TALI KI FESILI MAI TE TUSI TAPU

E mata, a te Tusi Tapu ko te Muna eiloa a te Atua?

E fakamoemoe eiloa koe ke tu ‵kese te Muna a te Atua, kae e fai eiloa pena a te Tusi Tapu. E lau i piliona o ‵kopi ko oti ne ‵lomi i te fia selau o ‵gana. A te poto e maua i te Tusi Tapu e isi sena ‵mana ke ‵fuli ei a tino ke tai ‵lei atu olotou olaga.​—Faitau te 1 Tesalonia 2:13; 2 Timoteo 3:16.

E iloa ne tatou me i te Tusi Tapu se tusi mai te Atua ona ko te mea e ‵valo tonu mai eiloa i ei a mea ka ‵tupu i aso mai mua. E seai se tagata e mafai o fai ne ia te mea tenā i a ia eiloa. Mafaufau ki te tusi o Isaia. E isi se ‵kopi ne faite i se vaitaimi e sili atu i te senitenali mai mua o fanau mai a Iesu ne maua atu i se ana i tafa o te Tai Mate. E fai mai i ei me ka se toe ai se tino e nofo i te fa‵kai o Papelonia. Ne taunu tonu muamua mai eiloa te mea tenā mai tua o te taviniga a Iesu i te lalolagi nei.​—Faitau te Isaia 13:19, 20; 2 Petelu 1:20, 21.

Ne tusi pefea te Tusi Tapu?

Ne tusi a te Tusi Tapu i se vaitaimi o tausaga e sili atu i te 1,600. E toko 40 a tino ne tusi ne latou te Tusi Tapu, kae e tasi eiloa te matua ne fai‵pati latou ki ei e aunoa mo te fe‵paki o olotou fakamatalaga. Ne tupu pefea te mea tenā? Ne takitaki ne te Atua olotou tusitusiga.​—Faitau te 2 Samuelu 23:2.

I nisi taimi, ne faipati atu te Atua ki tino tusitala o te Tusi Tapu e auala i agelu, fakaasiga, io me ko moemiti. E masani o tuku atu ne te Atua ana manatu ki mafaufau o tino tusitala kae tuku atu ei ke filifili loa ne latou a pati ke fakaasi atu ei te fekau a te Atua.​—Faitau te Fakaasiga 1:1; 21:3-5.