Te Pogai ne Sao Mai ei te Tusi Tapu

Ne sao mai te Tusi Tapu. Tenei ko mafai ei ne koe o maua kae faitau ki te ‵kopi o ia i aso nei. Kae kafai e fili aka ne koe se Tusi Tapu telā e ‵lei tena ‵fuliga, e mafai o mautinoa i a koe me faitau eiloa koe ki se ‵kopi telā e fetaui ‵lei mo tusitusiga mua.a Kae kaia ne tumau ei te Tusi Tapu faitalia a te pala, tekemaiga fakama‵taku, mo taumafaiga ne fai mo te iloa tonu ke ‵fuli te fekau i ei, kae fakaofoofogia te auala ne sao mai i ei? Se a te mea e tu ‵kese ei te tusi tenā?

Ne ‵pau te mea ne fakaiku aka ne tino a‵koga o te Tusi Tapu mo te apositolo ko Paulo, telā ne tusi mai penei: “A Tusitusiga Tapu katoa ne māfua mai i te Atua.” (2 Timoteo 3:16) E tali‵tonu latou i te pogai ne sao mai ei te Tusi Tapu, me ko te Muna tu ‵kese a te Atua kae ko te Atua foki loa ne puipui ne ia ke oko mai ki aso nei. A Faizal, telā ne sae mai i te kamataga o mataupu fakasolo konei, ne fai sena iloiloga ki fakamatalaga katoa kolā ne fai e uiga ki te Tusi Tapu. Kae ne poi a ia i te mea telā ne maua ne ia. Ne fatoa iloa ne ia me i te ukega o akoakoga kolā e lauiloa i Fenua o Lotu Kelisiano e se maua i loto i te Tusi Tapu. E se gata i ei, ne otia a ia i te fuafuaga a te Atua mō te lalolagi telā e fakaasi mai loto i Tena Muna.

“Nei la ko talitonu au i te Tusi Tapu tenei e nofo mo au se meaalofa mai i te Atua,” ko ana pati. “Kae kafai ne mafai ne te Atua o faite te iunivesi, e a, e se maua ne ia te malosi ke tuku mai ne ia se tusi kae puipui foki ne ia mō tatou? Kae kafai e sē penā, tena uiga ko fakatāpulagina te malosi o te Atua—Ke fakatapulā te malosi o te Tino Malosi Katoatoa​—ko oi la au ke fai ne au te mea tenā?”​—Isaia 40:8.