E Iloa ne Koe Tou Tamana Faka-te-lagi?

E ILOA ‵lei ne koe tou tamana? Kāti ka ‵tagi sala te fesili tenei māfai ne tupu aka koe i se kāiga alofa. Kāti ka fai mai koe, ‘Ao, e iloa ‵lei ne au a ia!’ E tonu, e iloa ne te tokoukega o tino olotou tamana, i mea e fiafia mo mea kolā e se fiafia a ia ki ei, te auala e saga atu ei a ia ki nisi tulaga, mo te auala e tausi atu ei a ia ki tena kāiga.

Kae kāti e isi eiloa ne taimi ko ofo koe ke lavea atu te ‵kese o te auala e saga atu ei tou tamana ki se mea. E pelā mo te iloa ne se tama tagata me i tena tamana se tino uiga filemu kae loto maulalo​​—ke oko ki te taimi ko tupu ei se fakalavelave fakafuasei. E fatoā lavea atu ne ia te loto toa o tena tamana i te puipuiga o tena kāiga.

Kae e a te ‵tou Mafuaga? E fai mai penei e uiga ki a ia: “Me ko ia e ola kae gasue‵sue ei tatou.” (Galuega 17:28) E ‵nofo kaitalafu tatou ki te Atua; me e fai a ia mo Tamana ki tino katoa kolā e ola. (Isaia 64:8) Kāti e penā eiloa ou lagonaga e uiga ki te Atua, kae se mea ‵lei kae ‵tau foki. Kae e uke atu foki a nisi mea e uiga ki a ia e ‵tau o iloa kae tauloto foki ne tatou​​—ke maua ei a mea aogā mo te fiafia.

E fakalagolago eiloa ou lagonaga mo te āva ki tou tamana faka-te-foitino ki te iloa ‵lei ne koe a ia. E penā foki loa, ko te iloa ‵lei ne koe o te Atua, ko te momea aka foki o te pili o tou fesokotakiga mo ia. E mafai o fesoasoani atu te Atua ke kufaki koe i tulaga faiga‵ta mo fakalavelave o te olaga māfai e taumafai ke iloa ‵lei ne koe a ia kae fakamasani ki te faiga o tena loto.

A te Atua se vaegā tino pefea? E ‵tau o pokotia pefea ‵tou lagonaga ki a ia ona ko ana uiga? E mata, e maua ne koe a tiute māfai ko iloa ‵lei ne koe a ia? Ka maua ne koe a tali ki fesili konei i te mataupu telā e ‵soko mai.

[Caption on page 3]

E mafai o pokotia ou lagonaga ki nisi tino i te lasi o te iloa ‵lei ne koe o latou