Ne Oko Mai a te “Mea e se Mafai o Fakapuli” i te Taimi Tonu

“MEA e se mafai o fakapuli!” Tenā te fakamatalaga e fai ne tino e tokouke ki te ata ko te “Creation Drama.” Ne oko mai i te taimi tonu kae ne seki mafai o puli i tino kolā ne lavea ne latou. E tonu, ne tuku atu i te “Creation Drama” se molimau lasi e tavae atu ei ki a Ieova mai mua malie loa o fakasaua malosi atu a te kau a Hitler ki Ana tino i Eulopa. Kae se a loa te “Creation Drama”?

I te 1914, ne ‵tala mai i ei ne te laumua o tino o Ieova i Brooklyn, Niu Ioki, U.S.A., a te ata ko te “Photo-Drama of Creation.” E valu itula te leva o te ata fai tāga mo ata sē gasue‵sue, e Ianu valevale kae isi se leo. Ko oti ne onoono a te fia miliona o tino i te lalolagi kātoa ki te “Photo Drama.” E isi se vaega toetoe o te ata​—ko te “Eureka Drama”​—kae ne ‵tala mai foki i te 1914. Kae mai te 1920 o fano ki mua, ne gasolo o ma‵sei a ata mo masini kolā e pei ei a ata. E ui i ei, e tokouke a tino ne ma‵nako o toe onoono ki te “Photo-Drama.” Pelā me se fakaakoakoga, ne fesili mai a tino mai i Ludwigsburg, Siamani, “Ka toe pei māfea a te ‘Photo-Drama’”? Se a te mea e mafai o fai?

Ke fakataunu a te manakoga ke toe fakaasi a te Drama, ne ‵togi ne sui o te kāiga Peteli i Magdeburg, Siamani, a ata mai i se kau fakasalalau tala i Paris, Falani, mo ata se gasue‵sue mai i se kamupane i Leipzig mo Dresden. Ne tuku fakatasi a mea konei mo nisi vaega mua o te “Photo-Drama” kolā koi mafai o fakaaoga.

Ne fai ne te Taina ko Erich Frost, se tagata fatu pese, a tagi o pese ke olo tasi mo te ata. A te vaega e tasi o te fakamatalaga o te ata ne puke mai i te ‵tou tusi ko te Creation. Tenā te pogai ne tuku atu ei a te igoa fou ki te ‵toe fakafouga o te “Photo-Drama”​—ko te “Creation Drama.”

E ‵pau a te loa o te Drama fou mo te “Photo-Drama”​—e valu itula​—kae e takitasi a vaega e pei i afiafi katoa. Ne tuku mai i te ata a fakamatalaga aoga e uiga ki aso ne faite ei a mea, tala fakasolopito o te Tusi Tapu mo malo o tāgata, kae fakaasi tonu mai i ei a te fakata‵mala o lotu ‵se o ‵saga atu ki tino. Ne pei a te “Creation Drama” i Austria, Siamani, Luxemburg, mo Switzerland, mo tino i te ‵gana Siamani i nisi koga aka.

Ne fakamatala mai a Erich Frost: “I te taimi ne pei ei a te ata, ne fakamalosi atu au ki taku kau ta‵ta ke fakaaoga a te taimi e ma‵nava malie ei o olo i laina takitasi o tufa a ‵tou tusi mo tamā tusi. Ne tufa ne matou a tusi e uke atu i te auala tenei i lō te olo mai fale ki fale.” E masaua ne Johannes Rauthe, telā ne fakatoka ne ia a te peiga o ata i Poland mo te Czech Republic i aso nei, me ne tuku atu ne tino e tokouke kolā ne olo atu a olotou fakatuatusi ko te mea ke toe fakailoa atu ki a latou. Ne fai a fakatuatusi konā mo fai se fakavae o toe asiga magoi.

I te 1930 o fano ki mua, ne ‵fonu faeloa a fale kolā e pei ei a te “Creation Drama,” kae ko tino katoa i fa‵kai konā ne fai‵pati e uiga ki Molimau a Ieova. I te 1933, toeitiiti kae kātoa te tasi miliona tino ne ‵kau mai ki te peiga o te ata ne ‵tou ofisa lagolago i Siamani. “Ke onoono fua ki te ata,” e masaua ne Käthe Krauss, “i aso e lima konā, e ono maila (10 km) i te aso e sa‵sale ei matou i vao lakau, kake i mauga kae olo i vanu i te auala e tasi.” “Ne fakatakato ne te ‘Creation Drama’ a te fakavae mō toku alofa ki te munatonu,” ko pati a Else Billharz.

E fai mai a Alfred Almendinger me i te taimi ne onoono ei tena mātua i te ata, “ne fiafia ‵ki eiloa tou fafine tenā ne ‵togi ei ne ia se Tusi Tapu kae ‵sala ki te pati ‘pekatuli.’” Ne seki maua ne tou fafine a te pati i loto i te Tusi Tapu, fakagata ei a tena fano ki tena lotu mua kae papatiso. “E tokouke ‵ki eiloa a tino ne o‵mai ki loto i te munatonu e auala i te ‘Creation Drama,’” ne masaua ne Erich Frost.​—3 Ioa. 1-3.

I te taimi eiloa telā ne tokouke ‵ki ei a tino e fia onoono i te “Creation Drama” kae malosi aka foki i ei a te pulega a te kau Nazi i Eulopa. Kamata mai i te 1933, ne fakatapu ei a te galuega a Molimau i Siamani. Mai te taimi tenā ke oko loa ki te fakaotiga o te taua i te lua a te lalolagi i te 1945, ne logo‵mae ‵ki a tavini a Ieova i Eulopa i fakasauaga. E valu tausaga ne nofo fakapagota ei a Erich Frost i te falepuipui. Ne sao tou tagata kae galue fakamuli ifo i te Peteli i Wiesbaden, Siamani. Ko oko eiloa i te ‵lei me i te “Creation Drama” telā e se mafai o fakapuli ne oko mai i te taimi tonu ke fakamalosi aka ei a te loto ma‵losi o Kelisiano e tokouke kolā ko pili o fe‵paki mo tofotofoga o te fakatuanaki i te Taua i te Lua a te Lalolagi!​—Mai i ‵tou faletusi mua i Siamani.