala a takitaki o Sekema o taua atu ki a Apimeleko. 40 Ne afuli ne Apimeleko tou tagata, kae ko Kaala ne tele kea‵tea, kae tokouke a tino ne ‵mate i ei ke oko atu eiloa ki te mataloa o te fakai.

41 Ne nofo eiloa a Apimeleko i Aluma, kae ne afuli ne Sepula+ a Kaala mo ana taina kea‵tea mai Sekema. 42 I te suā aso, ne olo a tino ki tua mo te fakai, kae ne logo a Apimeleko i te mea tenā. 43 Ne puke ne ia tena kau kae vaevae ki potukau e tolu kae olo o ‵muni kae faka‵tali i te vao. I te taimi ne lavea ei ne ia a tino ko o‵mai ki tua mo te fakai, ne taua atu a ia kae tamate latou. 44 Ne ‵tele atu a Apimeleko mo tena kau ki mua o ‵tu i te mataloa o te fakai, kae ko ana potukau aka e lua ne taua atu ki tino i tua o te fakai kae tamate latou. 45 Ne taua atu a Apimeleko ki te fakai i te aso kātoa tenā kae puke ne ia. Ne tamate ne ia a tino i loto i ei, kae ofa ki lalo ne ia te fakai+ kae ‵ligi a masima ki te laukele.

46 I te taimi ne ‵logo ei a takitaki o te taoa o Sekema i te mea tenei, ne olo fakavave atu latou ki te potu malosi o te fale* o Eli-pelita.+ 47 I te taimi ne lipoti atu ei ki a Apimeleko me i takitaki katoa o te taoa o Sekema ko oti ne maopoopo fakatasi, 48 olo atu ei a Apimeleko mo ana tāgata katoa ki luga i te Mauga o Salimona. Ne puke ne Apimeleko se takū i tena lima kae ‵kati ki lalo se kaula o te lakau kae sau aka ki tena tuauma, kae fai atu ki ana tino: “Fai fakavave a te mea telā ne lavea ne koutou ne fai ne au!” 49 Tenā ne ‵kati ei ne tino katoa a kaula kae tau‵tali atu i a Apimeleko. Ne faka‵pale ne latou a kaula konā ki luga i te potu malosi kae ‵sunu a te potu malosi ki te afi. Tenā ne ‵mate ei a tino katoa i loto i te taoa o Sekema, e nofo ki se toko 1,000 tāgata mo fāfine i ei.

50 Tenā ne fano ei a Apimeleko ki Tepesa, ne taua atu a ia ki Tepesa kae puke ne ia. 51 E isi se taoa malosi i te kogaloto o te fakai, kae ne ‵tele a tāgata mo fāfine mo takitaki katoa o te fakai ki ei. Ne ‵loka ne latou kae ‵kake ki te taulu o te taoa. 52 Ne fano a Apimeleko ki te taoa o taua atu. Ne fanatu a ia ki te mataloa o te taoa ke ‵sunu ki te afi. 53 Kae tokotasi te fafine ne ‵pei ifo ne ia se fatu solo saito ki luga i te ulu o Apimeleko, ma‵fa ei tena ulu.+ 54 Ne kalaga fakavave tou tagata ki tena tavini telā e puke i ana meatau kae fai atu ki ei: “Tapale aka tau pelu o tamate au ke mo a ma fai aka latou e uiga ki a au penei, ‘Ne tamate a ia ne se fafine.’” Tenā ne ‵suki ei a ia ne tena tavini ki te pelu, mate atu ei a ia.

55 I te taimi ne lavea ei ne tāgata Isalaelu i a Apimeleko ko mate, ‵foki atu ei a latou katoa ki olotou fale. 56 Ne toe taui atu ne te Atua ki a Apimeleko a mea ma‵sei katoa ne fai ne ia ki tena tamana mai te tamatega ne ia ana taina e toko 70.+ 57 Ne toe taui atu foki ne te Atua ki tāgata Sekema a mea ma‵sei katoa ne fai ne latou. Tela la, ne oko atu eiloa ki a latou a mala kolā ne fai atu ne Iotama+ te tama tagata a Ielupaala+ ki a latou.

10 Mai tua o Apimeleko, ne tu aka a Toula te tama tagata a Pua, te tama tagata a Toto, te tagata Isakala ke fakasao ne ia a Isalaelu.+ Ne nofo a ia i Samila i te koga maugā o Efalaima. 2 Ne fai a ia mo famasino o Isalaelu i tausaga e 23. Tenā ne mate ei a ia kae tanu i Samila.

3 Mai i ana tua ne tu aka ei a Iaila te tino Kileata kae ne fai a ia mo famasino o Isalaelu i tausaga e 22. 4 E toko 30 ana tama tāgata kolā e ‵sopo i asini e 30, kae e 30 olotou fakai, kolā e taku i aso nei ko Havota-iaila;+ kae ‵tu i te fenua o Kileata. 5 Mai tua ifo, ne mate a Iaila kae tanu i Kamono.

6 Ne toe fai foki ne tino Isalaelu a mea ma‵sei i te kilokiloga a Ieova,+ kae ne kamata o tavini atu latou ki a Paala,+ ki fakatusa o Asitate, ko atua o Alamo,* atua o Saitonu, atua o Moapi,+ atua o tino Amoni,+ mo atua o tino Filisitia.+ Ne tiaki ne latou a Ieova kae seki tavini atu ki a ia. 7 Tenā ne kaitaua malosi ei a Ieova ki Isalaelu, kae fakatau atu ne ia latou ki lima o tino Filisitia mo tino Amoni.+ 8 Ne fakapuapuaga kae pule fakasaua atu latou ki tino Isalaelu i te tausaga tenā—e 18 tausaga ne pule fakasaua atu ei latou ki tino Isalaelu katoa i te feitu o te Iolitana telā ko te laukele o tino Amoli i Kileata. 9 Ne olo atu foki a tino Amoni ki te suā feitu o te Iolitana o taua atu ki tino Iuta mo Peniamina mo te kāiga o Efalaima; kae ne puapuaga malosi eiloa a Isalaelu i ei. 10 Ne ka‵laga atu a tino Isalaelu ki a Ieova mō se fesoasoani+ kae fai atu: “A matou ko agasala ki a koe, me ne tiaki ne matou te motou Atua kae tavini atu ki a Paala.”+

11 Kae ne fai atu a Ieova ki tino Isalaelu: “E a, ne seki faka‵sao ne au koutou mai Aikupito,+ kae mai tino Amoli,+ tino Amoni, tino Filisitia,+ 12 tino Saitonu, Amaleka, mo Mitiana i te taimi ne pule fakasaua atu ei latou ki a koutou? I te taimi ne ‵tagi mai ei koutou ki a au, ne faka‵sao ne au koutou mai i olotou lima. 13 Kae ne tiaki ne koutou au kae tavini atu ki nisi atua.+ Tenā te pogai ka se toe faka‵sao ei ne au koutou.+ 14 Olo ki atua kolā ne filifili ne koutou kae ka‵laga atu ki ei mō se fesoasoani.+ Fai ke faka‵sao ne latou a koutou i taimi e mafatia ei koutou.”+ 15 Kae ne fai atu a tino Isalaelu ki a Ieova: “A matou ko agasala. Fai so se mea telā e ‵lei i tau kilokiloga ki a matou. Kae fakamolemole, faka‵sao aka fua matou i te aso nei.” 16 Kae ne tapale kea‵tea ne latou a atua fakaa‵tea mai i a latou kae tavini atu ki a Ieova,+ telā ko se mafai ei o fa‵ki ne ia a logo‵maega o Isalaelu.+

17 Fakamuli ifo, ne maopoopo fakatasi a tino Amoni+ kae ne faka‵tu olotou faleie i Kileata. Tenā ne maopoopo fakatasi foki a tino Isalaelu kae faka‵tu olotou faleie i Mesepa. 18 Ne fai ifo a tino mo pelenise o Kileata ki a latou eiloa: “Ko oi ka mua o taua atu ki tino Amoni?+ Ke fai eiloa a te tino tenā mo fai te takitaki o tino katoa kolā e ‵nofo i Kileata.”

11 A Iefata+ te tino Kileata se toa mafi eiloa. A ia ko te tama tagata a se fafine talitāgata, kae ko te tamana o Iefata ko Kileata. 2 Kae e isi foki ne tama tāgata a Kileata i tena avaga. I te taimi ko ma‵tua ei a tama tāgata a tena avaga, ne afuli kea‵tea ne latou a Iefata kae fai atu ki ei: “Ka seai se tofi e maua ne koe mai te kāiga o te motou tamana, me i a koe ko te tama tagata a te suā fafine.” 3 Tenā ne tele kea‵tea a Iefata mai i ana taina kae nofo i te fenua ko Topa. Kae ne ‵kau atu a tāgata ma‵sei ki a Iefata, kae tau‵tali atu latou i a ia.

4 Mai tua ifo, ne taua atu a tino Amoni ki Isalaelu.+ 5 Kae i te taimi ne taua atu ei a tino Amoni ki Isalaelu, ne olo fakavave atu a toeaina o Kileata o puke mai a Iefata mai te fenua ko Topa. 6 Ne fai atu latou ki a Iefata: “Vau ke fai koe mo fai te motou takitaki ko te mea ke mafai o taua atu matou ki tino Amoni.” 7 Kae ne fai atu a Iefata ki toeaina o Kileata: “E a, e se ko koutou kolā ne takalia‵lia malosi mai ki a au kae ne afuli kea‵tea ne koutou au mai te fale o toku tamana?+ Kaia ko o‵mai ei koutou ki a au i te taimi ko puapuaga ei koutou?” 8 Kae ne fai atu a toeaina o Kileata ki a Iefata: “Tenā te pogai ko ‵foki mai ei matou ki a koe. Kafai e vau koe ke olo atu tatou o taua ki tino Amoni, ka fai koe mo fai te motou takitaki ki luga i tino katoa kolā e ‵nofo i Kileata.”+ 9 Tenā ne fai atu ei a Iefata ki toeaina o Kileata: “Kafai e puke ne koutou au ke taua atu ki tino Amoni kae fakatakavale ne Ieova latou ona ko au, ko fai ei au mo fai te otou takitaki!” 10 Ne fai atu a toeaina o Kileata ki a Iefata: “Ke fai eiloa a Ieova mo fai te molimau* i te va o tatou māfai e se fai ne matou a te mea ne fai mai ne koe.” 11 Tenā ne olo ei a Iefata mo toeaina o Kileata kae ne fai ne tino tou tagata mo fai te lotou takitaki mo te lotou pule. Kae ne toe fai atu foki ne Iefata ana pati katoa konā i mua o Ieova i Mesepa.+

12 Tenā ne uga atu ei ne Iefata a avefekau ki te tupu o tino Amoni,+ ana muna: “Se a te mea e ita ei koe ki a au, ko vau ei koe o taua mai ki toku fenua?” 13 Kae ne fai atu a te tupu o tino Amoni ki avefekau a Iefata: “Ona ko te mea ne puke ne Isalaelu oku laukele i te taimi ne o‵mai ei latou mai Aikupito,+ mai te Alinona+ ki te Iapoka ke oko atu eiloa ki te Iolitana.+ Ke na fakafoki mai nei ne koe mo te filemu a laukele konā.” 14 Kae ne toe uga atu ne Iefata a avefekau ki te tupu o tino Amoni 15 ke fai atu ki a ia:

“Konei a pati ne fai mai ne Iefata: ‘Ne seki puke ne Isalaelu a laukele o tino Moapi+ mo laukele o tino Amoni,+ 16 me i te taimi ne o‵mai ei latou mai Aikupito, ne sa‵sale atu a tino Isalaelu i te koga lavaki ke oko atu ki te Tai Kula+ kae ne oko atu ki Katesa.+ 17 Kae ne uga atu ne Isalaelu a avefekau ki te tupu o Etoma,+ kae fai atu: “Fakamolemole talia mai ke olo atu matou i loto i te otou fenua,” kae ne seki fakalogo mai a te tupu o Etoma. Ne uga atu foki ne latou a te fekau ki te tupu o Moapi,+ kae ne seki talia ne ia. Tenā ne ‵nofo eiloa a tino Isalaelu i Katesa.+ 18 I te taimi ne sa‵sale atu ei latou i te koga lavaki, ne olo latou i tafa o te fenua ko Etoma+ mo te fenua o Moapi. Ne olo atu latou ki te feitu ki saegala o te fenua o Moapi+ kae ‵nofo i te kogā koga ko Alinona, ne seki oko atu eiloa latou ki te tuakoi o Moapi,+ me i Alinona ko te tuakoi o Moapi.

19 “‘Mai tua ifo i ei, ne uga atu ne tino Isalaelu a avefekau ki a Sekono te tupu o tino Amoli, te tupu o Hesepono, kae ne fai atu a Isalaelu ki a ia: “Fakamolemole talia mai ke olo atu matou i loto i te otou fenua o olo ki te motou koga.”+ 20 Kae ne seki talitonu a Sekono ki tino Isalaelu ke olo atu i loto i tena kogā fenua, tenā ne fakamaopoopo ei ne Sekono ana tino katoa kae ne olo atu o ‵nofo i Iasa kae taua atu ki tino Isalaelu.+ 21 I konā loa, ne tuku atu ei ne Ieova te Atua o Isalaelu a Sekono mo ana tino katoa ki lima o tino Isalaelu, tenā ne taka‵vale ei latou kae puke ne tino Isalaelu a mea katoa i te fenua o tino Amoli, ko tino kolā e ‵nofo i te fenua tenā.+ 22 Tenā ne puke ei mō latou a te kogā fenua kātoa o tino Amoli mai te Alinona ki te Iapoka, kae mai te koga lavaki ke oko ki te Iolitana.+

23 “‘Ko Ieova te Atua o Isalaelu ne afuli kea‵tea ne ia a tino Amoli i mua o ana tino, ko tino Isalaelu,+ e a, ka afuli eiloa ne koutou a latou kea‵tea? 24 E a, e se puke ne koutou so se mea e tuku atu ne te otou atua ko Kemoso+ ke puke ma koutou? Tela la, so se tino e afuli kea‵tea ne Ieova te motou Atua mai omotou mua ka afuli foki eiloa ne matou kea‵tea.+ 25 Nei la, e mata, e sili atu koutou i te ‵lei i lō Palako+ te tama tagata a Sipola, te tupu o Moapi? Kai fakatau‵fai aka eiloa a ia mo Isalaelu, io me kai taua aka eiloa a ia ki a latou? 26 I te taimi ne ‵nofo ei a tino Isalaelu i Hesepono mo ana fakai fo‵liki+ mo Aloela mo ana fakai fo‵liki mo fakai katoa i tafatafa o te kaugutu o te Alinona i tausaga e 300, kaia ne seki taumafai ei koe o toe puke a laukele konā i te taimi tenā?+ 27 Au e seki agasala ki a koe, kae se mea ‵se ke taua mai koe ki a au. Ke na fai eiloa a Ieova, te Famasino,+ mo famasino i te aso nei i te va o tino Isalaelu mo tino Amoni.’”

28 Kae ne seki fakalogo eiloa a te tupu o tino Amoni ki te fekau a Iefata ki a ia.

29 Ne oko atu te agaga o Ieova ki a Iefata+ kae ne fanatu a ia i loto i Kileata mo Manase o fano ki Mesepa i Kileata,+ kae mai i Mesepa i Kileata ne fanatu ei a ia ki te fenua o tino Amoni.

30 Tenā ne fai ei ne Iefata se tautoga+ i mua o Ieova kae fai atu: “Kafai e tuku mai ne koe a tino Amoni ki oku lima, 31 so se tino e ulu mai ki tua mo te mataloa o toku fale o fakafetaui mai ki a au māfai ko foki mai au mo te filemu mai tino Amoni ka tuku atu ne au ki a Ieova,+ kae ka ofo atu ne au a ia e pelā me se taulaga ‵sunu.”+

32 Tenā ne fano ei a Iefata o taua atu ki tino Amoni, kae ne tuku atu ne Ieova a latou ki ana lima. 33 E tokouke ‵ki a tino ne tamate ne ia mai Aloela ke oko atu ki Miniti—e 20 a fakai—ke oko atu foki eiloa ki Apelu-kelamima. Tenā ne taka‵vale ei a tino Amoni i mua o tino Isalaelu.

34 Oti aka, foki ei a Iefata ki tena fale i Mesepa,+ kae kiloke! ne vau tena tama fafine o fakafetaui ki a ia, e tātā tena samupelini kae sakasaka mai! Ko ia eiloa tena tama e tokotasi. E seai aka foki sena isi tama tagata io me se tama fafine i ana tafa. 35 I te laveaga ne ia tena tama, ne saesae ana gatu kae fai atu: “Oi aue taku tama! Ko fatifati ne koe toku loto, me ko koe te tino telā ka ave ne au kea‵tea. Ko oti ne fai taku pati ki a Ieova, kae e se mafai ne au o toe fakafoki aku pati.”+

36 Kae ne fai atu tou fafine ki a ia: “Toku tamana, kafai ko oti ne fai tau pati ki a Ieova, ke fai eiloa te mea telā ko oti ne tauto koe ki ei,+ me ko oti ne tuku atu ne Ieova te taui mō koe ki ou fili, ko tino Amoni.” 37 Tenā ne toe fai atu ei a ia ki tena tamana: “Ke fai eiloa te mea tenei ki a au: Tuku mai ke nofo aka au i a au eiloa i se lua masina, ke fano au ki luga i mauga, ke ‵tagi fakatasi au mo oku taugasoa fāfine* ona ko au ka se avaga.”

38 Ne fai atu tou tagata: “Fano la!” Tenā uga ei ne ia tou fafine ke fano i se lua masina; kae ne olo tou fafine mo ana taugasoa o ‵tagi ona ko ia ka se avaga. 39 I te otiga o masina e lua ne foki mai tou fafine ki tena tamana, kae ne fakataunu eiloa ne Iefata a tena tautoga telā ko oti ne fai e uiga ki tou fafine.+ Ne seki ‵moe fakatauavaga eiloa tou fafine mo se tagata. Kae ne fai eiloa mo fai se tuu masani* i Isalaelu: 40 I tausaga takitasi e olo atu faeloa a tamafine o Isalaelu o avatu a pati fakamālō ki te tama fafine a Iefata te tino Kileata e taki fa aso i te tausaga.

12 Ne maopoopo fakatasi a tāgata Efalaima, kae olo atu ki te suā feitu ki Safono* kae fai atu ki a Iefata: “Kaia ne seki fai mai ei koe ki a matou ke olo fakatasi tatou ki te suā feitu o taua atu ki tino Amoni?+ Ka ‵sunu ki lalo ne matou tou fale fakatasi mo koe i loto i ei.” 2 Kae ne fai atu a Iefata ki a latou: “Ne aofia fakatasi au mo oku tino i se kinauga lasi mo tino Amoni. Ne kalaga atu au ki a koutou mō se fesoasoani, kae ne seki fakasao ne koutou au mai olotou lima. 3 I te taimi ne iloa ei ne au me ka se fakasao ne koutou au, ne talia ei ne au ke tu toku ola i se tulaga fakamataku kae fanatu o taua ki tino Amoni,+ kae ne tuku mai ne Ieova latou ki a au. Kaia la ko o‵mai ei koutou i te aso nei o taua mai ki a au?”

4 Tenā ne fakamaopoopo ei ne Iefata a tāgata Kileata katoa,+ kae taua atu ki Efalaima; ne fakatakavale ne tāgata Kileata a Efalaima kolā ne fai atu: “A koutou ne tino fua kolā ne ‵sola mai i Efalaima, koutou tino Kileata i Efalaima mo Manase.” 5 Ne puke ne Kileata a te asaga o te Iolitana+ telā e tu mai mua o tino Efalaima; kae kafai e taumafai a tino Efalaima o ‵tele ke ‵sao latou, e fai atu latou, “Ke fano aka au ki te suā feitu”; kae ka fesili atu a tāgata Kileata ki a latou taki tokotasi, “A koe se tino Efalaima?” Kafai e fai mai a ia, “Ikai!” 6 kae ka fai atu latou ki te tino tenā: “Fakamolemole fai aka pelā Sepoleta.” Kae ne fai mai a ia “Sipoleta,” me e se mafai o taku faka‵lei ne ia te pati tenā. Ko puke ei ne latou te tino tenā o tamate i asaga o te Iolitana. E ‵tusa mo te toko 42,000 tino Efalaima ne ‵mate i te taimi tenā.

7 Ne fai a Iefata mo famasino o Isalaelu i tausaga e ono, kae ne mate atu a Iefata te tino Kileata kae ne tanu tou tagata i tena fakai i Kileata.

8 Mai tua o Iefata, ne fai ei a Ipisani mai Peteleema mo famasino o tino Isalaelu.+ 9 E toko 30 ana tama tāgata kae toko 30 ana tama fāfine. Ne uga atu ne ia ana tama fāfine ke a‵vaga ki tāgata mai tua o te lotou kaukāiga, kae ne aumai ne ia a fāfine e toko 30 mo fai a avaga a ana tama tāgata. Ne fai a ia mo famasino o Isalaelu i tausaga e fitu. 10 Tenā ne mate atu ei a Ipisani kae ne tanu i Peteleema.

11 Mai i ana tua, ne fai a Eloni te tino Sepulona mo famasino o Isalaelu; ne fai a ia mo famasino o Isalaelu i tausaga e sefulu. 12 Ne mate atu a Eloni te tino Sepulona kae ne tanu i Aitialona i te laukele o Sepulona.

13 Mai i ana tua, ne fai a Apatonu te tama tagata a Hilelu te tino Pilatonu mo famasino o Isalaelu. 14 E toko 40 ana tama tāgata kae toko 30 ana mokopuna tāgata kolā e ‵sopo i asini e 70. Ne fai a ia mo famasino o Isalaelu i tausaga e valu. 15 Tenā ne mate atu ei a Apatonu te tama tagata a Hilelu te tino Pilatonu kae tanu i Pilatonu i te laukele o Efalaima i te mauga o tino Amaleka.+

13 Ne toe fai foki ne tino Isalaelu a mea ma‵sei i te kilokiloga a Ieova,+ kae ne talia ne Ieova ke pule atu a tino Filisitia+ ki a latou mō tausaga e 40.

2 I te taimi tenā, e isi se tagata Sola+ mai te kāiga o tino Tanu,+ a tena igoa ko Manoa.+ A tena avaga e se afu kae e seai sena tama.+ 3 E seki leva, kae fakasae atu te agelu a Ieova ki te fafine kae fai atu ki a ia: “Kiloke, a koe e se afu kae e seai foki sau tama. Kae ko koe ka faitama kae fanau ne koe se tamaliki tagata.+ 4 Nei la, ke fakaeteete ke mo a ma inu koe ki uaina io me ko so se meainu malosi,+ kae ke mo a ma kai ki so se meakai sē ‵ma.+ 5 Kiloke! A koe ka faitama kae fanau ne koe se tamaliki tagata, kae ke seai eiloa se ‵vele e patele ki tena ulu,+ me i te tamaliki ka fai pelā me se Naseli ki te Atua mai te taimi e fanau* ei, kae ka takitaki ne ia te faka‵saoga o tino Isalaelu mai lima o tino Filisitia.”+

6 Tenā ne fanatu ei tou fafine kae fai atu ki tena avaga: “E isi se tagata o te Atua tonu ne vau ki a au, kae e foliga mai e pelā me se agelu a te Atua tonu, kae ko oko loa i te fakamataku. E seki fesili atu au ki ei me ko ia se tino mai fea, kae e seki fai mai foki ne ia tena igoa.+ 7 Kae ne fai mai a ia ki a au, ‘Kiloke! A koe ka faitama kae ka fanau ne koe se tamaliki tagata. Nei la, ke mo a koe ma inu ki uaina io me ko so se meainu malosi, kae ke mo a ma kai ki so se meakai sē ‵ma, me i te tamaliki tenei ka fai pelā me se Naseli ki te Atua mai te taimi e fanau* ei ke oko eiloa ki te aso e mate ei a ia.’”

8 Ne fakamolemole atu a Manoa ki a Ieova, ana muna: “Ieova, fakamolemole toe uga mai aka a te tagata o te Atua tonu telā ne uga mai ne koe ke fakatonu mai a mea kolā e ‵tau o fai ne māua ki te tamaliki telā ka fanau mai.” 9 Ne fakalogo te Atua tonu ki a Manoa, kae ne toe fanatu a te agelu a te Atua tonu ki te fafine i te taimi ne sagasaga ei a ia i tua; a tena avaga ko Manoa ne seki ‵nofo fakatasi mo ia i konā. 10 Ne tele fakavave atu te fafine kae fai atu ki tena avaga: “Kiloke! A te tagata telā ne vau muamua ki a au ko toe fakasae mai ki a au.”+

11 Tenā ne tu aka ei a Manoa ki luga kae olo mo tena avaga. Ne fanatu a ia ki te tagata tenā kae fai atu ki a ia: “A koe ko te tagata telā ne faipati ki taku avaga?” Ne fai atu a ia: “Ko au eiloa.” 12 Kae ne fai atu a Manoa: “Ke taunu eiloa au pati! Se a te vaegā olaga ka ola ei te tamaliki tenei, kae se a foki tena galuega?”+ 13 Ne fai atu te agelu a Ieova ki a Manoa: “E ‵tau o fai ne tau avaga a mea katoa kolā ne fai atu ne au ki a ia.+ 14 E se ‵tau mo ia o kai ki so se mea telā e faite mai i te vine, e se ‵tau mo ia o inu ki uaina io me ko so se meainu malosi,+ kae e se ‵tau foki mo ia o kai ki so se meakai sē ‵ma.+ A mea katoa kolā ne fakatonu atu ne au ki a ia, e ‵tau o tausi ne ia.”

15 Ne fai atu a Manoa ki te agelu a Ieova: “Fakamolemole sa fano, ke fakatoka mua ne māua se tamā kouti ma koe.”+ 16 Kae ne fai atu a te agelu a Ieova ki a Manoa: “Kafai au e nofo, au ka se kai ki lua meakai; kae kafai e manako koe o ofo atu se taulaga ki a Ieova, e mafai o ofo atu ne koe.” Ne seki iloa ne Manoa me tenā te agelu a Ieova. 17 Tenā ne fai atu ei a Manoa ki te agelu a Ieova: “Ko oi tou igoa,+ ko te mea ke mafai o tavae ne māua koe māfai ko taunu au pati?” 18 Kae ne fai atu te agelu a Ieova ki a ia: “Kaia e fesili mai ei koe e uiga ki toku igoa, me i toku igoa e fakaofoofogia?”

19 Tenā ne aumai ei ne Manoa te tamā kouti mo te taulaga meakai kae ofo atu a mea konā i luga i te fatu ki a Ieova. Kae ne fai ne Ia se mea fakaofoofogia kae kilo‵kilo atu eiloa a Manoa mo tena avaga ki ei. 20 I te taimi ne ula aka ei te afi mai te fatafaitaulaga, ne fanaka ei te agelu a Ieova i loto i te ulaga afi mai te fatafaitaulaga kae kilo‵kilo atu eiloa a Manoa mo tena avaga ki ei. I konā eiloa, ne faka‵siga ifo lāua mo lā mata e ‵fuli ki lalo i te laukele. 21 Ne seki toe fakasae atu eiloa te agelu a Ieova ki a Manoa mo tena avaga. Tenā ne iloa ei ne Manoa me i a ia ko te agelu a Ieova.+ 22 Ne fai atu a Manoa ki tena avaga: “A tāua ka ‵mate eiloa, me ko te Atua eiloa tenei ne lavea ne tāua.”+ 23 Kae ne fai atu tena avaga ki tou tagata: “Kafai e manako a Ieova ke ‵mate tāua, e se talia ne ia te taulaga ‵sunu+ mo te taulaga meakai mai i a tāua, e se fakaasi mai foki ne ia ki a tāua a mea katoa konei, kae e se fai mai foki ne ia ki a tāua a mea katoa konei.”

24 Fakamuli ifo, ne fanau ne te fafine se tamaliki tagata kae ne fakaigoa a ia ki a Samasoni;+ kae i te taimi ne tupu aka ei a te tamaliki tagata tenā, ne fakamanuia faeloa a ia ne Ieova. 25 Mai tua ifo, ne kamata o galue te agaga o Ieova+ i a ia i Mahena-tanu,+ i te va o Sola mo Esetaolo.+

14 Ne fano a Samasoni ki Timenata, kae ne lavea ne ia i Timenata se fafine Filisitia.* 2 Ne fanatu tou tagata ki tena tamana mo tena mātua kae fai atu: “E isi se fafine Filisitia ne lavea ne au i Timenata, kae manako au ke puke mai ne koulua a ia mo fai taku avaga.” 3 Kae ne fai atu tena tamana mo tena mātua ki a ia: “E a, e se mafai o ‵sala ne koe se fafine mai ou kāiga mo ‵tou tino katoa?+ E a, ka fano koe o avaga ki se fafine mai tino Filisitia kolā e seki pilitome?” Kae ne fai atu a Samasoni ki tena tamana: “Puke mai tou fafine ki a au, me ko ia eiloa te tino e fiafai au ki ei.” 4 Ne seki iloa ne tena tamana mo tena mātua me ko Ieova ne fai ne ia te mea tenei, me e salasala a Ia ki se avanoaga ke taua atu ki tino Filisitia, me i tino Filisitia e pule atu ki tino Isalaelu i te taimi tenā.+

5 Ne olo ifo a Samasoni mo tena tamana mo tena mātua ki Timenata. I tena okoatuga ki togavine o Timenata, ne lavea ne ia se leona e ‵gulu kae tele atu ki a ia. 6 Tenā ne maua ei ne ia te malosi mai te agaga o Ieova,+ kae ne ‵sae lua ne ia te leona, e pelā eiloa me se tino e ‵sae lua ne ia se kouti ki ana lima. Kae ne seki fai eiloa ne ia ki tena tamana mo tena mātua a te mea ne fai ne ia. 7 Tenā ne fanatu ei tou tagata o faipati ki te fafine, kae ne fiafai malosi eiloa a Samasoni ki tou fafine.+

8 Fakamuli ifo, i te taimi ne foki ei tou tagata o puke tou fafine ki te fale,+ ne ‵fuli atu a ia o kilo ki te foitino mate o te leona, kae ne lavea ne ia i loto i te foitino mate o te leona se mumuga lagofufu mo hani i ei. 9 Ne ‵salu mai ne ia ki tua a hani ki ana lima kae kaikai ne ia i tena auala. I tena okoatuga ki tena tamana mo tena mātua ne tuku atu ne ia ne hani ke ‵kai lāua ki ei. Kae ne seki fai eiloa ne ia ki a lāua me ne ‵salu mai ne ia a hani mai loto i te foitino mate o se leona.

10 Ne fanatu tena tamana ki te fafine, kae ne fai ne Samasoni se ‵kaiga i konā, me tenā eiloa te mea e masani sāle o fai ne tamataene. 11 I te laveaga ne latou a ia, ne aumai ne latou e 30 tamataene ke soa i a ia. 12 Tenā ne fai atu ei a Samasoni ki a latou: “Fakamolemole, faka‵logo mai ke fai atu ne au taku tupua. Kafai e mafai ne koutou o fakaasi mai te tali i loto i aso e fitu e fai ei te ‵kaiga, ka tuku atu ne au ki a koutou e 30 gatu lino kae 30 a gatu mō koutou. 13 Kae kafai e se maua ne koutou te tali ki ei, e ‵tau mo koutou o tuku mai ki a au e 30 gatu lino mo gatu e 30.” Ne fai atu latou: “Fakamatala mai tau tupua; ke faka‵logo matou ki ei.” 14 Ana muna ki a latou:

Ne seki mafai o maua ne latou te tali o te tupua i loto i aso e tolu. 15 I te fa o aso, ne fai atu latou ki te avaga a Samasoni: “Fakakolekole aka tau avaga+ ko te mea ke mafai o fakaasi mai ne ia te tali o tena tupua. Kafai e se fai ne koe te mea tenā, ka ‵sunu ne matou a koe mo te fale o tou tamana ki te afi. E a, ne ‵kami mai fua ne koe matou ki konei ke puke ne koe omotou mea?” 16 Ne tagi te avaga a Samasoni ki tou tagata kae fai atu: “A koe kāti e takalialia ki a au; a koe e se alofa mai ki a au.+ Ne fai ne koe se tupua ki oku tino, kae e seki fakaasi mai ne koe te tali ki a au.” Kae ne fai atu tou tagata ki a ia: “Ke oko foki ki toku tamana mo toku mātua e seki fakaasi ne au te tali ki a lāua! E mata, e ‵tau o fakaasi atu ne au ki a koe?” 17 Kae ne tagi atu faeloa tou fafine ki a ia i te ‵toega o aso o te ‵kaiga telā e fitu aso te leva. I te fitu o aso ne fakaasi atu ei ne tou tagata te tali me ne tagi atu faeloa tou fafine ki a ia. Tenā ne fakaasi atu ei ne tou fafine a te tali o te tupua ki ana tino.+ 18 Tela la, i te fitu o aso kae koi tuai o tō te mata o te la,* ne fai atu a tāgata o te fakai ki a ia:

Ne tali atu a ia ki a latou:

19 Ne maua ne ia te malosi mai te agaga o Ieova,+ kae ne fanatu a ia o taua ki Asekelona+ kae tamate ne ia a tāgata e toko 30 kae puke ne ia olotou gatu kae tuku atu ki tāgata kolā ne tali ne latou tena tupua.+ Ne kaitaua malosi a ia i te taimi ne foki atu ei ki te fale o tena tamana.

20 Tenā ne tuku atu ei te avaga a Samasoni+ ki se tamataene e tokotasi telā ne soa i a ia.+

15 Mai tua ifo, i aso o te ‵katiga o saito, ne fanatu a Samasoni o āsi ki tena avaga, kae avatu ne ia se tamā kouti. Ana muna: “Au e manako o fano ki taku avaga i loto i te potu ‵moe.”* Kae ne seki talia ne te tamana o te fafine a tou tagata ke fano ki loto. 2 Ne fai atu te tamana o te fafine: “Au ne mafaufau me i a koe ko takalialia eiloa ki tou fafine.+ Tenā ne tuku atu ei ne au a ia ki tou soa.+ E a, e se tinogali atu a tena taina foliki i a ia? Fakamolemole, puke atu tou fafine.” 3 Kae ne fai atu a Samasoni ki a latou: “I te taimi nei, e se mafai o ‵losi mai a tino Filisitia me ne ‵ta ne au latou.”

4 Tenā ne fanatu ei Samasoni o ‵po mai a alope* e 300. Oti aka, puke ne ia a lakau, saisai ne ia a felo o alope taki lua, kae ‵sulu atu a lakau i va o felo konā. 5 Ne faka‵ka ne ia a lakau konā kae tuku atu a alope ke ‵tele ki loto i fatoaga saito a tino Filisitia. Ne ‵sunu ne ia a mea katoa, ko fusigā saito ke oko eiloa ki lakau ko saito, e penā foki mo togavine mo togaolive.

6 Ne fesili aka a tino Filisitia: “Ko oi ne fai ne ia te mea tenei?” Ne fai atu ki a latou: “Ko Samasoni, te avaga a te tama fafine a te tino Timenata, me ne puke ne ia te avaga a Samasoni kae tuku atu ki tena soa.”+ I konā eiloa, ne olo atu a tino Filisitia o ‵sunu tou fafine fakatasi mo tena tamana ki te afi.+ 7 Tenā ne fai atu ei a Samasoni ki a latou: “Kafai tenei te mea ne fai ne koutou, ka se gata eiloa taku mea e fai ke oko ki te taimi e taui atu ei ne au te otou mea ne fai.”+ 8 Tenā ne ‵ta fakapalele ei ne ia latou taki tokotasi, oti aka fanaifo ei a ia o nofo i se ana i te kaupapa o Etama.

9 Fakamuli ifo, ne olo aka tino Filisitia o ‵nofo i Iuta kae ne olo sāle fua i Lehi.+ 10 Tenā ne fai atu ei a tāgata o Iuta: “Kaia ne o‵mai ei koutou o taua mai ki a matou?” kae ne tali atu latou: “A matou e o‵mai o puke* a Samasoni o taui atu a te mea ne fai ne ia ki a matou.” 11 Tenā ne olo ifo ei a tāgata o Iuta e toko 3,000 ki te ana i te kaupapa o Etama kae fai atu ki a Samasoni: “E se iloa ne koe me i tino Filisitia e pule mai ki a tatou?+ Kaia ne fai ei ne koe te mea tenei ki a matou?” Ne fai atu tou tagata ki a latou: “Ne fai ne au a te mea telā ne fai ne latou ki a au.” 12 Kae ne fai atu latou ki a ia: “A matou ne o‵mai o puke* koe o tuku atu ki tino Filisitia.” Tenā ne fai atu ei Samasoni: “Tauto mai ki a au me ka se ta ne koutou au.” 13 Ne fai atu latou ki a ia: “Ikai, e saisai fua ne matou koe ko tuku atu ei ki a latou, kae ka se tamate ne matou a koe.”

Tenā ne saisai ei ne latou tou tagata ki lōpu ‵fou e lua kae aumai ki tua mo te kaupapa. 14 I tena okoatuga ki Lehi, ne ka‵laga fia‵fia a tino Filisitia i te fetauiga mo tou tagata. Ne maua ne ia te malosi mai te agaga o Ieova,+ kae ne fai ei a lōpu i ana lima ke fai e pelā me ne filo kolā ne ‵ka i se afi, kae ne ‵motu i ei a lōpu konā i ana lima.+ 15 Ne maua ne ia se ivi kauvae koi ‵mata o se asini tagata, puke mai ei ne ia te ivi kauvae tenā kae ‵ta ki ei a tāgata e toko 1,000.+ 16 Tenā ne fai atu ei a Samasoni:

“Mai te ivi kauvae o se asini—e tasi te fakaputuga, e lua fakaputuga!

Mai te ivi kauvae o se asini ne ‵ta ei ne au a tāgata e toko 1,000.”+

17 I te otiga o ana pati, ‵pei ei ne ia kea‵tea te ivi kauvae kae fakaigoa ne ia te koga tenā ki a Lamata-lehi.*+ 18 Ne fiainu malosi a ia kae ne kalaga atu ki a Ieova: “Ko koe eiloa ne tuku mai ne koe te manumaloga lasi tenei ki lima o tau tavini. Kae nei la, e a, ko tuku fua au ke mate i te fiainu kae tuku atu ki lima o tino kolā e seki pilitome?” 19 Tenā ne fai ei ne te Atua ke isi se pūga i Lehi kae ne ‵tafe mai i ei te vai.+ I tena inuga ki ei ne toe foki mai tena malosi. Tenā te pogai ne fakaigoa ei ne ia te koga tenā ki a Eni-hakole,* telā e tu i Lehi ke oko mai eiloa ki te aso nei.

20 Kae ne fai a ia mo famasino i Isalaelu i aso o tino Filisitia mō tausaga e 20.+

16 I te taimi e tasi ne fano ei Samasoni ki Kasa kae lavea ne ia i konā se fafine talitāgata, fanatu ei a ia ki te fale o te fafine tenā. 2 Ne fakailoa atu ki tino Kasa: “A Samasoni ne vau ki konei.” Tenā ne nikoi ei ne latou te koga tenā kae fakatali‵tali ki a ia i te po kātoa i te mataloa o te fakai. Ne seki logoa eiloa latou i te po kātoa, kae fai ifo ki a latou eiloa: “Ka fai ko ao, ko tamate ei ne tatou a ia.”

3 Kae ne moe eiloa a Samasoni i te koga tenā ke oko ki te valuapo. Tenā ne tu aka ei a ia i te valuapo kae puke atu ki mataloa o te fakai mo pou e lua i feitu kae unu ne ia fakatasi mo te lakau faka‵lava. Ne tuku ne ia ki luga i ana tuauma kae amo ne ia ki luga i te taulu o te mauga telā e fakasaga ki Hepelona.

4 Mai tua ifo, ne fiafai a ia ki se fafine i te Vanu o Soleka telā e fakaigoa ki a Talila.+ 5 Tenā ne olo atu ei a aliki o tino Filisitia ki tou fafine kae fai atu: “Fai aka se togafiti* ki tou tagata+ ke iloa ne koe me e maua i fea tena malosi sili kae e mafai pefea o fakatakavale ne matou a ia kae saisai kae manumalo foki i a ia. Kafai e fai ne koe te mea tenei ka avatu ne matou taki tokotasi ki a koe a tupe siliva e 1,100.”

6 Fakamuli ifo, ne fai atu a Talila ki a Samasoni: “Fakamolemole, fakaasi mai ki a au me e maua ne koe i fea tou malosi sili kae ne a mea e mafai o fakaaoga ke saisai ei koe kae fakatakavale foki koe.” 7 Ne fai atu Samasoni ki tou fafine: “Kafai e saisai ne latou au ki uka ‵fou e fitu o kausana kolā e seki tauaki, ko au eiloa ko vāivāi e pelā mo nisi tāgata.” 8 Tenā ne avatu ei ne aliki o tino Filisitia ki tou fafine a uka ‵fou e fitu o kausana kolā e seki tauaki, kae ne saisai ne tou fafine a ia ki ei. 9 Ne fakatali‵tali latou i te potu tafa ki loto, kae ne kalaga atu tou fafine ki a ia: “Samasoni a tino Filisitia ko ‵mai!” I konā eiloa ne motumotu ne tou tagata a uka o kausana konā, e pelā fua mo filo mai te lakau ko te lino kolā e ‵ka i se afi.+ Ne seki iloa eiloa ne latou a te pogai e mafi ei tou tagata.

10 Tenā ne fai atu ei a Talila ki a Samasoni: “Kiloke! Ne fakaloiloi* ne koe au kae ‵pelo mai ki a au. Fakamolemole, fakaasi mai ki a au i te taimi nei me se a te mea e mafai o fakaaoga ke saisai ei koe.” 11 Ne fai atu tou tagata ki a ia: “Kafai e saisai ne latou au ki lōpu ‵fou kolā e seki fakaaoga eiloa, ko au eiloa ko vāivāi e pelā mo nisi tāgata.” 12 Tenā ne puke ei ne Talila a lōpu ‵fou kae saisai ki ei a tou tagata kae kalaga atu: “Samasoni a tino Filisitia ko ‵mai!” (I te taimi tenā ne fakatali‵tali eiloa a tino kolā ne o‵mai o puke a ia i te potu tafa ki loto.) I konā eiloa ne motumotu ne ia a lōpu i ana lima e pelā fua me ne filo.+

13 Oti aka, fai atu ei a Talila ki a Samasoni: “Ke oko mai ki te taimi nei, ne fakaloiloi ne koe au kae ‵pelo mai ki a au.+ Fakaasi mai ki a au me se a te mea e mafai o fakaaoga ke saisai ei koe.” Kae ne fai atu tou tagata ki a ia: “Māfai e ‵fili ne koe oku kaufiliga e fitu ki te filo o te masini ‵laga laugatu.” 14 Tenā ne faka‵mau ei ne ia ana kaufiliga ki se pine kae kalaga atu ki tou tagata: “Samasoni a tino Filisitia ko ‵mai!” Ne ala aka tou tagata kae ‵futi kea‵tea ne ia a te pine o te masini mo te filo.

15 Ne fai atu tou fafine ki a ia: “E mafai pefea o fai mai koe ‘Au e alofa ki a koe,’+ māfai tou loto e se nofo i a au? Ko tolu nei taimi ne fakaloiloi ne koe au kae seki fakaasi mai eiloa ne koe te pogai e mafi ‵ki ei koe.”+ 16 Ona ko te kotekote ‵soko o tou fafine kae faimālō atu ki a ia i aso takitasi, ne ‵fiu i ei tou tagata.+ 17 Tenā ne fakaasi atu ei ne ia a mea katoa i tena loto ki tou fafine, ana muna: “E seki ai eiloa se ‵vele ne patele ki toku ulu, me i a au se Naseli a te Atua mai taku fanaumaiga.*+ Kafai e ‵vele toku ulu, ko te mea eiloa ko seai soku malosi kae gasolo o vāivāi e pelā eiloa mo nisi tāgata katoa.”

18 I te iloaga ne Talila me ko oti ne fakaasi atu ne tou tagata a mea katoa i tena loto ki a ia, ne fakatonu fakavave ne ia a aliki o Filisitia+ kae fai atu: “O‵mai i te taimi nei, me ko oti ne fakaasi mai ne ia a mea katoa i tena loto ki a au.” Tenā ne o‵mai ei a aliki o Filisitia ki tou fafine, kae aumai ne latou a tupe. 19 Ne fai ne tou fafine ke tō te moe o Samasoni i ana vae, kae kalaga atu ki te tagata ke ‵vele a kaufiliga e fitu i tena ulu. Oti aka, ne kamata o sili atu te malosi o Talila i a Samasoni, me ko galo te malosi o tou tagata. 20 Ne kalaga atu tou fafine: “Samasoni a tino Filisitia ko ‵mai!” Ne ala aka tou tagata kae fai atu: “Ka fanatu au ki tua e pelā mo te masani+ kae ko au e sao eiloa.” Kae e se iloa ne tou tagata i a ia ko tiaki ne Ieova. 21 Tenā ne puke ei ne te kau Filisitia tou tagata kae ‵kape ana mata. Ne ave ne latou a ia ki Kasa kae saisai ki filifili kopa e lua, kae ne tuki ne ia a saito i loto i te falepuipui. 22 Kae ko laulu i tena ulu ne kamata o toe ‵somo aka mai tua o te ‵velega.+

23 Ne maopoopo fakatasi a aliki o tino Filisitia o ofo atu se taulaga sili ki te lotou atua ko Takono+ kae fai a fakafiafiaga, me ne fai aka latou: “Ko oti ne tuku mai ne te ‵tou atua a Samasoni te ‵tou fili ki ‵tou lima!” 24 I te taimi ne lavea ei ne tino a ia, ne ‵viki atu latou ki te lotou atua kae fai aka: “Ko oti ne tuku mai ne te ‵tou atua ki ‵tou lima a te ‵tou fili, ko ia telā ne fakamasei ne ia ‵tou laukele+ kae tamate ne ia a tino e tokouke o tatou.”+

25 Ona ko te lasi o te lotou loto fia‵fia, ne fai aka ei latou: “Puke mai a Samasoni ke fakafiafia ne ia tatou.” Tenā ne puke mai ei ne latou a Samasoni mai te falepuipui ke fakafiafia latou, kae ne fai ne latou a ia ke tu i va o pou. 26 Kae ne fai atu Samasoni ki te tamaliki tagata telā e ‵piki atu ki tena lima: “Fai aka ke patele au ki pou kolā e ‵lago ki ei te fale tenei, ko te mea ke fakapale au ki ei.” 27 (I te taimi tenā, ne ‵fonu eiloa a te fale i tāgata mo fāfine. A aliki katoa o tino Filisitia ne ‵nofo i konā, kae e nofo ki se toko 3,000 tāgata mo fāfine i luga i te tuafale e kilo‵kilo ifo ki a Samasoni e fakafiafia ne ia latou.)

28 Kae ne kalaga atu a Samasoni+ ki a Ieova: “Te Aliki Sili ko Ieova, fakamolemole masaua mai au, kae fakamalosi aka+ ne koe au i te taimi fua e tasi tenei, e te Atua, kae tuku mai ke taui atu ne au a te mea ne fai ne tino Filisitia ke sui ei se mata e tasi o oku mata e lua.”+

29 Tenā ne ‵piki atu ei a Samasoni ki pou e lua i te kogaloto kolā e ‵lago ki ei te fale, kae fakapale atu ki ei, ko tena lima fakaatamai i te pou e tasi kae ko tena lima fakamaui i te suā pou. 30 Ne kalaga aka Samasoni: “Tuku mai au ke ‵mate fakatasi mo tino Filisitia!” Tenā ne fakaoti ei tena malosi o ‵tule a pou konā, kae ne maofa ei te fale ki luga i aliki mo tino katoa i loto i ei.+ E tokouke atu a tino ne tamate ne ia i te taimi ne mate ei a ia i lō ana tino ne tamate i tena olaga kātoa.+

31 Fakamuli ifo, ne olo atu ana taina mo kāiga katoa o tena tamana o puke a ia. Ne ave ne latou a ia kae tanu i te va o Sola+ mo Esetaolo i te tanuga o Manoa+ tena tamana. Ne fai a ia mo famasino o Isalaelu i tausaga e 20.+

17 E isi se tagata mai te koga maugā o Efalaima+ e igoa ki a Mika. 2 Ne fai atu a ia ki tena mātua: “A tupe siliva e 1,100 kolā ne ‵galo i a koe kae lagona ne au me ne fetū ne koe te tino ne puke ne ia—kiloke! konei i a au a tupe siliva konā. Ne puke eiloa ne au.” I konā ne fai atu ei tena mātua: “Ke fakamanuia ne Ieova taku tama tagata.” 3 Tenā ne faka‵foki atu ei ne ia a tupe siliva e 1,100 ki tena mātua, kae ne fai atu tena mātua: “Ka fakatapu eiloa ne au a tupe siliva i oku lima ki a Ieova ke fakaaoga ne taku tama ke faite ki ei se tupua lakau mo se tupua fiti.+ I te taimi nei ko toe faka‵foki atu ne au ki a koe.”

4 I te otiga ne faka‵foki atu ne ia a tupe siliva ki tena mātua, ne puke ne tena mātua a tupe siliva e 200 kae tuku atu ki te tino faite mea ki siliva. Ne faite ne ia se tupua lakau mo se tupua fiti kae tuku atu ki loto i te fale o Mika. 5 A te tagata tenei ko Mika e isi sena fale e tuku ei ana atua faite, kae ne faite ne ia se efota+ mo se telafimi faite*+ kae fakasopo ne ia sena tama tagata ke fai mo fai sena faitaulaga.+ 6 I aso konā, e seai se tupu i Isalaelu.+ Ne fai sāle ne tino taki tokotasi a te mea telā e tonu i tena kilokiloga.*+

7 E isi se tamataene i Peteleema+ i Iuta telā se tino mai te kāiga o Iuta. A ia se tino Levi+ kae ko tai leva ne nofo i konā. 8 Ne tiaki ne te tagata tenei a te fakai ko Peteleema i Iuta o ‵sala se koga mo ana nofo. I te taimi koi faimalaga ei a ia, ne oko atu a ia ki te koga maugā o Efalaima, ki te fale o Mika.+ 9 Tenā ne fai atu ei a Mika ki a ia: “A koe ne vau mai fea?” Ne tali atu a ia: “Au se tino Levi mai Peteleema i Iuta, kae ko au nei e fano o ‵sala se koga mo oku nofo.” 10 Muna a Mika ki a ia: “Vau ke ‵nofo tāua kae ke fai koe mo tamana* mo se faitaulaga a aku. Ka tuku atu ne au e sefulu tupe siliva i te tausaga mo gatu mo meakai ma koe.” Tenā ne ulu atu ei te tino Levi ki loto. 11 Ne lotomalie te tino Levi ke ‵nofo a ia mo Mika, kae ne fai eiloa te tamataene tenā e pelā me se tama e tokotasi a ia. 12 E se gata i ei, ne fakasopo ne Mika a te tino Levi mo fai tena faitaulaga,+ kae ne nofo eiloa tou tagata i te fale o Mika. 13 Tenā ne fai aka ei a Mika: “Ko iloa nei ne au me ka fai ne Ieova a mea ‵lei ki a au, me ko oti ne fai a te tino Levi mo fai taku faitaulaga.”

18 I aso konā, e seai se tupu o Isalaelu.+ Kae i aso eiloa konā ne salasala a te matakāiga o Tanu+ ki se tofi mō latou ke ‵nofo i ei, me i te taimi tenā e seki ai eiloa se tofi o latou kai maua mai i matakāiga o Isalaelu.+

2 Ne uga atu ne tino Tanu a tāgata e tokolima mai te lotou kāiga, ne tāgata loto ‵toa mai Sola mo Esetaolo,+ ke olo o iloilo lēmū a te fenua kae sukesuke foki ne latou. Ne fai atu latou ki tāgata konā: “Olo o iloilo te fenua.” I te lotou okoatuga ki te koga maugā o Efalaima, ki te fale o Mika,+ ne ‵moe latou i te po tenā i konā. 3 I te lotou piliatuga ki te fale o Mika, ne lagona ne latou te leo* o te tamataene Levi, tenā ne olo atu ei latou ki a ia kae fesili atu: “Ko oi ne aumai ne ia koe ki konei? Ne a au mea e fai i te koga tenei? Kaia e nofo ei koe i konei?” 4 Ne tali atu a ia ki a latou: “E isi se fakatokaga ne fai ne māua mo Mika, telā e ‵togi ne ia au ke tavini atu e pelā me ko tena faitaulaga.”+ 5 Tenā ne fai atu ei latou ki a ia: “Fakamolemole, fesili atu ki te Atua me e mata, ka manuia te motou malaga io me ikai.” 6 Ne fai atu te faitaulaga ki a latou: “Olo mo te filemu. E fakatasi atu a Ieova ki a koutou i te otou malaga.”

7 Tenā ne olo atu eiloa a tāgata e tokolima konā kae oko atu ki Laisa.+ Ne lavea ne latou a tino i ei e ola i a latou eiloa e pelā mo te masani a tino Saitonu. E filemu kae e se manava‵se ki se mea,+ kae seai foki ne tino pule fakasaua i te fenua ke fakalavelave atu ki a latou. E ‵mao ‵ki latou mai tino Saitonu kae e se fai mea fakatasi mo nisi tino.

8 I te lotou ‵fokiatuga ki olotou taina i Sola mo Esetaolo,+ ne fai atu olotou taina ki a latou: “E a, se a te tala?” 9 Ne tali atu latou: “‵Tou olo o taua atu ki a latou, me ne lavea ne matou me e gali ‵ki te fenua. Kaia e fakatalave ei koutou? Sa fakatuai o olo o puke te fenua. 10 Kafai e oko atu koutou, ka maua atu ne koutou me i tino i ei e se manava‵se ki se mea,+ kae ko te fenua tenā e lasi. Ko oti ne tuku atu ne te Atua a te fenua tenā ki otou lima, se koga telā e seai se mea e mativa i ei.”+

11 Tenā ne olo atu ei mai Sola mo Esetaolo+ a tāgata e toko 600 mai te kāiga o tino Tanu kolā ko toka mō te taua. 12 Ne olo aka latou ki luga o ‵nofo i Kiliata-iealima+ i Iuta. Tenā te pogai e fakaigoa ei te koga tenā i te feitu ki togala o Kiliata-iealima ki a Mahena-tanu*+ ke oko mai eiloa ki te aso nei. 13 Ne olo atu latou mai konā ki te koga maugā o Efalaima kae oko atu ki te fale o Mika.+

14 Tenā ne fai atu ei a tāgata e tokolima kolā ne olo o iloilo lēmū a te fenua ko Laisa+ ki olotou taina: “E iloa ne koutou me e isi se efota mo telafimi faite,* se tupua lakau mo se tupua fiti+ i loto i se fale i konei? Mafaufau me se a te otou mea e ‵tau o fai.” 15 Tenā ne ‵tu ei latou i konā kae olo atu ki te fale o te tamataene Levi+ i te fale o Mika kae fesili atu me e a mai a ia. 16 I te taimi tenā, ne ‵tu atu eiloa i te mataloa o te fakai a tāgata e toko 600 o Tanu,+ kolā ko toka mō te taua. 17 Ne ulu atu ki loto a tāgata e tokolima kolā ne olo o iloilo lēmū a te fenua+ o puke mai a te tupua lakau, te efota,+ telafimi faite,*+ mo te tupua fiti.+ (A te faitaulaga+ ne ‵tu fakatasi mo tāgata e toko 600 kolā ko toka mō te taua, i te mataloa o te fakai.) 18 Ne ulu atu latou ki loto i te fale o Mika kae puke mai ne latou a te tupua lakau, te efota, telafimi faite* mo te tupua fiti. Ne fai atu a te faitaulaga ki a latou: “Ne a otou mea e fai?” 19 Kae ne fai atu latou ki a ia: “Sa uā. ‵Pono tou gutu, kae vau i a matou ke fai koe mo fai te motou tamana* mo te motou faitaulaga. Tefea e ‵lei atu—ko koe ke fai mo faitaulaga i te fale o se tagata fua e tokotasi+ io me ke fai koe mo faitaulaga ki se matakāiga mo se kāiga i Isalaelu?”+ 20 Tenā ne lotomalie ei te faitaulaga, kae puke ne ia te efota, telafimi faite* mo te tupua lakau+ kae olo fakatasi mo tino konā.

21 Tenā ne ma‵fuli atu ei latou o olo i te lotou auala, kae tuku atu a tama‵liki, lafu manu mo olotou kope tāua ke ‵mua i a latou. 22 Ko tai ‵mao eiloa latou mo te fale o Mika kae ko tāgata kolā e ‵nofo ‵pili ki te fale o Mika ne maopoopo fakatasi kae olo atu o afuli a tino Tanu. 23 I te taimi ne ka‵laga atu ei latou ki tino Tanu, ne ‵fuli mai latou kae fai atu ki a Mika: “Se a te mea e tupu? Kaia ko maopoopo fakatasi ei koutou?” 24 Tenā ne fai atu ei a ia: “Ko oti ne puke ne koutou aku atua kolā ne faite ne au, kae olo foki koutou mo te faitaulaga. Ne a la aku mea koi ‵toe? E mafai pefea o fesili mai koutou ki a au, ‘Se a te mea e tupu ki a koe?’” 25 Ne tali atu a tino Tanu: “Sa avaka tou leo ki luga o ita mai ki a matou, i tāgata konei ma kaitaua kae ta ne latou koe, ko mate ei koe e pelā foki mo tino i tou kāiga.” 26 Tenā ne olo eiloa a tino Tanu i te lotou auala; kae i te laveaga ne Mika me e ma‵losi atu latou i a ia, ne ‵fuli ei a ia o foki ki tena fale.

27 I te otiga ne puke ne latou a mea ne faite ne Mika, fakatasi mo tena faitaulaga, ne olo atu latou ki Laisa,+ ki tino filemu kae e se manava‵se ki se mea.+ Ne ‵ta ne latou a tino i ei ki te pelu kae ‵sunu te fakai ki te afi. 28 E seai se tino ne mafai o fakasao ne ia te fakai, me e ‵mao ‵ki eiloa mai Saitonu kae ko latou e se fai mea fakatasi mo nisi tino, kae tu i te vanu laugatasi o Petelehopa.+ Tenā ne toe faite ei ne latou te fakai kae ‵nofo i ei. 29 E se gata i ei, ne fakaigoa ne latou te fakai ki a Tanu,+ ki te igoa o te lotou tamana ko Tanu, telā ko te tama a Isalaelu.+ Kae ko te igoa muamua o te fakai ko Laisa.+ 30 Mai tua ifo, ne fakatu ne tino Tanu a te tupua lakau+ ma latou, kae ne fai a Ionatana+ te tama tagata a Kelesoma,+ te tama tagata a Mose, fakatasi mo ana tama tāgata mo fai a faitaulaga i te matakāiga o tino Tanu ke oko eiloa ki te aso ne ave fakapagota ei a tino e ‵nofo i te fenua. 31 Ne fakatu aka ne latou a te tupua lakau telā ne faite ne Mika, kae ne tumau eiloa i konā i aso katoa ne tu ei te fale o te Atua tonu i Sailo.+

19 I aso konā, i te taimi ne seki ai ei se tupu i Isalaelu,+ ne puke ne se tino Levi telā e nofo i se koga maugā kae ‵mao o Efalaima+ se fafine mai Peteleema+ i Iuta mo fai tena avaga fakasalasala. 2 Kae ko tena avaga fakasalasala ne seki fakamaoni ki a ia, tiaki ei ne tou fafine a ia kae fano ki te fale o tena tamana i Peteleema i Iuta. Ne nofo a ia i konā i masina e fa. 3 Tenā ne fanatu ei tena avaga o faipati faka‵lei ki tou fafine ke toe foki mai; kae ne olo fakatasi tou tagata mo tena tavini tagata mo asini e lua. Ne aumai ne tou fafine a ia ki te fale o tena tamana. I te taimi ne lavea ei ne te tamana o te fafine a tou tagata ne fiafia a ia o fakafetaui atu ki ei. 4 Ne fakakolekole ne te tamana o te fafine ke nofo a ia i aso e tolu; kae ne ‵kai kae inu lāua, kae ne moe foki tou tagata i konā i te po.

5 I te fa o aso, i te taimi ne ala aka ei latou i te tafataeao ‵malu o fakatoka ke olo, kae ne fai atu a te tamana o te fafine ki te avaga a tena tama: “Vau mua o kai ke maua ne koe te malosi,* ko olo ei koutou.” 6 Tenā ne saga‵saga ifo ei lāua kae ‵kai kae inu fakatasi; oti aka, fai atu ei te tamana o te fafine ki te tagata: “Fakamolemole, nofo o moe kae ke fiafia koe.”* 7 I te taimi ne tu aka ei tou tagata o fano, ne fakamolemole atu faeloa te tamana o tena avaga ke nofo a ia, tenā ne toe nofo ei a ia i te po tenā.

8 I te taimi ne ala aka ei a ia i te tafataeao ‵malu i te lima o aso o fano, ne fai atu te tamana o te fafine: “Fakamolemole, vau mua o kai ke maua ne koe te malosi.”* Kae ne fakatuaituai eiloa lāua ke oko ki te taimi ko tai maluga aka ei te la, tenā ne ‵kai eiloa lāua. 9 I te taimi ne tu aka ei te tagata o olo mo tena avaga fakasalasala mo tena tavini, ne fai atu a te tamana o tena avaga ki a ia: “Kiloke, ko pili fua o afiafi. Fakamolemole, ‵nofo o ‵moe. Ko pili nei o pouli. ‵Nofo o ‵moe i konei kae ke fia‵fia koutou. Taeao ko alausu ei koutou o fakatoka te otou malaga o olo ki te otou fale.”* 10 Kae ne seki manako a te tagata ke toe nofo a ia i se po e tasi, tenā ne tu aka ei a ia o faimalaga atu ke oko ki Iepuse, telā ko Ielusalema.+ Ne olo fakatasi atu mo ia ko ana asini e lua, tena avaga fakasalasala, mo tena tavini.

11 Ko tai oko atu latou ki Iepuse, kae ko pili eiloa o pouli. Tenā ne fai atu ei te tavini ki tena matai: “E a, ka ‵nofo malie tatou i te fakai o tino Iepuse o ‵moe i ei i te po nei?” 12 Kae ne fai atu tena matai ki a ia: “E se ‵tau o ‵nofo tatou i se fakai o tino fakaa‵tea kolā e se ne tino Isalaelu. Ka olo eiloa tatou ke oko atu ki Kipea.”+ 13 Tenā ne toe fai atu ei a ia ki tena tavini: “Vau kae taumafai ke oko atu tatou ki se koga e tasi i koga konā; ka ‵nofo tatou i te po nei i Kipea io me i Lama.”+ 14 Tenā ne olo atu eiloa latou i te lotou auala, kae ko kamata foki o tō te mata o te la i te taimi ko pili atu ei latou ki Kipea, telā se fakai o Peniamina.

15 Ne ‵tu latou i konā kae olo atu ki loto ke ‵moe latou i te po tenā i Kipea. I te lotou oloatuga ki loto, ne saga‵saga latou i te malae o te fakai, kae seai se tino ne puke ne ia latou ki tena fale ke ‵moe latou i ei i te po tenā.+ 16 Fakamuli ifo i te afiafi, ne vau se toeaina mai te galuega i te fatoaga. A ia se tino mai koga maugā o Efalaima,+ kae ko tai leva ne nofo i Kipea; kae ko tino o te fakai ne tino Peniamina.+ 17 I tena kiloakaga kae lavea ne ia a tino faima‵laga i te malae o te fakai, fai atu ei te toeaina: “A koutou e olo ki fea, kae ne o‵mai foki koutou mai fea?” 18 Ne tali atu a ia: “A matou ne faima‵laga mai Peteleema i Iuta ki se koga ‵mao i te koga maugā o Efalaima, ko te koga ne vau ei au. Au ne fano ki Peteleema i Iuta,+ kae ko fano nei au ki te fale o Ieova,* kae seai se tino e ave ne ia au ki tena fale. 19 E lava eiloa a mouku mo meakai a omotou asini,+ mo falaoa+ mo uaina ma aku, te fafine mo te mā tavini. E seai eiloa se mea e mativa ei au.” 20 Kae ne fai atu te toeaina: “Ke i luga i a koe te filemu! Tuku mai ke tausi ne au a mea katoa. Kae ke mo a fua ma ‵moe koutou i te po nei i te malae o te fakai.” 21 Tenā ne aumai ei ne ia latou ki tena fale kae fagai a asini. Ne ‵fulu ne latou olotou vae kae ‵kai kae inu.

22 I te taimi koi fia‵fia ei latou, ne nikoi ne tāgata amio ma‵sei o te fakai a te fale kae tukituki i te mataloa, kae fai atu faeloa ki te toeaina o te fale: “Aumai ki tua a te tagata tenā ne vau ki tou fale, ko te mea ke ‵moe fakatauavaga matou mo ia.”+ 23 I konā ne fanatu te tino i o ia te fale ki tua kae fai atu ki a latou: “Ikai, oku taina, sa fai ne koutou se faifaiga masei. Fakamolemole, a te tagata tenei se mālō a aku. Sa fai ne koutou te faifaiga matagā tenei. 24 Tenei taku tama fafine mo te avaga fakasalasala a te tagata tenei. Ke avatu ne au lāua ki tua, ko fai ei ne koutou so se mea ki a lāua.*+ Kae ke mo a eiloa ma fai ne koutou te faifaiga matagā tenei ki te tagata tenei.”

25 Kae ne seki fia faka‵logo a tāgata konā ki tou tagata, tenā ne ‵futi mai ei ne te tagata Levi a tena avaga fakasalasala+ kae tuku atu ki tua i a latou. Ne pukemālō kae fai fakamasei ne latou tou fafine i te po kātoa ke oko eiloa ki te tafataeao. Oti aka, uga atu ei ne latou a ia ke fano i te vaveao ‵malu. 26 I te tafataeao ‵malu, ne fanatu te fafine kae siga ifo i te mataloa o te fale o te tagata telā e nofo i ei tena matai, takato eiloa i konā ke oko ki te taimi ko maina ei. 27 I te taimi ne ala aka ei tena matai i te tafataeao kae ‵tala a mataloa o te fale o fano ki tua ke faka‵soko tena malaga, ne lavea ne ia te fafine, ko tena avaga fakasalasala, e takato mai i te mataloa o te fale mo ana lima i te mataloa. 28 Tenā ne fai atu ei a ia ki tou fafine: “Tu ki luga; tatou ka olo.” Kae seki tali mai a ia. Ne fakasopo a ia ne tou tagata ki luga i te asini, kae olo ki tena fale.

29 I tena okoatuga ki tena fale, ne puke ne ia te naifi kae puke atu ki tena avaga fakasalasala kae katikati tena foitino ki potumea e 12 kae avatu a vaega takitasi ki kogā fenua takitasi o Isalaelu. 30 A tino katoa kolā ne lavea ne latou te mea tenā ne fai aka: “E seki ai eiloa se mea penei ne tupu io me ne lavea atu talu mai te aso ne tiaki ei ne tino Isalaelu a Aikupito ke oko mai eiloa ki te aso nei. Mafau‵fau ki ei,* filifili faka‵lei,+ kae fakailoa mai ki a matou a te mea e ‵tau o fai.”

20 Fakamuli ifo, ne o‵mai a tino Isalaelu katoa mai Tanu+ ke oko ki Pelesepa mo te fenua o Kileata,+ kae ne maopoopo fakatasi* a latou katoa i mua o Ieova i Mesepa.+ 2 Tenā ne ‵tu ei a takitaki o tino mo matakāiga katoa o Isalaelu i olotou koga i te fakapotopotoga o tino o te Atua—e toko 400,000 a sotia sa‵sale kolā e isi ne olotou pelu.+

3 Ne ‵logo a tino Peniamina me ko oti ne olo aka a tāgata Isalaelu ki Mesepa.

Tenā ne fai aka ei a tāgata Isalaelu: “Fakamatala mai aka me ne tupu pefea te mea masei tenei?”+ 4 Tenā ne tali atu ei te tagata Levi,+ te avaga a te fafine telā ne tamate: “Ne olo atu māua mo taku avaga fakasalasala ki Kipea+ te fenua o Peniamina ke ‵moe i ei i te po. 5 Kae ne o‵mai a tino e ‵nofo* i Kipea o taua mai ki a au kae nikoi ne latou te fale i te po tenā. Ne taumafai latou o tamate au, kae i lō te fai penā ne pukemālō ne latou taku avaga fakasalasala, mate ei a ia.+ 6 Tenā ne puke ei ne au te foitino o taku avaga fakasalasala kae katikati kae avatu a vaega konā ki tofi katoa o Isalaelu,+ me ne fai ne latou se faifaiga fakamasiasi kae matagā i Isalaelu. 7 Nei la, koutou tino Isalaelu katoa, fai mai ne otou manatu mo fautuaga+ ki te mea tenei.”

8 Tenā ne ‵tu fakatasi* aka ei a tino katoa kae fai atu: “Ka seai se tino i a tatou e fano ki tena faleie io me foki ki tena fale. 9 Tenei te mea ka fai nei ne tatou ki Kipea: Ka fai ne tatou se vili ke fili ei a tāgata ke olo o taua atu ki a latou.+ 10 Ka puke ne tatou a tāgata e toko 10 mai te toko 100 o matakāiga katoa o Isalaelu, mo te toko 100 mai te toko 1,000 mo te toko 1,000 mai te toko 10,000 ke fakatoka ne latou a meakai ma te kautau, ko te mea ke mafai o taua atu latou ki Kipea te fenua o Peniamina, ona ko te faifaiga matagā telā ne fai ne latou i Isalaelu.” 11 Tenā ne maopoopo ei a tāgata Isalaelu katoa o taua fakatasi* atu ki te fakai.

12 Tenā ne uga atu ei ne matakāiga o Isalaelu ne tāgata ke olo atu ki tāgata katoa o matakāiga o Peniamina, kae fai atu: “Se a te mea masei tenei ne tupu i a koutou? 13 Tuku mai nei a tāgata ma‵sei o Kipea,+ ko te mea ke tamate ne matou kae ke ‵solo kea‵tea a te mea masei mai Isalaelu.”+ Kae ne seki fia faka‵logo a tino Peniamina ki olotou taina Isalaelu.

14 Tenā ne maopoopo fakatasi ei a tino Peniamina mai olotou fakai ki Kipea ke olo atu o taua ki tāgata Isalaelu. 15 I te aso tenā, ne fakamaopoopo ne tino Peniamina mai olotou fakai a tāgata e toko 26,000 kolā e isi ne olotou pelu, kae ‵kese mai i tāgata e toko 700 kolā ne filifili mai i Kipea. 16 E aofia i te kautau tenei ko tāgata filifilia e toko 700 kolā e tau ki te maui. E mafai ne tāgata taki tokotasi konei o fakaeva se fatu i se siligi ke poko i se laulu kae se mafai eiloa o seke.

17 A tāgata Isalaelu kolā e se ‵kau i tino Peniamina ne fakamaopoopo ne latou e toko 400,000 tāgata kolā e isi ne olotou pelu,+ kae ko tino taki tokotasi ne toa ‵mafi kae apo. 18 Ne ‵tu aka latou kae olo aka ki Peteli o fesili atu ki te Atua.+ Tenā ne fai atu ei a tino Isalaelu: “Ko oi a tino i a matou e ‵tau o ‵mua o taua ki tino Peniamina?” Ne tali atu a Ieova: “Ko Iuta e ‵tau o mua.”

19 Mai tua i konā, ne ‵tu aka a tino Isalaelu i te tafataeao kae fakatoka o taua atu ki Kipea.

20 Ne olo atu a tāgata Isalaelu o taua ki tino Peniamina; ne maopoopo latou e pelā me se kautau kae taua atu ki a latou i Kipea. 21 Ne o‵mai a tino Peniamina mai Kipea kae ‵ta ne latou a tāgata Isalaelu e toko 22,000 i te aso tenā. 22 Ne fakaasi atu ne te kautau o tino Isalaelu a te loto toa kae ne toe maopoopo latou e pelā me se kautau i te koga eiloa tenā e pelā eiloa mo te aso muamua. 23 Tenā ne olo aka ei a tino Isalaelu kae ‵tagi i mua o Ieova ke oko ki te afiafi kae fesili atu ki a Ieova: “E a, e ‵tau o toe olo atu matou o taua ki omotou taina, ko tino Peniamina?”+ Kae ne fai atu a Ieova: “Olo o taua atu ki a latou.”

24 Tenā ne fakapili‵pili atu ei a tino Isalaelu ki tino Peniamina i te lua o aso. 25 Kae ne o‵mai a tino Peniamina mai Kipea o taua mo latou i te lua o aso kae ‵ta ne latou a nisi tino Isalaelu e toko 18,000+ kolā e isi katoa ne olotou pelu. 26 I konā loa ne olo aka katoa a tāgata Isalaelu ki Peteli. Ne ‵tagi kae saga‵saga latou i konā i mua o Ieova,+ kae fakaliki‵liki+ latou i te aso tenā ke oko ki te afiafi kae ofo atu foki a taulaga ‵sunu+ mo taulaga ‵kai fakatasi+ i mua o Ieova. 27 Oti aka, fesili atu ei a tāgata Isalaelu ki a Ieova,+ me i aso konā a te pusa o te feagaiga a te Atua tonu e tuku i konā. 28 A Fineaso+ te tama tagata a Eleasalo, te tama tagata a Alona e tavini* atu ki ei i aso konā. Ne fesili atu latou: “E a, e ‵tau o toe olo atu matou o taua ki omotou taina, ko tāgata Peniamina, io me ikai?”+ Ne tali atu a Ieova: “Olo, me ka taeao ko tuku atu ne au latou ki otou lima.” 29 Tenā ne fakatoka ei ne Isalaelu a tāgata ke olo o ‵muni+ fakatamilo i tafa o Kipea.

30 Ne olo atu a tino Isalaelu o taua ki tino Peniamina i te tolu o aso, kae ne maopoopo latou e pelā me se kautau o taua atu ki Kipea e pelā eiloa mo taimi muamua.+ 31 I te taimi ne olo atu a tino Peniamina o taua ki te kautau, ne ‵taki atu eiloa latou ke ‵mao mo te fakai.+ Kae e pelā eiloa mo taimi muamua, ne kamata latou o taua atu kae ‵ta a nisi tāgata i auala ‵lasi, e tasi te auala e fanaka ki Peteli kae ko te suā auala ki Kipea, kae e toko 30 tāgata Isalaelu ne ‵mate i ei.+ 32 Tenā ne fai aka ei a tino Peniamina: “Ko taka‵vale foki latou i a tatou e pelā mo taimi muamua.”+ Kae ne fai aka a tino Isalaelu: “A tatou e ‵tele eiloa ko te mea ke ‵taki ne tatou a latou mai te fakai ke oko atu ki auala ‵lasi.” 33 Tenā ne ‵tu aka ei a tāgata Isalaelu katoa mai olotou koga kae maopoopo e pelā me se kautau i Palatamala kae ko tino Isalaelu kolā ne ‵muni ne ‵tele ki tua mai olotou koga ‵muni kolā e ‵pili ki Kipea. 34 Ona ko te mea tenā, ne olo atu a tāgata filifilia o Isalaelu e toko 10,000 mai mua o Kipea, kae ko faimasei eiloa te taua. Kae e se iloa eiloa ne tino Peniamina me ko pili o oko atu te malaia ki a latou.

35 Ne fakatakavale ne Ieova a tino Peniamina+ i mua o Isalaelu, kae i te aso tenā ne ‵ta ei ne tino Isalaelu a tāgata Peniamina e toko 25,100 kolā e isi katoa ne olotou pelu.+

36 Kae ko tino Peniamina ne mafau‵fau me i tāgata Isalaelu ka taka‵vale i te taimi ne ‵tele ei latou mai tino Peniamina,+ kae ne ‵tele a sotia konā me e tali‵tonu eiloa latou ki te kau kolā ne ‵muni ke taua atu ki Kipea.+ 37 Ne gasue‵sue fakavave a te kau kolā ne ‵muni kae ‵tele atu ki Kipea. Ne salalau valevale te kau kolā ne ‵muni kae ‵ta ne latou te fakai kātoa ki te pelu.

38 Kae e isi se fakatokaga ne fai ne tāgata Isalaelu mo tāgata kolā ne ‵muni i tafa o te fakai ke faka‵ka se afi ke fanaka te au mai i ei e pelā me se fakailoga.

39 I te taimi ne ma‵fuli mai ei a tino Isalaelu i te taua, ne kamata o taua atu a tāgata Peniamina kae ‵ta ne latou a tāgata Isalaelu e toko 30,+ kae fai aka latou: “Ko takavale faka‵lei eiloa latou i a tatou, e pelā eiloa mo te taua mai mua atu.”+ 40 Kae ne kamata o fanaka te au matolu mai te fakai e pelā me se fakailoga. I te taimi ne ‵fuli mai ei a tāgata Peniamina o ‵kilo ki ei, ne lavea ne latou a te fakai kātoa ko ‵ka valevale i te afi. 41 Tenā ne toe ‵foki mai ei a tāgata Isalaelu, kae ne manava‵se eiloa a tāgata Peniamina me ko lavea ne latou i a latou ko malaia. 42 Tenā ne ‵tele kea‵tea ei latou mai tāgata Isalaelu ki te koga lavaki, kae ne taua atu eiloa a te kautau ki a latou; ne ‵kau atu foki a tāgata kolā ne o‵mai mai i fakai o ‵ta latou. 43 Ne nikoi ne latou a tino Peniamina kae seki ma‵nava eiloa i te afuliga o latou. Ne lakalaka ne latou ki lalo a tino Peniamina i mua eiloa o Kipea i te feitu ki saegala. 44 Fakamuli loa, ne ‵mate atu a tāgata Peniamina e toko 18,000, ne toa ‵mafi katoa.+

45 Ne ma‵fuli a tāgata Peniamina o ‵tele ki te koga lavaki ki te kaupapa o Limoni,+ kae ne tamate ne tino Isalaelu te toko 5,000 o latou i auala ‵lasi, kae ne afuli faeloa ne latou ke oko atu ki Kitoma; tenā ne ‵ta ei ne latou a nisi tāgata e toko 2,000. 46 A tino Peniamina katoa kolā ne ‵mate i te aso tenā e ‵tusa mo te toko 25,000 tāgata kolā e isi ne olotou pelu,+ ne toa ‵mafi katoa. 47 Kae e toko 600 ne ‵tele ki te koga lavaki ki te kaupapa o Limoni, kae ne ‵nofo latou i te kaupapa o Limoni i masina e fa.

48 Kae ne ma‵fuli mai a tāgata Isalaelu o taua ki tino Peniamina kae ‵ta ne latou a tino i te fakai ki te pelu, ko tāgata ke oko ki lafu manu, ko mea katoa kolā ne ‵toe mai. Ne ‵sunu foki ne latou ki te afi a fakai katoa i te lotou auala.

21 I te taimi tenā ko oti ne fai ne tāgata Isalaelu te tautoga tenei i Mesepa:+ “E seai se tino i a tatou e tuku atu tena tama fafine ke avaga ki se tagata Peniamina.”+ 2 Tenā ne olo atu ei a tino ki Peteli+ kae saga‵saga i konā i mua o te Atua tonu ke oko eiloa ki te afiafi, ne ‵tagi paka‵laga kae ‵tagi mautuutu. 3 Kae ne fai atu latou: “Ieova te Atua o Isalaelu, kaia ko tupu ei te mea tenei i Isalaelu? Kaia ko galo atu ei te matakāiga e tasi mai Isalaelu i te aso nei?” 4 Kae i te suā aso ne ‵tu aka a tino i te tafataeao ‵malu kae faite ne latou se fatafaitaulaga i konā ke ofo atu i ei a taulaga ‵sunu mo taulaga ‵kai fakatasi.+

5 Tenā ne fai atu ei a tino Isalaelu: “Ko oi mai matakāiga katoa o Isalaelu ne seki o‵mai ki te maopoopoga i mua o Ieova?” me ko oti ne fai ne latou se tautoga tāua me i so se tino telā e se fanatu ki a Ieova i Mesepa ka tamate eiloa. 6 Tenā ne fanoa‵noa eiloa a tino Isalaelu i te mea ne tupu ki a Peniamina te lotou taina. Ne fai atu latou: “I te aso nei, e tasi te matakāiga ko oti ne ‵kati kea‵tea mai Isalaelu. 7 Se a te mea e ‵tau o fai ne tatou ke tuku atu ne avaga ma latou kolā ne ‵toe mai, me ko oti nei ne fai ne tatou se tautoga i mua o Ieova+ ke mo a ma tuku atu ne tatou a ‵tou tama fāfine ke a‵vaga ki a latou?”+

8 Ne fesili aka latou: “Ko oi mai matakāiga o Isalaelu ne seki o‵mai ki a Ieova i Mesepa?”+ Ne iloa aka me seki ai ne tino ne o‵mai mai Iapese-kileata ki te koga telā ne maopoopo i ei te fakapotopotoga. 9 I te taimi ne lau i ei a tino, ne lavea ne latou me e seai se tino mai i Iapese-kileata ne nofo atu i konā. 10 Ne uga atu ne te fakapotopotoga a toe tāgata ‵mafi e toko 12,000 ke olo atu ki konā. Ne fakatonu atu ki a latou: “Olo o ‵ta a tino e ‵nofo i Iapese-kileata ki te pelu, ke oko ki fāfine mo tama‵liki.+ 11 Tenei te mea e ‵tau o fai ne koutou: So se tagata e pelā foki mo so se fafine telā ko oti ne ‵moe fakatauavaga mo se tagata, e ‵tau o fakaseai ne koutou.” 12 Ne maua ne latou i tino Iapese-kileata a tamaliki fāfine e toko 400 kolā koi tamafine, kae ne seki ‵moe fakatauavaga eiloa mo se tagata. Tenā ne aumai ei ne latou a tamafine konā ki te lotou koga ‵nofo i Sailo,+ i te fenua o Kanana.

13 Tenā ne uga atu ei ne te fakapotopotoga kātoa se fekau ki tino Peniamina i te kaupapa o Limoni+ ke maua se va filemu mo latou. 14 Kae ne toe ‵foki mai a tino Peniamina i te taimi tenā. Ne tuku atu ne latou a tamafine Iapese-kileata+ kolā ne faka‵sao ne latou, kae ne seki lava latou i tamafine konā. 15 Kae ne fanoa‵noa a tino i te mea ne tupu ki tino Peniamina+ me ko oti ne ‵vae kea‵tea ne Ieova a latou mai matakāiga o Isalaelu. 16 Ne fai atu a toeaina i te fakapotopotoga: “Se a te mea e ‵tau o fai ne tatou ke maua a avaga a tāgata konei koi ‵toe, me ko oti ne ‵ta fakapalele a fāfine katoa o Peniamina?” 17 Ne tali atu latou: “E ‵tau o isi se tofi mō tino Peniamina kolā ne ‵sao, ko te mea ke mo a eiloa ma ‵solo kea‵tea se matakāiga mai Isalaelu. 18 Kae e se talia eiloa ne tatou ke tuku atu a ‵tou tama fāfine ke a‵vaga ki a latou, me ko oti ne tauto a tino Isalaelu: ‘Ke malaia eiloa a te tino telā e tuku atu ne ia se avaga ki se tino Peniamina.’”+

19 Tenā ne fai aka ei latou: “Kiloke! E isi se ‵kaiga fiafia a Ieova e fai i tausaga katoa i Sailo,+ telā e tu ki mātū o Peteli mo te feitu ki saegala o te auala lasi telā e fanaka mai Peteli ki Sekema mo te feitu ki saute o Lepona.” 20 Tenā ne fakatonu atu ei latou ki tāgata Peniamina: “Olo o ‵muni i loto i togavine. 21 Kae kafai e lavea ne koutou a tamafine* o Sailo ko o‵mai ki tua o ‵saka fakatamilo, e ‵tau mo koutou katoa o ‵mai ki tua mai togavine kae puke otou avaga mai tamafine o Sailo, ko ‵foki ei koutou ki te fenua o tino Peniamina. 22 Kae kafai e o‵mai olotou tamana io me ko olotou tuagane o fameo mai ki a tatou, ko fai atu ei tatou ki a latou, ‘Ke a‵lofa koutou ki a matou ona ko latou, me ko se mafai ne matou o ‵sala ne avaga ma tino taki tokotasi mai te taua+ kae e se mafai ne koutou o tuku atu ne avaga ma latou e aunoa mo te agasala.’”+

23 Tenā eiloa te mea ne fai ne tāgata Peniamina, ne puke ne latou taki tokotasi olotou avaga mai tamafine kolā ne ‵saka. Oti aka, ‵foki atu ei latou ki te lotou tofi kae toe faite olotou fakai+ kae ‵nofo i ei.

24 I te taimi tenā ne fano eiloa te tino Isalaelu ki tena matakāiga mo tena kāiga, kae ne tiaki ne latou te koga tenā, ko tino taki tokotasi ki tena tofi.

25 I aso konā e seai se tupu i Isalaelu.+ Ne fai sāle ne tino taki tokotasi a te mea telā e tonu i tena kilokiloga.*