Fesili Mai te Kau Fai‵tau
E mata, e isi ne vae o te gata telā ne faipati ki a Eva?
E pelā mo te mea ne tusi i te Kenese 3:14, ne faipati ‵tonu atu a Ieova te Atua ki te gata telā ne fakaloiloi ne ia a Eva i te fatoaga o Etena. Ne fai atu te Atua: “A koe ka fakasala e ‵tusa mo te mea tenei ne fai ne koe; ko koe ake eiloa mai manu katoa ka nofo mo te fakasalaga tenei: Mai te taimi tenei, a koe ka ‵solo ki tou tinae, ka ko te ‵pefu ka fai mo au meakai ke oko ki tou mate.” E se fakaasi tonu mai i te Tusi Tapu me ne isi muamua ne vae o te manu telā ne takitaki‵se ne ia a Eva. E ui eiloa e fai ne pati i te Kenese 3:14 ke mafau‵fau a nisi tino penā, e se ‵tau o fakaiku aka ne tatou me mai mua o te fakamalaiaga tenei, ne isi eiloa ne vae o gata. Kaia?
Me i te tino telā e manako a Ieova ke fakasala ko Satani—ko te agaga se lavea telā ne fakaaogā ‵se ne ia te manu tenā. E fakamatala mai ne te Tusi Tapu a Satani me ko te “tamana foki eiloa o tino ‵loi,” mo te “gata mua.” E fakasino atu a tugāpati e lua konei ki te fakaaogāga ne Satani se manu telā e lavea ki mata, ko te gata, ke faipati atu mō ia ke takitaki ei a Eva ke ‵teke atu ki te fakatonuga a te Atua.—Ioane 8:44; Fakaasiga 20:2.
Ne faite ne te Atua a gata, kae ko oti foki ne fakaigoa ne Atamu a latou mai mua o fakaaogā ne Satani ke fakaloiloi a Eva. E se ‵tau o ‵losi atu ki te gata telā ne faipati atu ki a Eva kae seai sena mea e iloa. Tela la, ne seki iloa ne te gata i a ia ne fakaaogā ‵se ne Satani, kae ne seki malamalama foki a ia i te fakasalaga telā ne fai ne te Atua ki tino sē faka‵logo kolā ne aofia i te agasala tenā.
Kaia la ne faipati ei a te Atua e uiga ki te tulaga malalo o te gata? E fetaui ‵lei eiloa a faifaiga masani a te gata e pelā mo te ‵solo i tena tinae mo tena alelo telā e fakasae sāle ki tua e pelā eiloa me kai ki ‵pefu, mo te tulaga o Satani telā ko oti ne fakamalalogina. Mai tena tulaga maluga telā ne nofo muamua a ia i ei e pelā me se agelu a te Atua, ne tuku ifo a ia ki te toe tulaga malalo telā e fakasino atu te Tusi Tapu ki ei me ko Tatalusi.—2 Petelu 2:4, NW.
E se gata i ei, e pelā mo te gata telā e mafai o ū ne ia te mulivae o se tino, ka ū foki ne Satani a te ‘mulivae’ o te “fanau” a te Atua i tena tulaga malalo tenā. (Kenese 3:15) A te fanau sili tenā, ko Iesu Keliso, telā ne logo‵mae i se taimi toetoe mai lalo i faifaiga a sui o Satani. Kae i se taimi pili mai mua nei ka tuki pala ei a te ulu fakatusa o te gata ne Keliso mo ana taina Kelisiano fakaekegina kolā ko oti ne faka‵tu aka. (Loma 16:20) Tela la, a te fakamalaiaga telā ne fai atu ne te Atua ki te gata e fakaata manino mai i ei te fakamalaloga mo te fakaseaiga se-gata-mai o te “gata mua,” ko Satani te Tiapolo.