E Fesili Mai ‵Tou Tino Fai‵tau

E Mata, a te Molimau a Ieova se Lotu Poletesano?

E se mafau‵fau a Molimau a Ieova me i a latou se vaega o te lotu Poletesano. Kaia e se fai ei penā?

Ne sae aka a te Lotu Poletesano i te 16 o senitenali i fenua o Eulopa i se taumafaiga ke toe fakamaopoopo a te Lotu Katolika i Loma. A te pati “poletesano” ne fakagalue muamua ki soko o Matini Lutelu i te fono i Speyer i te 1529. Kae i te taimi tenā, ne fakasino atu a te pati tenā ki tino katoa kolā e faka‵logo ki fakatakitakiga mo fakamoemoega e uiga ki te Fakafouga tenā. Tela la, e fakamatala mai i te Merriam-Webster’s Collegiate Dictionary, te lomiga e 11, a te pati Poletesano e pelā me e fakasino atu ki “se lotu telā e ‵teke atu ki te manatu me e isi se pule a te Pope i te lagi mo te lalolagi kae ke faka‵logo ki akoakoga kolā ne faka‵sae aka i te taimi o te Fakafouga, me e mafai fua o maua ne te tino a te taliaga a te Atua mai i te fakatuanaki, me i tino tali‵tonu katoa ne faifeau, kae ko te Tusi Tapu ko te mafuaga fua o te munatonu.”

E tiga eiloa e se talia ne Molimau a Ieova a te pulega a te pope i te lagi mo te lalolagi kae ‵lago katoatoa atu latou ki te ‵mana o te Tusi Tapu, e ‵kese eiloa latou mai i te lotu Poletesano i auala tāua e uke. A te ‵tonuga loa, e fakasino atu a The Encyclopedia of Religion ki Molimau a Ieova e pelā me e “tu ‵kese.” Mafaufau la ki auala e tolu e ‵kese ei latou.

Muamua la, e tiga eiloa e ‵teke atu a te lotu Poletesano ki nisi faifaiga a te lotu Katolika, ne fakatumau eiloa ne takitaki lotu a tulafono a te lotu Katolika, e pelā mo te talitonuga ki te Tolutasi, te afi i seoli, mo te agaga telā e tumau i te ola. Kae e tali‵tonu a Molimau a Ieova me e se fe‵paki fua a akoakoga konā mo te Tusi Tapu kae e fakamalosi aka foki i ei se kilokiloga ‵se e uiga ki te Atua.​—Ke onoono ki te itulau e 4-7 o te mekesini tenei.

A ko te lua, e se fakamasei ne Molimau a Ieova a te suā talitonuga, kae e fakaasi atu ne latou a fakatonuga i se auala ‵lei. E mafaufau ‵mafa latou ki fakatakitakiga a te Tusi Tapu: “A te tavini a te Aliki e se aofia i kinauga, kae e ‵tau mo ia o alofa ki tino katoa, se faiakoga ‵lei, kae loto kufaki. E ‵tau o loto maulalo māfai e faka‵tonu ne ia a tino kolā e kinau atu ki a ia.” (2 Timoteo 2:​24, 25, The Jerusalem Bible) E fakaasi mai ne Molimau a Ieova a te sē fetaui ‵lei o pati i te Tusi Tapu mo mea kolā e akoako atu ne lotu e uke. Kae e se fakamoe‵moe latou ke ‵fuli ne latou a nisi fakapotopotogā lotu. I lō te fai penā a te lotou fakamoemoega ko te fesoasoani atu ki tino fia‵fia tonu ke maua ne latou te poto tonu e uiga ki te Atua mo tena Muna, ko te Tusi Tapu. (Kolose 1:​9, 10) Kafai e se fia‵fia a tino o nisi lotu ki a latou, e ‵kalo keatea eiloa a Molimau a Ieova mai te kinau atu ki a latou.​—2 Timoteo 2:​23.

A ko te tolu, i lō te mavae‵vae o latou e pelā mo lotu Poletesano kolā ko ‵nofo mavae‵vae, koi tumau eiloa a te ‵kau fakatasi o Molimau a Ieova e pelā me se kautaina i te lalolagi kātoa. Kafai ko oko mai ki akoakoga i te Tusi Tapu, e tau‵tali atu eiloa a Molimau a Ieova i fenua e sili atu mo te 230 ki te fakatakitakiga a te apositolo ko Paulo ke “fakagata te otou finau.” E se mavae‵vae latou. I lō te fai penā, e ‘fusi latou i te manatu e tasi mo te fakamoemoega e tasi.’ (1 Kolinito 1:10) E taumafai fakatasi latou mo olotou taina tali‵tonu o “fai te loto tasi telā ne tuku atu ne te Agaga, i te filemu telā e fusi ne ia koutou.”​—Efeso 4:3.