E Folafola Mai ne te Atua se Palataiso

TENEI eiloa a te ata o se palataiso kāti e fai pelā mo te mea telā ne fakaasi atu ne te Atua ki tena pelofeta ko Isaia. Ne ola a Isaia i se taimi mai tua malie ifo o te taimi ne ola ei a Iona.

A te uiga o te palataiso ko te “fatoaga” io me se “koga e mafai o malōlō i ei.” E mata, e fakamasaua atu i ei ki a koe e uiga ki se mea telā ko oti ne lavea ne tatou i te tusi tenei? E tai ‵pau eiloa mo te fatoaga gali telā ne faite ne Ieova te Atua mō Atamu mo Eva, i ne? Kae e mata, ka fai a te lalolagi kātoa pelā me se palataiso?

Ne fai atu a Ieova ki tena pelofeta ko Isaia ke tusi a mea e uiga ki te okomaiga o te palataiso fou mō tino o te Atua. Ne fai atu a ia: ‘A kuli vao mo mamoe ka ‵nofo tasi i te filemu. A tamā pulumakau mo leona fo‵liki ka ‵kai fakatasi, kae ka tausi latou ne tamā tama‵liki. Ke oko eiloa ki se pepe ka se fakamataku māfai e tafao a ia i tafa o se gata poisini.’

‘E se mafai o tupu a te mea tenei,’ ka fai mai a tino e tokouke. ‘Ko oti ne ‵tupu sāle a fakalavelave i te lalolagi, kae ka fai faeloa penā.’ Kae mafaufau ki te mea tenei: Se a te vaegā koga nofo ne tuku atu ne te Atua ki a Atamu mo Eva?

Ne tuku atu ne te Atua a Atamu mo Eva ki loto i se palataiso. Ona fua ko te mea ne seki faka‵logo laua ki te Atua, ne galo ei i a laua a te lā koga nofo gali, kae ne gasolo aka o ma‵tua kae ‵mate. E folafola mai ne te Atua me ka toe tuku atu ne ia ki tino kolā e a‵lofa ki a ia a mea foki eiloa kolā ne ‵galo i a Atamu mo Eva.

I te palataiso fou telā ko pili o oko mai, ka seai se mea e fakalogo‵mae io me fakamasei mea. Ka maua i ei se filemu ‵lei katoatoa. Ka ma‵losi kae fia‵fia a tino katoa. Ka fai eiloa pelā mo te mea ne manako ki ei te Atua i te kamataga. Kae ka tau‵loto fakamuli tatou ki te auala ka aumai ei ne te Atua a te mea tenei.