Te Galuega Telā e Sili Atu Tena Tāua
1. Ne a mea ka fai ne tatou ona ko te ‵tou loto fakafetai mō te galuega talai?
1 Kaia e fakamalosi sale mai ei ki a tatou ke fakaaoga ‵tou taimi, malosi mo kope ki te faiga o te galuega talai? Me e seai eiloa se isi galuega e sili atu tena tāua i te galuega tenei! A te lavea atu o ikuga ‵gali mai i ei ka fai ei ke momea aka te ‵tou manakoga ke ‵kau atu ki te galuega telā e se toe fai eiloa.—Galu. 20:24.
2. E mafai pefea o fesoasoani atu a te ‵tou galuega talai ke fakamaluga aka ei a te igoa o Ieova?
2 Fakamaluga Aka te Igoa o Ieova: E faka‵mafa mai i te faiga o te galuega talai me ka sui ne te Malo o Ieova e auala i a Iesu Keliso a malo katoa o tino kae aumai ne ia a faka‵leiga ki fakalavelave katoa o tino. (Mata. 6:9, 10) Ko oti ne faka‵malu a Ieova e pelā me ko te tino fua e tokotasi e mafai o faka‵sao ne ia tatou mai masaki mo te mate. (Isa. 25:8; 33:24) E tiga eiloa e folafola atu ne tatou tena igoa, e mafai ne tino kolā e ‵kilo mai ki ‵tou amioga ‵lei mo te ‵tou loto finafinau o ‵viki atu ki a ia. (1 Pe. 2:12) Ko oko eiloa i te fakamalie loto ke fakasalalau atu ne tatou i te lalolagi kātoa a te igoa o te ‵tou Aliki Sili i te lagi mo te lalolagi, ko Ieova!—Sala. 83:18.
3. Se a te fakamanuiaga ka maua ne latou kolā e tali mai mo te fiafia ki te fekau o te Malo?
3 E Faka‵sao ei a Ola o Tino: A Ieova e “se manako ke malaia se tino, tenā te pogai e fakatuai ei a ia o fakataunu ana folafolaga, ko te mea ke lava se taimi e salamo ei a tino.” (2 Pe. 3:9) Kae e aunoa mo se tino ke akoako atu ki a latou, e mafai pefea ne tino o iloa a mea kolā e mafaufau ki ei a Ieova me ne mea ‵lei io me ne mea sē ‵lei? (Iona 4:11; Loma 10:13-15) Kafai ko talia ne tino taki tokotasi a te tala ‵lei, ka gasolo aka ei o ‵lei olotou olaga me ko se fai ne latou a amioga ma‵sei. (Mika. 4:1-4) E se gata i ei, ka maua ne latou se fakamoemoega ke ola ki te se-gata-mai. A te talaiga mo akoakoga konei e fai ne tatou ka faka‵sao ne ia ‵tou ola e pelā foki mo ola o tino kolā e faka‵logo mai ki a tatou. (1 Timo. 4:16) Ko tafaga la te ‵malu o te tiute tenei ne maua ne tatou i te galuega tāua tenei!
4. Kaia e ‵tau ei o fai ne tatou a te ‵toe mea e mafai ne tatou o fai i te talaiatuga o te Malo mo te galuega ko te faiga o soko?
4 Ko pili nei o aumai fakapulele ne te fakalavelave lasi a te gataga ki te lalolagi se fai mea tonu tenei. A latou kolā e tapuaki ki a Ieova ka ola. Tela la, a te talaiga mo te faiga o soko ko ‵toe galuega eiloa e ‵tau o ‵saga fakavave ki ei, e tāua, kae e aoga i te vaitaimi tenei. Ke na fakamuamua faeloa ne tatou i ‵tou olaga!—Mata. 6:33.