AMOSA
1 Ko pati a Amosa,* telā se tagata e tokotasi o tino tausi mamoe mai Tekoa,+ kae ne oko atu ki a ia se fakaasiga e uiga ki Isalaelu i aso o te tupu o Iuta ko Usia+ mo aso o Ielopoamo+ te tama tagata a Ieoasa,+ te tupu o Isalaelu, i te lua tausaga mai mua o te mafuie.+ 2 Ana muna:
“A Ieova ka ‵gulu mai e pelā me se leona mai Siona,
Kae ka momea aka tena leo mai i Ielusalema.
Ka fanoa‵noa eiloa a laukele moukuā o tausi mamoe,
Kae ka pakupaku te taulu o te mauga o Kalamelu.”+
3 “Konei a pati a Ieova ne fai mai,
‘“Ka se ‵fuli kea‵tea eiloa au ona ko ‵tekeatuga* e tolu a Tamaseko mo te fa foki,
Me ne tofa eiloa ne latou a Kileata ki mea tofa saito fiti.+
5 Ka ‵fati ne au a lakau faka‵lava o Tamaseko;+
Ka fakamasei ne au a tino kolā e ‵nofo i Pikata-avene
6 Konei a pati a Ieova ne fai mai,
‘“Ka se ‵fuli kea‵tea eiloa au ona ko ‵tekeatuaga e tolu a Kasa+ mo te fa foki,
Me ne puke ne latou te potukau kātoa o tino ne puke fakapagota+ kae avatu ki Etoma.
7 Tenā ka uga mai ei ne au se afi ki te ‵pui o Kasa,+
Kae ka ‵ka i ei ana taoa ma‵losi.
8 Ka fakamasei ne au a tino kolā e ‵nofo i Asetota,+
Mo te tino e pule* i Asekelona;+
Ka ‵fuli toku lima o ‵teke a Ekelona,+
Kae ko tino Filisitia kolā e ‵toe ka ‵mate atu,”+ ko pati a te Aliki Sili ko Ieova.’
9 Konei a pati a Ieova ne fai,
‘Ka se ‵fuli kea‵tea eiloa au ona ko ‵tekeatuga e tolu a Tulo+ mo te fa foki,
Me ne avatu ne latou se potukau kātoa o tino ne puke fakapagota ki Etoma,
Kae ne seki masaua ne latou a te feagaiga a taina.+
10 Tenā ka uga mai ei ne au se afi ki te ‵pui o Tulo,
Kae ka ‵ka i ei ana taoa ma‵losi.’+
11 Konei a pati a Ieova ne fai mai,
‘Ka se ‵fuli kea‵tea eiloa au ona ko ‵tekeatuga e tolu a Etoma+ mo te fa foki,
Me ne afuli ne ia tena taina tonu ki te pelu,+
Kae ne ita a ia ma fakaasi atu te alofa fakamagalo;
I tena kaitaua ne tumau i te saesae valevale ne ia latou,
Kae ne tumau tena kaitaua ki a latou.+
13 Konei a pati a Ieova ne fai mai,
‘“Ka se ‵fuli kea‵tea eiloa au ona ko ‵tekeatuga e tolu a tino Amoni+ mo te fa foki,
Me ne ‵sae ne latou a tinae o fāfine fai‵tama o Kileata ke fakalasi atu i ei te lotou kogā fenua.+
14 Tenā ka ‵sunu ei ne au te ‵pui o Lāpa ki se afi,+
Kae ka ‵ka i ei ana taoa ma‵losi,
Fakatasi mo te kalaga o te taua i te aso o te taua,
Fakatasi mo te matagi malosi i te aso o te afā.
15 Kae ko te lotou tupu ka ave fakapagota fakatasi mo ana pelenise,”+ ko pati a Ieova.’
2 “Konei a pati a Ieova ne fai mai,
‘“Ona ko ‵tekeatuga* e tolu a Moapi,+ mo te fa foki, ka se ‵fuli kea‵tea eiloa au,
Me ne ‵sunu ne ia a ivi o te tupu o Etoma ke maua mai a lase.
2 Tenā ka uga mai ei ne au se afi ki Moapi, kae ka ‵ka i ei a taoa ma‵losi o Keliota;+
A Moapi ka mate i te kogaloto o te taua,
Fakatasi mo te kalaga o te taua, mo te ‵tagi o se pu.+
3 Ka tapale kea‵tea ne au te pule* mai i loto i a ia
Kae tamate ana pelenise katoa fakatasi mo ia,”+ ko pati a Ieova.’
4 Konei a pati a Ieova ne fai mai,
‘Ona ko ‵tekeatuga e tolu a Iuta,+ mo te fa foki, ka se ‵fuli kea‵tea eiloa au,
Me ne ‵teke ne latou te tulafono* a Ieova,
Kae ne seki tausi ne latou ana tulafono fo‵liki;+
Kae ko loi eiloa kolā ne tau‵tali i ei olotou tupuga ne ‵taki ei latou ke takasē‵se.+
5 Tenā ka uga mai ei ne au se afi ki Iuta,
Kae ka ‵ka i ei a taoa ma‵losi o Ielusalema.’+
6 Konei a pati a Ieova ne fai mai,
‘Ona ko ‵tekeatuga e tolu a Isalaelu,+ mo te fa foki, ka se ‵fuli kea‵tea eiloa au,
Me ne fakatau atu ne latou a tino amio‵tonu ki siliva,
Kae ko tino ma‵tiva ki se ‵pea taka.+
7 Ne lakalaka ne latou a ulu o tino ma‵lalo ki te ‵pefu o te laukele,+
Kae ‵pono ne latou te auala o tino agamalu.+
A te tagata mo tena tamana e ‵moe fakatauavaga mo te tamaliki fafine e tokotasi,
E fakalailai i ei toku igoa tapu.
8 E ta‵kato latou i tafa o fatafaitaulaga katoa+ i luga i gatu ne puke ne latou e pelā me se puipuiga o te tupe fakakaitalafu;*+
Kae ko uaina e inu ne latou i fale* o olotou atua ne maua mai i tino kolā ne fakasala tupe ne latou.’
9 Kae ko au eiloa telā ne fakaseai ne au a tino Amoli i mua o latou,+
Kolā e ‵loa pelā mo lakau ko alasi kae e ma‵losi e pelā mo lakau ko oka;
Ne fakamasei ne au ana fuagalakau i luga mo ana aka i lalo.+
10 Ne aumai ne au koutou ki tua mo te fenua o Aikupito,+
Kae ne fai ne au koutou ke sa‵sale i loto i te koga lavaki i tausaga e 40,+
Ke puke mō koutou a te fenua o tino Amoli.
11 Ne puti aka ne au a nisi tama tāgata a koutou ke fai pelā me ne pelofeta+
Kae ko nisi tamataene a koutou ke pelā me ne Naseli.+
E a, e se tenei loa te mea e ‵tau o fai, e tino Isalaelu?’ ko te folafolaga a Ieova.
12 ‘Kae ne tuku atu faeloa ne koutou a uaina ke inu i ei a te kau Naseli,+
Kae fakatonu atu koutou ki te kau pelofeta: “E se ‵tau mo koutou o ‵valo fakapelofeta.”+
13 Tela la, ka tuki pala ne au koe i tou koga,
E pelā eiloa me se kā e ‵fonu i saito ne ‵kati kae e ‵tao ne ia a mea i lalo i ei.
14 A te tino tele makini ka seai se koga mo ana tele,+
A te tino malosi ka se tumau tena malosi,
Kae e seai se toa mafi ka sao tena ola.
15 A te tino sana matasana ka se tumau i tena tulaga,
A te tino vae makinikini ka se sao,
Kae ko te tino fakatele solofanua ka se sao tena ola.
16 Ke oko eiloa ki te ‵toe tino loto toa* o toa ‵mafi
Ka tele fuafua i te aso tenā,’+ ko te folafolaga a Ieova.”
3 “Faka‵logo mai ki te fekau tenei ne fai mai ne Ieova e uiga ki a koutou, e tino Isalaelu, e uiga ki te fenua kātoa telā ne aumai ne au ki tua mo te fenua o Aikupito:
2 ‘Ko koutou fua ne iloa ne au mai i kāiga katoa o te lalolagi.+
Tenā te pogai ka fakasala ei ne au koutou ona ko otou mea ‵se katoa.+
3 E a, ka sa‵sale fakatasi a tino e tokolua māfai e seki lotoma‵lie ke fetaui lāua?
4 E a, ka ‵gulu se leona i te vao māfai e seki ai sena manu ne ‵poa?
E a, ka tagi se tamā leona i tena koga ‵muni māfai e seki ai sena manu ne ‵po aka?
5 E a, ka tō se manu eva ki se matasele i te laukele māfai e seki ai se malei mō ia?*
E mata, ka fiti aka se matasele mai i te laukele māfai e seki ‵lave se mea i ei?
6 Kafai e ili se pu i te fakai, e a, e se pole‵pole a tino?
Kafai e tupu se fakalavelave i te fakai, e a, e se ko Ieova ne fai ne ia?
7 Me i te Aliki Sili ko Ieova ka se fai ne ia se mea
Vagana ko oti ne fakaasi atu ne ia tena mea ‵funa ki ana tavini ko pelofeta.+
8 A te leona ko oti ne ‵gulu!+ Ko oi te tino ka se mataku?
A te Aliki Sili ko Ieova ko oti ne faipati! Ko oi te tino ka se ‵valo fakapelofeta?’+
9 ‘Folafola atu te mea tenā i taoa ma‵losi o Asetota
Mo taoa ma‵losi i te fenua o Aikupito.
Fai atu: “Maopoopo fakatasi mai o ‵teke a mauga o Samalia;+
Kilo atu ki te ‵numi valevale i loto i ei
Mo faifaiga fakaloiloi i loto i a ia.+
10 Me e se iloa ne latou o fai a te mea tonu,” ko te folafolaga a Ieova,
“Ko latou kolā e fakaputu aka ne latou a faifaiga fakasaua mo te fakamaseiga i loto i olotou taoa ma‵losi.”’
11 Tela la, konei a pati a te Aliki Sili ko Ieova ne fai mai,
‘A te fili ka nikoi ne ia te fenua,+
Ka ‵fao kea‵tea ne ia tou malosi,
Kae ka kaisoa a mea mai i ou taoa ma‵losi.’+
12 Konei a pati a Ieova ne fai mai,
‘E pelā eiloa mo te tausi mamoe e ‵futi kea‵tea ne ia a vae e lua io me se vaega o te taliga mai te gutu o te leona,
Tenā eiloa te auala ka ‵futi ei kea‵tea ne Ieova a tino Isalaelu,
Ko latou kolā e saga‵saga nei i Samalia i luga i moega ‵gali mo nofoga ‵lei.’+
13 ‘Faka‵logo mai kae fakailoa atu ki te kāiga o Iakopo,’ ko te folafolaga a te Aliki Sili ko Ieova, te Atua o kautau.
14 ‘Me i te aso e fakasala ei ne au a Isalaelu ona ko olotou ‵tekeatuga* katoa,+
Ka fakaoko atu foki ne au te taui ki fatafaitaulaga o Peteli,+
A suki o te fatafaitaulaga ka ‵kati kea‵tea kae ‵to ki te laukele.+
15 Ka ofa ne au ki lalo a te fale o te tau ‵moko fakatasi mo te fale o te tau ‵vela.’
‘Ka fakaseai atu eiloa a fale ne faite ki nifo o elefane,+
Kae ko fale ‵gali ka oko ki te lotou gataga,’+ ko te folafolaga a Ieova.”
4 “Faka‵logo mai ki pati konei, koutou e pulumakau o Pasana,
Kolā e ‵nofo i mauga o Samalia,+
Ko koutou e fāfine kolā e fakaloi‵loi ne koutou a tino ma‵lalo+ kae tuki pala a tino ma‵tiva,
Kolā e fai atu ki olotou avaga,* ‘Aumai aka se mea ke inu matou ki ei!’
2 A te Aliki Sili ko Ieova ne tauto e auala i tena ‵malu,
‘“Kiloke! Ka oko mai otou aso ka sau aka ei ne ia koutou ki te pine faka‵lave a te tino katikati ‵kano o manu
Kae ka sau aka te ‵toega o koutou ki kafilo.
3 A koutou ka olo ki tua e auala i pūga i te ‵pui, kae ka olo ‵tonu eiloa a tino taki tokotasi i ei;
Kae ko koutou ka ‵pei ki Hamono,” ko te folafolaga a Ieova.’
4 O‵mai ki Peteli o fai amioga solitulafono,*+
Ki Kilikala o fai amioga solitulafono e uke atu i ei!+
5 ‵Sunu se taulaga fakafetai o falaoa sē faka‵fete;+
Folafola atu i se leo maluga otou taulaga!
Me tenā te mea e fia‵fia koutou o fai, e tino Isalaelu,’ ko te folafolaga a te Aliki Sili ko Ieova.
6 ‘Kae pelā mo au, ne fai ne au otou nifo ke ‵ma i meakai* i otou fakai katoa
Kae fai ke se lava a meakai i otou fale katoa;+
Kae ne seki ‵foki mai eiloa koutou ki a au,’+ ko te folafolaga a Ieova.
7 ‘Ne taofi foki ne au a vaiua mai i a koutou i masina e tolu mai mua o te ‵katiga o fuataga;+
Ne fai ne au ke ‵to te vaiua i te fakai e tasi kae e se i te suā fakai.
A te vaega e tasi o te laukele e ‵to i ei te vaiua,
Kae ko te suā vaega o te laukele telā e seai ne vaiua i ei ka malō.
8 A tino i fakai e lua io me tolu ka takasē‵se atu ki se fakai e tasi o inu vai,+
Kae ka se ma‵kona latou;
Kae ne seki ‵foki mai eiloa koutou ki a au,’+ ko te folafolaga a Ieova.
9 ‘Ne ta ne au koutou ki te matagi ‵vela mo te taelagoa.+
Ne fakauke ne koutou otou fatoaga mo togavine,
Kae ka kai ne seakelise otou lakau ko mati mo lakau olive;+
Kae ne seki ‵foki mai eiloa koutou ki a au,’+ ko te folafolaga a Ieova.
10 Ne uga atu ne au ki a koutou se famai e pelā mo te famai i Aikupito.+
Ne tamate ne au ki te pelu otou tamataene+ kae ne puke foki otou solofanua.+
E fai ne au te manogi ‵pou mai i otou koga ‵nofo ke olo aka ki otou puisu;+
Kae ne seki ‵foki mai eiloa koutou ki a au,’ ko te folafolaga a Ieova.
11 ‘Ne fai ne au ke maofa valevale koutou
E pelā mo te fakamaseiga ne te Atua a Sotoma mo Komolo.+
Kae ne fai koutou e pelā me se lakau ne ‵futi mai ki tua mo te afi;
Kae ne seki ‵foki mai eiloa koutou ki a au,’+ ko te folafolaga a Ieova.
12 Tenā eiloa te mea ka fai ne au ki a koe, e Isalaelu.
Ona ko te mea ka fai ne au te mea tenei ki a koe,
Fakatoka o fakafetaui ki tou Atua, e Isalaelu.
13 Kiloke! ko ia te Atua telā ne māfua mai i ei a mauga+ kae faite foki ne ia te matagi;+
E taku mai ne ia Ana mafaufauga ki te tagata,
E ‵fuli ne ia te vaveao ‵malu ki te pouliga,+
Kae sasale a ia i koga ma‵luga o te lalolagi;+
A tena igoa ko Ieova te Atua o kautau.”
5 “Faka‵logo mai ki te fekau tenei ka fai atu ne au ki a koutou e pelā me se pese fanoanoa, e te kāiga o Isalaelu:
2 ‘A te tamafine ‵ma, ko Isalaelu, ko pakū;
Ko se mafai ne ia o toe tu aka ki luga.
Ko oti ne tuku tiaki a ia i luga i tena laukele eiloa;
E seai se tino ke fakatu aka a ia ki luga.’
3 “Me konei a pati a te Aliki Sili ko Ieova ne fai mai:
‘A te fakai telā e olo atu mo te tokoafe ka ‵toe mai fua se tokoselau;
Kae ko ia telā e olo atu mo te tokoselau ka ‵toe mai fua se tokosefulu, mō te kāiga o Isalaelu.’+
4 “Me konei a pati a Ieova ne fai ki te kāiga o Isalaelu:
‘‵Sala mai ki a au kae tumau i te ola.+
5 Sa ‵sala ki Peteli,+
Sa olo atu ki Kilikala+ io me faka‵seke o olo ki Pelesepa,+
Me i a Kilikala ka ave fakapagota eiloa,+
Kae ko Peteli ka iku atu ki te seai.
6 ‵Sala atu ki a Ieova kae tumau i te ola,+
Ko te mea ke se puna mai a ia ki tua e pelā me se afi ki te kāiga o Iosefa,
Ko ‵sunu i ei a Peteli, e aunoa mo se tino ke tamate ne ia te afi.
7 E ‵fuli ne koutou a te fakamasinoga tonu ki se lakau ‵kona,
Kae ‵pei ne koutou te amiotonu ki te laukele.+
8 Ko te Atua telā ne faite ne ia te fakaputuga fetū ko te Kima* mo te fakaputuga fetū ko te Kesila,*+
Ko te Atua telā e ‵fuli ne ia te pouli tagataga ki te vaveao,
Ko te Atua telā e fai ne ia te ao ke pouli e pelā mo te po,+
Ko te Atua telā e fakatonu ne ia a vai o te tai
Ke ‵ligi atu ki luga i te lalolagi+
—A tena igoa ko Ieova.
9 Ka fai ne ia ke oko atu te fakamaseiga ki tino ma‵losi,
Kae aumai te fakamaseiga ki koga e puipui faka‵lei.
10 E takalia‵lia latou ki tino kolā e polopoloki ‵mafa a tino i mataloa o te fakai,
Kae ‵teke ne latou a tino kolā e fai‵pati ki te mea tonu.+
11 Ona ko koutou e ma‵nako malosi ki te ‵togi o te laukele* mai i tino ma‵tiva
Kae puke ne koe ana fuaga e pelā me se meaalofa,+
Ka se tumau koutou i te ‵nofo i fale ne faite ne koutou ki fatu kolā ne ‵kati faka‵lei+
Io me inu ki uaina mai togavine ‵lei kolā ne ‵toki ne koutou.+
12 Me iloa ne au te aofaki o otou ‵tekeatuga
Mo te uke o otou agasala
—Ne fai fakamasei ne koutou a tino amio‵tonu,
Ne puke ne koutou a ‵togi fakakolekole,
Kae taofi ne koutou a saolotoga o tino ma‵tiva i loto i mataloa o te fakai.+
13 Tela la, a latou kolā e ‵loto te lotou malamalama ka ‵nofo filemu i te taimi tenā,
Me ka fai pelā me se taimi o te puapuaga.+
Tenā ko fakatasi atu ei a Ieova te Atua o kautau ki a koutou,
E pelā eiloa mo otou pati ne fai e uiga ki a ia.+
15 Takalia‵lia ki te mea masei, kae fia‵fia ki te mea ‵lei,+
Ke manumalo a te fakamasinoga tonu i mataloa o te fakai.+
E se taumate a Ieova te Atua o kautau
Ka fakaasi atu tena taliaga ki te ‵toega o tino o Iosefa.’+
16 Tela la, konei a pati a Ieova te Atua o kautau, Ieova, ne fai mai:
‘Ka isi eiloa ne tino e ‵tagi fanoa‵noa i malae katoa o te fakai,
Kae i auala katoa ka fai aka latou, “Oi aue, oi aue!”
Ka ka‵laga latou ki tino fai fatoaga ke ‵tagi fanoa‵noa
Penā foki loa mo tino kolā ne ‵togi mai ke ‵tagi fanoa‵noa.
17 ‘Ka isi ne tino e ‵tagi fanoa‵noa i togavine katoa;+
Me ka fanatu au i loto i a koutou,’ ko pati a Ieova.
18 ‘Ka‵lofa eiloa i a latou kolā e olioli malosi ki te aso o Ieova!+
Se a la te uiga o te aso o Ieova ki a koutou?+
Se aso pouli kae e se maina.+
19 E fai pelā me se tagata e tele kea‵tea mai se leona kae fetaui mo se pea,
Kae kafai e ulu atu ki loto i tena fale kae fakapale tena lima ki te ‵pui, ka ū a ia ne se gata.
20 E a, a te aso o Ieova ka pouli, kae e se maina;
E a, ka fakamalumalu, kae e se mainaina?
21 Au e takalialia, au e ‵teke ki otou ‵kaiga fia‵fia,+
Kae e se fiafia au ki te manogi o otou maopoopoga ‵malu.
22 Kafai foki loa e ofo mai ne koutou a taulaga ‵sunu kātoa mo taulaga meaalofa,
Ka se fiafia au ki ei;+
Kae ka se talia ne au otou taulaga ‵kai fakatasi o manu puta‵puta.+
23 Fakagata otou pese logoa;
Kae fai ke se lagona ne au te ‵tagi o otou kitala.+
24 Fai a te fakamasinoga tonu ke ‵sali ifo e pelā me ne vai,+
Kae ko te amiotonu e pelā me se tamā vaitafe e ‵tafe faeloa.
25 E a, e isi ne taulaga mo meaalofa ne aumai ne koutou ki a au
I tausaga e 40 i te koga lavaki, e te kāiga o Isalaelu?+
26 Nei la, e ‵tau o sau kea‵tea ne koutou a Sakuta te otou tupu mo Kaiuani,*
Ko otou fakatusa, ko te fetū o te otou atua, telā ne faite ne koutou mō koutou eiloa,
27 Kae ka ave fakapagota ne au koutou ki se fenua e ‵mao mo Tamaseko,’ +ko pati a ia telā e fakaigoa ki a Ieova te Atua o kautau.”+
6 “Ka‵lofa eiloa i tino Siona kolā e tali‵tonu ki a latou eiloa,
Ki a latou kolā e ‵nofo mo te tokagamalie i mauga o Samalia,+
Ko tāgata takutakua o atufenua,
Ko latou kolā e olo atu ki ei a te kāiga o Isalaelu!
2 Olo atu ki te suā feitu ki Kalene o onoono ki ei.
Olo atu mai i konā ki Hamata Sili,+
Kae olo ifo ki lalo i Kata o tino Filisitia.
E a, e ‵lei atu latou i lō malo* konei,
Io me e a, e lasi atu te lotou kogā fenua i lō koutou?
3 E a, ko oti ne tapale ne koutou kea‵tea mai i otou mafaufau a te aso o te puapuaga+
Kae aumai ki loto se pulega fakasaua?+
4 E ta‵kato latou i moega ne faite ki nifo o elefane+ kae ta‵kato fakaloa‵loa i luga i nofoga,+
E ‵kai ki mamoe mai te lafu mamoe mo pulumakau puta‵puta;*+
5 E ‵fatu ne latou a pese ki te ‵tagi o kitala,*+
Kae e pelā mo Tavita, e faite ne latou olotou mea fakatagi‵tagi;+
6 E inu uaina latou mai i pōla e ‵fonu i uaina+
Kae faū a latou eiloa ki toe sinu tafasili i te ‵lei.
Kae e se fia ‵saga atu latou ki* te puapuaga o Iosefa.+
7 Tenā ka ave fakapagota ei latou i mua o nisi tino,+
Kae ko fiafiaga o te konā o latou kolā e ta‵kato fakaloa‵loa ka oko atu ki te lotou gataga.
8 ‘A te Aliki Sili ko Ieova ne tauto e auala i a ia eiloa,’+ ko te folafolaga a Ieova te Atua o kautau,
‘“Au e takalialia ki te fakamatamata o Iakopo,+
E takalialia au ki ana taoa ma‵losi,+
Kae ka tuku atu ne au te fakai mo mea kolā e faka‵fonu ki ei.+
9 “‘“Kae kafai e ‵toe mai a tāgata e tokosefulu i te fale e tasi, ka ‵mate foki latou. 10 Ka vau se kāiga* o sau latou ki tua kae ‵sunu fakasolosolo latou. Ka aumai ne ia olotou ivi ki tua mo te fale; ko fai atu ei a ia ki so se tino i loto i potu tafa ki loto o te fale, ‘E a, koi isi ne nisi tino e ‵nofo mo koe?’ Kae ka fai mai a ia, ‘E seai!’ Tenā ko fai atu ei a ia, ‘Sa uā! Me e se tenei te taimi ke takutaku ei te igoa o Ieova.’”
11 Me ko Ieova ne fai atu ne ia te fakatonuga,+
Kae ka ofa ki lalo ne ia te fale lasi ke malipilipi,
Kae ko te tamā fale ke fai pelā me ne kaiga.+
12 E a, e ‵tele a solofanua i kaupapa,
Io me e a, e mafai o fakamalū ne se tino te laukele i konā ki pulumakau?
Me ko oti ne ‵fuli ne koe te fakamasinoga tonu ki se lakau poisini,
Kae ko fuagalakau o te amiotonu ki lakau ‵kona.+
13 A koe ne fiafia ki mea sē aoga,
Kae fai aka koe, “E a, e seki gasolo aka tatou o ‵mafi i ‵tou malosi eiloa?”*+
14 Tela la, e te kāiga o Isalaelu, ka aumai ne au se atufenua ke ‵teke atu ki a koutou,’+ ko te folafolaga a Ieova o kautau,
‘Kae ka fakasaua ne latou a koutou mai i Lepo-hamata*+ ke oko ifo ki te Vanu o te Alapaa.’”
7 Tenei te mea ne fakaasi mai ne te Aliki Sili ko Ieova ki a au: Kiloke! Ne uga mai ne ia se mumuga seakelise i te taimi ko fatoa kamata ei o ‵somo aka a lakau.* A mea konei ko lakau kolā ne ‵toki i te otiga ne ‵kati a mouku a te tupu. 2 I te otiga ne kai ne seakelise a lakau kaina o te fenua, ne fai atu au: “Te Aliki Sili ko Ieova, fakamolemole fakamagalo atu latou!+ E mafai pefea o sao* a Iakopo? Me i a ia e vāivāi fua!”+
3 Tenā ne toe mafaufau ei a Ieova ki te mea tenei.+ “Ka se tupu eiloa a te mea tenei,” ko muna a Ieova.
4 Tenei te mea ne fakaasi mai ne te Aliki Sili ko Ieova ki a au: Kiloke! A te Aliki Sili ko Ieova ne aumai ne ia se fakasalaga e auala i se afi. Ne ‵ka i ei a vai ‵poko, kae ne ‵ka i ei se vaega o te laukele. 5 Tenā ne fai atu ei au: “Te Aliki Sili ko Ieova, fakamolemole taofi aka te mea tenei.+ E mafai pefea o sao* a Iakopo? Me i a ia e vāivāi fua!”+
6 Tenā ne toe mafaufau ei a Ieova ki te mea tenei.+ “Ka se tupu foki a te mea tenā,” ko muna a te Aliki Sili ko Ieova.
7 Tenei te mea ne fakaasi mai ne ia: Kiloke! A Ieova ne tu i luga i se ‵pui telā ne faite ki se uka levolo, kae e isi se uka levolo i tena lima. 8 Tenā ne fai mai ei a Ieova ki a au: “Se a te mea e lavea ne koe e Amosa?” Ne fai atu au: “Se uka levolo.” Tenā ne fai mai ei a Ieova: “Ko tuku atu nei ne au se uka levolo ki luga i oku tino Isalaelu. Ka se toe fakamagalo ne au latou.+ 9 A koga ma‵luga o Isaako+ ka ofa ki lalo, kae ko koga tapuaki o Isalaelu ka fakamaseigina;+ kae ka vau au o ‵teke ki te kāiga o Ielopoamo mo se pelu.”+
10 Ne ave ne Amasia te faitaulaga o Peteli+ a te fekau tenei ki te tupu o Isalaelu ko Ielopoamo:+ “E isi se togafiti a Amosa e fai ki a koe i te kogaloto o te kāiga o Isalaelu.+ Ko se mafai ne te fenua o fa‵ki i ana pati katoa.+ 11 Me konei a pati a Amosa ne fai atu, ‘A Ielopoamo ka mate i te pelu, kae ko Isalaelu ka ave fakapagota eiloa mai i tena fenua.’”+
12 Tenā ne fai atu ei a Amasia ki a Amosa: “Te tino fakamatala fakaasiga, fano, tele kea‵tea ki te fenua o Iuta, ‵sala au meakai i konā, kae ‵valo fakapelofeta atu i konā.+ 13 Kae e se ‵tau mo koe o toe ‵valo fakapelofeta i Peteli,+ me ko te koga tapuaki o te tupu+ mo te fale o tena malo.”
14 Tenā ne tali atu ei a Amosa ki a Amasia: “Au e sē se pelofeta io me se tama a se pelofeta; kae ko au se tino tausi manu+ kae ne tausi ne au a lakau ko sukamolo. 15 Kae ne puke au ne Ieova kea‵tea mai te tautali atu i te lafu mamoe, kae ne fai mai a Ieova ki a au, ‘Fano, ‵valo fakapelofeta ki oku tino Isalaelu.’+ 16 Tela la, fakalogo mai nei ki te fekau a Ieova: E fai mai koe, “Sa ‵valo fakapelofeta o ‵teke a Isalaelu+ kae sa talai+ o ‵teke te kāiga o Isaako.” 17 Tela la, konei a pati a Ieova ne fai mai: “A tau avaga ka fai pelā me se fafine talitāgata i te fakai, kae ko au tama tāgata mo au tama fāfine ka ‵mate i te pelu. A tou laukele ka vaevae e auala i se uka e fua i ei a mea, kae ko koe ka mate i se laukele sē ‵ma; kae ko Isalaelu ka ave fakapagota eiloa mai i tena fenua.”’”+
8 Tenei te mea ne fakaasi mai ne te Aliki Sili ko Ieova ki a au: Kiloke! E isi se kete o fuagalakau o te tau ‵vela. 2 Tenā ne fai mai ei a ia ki a au, “Se a te mea e lavea ne koe, e Amosa?” Ne tali atu au, “Se kete o fuagalakau o te tau ‵vela.” Tenā ne fai mai ei a Ieova ki a au: “Ko oko mai te gataga o oku tino Isalaelu. Ka se toe fakamagalo ne au latou.+ 3 ‘A pese o te faletapu ka ‵fuli ki te ‵tagi fanoanoa i te aso tenā,’+ ko te folafolaga a te Aliki Sili ko Ieova. ‘Ka uke ‵ki a foitino ‵mate e laku tatela+—sa logoa!’
4 Faka‵logo mai ki te mea tenei, koutou kolā e lakalaka ki lalo a tino ma‵tiva
Kae fai ke palele atu a tino agamalu o te fenua,+
5 Kolā e fai mai, ‘Ka oti mafea te ‵kaiga fiafia o te masina sae,+ ko te mea ke ‵togi atu ki tua omotou saito,
Mo te Sapati,+ ko te mea ke avatu omotou saito o fakatau atu ki tua?
Ko te mea ke fakafoliki ifo te fua o te efa*
Kae ke lasi atu te ‵mafa o te sekela,*
Ke faka‵se omotou fua mea ‵mafa fakaloiloi;+
6 Ko te mea ke ‵togi ne matou a tino fakaa‵lofa ki siliva
Mo tino ma‵tiva ki se ‵pea taka,+
Kae fakatau atu a te vaega sē aoga o saito.’
E a, ka se ‵tu aka a latou katoa ki luga e pelā mo te Naila,
Kae sou kae pulu ifo ki lalo e pelā mo te Naila o Aikupito?’+
9 ‘I te aso tenā,’ ko te folafolaga a te Aliki Sili ko Ieova,
‘Ka fai ne au ke fanaifo te la i te tutonu,
Kae ka fakapouli ne au te fenua i te ao malamalama.+
10 Ka ‵fuli ne au otou ‵kaiga fiafia ki te fanoanoa+
Mo otou pese katoa ki pese fanoa‵noa.
Ka tuku atu ne au a gatu lautaga ki otou kautega katoa kae fai a ulu katoa ke ‵tula;
Ka fai ne au ke fai pelā me se pese fanoanoa mō se tamaliki tagata eiloa e tokotasi,
Kae ko tena gataga ka fai pelā me se aso fakalogo‵mae.’
11 ‘Kiloke! Ka oko mai a aso,’ ko te folafolaga a te Aliki Sili ko Ieova,
‘Kae ka uga atu ne au se oge ki te fenua,
E sē se oge meakai io me ko te fiainu ki vai,
Kae ko te fia fakalogologo ki muna a Ieova.+
12 Ka takasē‵se atu latou mai te tai e tasi ki te suā tai
Kae mai i te feitu ki mātū ki te feitu ki saegala.
Ka olo valevale latou o ‵sala ki te muna a Ieova, kae ka se maua eiloa ne latou.
13 I te aso tenā a tamafine tino‵gali kae ‵ma ka mata‵po,
E pelā foki a tamataene ona ko te fiainu;
14 A latou kolā e tauto e auala i te agasala a Samalia+ ka fai aka,
“E pelā eiloa mo tou atua e ola, e Tanu!+
Kae, “E pelā eiloa mo te auala o Pelesepa+ e ola!”
Ka pa‵kū latou, kae ka se toe ‵tu aka latou ki luga.’”+
9 Ne lavea ne au a Ieova+ e tu mai luga o te fatafaitaulaga, kae ne fai mai a ia: “‵Kini a te ulu o te pou, kae ka galulu a te fale. ‵Kati kea‵tea a ulu o pou, kae ka tamate ne au te tino fakaoti i a latou ki te pelu. E seai se tino telā e tele kea‵tea ka sao, kae e seai foki se tino e taumafai ke sao a ia ka manuia.+
2 Kafai e keli ifo latou ki lalo i te Tanuga,*
Ka puke atu toku lima ki a latou i konā;
Kae kafai e olo aka latou ki te lagi,
Ka puke ifo ne au latou mai konā.
3 Kae kafai e ‵muni latou i te taulu o Kalamelu,
Ka ‵sala ne au latou i konā kae puke mai latou.+
Kafai e ‵muni latou mai i oku mata i te takele o te tai,
Ka fakatonu ne au te gata i konā ke ū latou.
4 Kafai e ave fakapagota latou i mua o olotou fili,
Ka fakatonu atu au ki te pelu i konā, kae ka tamate ne ia latou;+
Ka kilo ‵tonu atu oku mata ki a latou mō te masei, kae e se mō te ‵lei.+
5 Me i te Aliki Sili, ko Ieova o kautau, ko te Atua telā e fakapatele atu ki te laukele,*
Ko te mea ke liuvai,+ kae ko ana tino katoa ka fanoa‵noa;+
Kae ko latou katoa ka ‵tu aka ki luga e pelā mo te Naila,
Kae ‵pulu ifo ki lalo e pelā mo te Naila o Aikupito.+
6 ‘Ko te tino telā e faite tena kakega i te lagi
Kae fakatu tena vanimonimo mai luga o te lalolagi;
Ko te tino telā e fakatonu ne ia a vai o te tai,
Ke ‵ligi ifo a mea konā ki luga i te lalolagi+
—A tena igoa ko Ieova.’+
7 ‘E a, e se ‵pau koutou mo tama tāgata a tino Kusi ki a au, e tino Isalaelu?’ ko te folafolaga a Ieova.
‘E a, ne seki aumai ne au a Isalaelu ki tua mo te fenua o Aikupito,+
Tino Filisitia ki tua mo Keleta,+ kae ko Sulia ki tua mo Kila?’+
8 ‘Kiloke! A mata o te Aliki Sili ko Ieova ko saga atu ki te malo agasala,
Kae ka fakaseai ne ia latou mai luga i te laukele.+
Kae ka se fakaseai katoatoa atu ne au a te kāiga o Iakopo,’+ ko te folafolaga a Ieova.
9 Kiloke! Ko tuku atu ne au te fakatonuga,
Kae ka lūlū ne au te kāiga o Isalaelu i luga i atufenua katoa,+
E pelā eiloa mo te tino e lūlū ne ia se mea faka‵ma,
Kae seai eiloa se kilikili e tō ki te laukele.
10 Ka ‵mate latou e auala i te pelu, ko tino agasala katoa i oku tino,
Ko latou kolā e fai mai, “A te puapuaga ka se fakapilipili mai ki a tatou io me oko mai ki a tatou.”’
11 I te aso tenā ka fakatu aka ei ne au a te fale fakamalumalu* o Tavita+ telā ko oti ne siga ki lalo,
Ka faite faka‵lei ne au a* pūga i ei,
Kae toe faka‵fou ne au ana mea ma‵sei;
Ka toe faite ne au e pelā eiloa mo mea i aso mua,+
12 Ko te mea ke fai mō latou a mea e ‵toe mai i Etoma,+
Mo atufenua katoa kolā ne takutaku i ei toku igoa,’ ko te folafolaga a Ieova, telā e fai ne ia te mea tenei.
13 ‘Kiloke! Ka oko mai a aso,’ ko te folafolaga a Ieova,
‘Ka sui ei ne te tino fakamalū laukele a te tino ‵kati fuataga,
Kae ko te tino lakalaka fuagavine ka sui ne ia te tino e amo ne ia a fuaga;+
Kae ka moti‵moti mai i mauga a te uaina magalo,+
14 Ka toe fakamaopoopo mai ne au oku tino Isalaelu kolā ne ave fakapagota,+
Kae ka toe faite ne latou a fakai ne ofa ki lalo kae ‵nofo i ei;+
Ka ‵toki ne latou a togavine kae inu olotou uaina,+
Kae fai a fatoaga kae ‵kai ki olotou fuagalakau.’+
15 ‘Ka ‵toki ne au latou i luga i te lotou laukele,
Kae ka se toe unu eiloa latou
Mai te lotou fenua telā ne tuku atu ne au ki a latou,’+ ko muna a Ieova te otou Atua.”
Tena uiga “Fai Pelā me se Amoga” io me “Amo se Amoga.”
Io me “amioga solitulafono.”
Epelu, “te tino e puke i te tokotoko.”
Epelu, “te tino e puke i te tokotoko.”
Io me “amioga solitulafono.”
Epelu, “famasino.”
Io me “fakatonuga.”
Io me “se tautoga.”
Io me “faletapu.”
Io me “latou kolā e loto ma‵losi.”
Io me kāti, “māfai e seai se poa i loto i ei?”
Io me “amioga solitulafono.”
Io me “matai.”
Io me “‵teke.”
Io me “seai ne meakai ne tuku atu ke ‵kai ki ei.”
Kāti ko te fetū ko Mataliki i te fakaputuga fetū ko te Taulusi.
Kāti ko te fakaputuga fetū ko te Melemele.
Io me “lafoga o te laukele.”
A atua e lua konei e mafai o fakasino atu ki te paneta ko Saturn, telā e tapuaki atu ki ei a tino e pelā me se atua.
E mautinoa me fakasino atu ki malo o Iuta mo Isalaelu.
Io me “tamā pulumakau.”
Io me “mea fakatagi‵tagi e isi ne uka i ei.”
Epelu, “ne seki ma‵saki i.”
Epelu, “Te taina o tena tamana.”
Epelu, “puke a sau mō tatou eiloa.”
Io me “te auala ki loto i Hamata.”
Telā ko Ianuali mo Fepuali.
Epelu, “tu aka ki luga.”
Epelu, “tu aka ki luga.”
Onoono ki te MF E14.
Onoono ki te MF E14.
Io me “lalolagi.”
Io me “Seoli,” telā ko te tanuga masani o tino. Onoono ki te FP.
Io me “lalolagi.”
me “faleie; tamā fale.”
Io me “olotou.”
Epelu, “ka liuvai.”