E Takitaki ne Faifeau Kolā e Ga‵lue Tumau a te Galuega Talai
Kāti te tino muamua telā ne āsi atu ki a koe pelā me se Molimau a Ieova se faifeau telā e paenia tumau io me se misionale. Kāti ne fesili ifo koe me e mafai pefea o ga‵lue tumau a tino konā i te taviniga, me e se ‵togi a Molimau a Ieova ke fai ne latou te galuega tenā.
A Molimau a Ieova katoa kolā ko oti ne tukugina atu kae papatiso foki ko fai mo fai ne faifeau. Kae ko te taulasiga o latou e fakamaumau fua ne nai itula i te vaiaso ki te lotou galuega talai ona ko tiute o te kāiga io me ko nisi tiute aka foki. Kae ko te fia afe o Molimau i te lalolagi kātoa ko oti ne fakati‵titi a mea i olotou olaga ko te mea ke lava olotou sene tausi e maua mai i galuega sē tumau, kae ke mafai foki o fakamaumau ne latou se 1,000 tupu itula i te faiga o te galuega talai i te tausaga.
E tonu, e se uke a tupe a faifeau kolā e ga‵lue tumau pelā me ne paenia ke ‵togi ei olotou mea, kae tenā loa te auala e ‵sala muamua ei ne latou te Malo o te Atua. Kae e maua ne latou a fakamanuiaga e uke. Se mea gali ‵ki ke mafai o faipati atu ki nisi tino e uiga ki te Muna a te Atua i se 90 itula i masina katoa. Ko fai ei ne te faifeau tumau ke tai momea aka tena atamai i te galuega talai kae ke lava foki tena taimi ke toe foki faka‵lei atu ki tino fia‵fia. E maua i ei a ikuga fakama‵losi loto. E lava olotou mea faka-te-lalolagi, kae e fia‵fia eiloa latou ki mea kolā ko maua ne latou.—Mataio 6:33.
I a Fepuali 1943, ne fakatu aka ei ne te Sosaiete o te Faleleoleo Maluga a te Akoga Faka-te-Tusi Tapu a te Faleleoleo Maluga, ko Kiliata. A te pogai ko te fakaakoakoga o faifeau ata‵mai kolā e ga‵lue tumau pelā me ne paenia ke tavini atu pelā me ne misionale i fenua fakaa‵tea. A te kōsi, telā e lima masina tena leva, e aofia i ei se sukesukega maea ki te Tusi Tapu, tala faka-te-Tusi Tapu, te fakapotopotoga a Ieova, mo nisi mataupu aka foki ke toka ‵lei latou mō te taviniga i se fenua fakaatea.
E ‵togi ne te Sosaiete a te malaga ki te fenua e galue i ei te misionale kae e ‵togi foki a meakai ‵lei mo te koga ‵lei ke nofo i ei i se fale misionale. E avatu foki ki misionale taki tokotasi se tamā fesoasoani i mea tautupe mō olotou mea totino. E fai ne te kau misionale olotou tusaga i galuega i te fale i te ‵togiga o meakai, te faiga o meakai, mo te ‵fuluga o te fale. Ona ko te fesoasoani ‵lei tenā e mafai ei ne te kau misionale o fakamaumau se 140 tupu itula i masina katoa ki te talaiga mai fale ki fale mo te faiga foki o akoga faka-te-Tusi Tapu fakatasi mo tino fia‵fia.
A te tokoukega o misionale konā e uga atu i te fia afe maila mai olotou kāiga, mo olotou fa‵kai. Ne ‵tau o ‵fuli ne latou olotou olaga mo olotou tu mo aganuu, mo meakai ‵fou, tau-o-aso ‵fou kae ke fai‵pati foki ki ‵gana fakaa‵tea. E fai ne latou te galuega tenā me e a‵lofa latou ki tino kae e fia fesoasoani malosi atu foki latou ki tino ke tau‵loto e uiga ki te Malo o te Atua.
Mai i te 1943 ki te 1985, ne fai ei i te Akoga Faka-te-Tusi Tapu a te Faleleoleo Maluga, ko Kiliata, a vasega e 80 kae ne uga atu i ei a misionale e toko 6,000 tupu. Mai lalo i te tausiga a te Sosaiete, ne takitaki ei ne latou te faka‵lasiga o akoakoga faka-te-Tusi Tapu i Afelika, Amelika i te Kogāloto kae ki Saute foki, Asia, te Pasefika ki Saute, kae e uke foki olotou mea ne fai i Eulopa.
Faitalia me e ga‵lue tumau a Molimau a Ieova pelā me ne paenia io me ne misionale io me e se ga‵lue tumau, e ga‵lue eiloa latou e aunoa mo se ‵togi. E fakamaumau ne latou olotou taimi mo tupe, penā foki loa mo olotou malosi, ke fesoasoani atu ki nisi tino ke maua ne latou te iloaga telā e iku atu ki te ola se-gata-mai.—Ioane 17:3.
• E mafai pefea ne nisi Molimau a Ieova o ga‵lue tumau i te galuega talai, kae kaia e fai ei ne latou te mea tenā?
• E fakamasani pefea a faifeau mō te galuega fakamisionale?
• Ne a fesoasoani e maua ne misionale māfai ko ga‵lue latou i olotou tofiga i fenua fakaa‵tea?
[Ata i te itulau e 22]
Te fakamaui: Se potu o te Akoga ko Kiliata i Brooklyn, Niu Ioki, Amelika
Te fakaatamai: E akoako atu ne se misionale a te Muna a te Atua i Papua Niu Kini
[Ata i te itulau e 23]
E talai atu ne faifeau kolā e paenia mo misionale te Muna a te Atua i fenua kese‵kese
Pasili
Tominiko
Sepania
Siela Leone, i Afelika