E Fesili Mai ‵Tou Kau Fai‵tau . . .

E mata, e talia ne Molimau a Ieova a togafiti fakatokita?

▪ Ne fai mai a Iesu me i “tino sē ma‵saki, e se ma‵nako ki se tokita, ka ko latou fua kolā e ma‵saki.” (Mataio 9:​12) Ne fakaasi mai ne ia me e se ‵teke atu a te Tusi Tapu e uiga ki te ‵salaga o se fesoasoani mai tokita. Kae e talia mo te fiafia ne Molimau a Ieova a vailakau mo togafiti fakatokita. E ma‵nako latou o fakatumau a te malosi ‵lei kae ke ola leva. A te ‵tonuga loa, e pelā mo te Kelisiano i te senitenali muamua ko Luka, a nisi Molimau a Ieova ne tokita.​​—Kolose 4:​14.

Kae e se talia ne Molimau a Ieova a vaegā togafiti kolā e fe‵paki mo fakatakitakiga i te Tusi Tapu. E pelā me se fakaakoakoga, e se talia ne latou a te ‵suki ki te toto, me e se talia ne te Tusi Tapu ke faulu te toto ki te foitino. (Kenese 9:4; Levitiko 17:​1-​14; Galuega 15:​28, 29) E taku fakamasei foki ne te Muna a te Atua a togafiti ‵lei mo faifaiga kolā e aofia i ei a te fakaaogaga o “faifaiga faivailakau.”​​—Isaia 1:​13, NW; Kalatia 5:​19-​21.

E uke a fa‵kaimasaki e maua i ei a vailakau fakaola tino kolā e se fe‵paki mo tulaga o te Tusi Tapu. A vaegā togafiti konā, kolā e talia ne Molimau e tokouke, e ‵lei atu fakafia i lo vailakau kolā e se fetaui mo mea kolā e manako ki ei te Atua.

E tonu, e uke atu a filifiliga e mafai o fai māfai ko oko atu ki fakalavelave e uiga ki te ola ‵lei. A te mea telā e mafai o aoga ki se tino e tokotasi e mafai o se aoga malosi ki te suā tino. Tela la, a tino kolā e ‵sala atu ki toe auala ‵lei mo togafiti e uiga ki se masaki e olioli eiloa ke toe onoono faka‵lei latou ki olotou filifiliga.​​—Faataoto 14:15.

E se ko Molimau katoa ka ‵pau olotou filifiliga e uiga ki togafiti fakatokita. E talia ne te Muna a te Atua a te kese‵kese o loto lagona o Kelisiano telā e seai se tulafono fakavae i te Tusi Tapu e ‵teke ki ei. (Loma 14:​2-4) Tela la, e ‵tau mo tino taki tokotasi katoa o sukesuke so se togafiti kae fakamautinoa aka me e se fe‵paki mo tena loto lagona telā ko oti ne akoakogina.​​—Kalatia 6:5; Epelu 5:​14.

Ka onoono faka‵lei eiloa se Molimau ki ana fakaikuga e pelā eiloa mo se tino fakateletele telā e tele atu i se magā auala telā e ‵fonu i mea fakateletele. Kafai e tautali atu fua a ia i motoka i ana mua kae fakamakini atu a ia i se magā auala, e uke a fakalavelave e iku atu ki ei. A te tino fakateletele poto ka fakateletele malie kae onoono ki oloologa o motoka a koi tuai o tele atu a ia. I se auala tai ‵pau, e se ‵tau o fai fakavave ne Molimau a fakaikuga i mea tau fa‵kaimasaki io me fai ne latou se filifiliga telā ko lauiloa. I lo te fai penā, e fuafua faka‵lei aka eiloa ne latou olotou filifiliga kae suke‵suke ki fakatakitakiga i te Tusi Tapu a koi tuai o fai ne latou se fakaikuga.

E mautinoa eiloa me e fia‵fia a Molimau a Ieova ki te ga‵lue ‵mafa mo te tuku katoatoa atu o latou kolā e fakatoka ne latou a togafiti. E loto fakafetai foki latou ki fakamafanafanaga e maua ne se masaki mai i tino penā.