TAGIGA A IELEMIA
א [Alefa]
1 Ko sagasaga nei a Ielusalema tokotasi, te fakai telā ne ‵fonu i tino!+
Ko fai a ia e pelā me se fafine telā ko mate tena avaga, ko ia telā ne lauiloa i atufenua katoa!+
A ia telā ne fai muamua pelā me se pelenise i kogā fenua ko faimālō ke galue ‵mafa!+
ב [Peta]
2 E tagi lotulotu tou fafine i te po,+ kae e ‵fonu ana kalafou i ana loimata.
E seai se tino ne fiafai a ia ki ei ne nofo atu i konā o fakamafanafana a ia.+
Ana taugasoa katoa ko oti ne tiaki ne latou a ia;+ ko fai latou mo fai ana fili.
ג [Gimela]
3 A Iuta ko oti ne ave fakapagota+ mai lalo i puapuaga mo galuega ‵mafa fakapologa.+
E ‵tau mo ia o ‵nofo fakatasi mo nisi atufenua;+ e seai se koga malōlō ne maua ne ia.
Ana tino fakasaua katoa ko oti ne puke ne latou a ia i te taimi o tena puapuaga.
ד [Taleta]
4 A auala ki Siona e fanoa‵noa, me e seai se tino e vau ki te ‵kaiga fiafia.+
A mataloa katoa o ana ‵pui ko seai;+ ana faitaulaga ko mānava fi‵ta.
Ana tamafine ‵ma e ‵tagi fanoa‵noa, kae ko ia e mafatia malosi.
ה [He]
5 A tino kolā e ita ki a ia ko fai nei mo fai tena matai; ana fili ko se manavase ki se mea.+
Me ko oti ne aumai ne Ieova te fanoanoa ki a ia ona ko ana amioga solitulafono e uke.+
Ana tama‵liki ko oti ne ave fakapagota ki mua o te fili.+
ו [Vau]
6 A te gali o te tama fafine o Siona ko galo atu kātoa.+
Ana pelenise ko pelā mo tia kolā e seai ne laukele moukuā ne maua ne latou,
Kae ko sa‵sale fi‵ta latou i mua o te tino ne afuli ne ia latou.
ז [Seini]
7 I aso o tena puapuaga mo te taimi e seai ei sena fale mo ana nofo, e masaua ne Ielusalema
A mea tāua katoa a ia i aso ko ‵teka.+
I te taimi ne ‵to atu ei ana tino ki lima o te fili kae seai se tino ke fesoasoani atu ki ei,+
Ne lavea a ia ne ana fili kae ‵kata latou i tena takavale.+
ח [Heta]
8 A Ielusalema ko oti ne agasala malosi.+
Tenā te pogai ko fai ei a ia e pelā me se mea fakatakalialia.
A latou katoa kolā ne masani o fakaaloalo ki a ia ko takalia‵lia ki a ia, me ko oti ne lavea ne latou tena nofo fuafua.+
A ia e tagi fi‵ta+ kae ‵fuli kea‵tea i te mavale.
ט [Teta]
9 A tena sē ‵ma e nofo i loto i tena lavalava.
E se mafaufau eiloa a ia ki ana aso mai mua.+
A tena pakūga e fakaofoofogia; e seai se tino ke fakamafanafana atu ki a ia.
Ieova, kilo mai ki toku puapuaga, a te fili ko oti ne fakamaluga aka ne ia a ia eiloa.+
י [Iota]
10 A te fili ko oti ne tuku atu ana lima ki luga i ana koloa katoa.+
Me ne lavea ne ia a atufenua e ulu ki loto i tena koga tapuaki,+
A latou kolā ne fakatonu ne koe e se ‵tau o ulu ki loto i tau fakapotopotoga.
כ [Kafa]
11 Ana tino katoa e mānava fi‵ta; e salasala latou ki meakai.+
Ko oti ne tuku atu olotou mea tāua ke maua ne meakai, ko te mea ke ola latou.
Kiloke, e Ieova, kilo mai i a au ko oti ne fai pelā me se fafine ko seai sena aoga.
ל [Lameta]
12 E a, a te mea nei se mea fua seai ki a koutou katoa kolā e olo atu i te auala?
Kilo atu kae onoono ki ei!
E a, e isi se ‵mae e ‵pau mo te ‵mae ne oko mai ki a au,
Telā ne fai ne Ieova ke logo‵mae au i ei i te aso o tena kaitaua telā e ‵ka pelā me se afi?+
מ [Mema]
13 Ne aumai ne ia se afi mai i te lagi ke ‵sunu ei oku ivi,+ kae ne fakatakavale ne ia a ivi takitasi.
Ne ‵fola ne ia se tili mō oku vae; ne faimālō ne ia au ke ‵fuli kea‵tea.
Ne fai ne ia au e pelā me se fafine ko tuku tiaki.
Au ne masaki i te aso kātoa.
נ [Nuna]
14 Aku amioga solitulafono ko ‵sai tasi e pelā me se amo, e faka‵mau fakatasi ne tena lima.
Ne tuku a mea konā ki toku ua, kae ko gasolo ifo toku malosi.
Ne tuku atu au ne Ieova ki lima o latou kolā e se mafai ne au o ‵teke.+
ס [Sameka]
15 Ko oti ne fakatafa kea‵tea ne Ieova a tāgata ma‵losi ne ‵nofo mo au.+
Ne fakamaopoopo ne ia se potukau o tino ke ‵teke mai ki a au o tuki pala aku tamataene.+
Ne lakalaka ne Ieova te tama fafine ‵ma o Iuta i te mea ‵tau uaina.+
ע [Aina]
16 Au ko tagi mautuutu ona ko mea konei;+ oku mata ko ‵fonu i loimata.
Me i so se tino e mafai o fakamafanafana ne ia au io me fakamalosi au e ‵mao mai i a au.
Aku tama ko tuku tiaki, me ko manumalo te fili.
פ [Pe]
17 A Siona ko ‵fola ana lima;+ ko seai se tino ke fakamafanafana a ia.
Ko oti ne tuku atu ne Ieova se fakatonuga ‵teke e uiga ki a Iakopo ki ana fili katoa i ana tafa.+
A Ielusalema ko fai pelā me se mea fakatakalialia ki a latou.+
צ [Sati]
18 A Ieova e amiotonu,+ me ne ‵teke atu au ki tena fakatonuga.+
Faka‵logo mai koutou e tino katoa, kae ‵kilo mai ki toku logo‵mae.
Aku tamafine ‵ma mo aku tamataene ko oti ne puke fakapagota.+
ק [Kofa]
19 Au ne kalaga atu ki tino ne fiafai au ki ei, kae ne tiakina ne latou au.+
Aku faitaulaga mo aku toeaina ne ‵mate atu i loto i te fakai,
I te taimi ne ‵sala ei latou ki meakai ke ola latou.+
ר [Lesa]
20 Kilo mai, e Ieova, me ko oko eiloa au i te puapuaga.
Oku koga i loto* e gasue‵sue.
A toku loto ko oko eiloa i te mafatia, me i a au ne ‵teke katoatoa atu.+
I tua o te fale e tamate ei ne te pelu a tama‵liki;+ kae i loto i te fale e foliga mai pelā me ko te mate.
ש [Sini]
21 Ne lagona ne tino toku mānava fi‵ta; e seai se tino e fakamafanafana ne ia au.
Oku fili katoa ne ‵logo i toku puapuaga.
E fia‵fia latou, me ne aumai ne koe te mea tenā.+
Kae ka aumai ne koe a te aso telā ne folafola mai ne koe,+ kae ka fai ei latou e pelā mo au.+
ת [Tau]
22 Ke na oko atu eiloa ki ou mua olotou mea ma‵sei katoa, kae ke fai fakamasei ne koe latou,+
E pelā eiloa mo fakamaseiga ne fai ne koe ki a au ona ko aku amioga solitulafono katoa.
Me e uke a mea e mānava fi‵ta au i ei, kae ko toku loto ko masaki.
א [Alefa]
2 Ne ufi eiloa ne Ieova te tama fafine o Siona i te kaumana o tena kaitaua!
Ne ‵pei ifo ne ia te gali o Isalaelu mai te lagi ki te lalolagi.+
Ne seki masaua ne ia tena mea tuku vae+ i te aso o tena kaitaua.
ב [Peta]
2 Ne folo eiloa ne Ieova e aunoa mo te alofa atafai a koga ‵nofo katoa o Iakopo.
I tena ita ne ofa ei ne ia ki lalo a koga ma‵losi o te tama fafine o Iuta.+
Ne ofa ne ia ki te laukele kae fakamasei te malo+ mo ana pelenise.+
ג [Gimela]
3 I te lasi o tena kaitaua ne ‵kati ei ne ia ki lalo a te malosi kātoa* o Isalaelu.
Ne taofi ne ia tena lima fakaatamai i te taimi ne o‵mai ei te fili,+
Kae ne ‵ka faeloa a ia pelā me se afi i loto i a Iakopo kae ne ‵sunu i ei a mea katoa i ana tafa.+
ד [Taleta]
4 Ne ofe ne ia tena kausana e pelā mo te fili; a tena lima fakaatamai ko toka o taua atu e pelā mo te tino e ita ki a ia;+
Ne tamate faeloa ne ia a tino kolā e manako a ia ki ei.+
Kae ne ‵ligi ki tua ne ia tena kaitaua e pelā me se afi+ ki te faleie o te tama fafine o Siona.+
ה [He]
5 A Ieova ko fai pelā me se fili;+
Ko oti ne folo ne ia a Isalaelu.
Ko oti ne folo ne ia ana taoa katoa;
Ko oti ne fakamasei ne ia ana koga ma‵losi katoa.
Kae ne fai ne ia te tama fafine o Iuta ke tagi fanoanoa kae tagi fakaalofalofa malosi.
ו [Vau]
6 Ne ofa ne ia tena fale fakamalumalu,+ e pelā me se fale lau i se fatoaga.
Ne fakagata ne ia tena ‵kaiga fiafia.+
Ne fai ne Ieova ke puli atu i Siona a ‵kaiga fia‵fia mo te sapati,
Kae i tena kaitaua lasi ne seki fakaasi atu ne ia te āva ki te tupu mo te faitaulaga.+
ז [Seini]
7 Ne ‵teke eiloa ne Ieova a tena fatafaitaulaga;
Ko ‵teke atu a ia ki tena koga tapuaki.+
Ko tuku atu ne ia a ‵pui o ana taoa ma‵losi ki lima o te fili.+
Ne avaka olotou leo i loto i te fale o Ieova,+ e pelā mo te aso o te ‵kaiga fiafia.
ח [Heta]
8 Ko oti ne fakaiku aka ne Ieova ke fakaseai atu a te ‵pui o te tama fafine o Siona.+
Ko oti ne ‵futi ne ia te uka e fua ei a mea.+
Ne seki taofi ne ia tena lima mai te aumaiga o te fakaseaiga.
Kae ne fai ne ia a pā mo ‵pui ke fanoa‵noa.
Ko oti ne fai fakatasi a mea konā ke se ma‵losi.
ט [Teta]
9 Ana mataloa ko ‵goto ki lalo i te laukele.+
Ko oti ne ofa kae fatifati ne ia ana lakau faka‵lava.
A tena tupu mo tena pelenise ko ‵nofo fakatasi eiloa mo atufenua.+
Ko seai se tulafono; ke oko ki ana pelofeta ko seai ne fakaasiga e maua ne latou mai i a Ieova.+
י [Iota]
10 A toeaina o te tama fafine o Siona e saga‵saga filemu i te laukele.+
E ‵pei ne latou a ‵pefu ki olotou ulu kae ‵pei ki gatu lautaga.+
A tamafine ‵ma o Ielusalema ne ifo olotou ulu ki lalo i te laukele.
כ [Kafa]
11 Oku mata ko fi‵ta i te ‵tagiga.+
Oku koga i loto* ko gasue‵sue.
Toku ate ko oti ne ‵ligi ki tua i te laukele, ona ko te takavale o te tama fafine o toku fenua,+
Ona ko tama‵liki mo pepe ko mata‵po i loto i malae o te fakai.+
ל [Lameta]
12 E fesili atu faeloa latou ki olotou mātua, “Kofea la a saito mo uaina?”+
I te taimi e mata‵po ei latou e pelā me ne tino ne pa‵kia i te malae o te fakai,
I te taimi e gasolo ifo ei latou o vāi‵vai i lima o olotou mātua.
מ [Mema]
13 Se a te mea e mafai o fakaaoga ne au e pelā me se molimau,
Io me se a te mea e mafai o faka‵pau ne au koe ki ei, e te tama fafine o Ielusalema?
Se a te mea e mafai o fakatusa ne au koe ki ei, ke fakamafanafana ei koe, e te tama fafine o Siona?
Me i tou pakiaga ko lasi eiloa e pelā mo te tai.+ Ko oi e mafai o faka‵lei aka ne ia koe?+
נ [Nuna]
14 A fakaasiga ne lavea ne au pelofeta mō koe ne mea ‵loi kae e se aoga,+
Kae ne seki fakaasi faka‵sau atu ne latou tau mea ‵se ko te mea ke se puke fakapagota ei koe,+
Kae ne fai faeloa ne latou a fakaasiga mō koe kolā e se ‵tonu mo folafolaga faka‵se tino.+
ס [Sameka]
15 A latou kolā e olo i tua i te auala e pati lima mo te fakatauemu ki a koe.+
E ‵poi kae ofo+ latou kae lūlū olotou ulu ki te tama fafine o Ielusalema, olotou muna:
“E a, tenei te fakai ne fai mai ei latou, ‘E ‵lei katoatoa tena gali, ko te fiafiaga o te lalolagi kātoa’?”+
פ [Pe]
16 Ko oti ne faka‵maga a gutu o ou fili katoa ki a koe.
E fakatauemu mai latou kae ū olotou nifo kae fai aka: “Ko oti ne folo ne matou tou fafine.+
Tenei te aso ne faka‵tali matou ki ei!+ Ko oti ne oko mai, kae ne lavea ne matou!”+
ע [Aina]
17 Ne fai ne Ieova a te mea ne mafaufau a ia ki ei;+ ko oti ne fakataunu ne ia ana pati,+
Ko mea ne fakatonu ne ia i aso ko ‵teka.+
Ko oti ne ofa ne ia ki lalo e aunoa mo te alofa atafai.+
Ko oti ne fai ne ia te fili ke fiafia ona ko koe; ko oti ne fakamaluga aka ne ia te malosi* o ou fili.
צ [Sati]
18 E ‵tagi atu olotou loto ki a Ieova, e te ‵pui o te tama fafine o Siona.
Ke ‵sali ifo a loimata e pelā me se vaitafe i te ao mo te po.
Ke mo a koe e malōlō malie, ke mo a ma ‵moe ou mata.
ק [Kofa]
19 Tu ki luga! Tagi i te po kātoa, i te kamataga o te taimi leoleo.
‵Ligi atu ki tua a mea i tou loto e pelā me ne vai ki mua o Ieova.
Sisi aka ou lima ki a ia ona ko ola o au tama‵liki,
Kolā ko mata‵po valevale i ‵kōna katoa o auala ona ko te oge.+
ר [Lesa]
20 Kilo mai, e Ieova, kae kilo atu ki te tino ne fai fakamasei ne koe.
E a, e ‵tau o kai faeloa ne fāfine olotou tama, ko olotou tama‵liki kolā ko katoatoa,+
Io me e a, e ‵tau o tamate atu a faitaulaga mo pelofeta i te koga tapuaki o Ieova?+
ש [Sini]
21 A te tamaliki tagata mo te toeaina matua e ta‵kato i te auala ko ‵mate.+
Aku tamafine ‵ma mo aku tamataene ko pa‵kū i te pelu.+
A koe ne tatino i te aso o tou kaitaua; ne tamate ne koe a tino e aunoa mo te alofa atafai.+
ת [Tau]
22 E pelā eiloa me ‵kami mai ne koe a te mataku mai i feitu katoa ki se ‵kaiga fiafia.+
I te aso o te kaitaua o Ieova, e seai se tino ne sao io me ne ola i ei;+
A latou kolā ne fanau ne au kae puti aka, ne tamate atu katoa ne toku fili.+
א [Alefa]
3 Au ko te tagata telā ne lavea ne au te puapuaga ne māfua mai ona ko te tokotoko o tena kaitaua.
2 Ko oti ne afuli kea‵tea ne ia au kae fai ne ia ke sasale au i te pouliga, kae e se i te mainaga.+
3 E tonu, e ‵teke mai faeloa tena lima ki a au i te aso kātoa.+
ב [Peta]
4 Ne fakafi‵ta ne ia toku foitino mo toku pa‵kili ke se aoga;
Ko oti ne fatifati ne ia oku ivi.
5 Ne nikoi ne ia au; ne fakatamilo ne ia au ki te ‵kona o te poisini+ mo mea faiga‵ta.
6 Ne faimālō ne ia au ke sagasaga i te koga pouli, e pelā me ne tāgata ko leva ne ‵mate.
ג [Gimela]
7 Ne taofi ne ia au i loto i se ‵pui, ko te mea ke se mafai au o sao;
Ne saisai ne ia au ki mea pikifao kopa kae ‵mafa.+
8 Kae kafai e tagi au kae manako malosi ki se fesoasoani, e se talia ne ia aku ‵talo.+
9 Ne ‵pono ne ia oku auala ki fatu kolā ne ‵kati;
Ne fai ne ia oku ala ke piko‵piko.+
ד [Taleta]
10 E ‵muni a ia o taua mai ki a au e pelā me se pea, e pelā me se leona telā e ‵muni.+
11 Ne faimālō ne ia au ke fano kea‵tea mo te auala kae saesae likiliki ne ia au;
Ne tuku ne ia au ke nofo tokotasi.+
12 Ne ofe ne ia tena kausana, kae fakatu ne ia au mo fai te taketi o tena matasana.
ה [He]
13 Ne ‵suki ne ia oku nonu ki matasana mai tena mea tuku matasana.
14 Ko fai au pelā me se mea e ‵kata ki ei a te fenua kātoa, ko te matua foki o te lotou pese i te aso kātoa.
15 Ne faka‵fonu ne ia au ki mea ‵kona kae fainu ne ia au ki lakau ‵kona.+
ו [Vau]
16 E fatifati ne ia oku nifo ki kilikili;
E fai ne ia au ke punou ifo ki lalo i lefu.+
17 E ave kea‵tea ne koe te filemu mai i a au; ko puli i a au a te mea ‵lei.
18 Ne fai aka au: “A toku gali ko galo atu, e pelā foki mo toku fakamoemoe ki a Ieova.”
ז [Seini]
19 Ke masaua toku puapuaga mo te tulaga o oku i te taimi ne seai ei se koga mo oku nofo,+ ko te lakau ‵kona mo te ‵kona o te poisini.+
20 Ka masaua eiloa ne koe kae punou ifo ki lalo i a au.+
21 Ne masaua ne au te mea tenei i toku loto; tenā te pogai e nofo fakatalitali ei au.+
ח [Heta]
22 Ona ko te alofa fakamaoni o Ieova ne seki fakaseai atu ei ne ia tatou,+
Me e se mafai eiloa o gata a tena alofa fakamagalo.+
23 E ‵fou faeloa a mea konā i tafataeao katoa;+ a tou fakamaoni e lasi ‵ki.+
24 “A Ieova ko toku vaega,”+ ko aku muna, “tenā te pogai ka nofo fakatalitali ei au ki a ia.”+
ט [Teta]
25 A Ieova e ‵lei ki te tino telā e fakamoemoe ki a ia,+ ki te tino telā e salasala faeloa ki a ia.+
26 Se mea ‵lei ke nofo fakatalitali i te filemu*+ ki te fakaolataga a Ieova.+
27 Se mea ‵lei mō se tagata ke amo tena amoga i te taimi koi talavou ei a ia.+
י [Iota]
28 Ke na sagasaga tokotasi eiloa a ia kae filemu māfai ko tuku atu ne te Atua a te amoga ki luga i a ia.+
29 Ke na tuku atu tena gutu ki te ‵pefu;+ e mafai eiloa o isi se fakamoemoega ki ei.+
30 Ke na tuku atu tena kalafou ki te tino e ‵pa ne ia a ia; ke na maua ne ia te katoatoaga o tena masiasi.
כ [Kafa]
31 Me i a Ieova ka se tiaki ne ia tatou ki te se-gata-mai.+
32 E tiga eiloa ne pogai mai i a ia te fanoanoa, ka fakaasi mai foki ne ia te alofa fakamagalo e ‵tusa eiloa mo te lasi o tena alofa fakamaoni.+
33 Me e se ko tena loto eiloa ke fakapuapuaga io me fakafanoanoa a tama a tāgata.+
ל [Lameta]
34 Ke lakalaka ki vae o se tino a pagota katoa o te lalolagi,+
35 Ke ave kea‵tea mai i se tagata a te fakamasinoga tonu i mua o te Atua Tafasili i te Maluga,+
36 Ke fakaloiloi se tagata i te taimi e fai ei tena tagi
—A Ieova e se talia ne ia a vaegā mea penā.
מ [Mema]
37 Ko oi la te tino e mafai o faipati kae fai ne ia ke tupu te mea tenā, seiloga ke fakatonu mai ne Ieova te mea tenā?
38 Mai i te gutu o te Atua Tafasili i te Maluga,
A mea ma‵sei mo mea ‵lei e se o‵mai fakatasi ki tua mai i ei.
39 Kaia e ‵tau ei o fameo se tino ola e uiga ki ikuga o tena agasala?+
נ [Nuna]
40 Ke na iloilo kae sukesuke ne tatou a ‵tou auala,+ kae ke na ‵foki atu tatou ki a Ieova.+
41 Ke na sisi aka ‵tou loto fakatasi mo ‵tou lima ki te Atua i te lagi:+
42 “A matou ne agasala kae ‵teke atu,+ kae ne seki fakamagalo ne koe.+
ס [Sameka]
43 Ona ko te kaitaua ne ‵pono ei ne koe matou;+
Ne afuli kae tamate ne koe matou e aunoa mo te alofa atafai.+
44 Ne ‵pono ne koe ki te kaumana te motou fakapili‵pili atu ki a koe, ko te mea ke se ulu atu omotou ‵talo i ei.+
45 E fai ne koe matou e pelā me ne tino sē taulia kae ne kaiga i loto i tou fenua.”
פ [Pe]
46 Omotou fili katoa e faka‵maga olotou gutu o ‵teke mai ki a matou.+
47 A te mataku mo te lua ko te motou tusaga,+ ko te fakamaseiga mo te tuki palapala ki lalo.+
48 A vai e ‵tafe mai i oku mata ona ko te tuki palapala ki lalo o te tama fafine o toku fenua.+
ע [Aina]
49 Oku mata e ‵tagi e aunoa mo se gataga, e aunoa mo se mānavaga,+
50 Ke oko ki te taimi e kilo ifo ei a Ieova mai te lagi.+
51 Oku mata ne aumai ne ia te fanoanoa ona ko tama fāfine katoa o toku fakai.+
צ [Sati]
52 E aunoa mo se pogai ne tulituli au ne oku fili e pelā me se manu eva.
53 Ne fakafilemu ne latou toku ola i te lua; ne peipei mai faeloa ne latou a fatu ki luga i a au.
54 A vai ne ‵tafe i luga i toku ulu, kae ne fai aka au: “Ko palele atu au!”
ק [Kofa]
55 Ne kalaga atu au ki tou igoa, e Ieova, mai koga ‵poko o te lua.+
56 Fakalogo mai ki toku leo; sa ‵pono ou taliga ki taku tagi mō se fesoasoani, mō se fakatapūga.
57 Ne fakapilipili mai koe i te aso ne kalaga atu ei au. Ne fai mai koe: “Sa mataku.”
ר [Lesa]
58 Ne ‵pulu ne koe au i te fono fakamasino, e Ieova, ne fakasao ne koe toku ola.+
59 Ieova, ne lavea ne koe a mea ‵se ne fai ki a au; fakamolemole fai mai ki a au te fakamasinoga tonu.+
60 Ne lavea ne koe te lotou taui ma sui, olotou togafiti katoa e fai mai ki a au.
ש [Sina] io me ko [Sini]
61 Ne lagona ne koe olotou pati fakaitaita, e Ieova, ko olotou togafiti katoa e fai mai ki a au,+
62 Ko laugutu o tino e ‵teke mai ki a au mo olotou pati musumusu o ‵teke mai ki a au i te aso kātoa.
63 Kilo atu ki a latou; faitalia me saga‵saga io me ‵tu latou, e fakatauemu ne latou au i olotou pese!
ת [Tau]
64 Ka toe ‵togi atu ne koe ki a latou, e Ieova, e ‵tusa mo olotou faifaiga.
65 Ka fai ne koe latou ke loto ma‵keke, e pelā eiloa mo tau fakamalaiaga ki a latou.
66 Ka afuli ne koe latou i tou kaitaua kae ‵ta fakapalele atu latou mai lalo o te lagi a Ieova.
א [Alefa]
4 A te aulo malapulapu ko gasolo o ‵nefu, ko te aulo ‵lei.+
A fatu tapu+ ko ta‵tela valevale i ‵kōna katoa o te auala!+
ב [Peta]
2 E pelā mo tama tāgata tāua o Siona, kolā ne fua pelā* me ne aulo ‵lei,
Ko fai nei latou e pelā me ne tiā kele,
Ko galuega ne fai ki lima o te tino faite mea ki kele!
ג [Gimela]
3 Ke oko ki manu ko tiakolo e tuku atu a susu ke faū olotou pepe,
Kae ko te tama fafine o toku fenua ko oko eiloa i te masei,+ ko pelā me ne osetelite i te koga lavaki.+
ד [Taleta]
4 A te alelo o te tamaliki koi ū ko ‵piki ki tena gutu ona ko te fiainu.
A tama‵liki e akai meakai,+ kae seai se tino e tuku atu ne meakai ki a latou.+
ה [He]
5 A latou kolā ne masani o ‵kai ki meakai ‵gali ko ta‵kato mo te fia‵kai i auala.+
A latou kolā ne ‵tupu aka kae ‵pei ki gatu ‵togi ‵mafa*+ ko ta‵kato i luga i fakaputuga lefu.
ו [Vau]
6 A te fakasalaga* o te tama fafine o toku fenua e sili atu i te fakasalaga o te agasala a Sotoma,+
Telā ne fakatakavale i se taimi vave, e aunoa mo se lima ke fesoasoani atu ki a ia.+
ז [Seini]
7 Ana tāgata Naseli+ e sili atu te lotou ‵ma i lō kiona, e sili atu te lotou ‵kena i lō susu.
E kula atu latou i lō kamu; e fai latou e pelā me ne safaila ne kana faka‵lei.
ח [Heta]
8 A olotou foliga ko uli atu i lō malala;
Ko se lavea latou i te pouliga.
A olotou pa‵kili ko piki‵piki i luga i olotou ivi;+ ko fai pelā me se lakau malō.
ט [Teta]
9 A latou kolā ne ‵mate i te pelu e ‵lei atu i lō latou kolā ne ‵mate i te oge,+
Ko latou kolā ko vāi‵vai, e pelā me ne ‵suki ki te pelu ona ko te sē lava o meakai mai i te fatoaga.
י [Iota]
10 A lima o fāfine a‵lofa atafai ne saka ne latou olotou tama‵liki.+
Ko fai latou mo fai olotou meakai o te fanoanoa i te taimi ne tuki palapala ei te tama fafine o toku fenua.+
כ [Kafa]
11 A Ieova ne fakaasi mai ne ia tena ita;
Ne ‵ligi ki tua ne ia tena kaitaua telā e ‵ka pelā me se afi.+
Kae ne kamata ne ia se afi i Siona telā e ‵ka i ei ana fakavae.+
ל [Lameta]
12 A tupu o te lalolagi mo tino katoa e ‵nofo i te laukele ola ‵lei ne seki tali‵tonu
Me i te tino e ita ki a latou mo te fili ka ulu atu ki loto i mataloa o ‵pui o te fakai o Ielusalema.+
מ [Mema]
13 Ne fai penā ona ko agasala a ana pelofeta, ko mea ‵se a ana faitaulaga,+
Kolā ne fakama‵ligi ne latou a toto o tino amio‵tonu i loto i a latou.+
נ [Nuna]
14 Ne olo valevale latou mo te ‵kivi+ i auala.
Ko lai‵lai latou i toto,+
Tela la, ko seai se tino e mafai o fakapatele atu ki olotou gatu.
ס [Sameka]
15 E ka‵laga atu latou ki tino konā: “Olo kea‵tea! E se ‵ma! Olo kea‵tea! Olo kea‵tea! Sa fakapa‵tele mai ki a matou!”
Me ko seai se koga mo olotou ‵nofo kae ko olo valevale fua.
Ne fai atu a tino o te fenua: “E se mafai o ‵nofo fakatasi latou mo tatou i konei.+
פ [Pe]
16 A Ieova ne fakasalalau ne ia latou;+
Ko se toe kilo atu a ia ki a latou mo te alofa.
A tāgata ko se fakaasi atu te āva ki faitaulaga,+ io me ko te alofa ki toeaina.”+
ע [Aina]
17 Ko fi‵ta nei omotou mata i te kilo‵kilo atu mō se fesoasoani kae seai se aoga.+
Ne ‵sala faeloa matou ke maua se fesoasoani mai i se atufenua telā e se mafai o faka‵sao ne ia matou.+
צ [Sati]
18 Ne afuli ne latou matou i omotou kalafaga takitasi+ ko se mafai ei matou o sa‵sale i malae o omotou fakai.
Ko pili mai te motou gataga; ko palele atu omotou aso, me ko oko mai te motou gataga.
ק [Kofa]
19 A tino e o‵mai o afuli matou e ma‵kini atu i lō aeto o te lagi.+
E afuli ne latou a matou i luga i mauga; e ‵muni o taua mai ki a matou i te koga lavaki.
ר [Lesa]
20 A te mānava mai i omotou puisu, ko te tino fakaekegina a Ieova,+ ko oti ne puke i loto i te lotou lua lasi,+
Ko te tino telā ne fai atu matou: “I tena malūga ka ola ei tatou fakatasi mo atufenua.”
ש [Sina]
21 Ke ‵lifu kae fiafia, e te tama fafine o Etoma,+ kae ola e pelā mo tau nofoga i te fenua o Iusa.
Kae ka avatu foki ki a koe a te ipu,+ kae ka konā koe kae fakaasi atu tou nofo fuafua.+
ת [Tau]
22 A te fakasalaga mō koe ona ko tau mea ‵se, e te tama fafine o Siona, ko oko mai ki tena gataga.
Ka se toe ave fakapagota ne ia koe.+
Kae ka saga atu a ia ki tau mea ‵se, e te tama fafine o Etoma.
Ka fakaasi faka‵sau atu ne ia au agasala.+
5 Ieova, ke masaua a mea ne ‵tupu ki a matou.
Onoono mai kae kilo mai ki te motou masiasi.+
2 A te motou tofi ko oti ne tuku atu ki tino fakaa‵tea, a omotou fale ki tino mai i nisi fenua.+
3 Ko fai eiloa matou e pelā me ne tama‵liki ko ‵mate olotou tamana; a omotou mātua ko pelā me ne fāfine ko ‵mate olotou avaga.+
4 E ‵tau eiloa o ‵togi a vai a matou mo omotou inu,+ kae ko fafie a matou e ‵tau foki eiloa o ‵togi.
5 A latou kolā e o‵mai o afuli matou ko pili ‵ki mai;
A matou ko fi‵ta, kae e seai eiloa se malōlōga e maua ne matou.+
6 E ‵fola atu omotou lima ki Aikupito+ mo Asulia,+ ke maua ei a meakai e lava mō ‵kai.
7 A omotou tupuga kolā ne agasala ko ‵galo atu, kae e ‵tau mo matou o tauave olotou mea ‵se.
8 Ko pule matou ne tavini; e seai se tino e mafai o ‵futi kea‵tea ne ia matou mai i olotou lima.
9 E ‵tu omotou ola i se tulaga fakamataku ko te mea ke aumai ne matou a omotou meakai ki loto,+ ona ko te pelu o te koga lavaki.
10 A omotou pa‵kili ko ‵vela eiloa e pelā me se ogaumu, ona ko te logo‵mae o te fiakai.+
11 Ko oti ne fakamasiasi* ne latou a fāfine a‵vaga i Siona, mo tamafine ‵ma i fakai o Iuta.+
12 Ne fakatau‵tau eiloa a pelenise i olotou lima takitasi,+ kae seai se āva ne fakaasi atu ki toeaina.+
13 A tamataene e sau ne latou a te mea solo saito, kae ko tama‵liki tāgata e ‵siga i te amōga o fafie ‵mafa.
14 Ko ‵galo eiloa a toeaina mai i mataloa o te fakai;+ a tamataene ko se fakatagi‵tagi olotou pese.+
15 Ko galo atu eiloa a te fiafia mai i ‵tou loto; ko ‵fuli eiloa a ‵tou saka ki te fanoanoa.+
16 A te kalauna ko tō mai ‵tou ulu. Kalofa eiloa i a tatou, me ko oti tatou ne agasala!
17 Ona ko te mea tenei, ko ma‵saki ei ‵tou loto,+
Kae ona ko mea katoa konei ko se ‵kite ‵lei ei ‵tou mata,+
18 Ona ko te Mauga o Siona, telā ko tuku tiaki;+ ko olo valevale fua i ei a alope.
19 E pelā mo koe, e Ieova, e sagasaga koe i te nofogaaliki ki te se-gata-mai.
A tou nofogaaliki e tumau i kautama katoa.+
20 Kaia e fakapuli ei ne koe matou ki te se-gata-mai kae tuku tiaki matou i se taimi leva ‵ki?+
21 Faka‵foki mai matou ki a koe, e Ieova, kae ka toka matou o ‵foki atu ki a koe.+
Fakafou aka omotou aso e pelā eiloa mo aso mua.+
22 Kae ko koe ne ‵teke malosi mai ki a matou.
Ne tumau eiloa te malosi o tou kaitaua ki a matou.+
Epelu, “gakau.”
Epelu, “sau katoa.”
Epelu, “gakau.”
Epelu, “sau.”
Io me “faka‵tali mo te kufaki.”
Io me “ne tāua e pelā.”
Epelu, “‵pei ki gatu lanu kula” ko tena uiga ko gatu lanu kula ‵togi ‵mafa.
Epelu, “mea ‵se.”
Io me “pukemālō.”