Ke Ati Aka te Loto Fakafetai mō Uiga sē Fakanafagina o Ieova
1 I te ‵tou galuega talai, e uke atu ‵tou mea e fai i lō te akoako atu fua o muna‵tonu fakavae i te Tusi Tapu ki nisi tino. E fesoasoani atu tatou ke iloa ne tino a Ieova e pelā me se tino tonu kae ke ati aka foki ne latou te loto fakafetai mō ana uiga sē fakanafagina. I te taimi e tauloto ei ne tino loto fakamaoni a te mea tonu e uiga ki te Atua, e mafai o otia olotou loto kae fakamalosi atu ke fai a ‵fuliga ki olotou olaga “ke takitaki ei se olaga e aoga mō te Aliki [ko Ieova].”—Kolose 1:9, 10; 3:9, 10.
2 ‵Tou Tusi A‵koga ‵Fou: Mai te kamataga, e fakasino atu eiloa a te tusi ko te Akoakoga a te Tusi Tapu ki uiga o Ieova. E tuku mai i te mataupu muamua a tali ki fesili konei: E mata, e atafai tonu mai eiloa te Atua ki a koe?, Ne a uiga o te Atua?, kae, E mata, e mafai eiloa ne tatou o fakamasani faka‵lei atu ki te Atua? E faka‵mafa mai foki i te mataupu tenā me e tapu kae ‵malu a Ieova (pala. 10), ana faifaiga fakamaoni mo tena atafai (pala. 11), tena alofa (pala. 13), tena malosi (pala. 16), tena alofa fakamagalo, kaimalie, toka o fakamagalo, kufaki, mo tena alofa fakamaoni (pala. 19). I te palakalafa e 20 e fakatoetoe mai i ei te manatu kātoa tenā i pati konei: “Ko te momea aka o tou malamalama e uiga ki a Ieova, ko te momea aka foki o tou talitonu me e ola tonu a ia, kae ka momea aka foki i ei tou alofa mo tou masani ‵lei ki a ia.”
3 E mafai pefea o fakaaoga ne tatou a te tusi ko te Akoakoga a te Tusi Tapu ke fesoasoani atu ki ‵tou tino a‵koga ke fakapili‵pili atu ki a Ieova? Kafai ko oti ne sau‵tala ki se palakalafa telā e fakasae aka ei se uiga e tasi o te Atua, e mafai o fesili atu ki te tino akoga, “Se a te mea e fakaasi mai i te uiga tenei e uiga ki a Ieova?” io me “E fakaasi mai pefea i ei me e amanaia tonu atu eiloa a te Atua ki a koe?” Mai te faka‵sae aka o vaegā fesili penei i nai taimi o te akoga, e akoako ne tatou a ‵tou tino a‵koga ke mafaufau ‵loto ki mea kolā e tauloto ne latou kae ka fesoasoani atu foki ke gasolo aka te lotou loto fakafetai ki uiga sē fakanafagina o Ieova.
4 Ke Fakaaoga a te Pokisi o Fesili: I te fakaotiga o mataupu takitasi, ke ‵kami te tino akoga ke fakamatala mai i ana pati eiloa a manatu takitasi mai te pokisi “Mea Kolā e Akoako Mai i te Tusi Tapu.” Ke fakasino atu ki tusi siki. Ke maina koe i mea i tena loto, e mafai o fesili atu i nisi taimi penei, “Ne a ou lagonaga e uiga ki te manatu tenei e akoako mai i te Tusi Tapu?” Mai te fai penā, e se faka‵mafa fua ne koe a manatu tāua i te mataupu tenā kae ka maina ‵lei foki koe e uiga ki talitonuga ‵tonu o te tino akoga. Ka fesoasoani atu eiloa a te faiga tenei ke ati aka ne te tino akoga se fesokotakiga pili mo Ieova.