TALI KI FESILI MAI TE TUSI TAPU

Kaia e taku ei a Iesu ko te Tama a te Atua?

E seai se avaga tonu a te Atua telā e ‵tau ei o fai a ia mo tamana. A ia ko te Mafuaga o mea ola katoa. Ne faite a tino i se auala telā e mafai ei o tau‵tali latou i uiga o te Atua. Tenā te pogai ne taku ei a te tino muamua eiloa ne faite, ko Atamu, ko te “tama a te Atua.” Ne taku foki a Iesu ko “te Tama a te Atua” me ne faite a ia fakatasi mo uiga e pelā mo tena Tamana.​—Faitau te Luka 3:38; Ioane 1:14, 49.

Ne faite anafea a Iesu?

Ne faite ne te Atua a Iesu a koi tuai o faite ne ia a Atamu. A te tonuga loa, ne faite ne te Atua a Iesu kae fakaaoga a ia ke fai a nisi mea katoa, e aofia i ei agelu. E tenā te pogai e taku ei ne te Tusi Tapu a Iesu ko “te uluaki o mea katoa ne faite” ne te Atua.​—Faitau te Kolose 1:15, 16.

A koi tuai o fanau a ia i Peteleema, ne ola a Iesu e pelā me se tino faka-te-agaga i te lagi. I te okoga ki te taimi tonu, ne fakamasiki mai ei ne te Atua a te ola o Iesu mai te lagi ki te moegatama o Malia ko te mea ke mafai o fanau mai a ia e pelā me se tagata.​—Faitau te Luka 1:30-32; Ioane 6:38; 8:23.

Kaia ne fai ei ne te Atua ke fanau a Iesu i te lalolagi e pelā me se tagata? Se a te vaega fakapito ne fakataunu ne Iesu? E mafai o maua ne koe a tali ki fesili konā i loto i te Tusi Tapu, kae ka momea aka i ei a tou malamalama mo tou loto fakafetai ki mea ne fai ne te Atua mo Iesu mō koe.