“E Tau ne Au a Fuataga o Vikiga ki a Ieova”

“A TAUA katoa i aso mua . . . e se nā loa ko lauiloa māfai ko fakatusa ki te taua muamua i Eulopa.” Ne fakamatala mai i The Watch Tower i a Setema 1, 1915, a te taua muamua o te lalolagi, telā ne pokotia fakamuli i ei a atufenua e 30. Ona ko te taua, ne lipoti mai The Watch Tower, penei: “A te galuega o te [Malo] ne taofi malie, maise loa i Siamani mo Falani.”

Mai te fakafesagai atu ki kinauga i mea tau tupe, mea fakapolitiki, mo mea fakafenua, ne seki malamalama katoatoa a Tino A‵koga ki te Tusi Tapu i te fakatakitakiga fakavae o te sē kau atu o se Kelisiano ki se feitu. Kae ne fakaiku aka ke folafola atu eiloa ne latou a te tala ‵lei. Ona ko tena manako ke fai sena tusaga i te galuega talai o te Malo, ne ōta ne Wilhelm Hildebrandt a ‵kopi o te tamā pepa ko The Bible Students Monthly i te ‵gana Falani. Ne seki ‵tau o nofo atu a ia i Falani e pelā me se tino talai tumau, kae e pelā me se sotia Siamani. A te tino tenei telā ne ‵tau o fai pelā me se fili kae pei ki gatutau, ne avatu ne ia te fekau o te filemu ki sotia Falani kolā ne sa‵sale i ana tafa.

A tusi kolā ne ‵lomi i The Watch Tower e fakaasi mai i ei me isi ne Tino A‵koga ki te Tusi Tapu i Siamani ne ma‵nako o talai atu te tala ‵lei o te Malo a koi ‵nofo atu latou i te taua. A te taina ko Lemke, telā ne galue e pelā me se tino tau o te tai, ne lipoti mai me ne maua ne ia se tokolima kauvaka fia‵fia. “I luga foki loa i te vaka, ne tau ne au a fuataga o vikiga ki a Ieova,” ne tusi mai a ia.

A Georg Kayser ne fano e pelā me se sotia ki te taua kae toe foki atu ki tena fenua e pelā me se tavini a te Atua tonu. Se a te mea ne tupu? Ne maua ne ia se tusi a Tino A‵koga ki te Tusi Tapu, kae ne talia ne ia mo te loto kātoa a te munatonu e uiga ki te Malo, kae ne taofi ei tena kau atu ki te taua. Tela la, ne galue a ia i te ofisa o te kautau. I te otiga o te taua, ne tavini atu a ia e pelā me se paenia loto finafinau mō se fia tausaga.

E tiga eiloa ne seki malamalama katoatoa a Tino A‵koga ki te Tusi Tapu e uiga ki te sē ‵kau atu ki se feitu, ne tu ‵kese eiloa olotou amioga mo faifaiga mai tino kolā e olo atu ki te taua. E tiga eiloa e ‵lago atu a tino politiki mo takitaki lotu ki taua, ne fakamaluga eiloa ne Tino A‵koga ki te Tusi Tapu a te “Pelenise o te Filemu.” (Isa. 9:6) Faitalia loa ne seki tumau a nisi tino i te sē ‵kau atu ki se feitu, ne fakatāua eiloa ne latou a te manatu tāua telā ne fakaasi mai ne te Tino Akoga ki te Tusi Tapu ko Konrad Mörtter, “Ne iloa faka‵lei ne au mai te Muna a te Atua me i te Kelisiano e se ‵tau o tatino.”—Eso. 20:13.a

I Siamani, telā e se manakogina i te tulafono ko tino ke fai ne olotou fakamasakoga ke mo a ma se ‵kau ki taua, e silia atu mo te toko 20 Tino A‵koga ki te Tusi Tapu ne ita fitifiti ma aofia i te kautau. A nisi o latou ne fai pelā me ma‵saki ki olotou mafaufau, e pelā mo Gustav Kujath, telā ne avatu ki se koga telā e tausi i ei a tino penā. A Hans Hölterhoff, telā ne ‵teke ki te fakatonuga tenā, ne ‵pei ki te falepuipui, telā ne tiaki katoatoa ei ne ia tena galuega. Ne saisai ne sotia a ia ki se gatu fai fusi ke oko loa ki te taimi ne ‵mu ei ana lima mo ana vae. Ne seki mafai o ‵fuli ne te faiga tenā a tena fakaikuga, telā ne fakasala ei ne sotia a ia ki te noua. Kae ui i ei, ne tu ‵mautakitaki eiloa a Hans ke oko loa ki te taimi ne oti ei te taua.

A nisi taina kolā ne aofia i te kautau ne seki toe ma‵nako o fakaaoga a meatau kae ne fakamolemole ke ga‵lue fua latou i ofisa.b A Johannes Rauthe se tokotasi ne fai penā, kae ne avatu ke galue i koga fai auala o tuleini. A Konrad Mörtter ne ‵tofi aka ke galue e pelā me se tino onoono ki tino ma‵saki, kae ko Reinhold Weber ne galue e pelā me se nēsi. Ne loto fiafia a August Krafzig me ne fai ne tena galuega ke sē fano a ia ki te taua. Ne fakaiku aka ne Tino A‵koga ki te Tusi Tapu konei mo nisi tino ke tavini atu latou ki a Ieova ona ko te lotou a‵lofa mo te fakamaoni.

Ona ko olotou amioga talu mai te taimi o te taua, ne fai se iloiloga e uiga ki Tino A‵koga ki te Tusi Tapu konei. I tausaga mai tua ifo, ne fakafesagai atu a Tino A‵koga ki te Tusi Tapu ki se fia afe o tagi ona ko te faiga o te lotou galuega talai. Ke fesoasoani atu ki a latou, ne fakatu aka ne se Ofisa lagolago i Siamani se matagaluega i mea tau tulafono i te Peteli i Magdeburg.

Ne gasolo malielie eiloa o fakafou te mainaga o Molimau a Ieova e uiga ki te sē kau atu o se Kelisiano ki se feitu. I te kamataga o te taua i te lua, ne tumau eiloa latou i te sē ‵kau ki se feitu mai te ‵kalo katoatoa keatea mai te aofia i kautau. Tela la, ne ‵kilo atu a te malo o Siamani ki a latou e pelā me ne fili kae fakasaua foki latou. Kae ka fakamatala fakamuli mai te mea tenei i se mataupu fakaa‵tea i te fakasologa o te vaega tenei, “Mai ‵Tou Faletusi.”—Mai ‵tou faletusi i te kogāloto o Eulopa.