TALI KI FESILI MAI TE TUSI TAPU

Ko oi te igoa o te Atua?

E isi katoa ne igoa o tino i ‵tou kāiga. Ke oko foki loa ki ‵tou manu fagai, e isi ne olotou igoa! E mata, e sē se mea ‵lei ke isi foki se igoa o te Atua? E uke a tofi o te Atua e fakaasi mai i te Tusi Tapu e pelā mo te Atua Malosi Katoatoa, te Aliki Sili mo te Mafuaga, kae e isi foki sena igoa totino.​—Faitau te Isaia 42:8, Tusi Paia, Samoa.

E maua i ‵fuliga e uke o te Tusi Tapu a te igoa totino o te Atua i te Salamo 83:18. I te Tusitapu Tauloto, e fai mai a te fakamatalaga fakaopoopo i te Kenese 2:4, penei: “I te koga telā ne tusi faka-Epelu a te igoa Iāuē telā ne masani sāle o ‵fuli taumua ki a Ieova ko fakaaogā ne te ‵fuliga tenei te Aliki, mai i te fakaaogāga telā ko masani i ‵fuliga faka-‵Palagi. E pelā mo te Tusi Paia, Samoa e faitau penei a te fuaiupu tenā: “I o koe te igoa ko Ieova, ko koe tokotasi te Atua Tafasili i te Maluga i te lalolagi kātoa.”

Kaia e ‵tau ei o fakaaoga ne tatou a te igoa o te Atua?

E manako te Atua ke fakaaoga ne tatou tena igoa totino. E fakaaoga ne tatou a igoa o tino māfai e fai‵pati tatou mo tino kolā e a‵lofa tatou ki ei, e pelā mo ‵tou taugasoa pele. E mata, e se ‵tau foki o fai tatou penā ki te Atua? I tafa i ei, ne fakamalosi mai a Iesu Keliso ke fakaaoga ne tatou te igoa o te Atua.​—Faitau te Mataio 6:9; Ioane 17:26.

Ke fai tatou mo taugasoa o te Atua, e ‵tau o iloa ne tatou a mea e uke atu e uiga ki a ia, i tafa o te iloa ne tatou a tena igoa. E pelā mo te mea tenei, a te Atua se vaegā tino pefea? E mata, e mafai eiloa o fakapilipili atu koe ki te Atua? E mafai o maua ne koe a tali ki fesili konā i te Tusi Tapu.